बरिष्ठ पत्रकार सुरेश किरण मानन्धर मदुगु १३ दिं या पूण्यतिथिइ हेटौँडाय् शोकसभा जुगु दु। भाषा आयोगया दुजः मानन्धर वंगु फागुन २५ गते हृदयघात जुया मदुगु खः।

हेटौँडाय् नेवाः समुदायया थीथी खलः, पुचः पदाधिकारीया उपस्थितिइ शोकसभा जुगु खः। शोकसभा याये न्ह्यः हेटौँडा–२ स्थित संगमचोकय् मुनां श्रद्धाञ्जली व्यानर ज्वना हरिकुञ्जरोड, कान्तिराजपथ, बुद्धचोक, पिपलबोट चोक जुया हेटौँडा–२ स्थित मन्त्र होटलय् शोकसभा जुगु खः।

मदुम्ह मानन्धर हेटौँडा वापौ प्रकाशन यायेगु निति ज्वःमदुगु ग्वहालि यानादीम्ह खः।

जनबहाः द्यया जात्रा न्ह्याकेत आइतवाः येँ महानगरपालिकाया मुँज्या च्वंगु दु।

महानगरपालिकाया कार्यवाहक प्रमुख सुनिता डंगोलया नायःसुइ च्वंगु उगु मुँज्याय् रथयात्रा मार्ग व्यवस्थापन, धार्मिक, सांस्कृतिक तथा सामाजिक ज्याया समन्वय व सहजीकरण, सरसफाइ, शान्ति सुरक्षा, जात्राया गरिमा प्रवर्धन लगायत खँय् सहलह जुगु खः। जात्रा महानगरपालिकाया ९ गू वडात १, १९, २०, २१, २३, २४, २५, २७ व २८ सं जुइ।

सहलहया झ्वलय् कार्यवाहक प्रमुख डंगोलं, जात्रा न्ह्याकेत महानगरपालिकां बिया वयाच्वंगु ग्वहालि कथंया ध्यबा १० लखं २० लख तका थ्यंकूगु खँ कनादिसें उकिं जात्रायात भव्यता व श्रद्धालु भक्तजनपिनिगु नितिं अःपुकेत ग्वहालि जुइ धयादिल। ‘जात्राय् ब्वति कयादीपिन्सं गरिमामय उत्सवया अनुभूति याकेगु दायित्व सकलें जाना यायेमाः।’ धका धयादीगु खः।

करुणा सकलसित माः । शान्ति व सुव्यवस्था सकलसिगु चाहाना खः। थुकियात पूवंकेत झी सकलें छगू हे थासय् च्वनेगुया विकल्प मदु । जनबहाः द्यःया मूल पुजारी नापं महानगरपालिकाया पुलांम्ह वडा नायः नीलकाजी शाक्यं धयादिल, ‘थुकिया सन्देश हलिंन्यंकं छ्वयेमाः । थुकियात अपनत्व महसूस याकेत समन्वय यायेनु।’

जनवहाः द्यः जात्रा व्यवस्थापन समितिया कजि सुजीव वज्राचार्यया कथं थुगुसी चैत १२ गते केलत्वालं द्यःखः जात्रा सुरु जुइ। जनबहाःद्यःया मूर्तियात विशेष छायपिया याना जमलया तीनधाा पाठशालात न्ह्यःने दयेकातःगु रथय् बिज्याकी। अनं लिपा रथ साला न्हापांगु दिं रत्नपार्क, भोताहिति जुया असनय् तक थ्यनी।

असनय् चाान्हय् १० बजे राष्ट्रपति दर्शनया नितिं वयादीगु ज्याझ्वः दु।१३ गते बहनी ५ बजे असनं बालकुमारी, केलत्वाः, वंघः जुया हनुमानध्वाखा थ्यंकी। १४ बहनी ५ बजे हनुमानध्वाखां चिकंमुगः, जैसीदेवल, ज्यावहाः जुया लगनय् थ्यंकी। 

वरिष्ठ पत्रकार, नेपाःया साहित्यय् आधुनिक कवि नापं व्यंग्यकार व भाषा आयोगया दुजः माननीय सुरेश किरण मानन्धरया लुमन्तिइ आइतवाः कविताया लायकूया ग्वसालय् येँया मंकाः खलःया भवनय् विचाः मुँज्या जुगु दु।

उगु विचाः मुँज्याय् मदुम्ह कवि मानन्धरया हे कविता ब्वनाः विचाः हायेकेगु ज्या जूगु खः।उगु ज्याझ्वलय् नेपालभाषा एकेदेमिया चान्सलर नेवाः न्ह्यलुवा मल्ल के. सुन्दरं मदुम्ह कवि सुरेश किरण मानन्धरया व्यक्तित्वया बारे कनादीगु खःसा नेपाली भाषाया कवि अभय श्रेष्ठं मानन्धरं च्वयादीगु कविताया बारे कुलादीगु खः।

उगु ज्याझ्वलय् मञ्जु बज्राचार्य, प्रतिसरा सायमि, सुशील राजोपाध्याय, नारद बज्राचार्य, राजभाई जकःमि, मञ्जु नकःमि, रहेना नकःमि, रमि प्रिया, लक्ष्मी माली, शोभा महर्जन, बिनिता बज्राचार्य व रजनी मिलापिंसं मदुम्ह कवि मानन्धरया कविता ब्वनाः न्यंकादीगु खःसा ग्वसाः खलःया छ्याञ्जे रजनी मिलां मदुम्ह कवि मानन्धरं थीथी ख्यलय् न्ह्याकाच्वनादीगु च्वसाया संरक्षणय् थःपिंसं फुकथंया भूमिका म्हितेगु हे वय्कःप्रतिया वास्तविक विचाः हायेकेगु जुइ धयादीगु खः।ज्याझ्वलय् ग्वसाः खलःया नायः ज्योतिप्रभा तुलाधरया शोक मन्तव्य न्वकू बिनिता शाक्यं ब्वनाः न्यंकादीगु खः।

मदुम्ह सुरेश किरण मानन्धरया कवि व्यक्तित्वयात कयाः कविता लायकूया ग्वसालय् जूगु उगु ज्याझ्वलय् मानन्धरं च्वयादीगु कविता वाचन यायेगु व वय्कःया कवि व्यक्तित्वयात कयाः चर्चा यायेगु ज्या जूगु खः।मदुम्ह मानन्धरया किपातय् स्वां देछानाः छगू मिनेट मौनधारण यानाः न्ह्याःगु उगु ज्याझ्वलय् नुगः खँ तयादिसें नेपालभाषा एकेदेमिया चान्सलर मल्ल के सुन्दरं कवितापाखें नं व्यंग्य यायेफुम्ह सुरेशकिरण मानन्धर छम्ह असाधारण कवि जूगु व कवि सुरेशकिरणया पत्रकारिताया सुरुवात निसें थीथी आयामयात कयाः नुगःखँ तयादीगु खः।

येँ महानगरपालिका वडा ल्याः २७ या ग्वसालय् ‘विश्व कविता दिवस’या लसताय् कविता गोष्ठी जुगु दु।

वडा ल्याः २७ व सिर्जना कलेज अफ फाइन आट्र्सया मंकाः ग्वसालय् येँया असंत्वाःया दबुलिइ जूगु उगु कविता गोष्ठीया उलेज्या येँ महानगरपालिकाया कार्यवाहक मेयर सुनिता डंगोलं त्वाःदेवाय् मत च्याकाः उजेज्या यानादीगु खः। उगु हे ज्याझ्वलय् साहित्य व सिने अन्वेषक प्रकाश सायमिया बुदिं नं हंगु खः।

ज्याझ्वलय् येँ महानगरपालिकाया कार्यवाहक मेयर सुनिता डंगोल मूपाहाँ जुयादीगु खःसा वडा २७ या वडा नायः योगेशकुमार खड्गीया सभाध्यक्षताय् उगु ज्याझ्वः न्ह्याःगु खः।

कवि बसन्त नकःमि व घिमिरें न्ह्याकादीगु कविता गोष्ठिइ लक्ष्मी थापा, शोभा सरभ, राजेश केसी, शमशेर बहादुर न्हुछे प्रधान, मुस्कान थापा, रोशन श्रेष्ठ लगायतं कविता वाचन यानादीगु खः।ज्याझ्वलय् वडा २७ या दुजः सृष्टि कंसाकारं लसकुस नुगःखँ नापं कविता वाचन यानादीगु खःसा मूपाहाँ कार्यबाहक मेयर सुनिता डंगोलं नं नुगःखँ नापं कविता वाचन यानादीगु खः।

उपराष्ट्रपति रामसहायप्रसाद यादवयात कोशी प्रदेशया प्रमुख पर्शुराम खापुङ, बागमती प्रदेशया प्रमुख दीपकप्रसाद देवकोटा व सुदूरपश्चिम प्रदेशया प्रमुख नजिर मियां नापलानादीगु दु।

लैनचौरय् च्वंगु उपराष्ट्रपतिया ज्याकुथि वनाः वय्कःपिंसं उपराष्ट्रपति यादवयात थौं नापलानादिल। नापलायेगु झ्वलय् उपराष्ट्रपति यादव व प्रदेश प्रमुखपिंसं भिंतुना कालबिल यायेधुंकाः देय्या थौंया परिस्थिति व समसामयिक विषयतय्के महत्त्वपूर्ण सहलह याःगु उपराष्ट्रपतिया सचिवालय.धाःगु खः ।