याइगु प्रधानमन्त्री केपी शर्मा ओलीपाखें थौं मधेस प्रदेश प्रहरी ज्याकुथिया न्हूगु दयेकूगु भवनया उलेज्या याइगु ज्याझ्वः क्वःछिनातःगु दु।

जनकपुरधाम उपमहानगरपालिका–४य् थ्यंमथ्यं नीस्वंगू क्वति झिगू लख पी स्वद्वः प्यसः व न्हय्तका लागतय् प्रदेश प्रहरी ज्याकुथिया निर्माण याःगु भवन प्रधानमन्त्रीं उलेज्या यानादीत्यंगु ज्याझ्वः दूगु मधेस प्रदेश गृह, सञ्चार लिसें कानुन मन्त्रालयया प्रवक्ता गणेश नायकं धयादिल।

विसं २०८० असोज १० गते निर्माण सम्झौता जुयाः भवन निर्माण न्ह्याःगु खः।प्रधानमन्त्री ओलीं थौं हे महोत्तरीया सोनमा गाउँपालिकाय् पिच यायेत्यंगु सतकया शिलान्यास यानादीत्यंगु ज्याझ्वः तकं दूगु पूर्वाधार विकास ज्याकुथि जलेश्वरया प्रमुख राजेलाल कर्णं धयादिल। प्रदेशया भौतिक पूर्वाधार विकास मन्त्रालयया साझेदारी नापं विश्व बैंकया ऋण त्यासाय् सञ्चालित प्रादेशिक लिसें स्थानीय सतक सुधार आयोजना अन्तर्गत महोत्तरीया हुलाकी राजमार्ग रघुनाथपुर बजाः–सोनमा–तरहारी–सुन्दरपुर ब्वःया ८.३८४ किलोमिटर सतक पिच यायेत्यंगु खः।

विसं २०८३ चैत ११ गतेया दुने पूवंकेमाःगु थ्व परियोजनाया मुक्कं लागत स्वीपंगू क्वति खुइगुंगू लख न्ययद्वः खुसः व झिंखुतका क्वःछिनातःगु दु। विश्व बैंकया त्यासा ग्वाहालिं निर्माण जुइगु थ्व सतक झिंगुंगू क्वति न्हय्गू लख चय् स्वद्वः खुसः व झिंच्या तकाय् ठेक्का सम्झौता जूगु दु। थ्व योजना कथं प्रदेशया नीछगू स्थानीय तगिंया केन्द्रपिंत पक्की सतक सञ्जालनाप स्वाइगु दु।

रसुवाया गत्लाङपाखे येँ वयाच्वंगु बस उत्तरगया गाउँपालिका वडा–५ लहरेपौवाय् दुर्घटना जूगु दु।

रसुवाया पासाङल्हामू मार्ग अन्तर्गत लहरेपौवाय् बा ४ ख ८४३५ नम्बरया बस थौ न्हिनय् २ बजे दुर्घटना जुगु खः। उगु बस दुर्घटना जुगुलि सतक स्वया ३० मिटर क्वय् कुतु वःगु खः।

१२ म्ह घाःपाः जुगु दु सा छम्ह तसकं घाःपा जुगु दु। घाःपा जूपिन्त जिल्ला अस्पताल त्रिशुली वास याकाच्वंगु दु।

किपा सामाजिक संजाल

सरकारं ‘राष्ट्रिय आर्टिफिसियल इन्टेलिजेन्स (एआई) नीति, २०८२’ स्वीकृत यायेगु निर्णय याःगु दु। सञ्चार नापं सूचना प्रविधि मन्त्रालयं पेस याःगु उगु निर्णययात साउन २६ गते च्वंगु मन्त्रिपरिषद् बैठकं स्वीकृत यायेगु निर्णय याःगु खः।

सरकारया प्रवक्ता नाप सञ्चार नापं सूचना प्रविधिमन्त्री पृथ्वी सुब्बा गुरुङं थौं मन्त्रालय पत्रकार सम्मेलनपाखें ‘एआई नीति, २०८२’ स्वीकृत यायेगु निर्णय पित ब्वयादिल। राष्ट्रिय समाचार समिति (रासस)या खालि जुयाच्वंगु महाप्रबन्धक पदय् पाँचथरया सन्दिप राईयात नियुक्त यायेगु सरकारया निर्णय जूगु वय्कलं जानकारी बियादिल। सञ्चारमन्त्री गुरुङं ‘अ स्टडी टुर अन इन्टर–गर्भरमेन्टल कोअपरेसन एण्ड कम्पिटिसन इन द स्वीस फेडरल सिस्टम’ विषयया ज्याझ्वलय् ब्वति कायेत वइगु भदौ १५ निसें २१ गते तक मधेश प्रदेशया मुख्यमन्त्री सतिशकुमार सिंहया स्वीट्जरल्याण्ड भ्रमण स्वीकृत यायेगु मन्त्रिपरिषदया निर्णय जूगु धयादिल।

वइगु असोज ६ गतेनिसें १० गते तक फिलिपिन्सय् ग्वसाः ग्वइगु ‘एसिया अर्गनाइजेसन अफ सुप्रिम अडिट इन्सच्युसन्स (एएसओएसएआइ) ब्रेकिङ अप्सकल्ड एसएआइ सर्पोट (वियुएसएस) वर्कसपय् ब्वति कायेत उपमहालेखा परीक्षक बिन्दु विष्टयात स्वीकृति बिइगु, दक्षिण कोरिया सरकारपाखें गण्डकी प्राविधिक शिक्षालयया पूर्वाधार विकास परियोजनाया निंतिं वइगु ९० लख अमेरिकी डलर (थ्यंमथ्यं १ अर्ब २५ क्वति नेपाःया ध्यबा) अनुदान ग्वाहालि स्वीकृत यायेगु, न्ह्यानाच्वंगु आर्थिक दँया निंतिं ख्वातूगु वाया प्रतिक्विन्टल स्वद्वः व ४६३ तका व ८१ गः ध्यबा व मध्यम वाया प्रतिक्विन्टल स्वद्वः व ६२८ तका व ३३ गः ध्यबा न्यूनतम समर्थन मू क्वःछीगु सरकारया निर्णय जूगु प्रवक्ता गुरुङं जानकारी बियादिल। वइगु भदौ ३१ निसें असोज २ गतेतक गणतन्त्र कोरियाया सिओल सहरय् ग्वसाःग्वइगु ‘ग्लोबल इन्फास्टक्चर कोअपरेसन कन्फ्रेन्स २०२५’य् ऊर्जा, जलस्रोत नापं सिँचाइ मन्त्रीयात ब्वति कायेत स्वीकृति बिइगु, राष्ट्रिय सहकारी नियमन प्राधिकरणया खालिगु विज्ञ दुजलय् डा रमेशप्रसाद चौलागाइँ (ख्वप)यात नियुक्त यायेगु, नेपाल सरकारया नामय् दर्ता जुयाच्वंगु बाजुरा जिल्ला साविक बाँध गाविस–४ या न्हय्द्वः व  ४८५ वर्गमिटर सरकारी प्रकृतिया जग्गा प्रशासकीय भवन निर्माण यायेत हिमाली गाउँपालिका, बाजुरायात उपयोग यायेत स्वीकृति बिइगु सरकारया निर्णय जूगु मन्त्री गुरुङं जानकारी बियादिल।

वय्कःया कथं नेपाल सरकारया नामय् दर्ता श्रेस्ता जुयाच्वंगु तेह्थुम जिल्ला साविक सहकारी नापं गरिबी म्याङलुङ गाविस–९ या ०–१४–०–२ जग्गा राष्ट्रिय अनुसन्धान निवारण मन्त्रालय जिल्ला ज्याकुथि तेह्थुमया ज्याकुथि भवन निर्माणया निंतिं छ्यलेत स्वीकृति बिइगु, बाजुरा जिल्ला साविक बाँध गाविस वडा ल्याः ४ या २३०५५ वर्गमिटर जग्गा धुलाचौर स्वास्थ्य सेवा केन्द्रया भवन निर्माणया निंतिं हिमाली गाउँपालिका, बाजुरायात छ्यलेत स्वीकृति बिइगु निर्णय याःगु दु। वइगु भदौ २४ निसें २६ गतेतक फिलिपिन्सया मनिलाय् ग्वसाः ग्वइगु ‘मिनिस्ट्रियल राउण्ड टेबल, सेसन डुइरिङ द एसिया–प्यासिफिक रिजनल रोड सेफ्टी कन्फ्रेन्स’य् ब्वति कायेत भौतिक पूर्वाधार नापं यातायात मन्त्रीयात स्वीकृति बिइगु, नेपाली सेनाया छम्ह उपरथीयात वैदेशिक भ्रमण स्वीकृत यायेगु व छम्ह सहायक रथीया पदावधि थपे यायेगु, ‘स्कुल मिल्स् कोअलिसन’या ग्वसालय् ब्राजिलया फोर्टालेजाय् वइगु असोज २ निसें ३ गतेतक ग्वसाः ग्वइगु ‘सेकेण्ड ग्लोबल समिट अफ स्कुल मिल्स्’य् ब्वति कायेत शिक्षा, विज्ञान नापं प्रविधि मन्त्रालयया सचिवयात स्वीकृति बिइगु मन्त्रिपरिषद्या निर्णय जूगु वय्कलं धयादिल।

श्रम, रोजगार नापं सामाजिक सुरक्षा मन्त्रालय अन्तर्गत स्थानीय तहय् दूगु रोजगार सेवा केन्द्र राष्ट्रिय व्यावसायिक प्रशिक्षण प्रतिष्ठान (भैँसेपाटी), व्यावसायिक प्रशिक्षण केन्द्र (बुटवल) व व्यावसायिक प्रशिक्षण केन्द्र (इटहरी)या निंतिं आर्थिक दँ २०८२÷८३ य् आवश्यक जूपिं अधिकृतस्तरया न्हय्सः व २५ म्हेसिया अस्थायी दरबन्दी स्वीकृत यायेगु मन्त्रिपरिषदया निर्णय जूगु प्रवक्ता गुरुङं जानकारी बियादिल।

वइगु असोज ७ निसें १७ गतेतक क्यानडाया मन्ट्रियलय् ग्वसाः ग्वइगु ‘इन्टरनेसनल सिभिल एभिएसन अर्गनाइजेसन (आइसिएओ) या फोर्टी सेकेण्ड सेसन अफ द एसेम्बली’य् ब्वति कायेत संस्कृति, पर्यटन नापं नागरिक उड्डयन मन्त्रीयात स्वीकृति बिइगु, सार्वजनिक खरिद ऐन, २०६३ अन्तर्गत बाधा अड्काउ फुकाउ आदेश जारी यायेगु व ‘सेवा प्रदायकपाखें सार्वजनिक पूर्वाधारया सञ्चालन, व्यवस्थापन व मर्मत सेवा खरिद यायेगुसम्बन्धी निर्देशिका–२०८२’ स्वीकृत यायेगु सरकारं निर्णय याःगु वय्कलं धयादिल।

राष्ट्रिय समाचार समिति (रासस)या पुस्तकालय (लाइब्रेरी)या निंतिं फ्रिडम फोरमं थी थी १८ शिर्षकया ३१ गू सफू उपलब्ध याकूगु दु।

राससया कार्यकारी अध्यक्ष धमेन्द्र झायात थौं फ्रिडम फोरमया प्रतिनिधि मञ्जु दाहालं रासस केन्द्रीय ज्याकुथि, भ्रद्रकाली प्लाजाय् उगु सफू लःल्हानादिल। सफू लःल्हानाकयादिसें कार्यकारी अध्यक्ष झां राससयात छगू अनुसन्धान केन्द्र दयेकेगु योजना कथं पुस्तकालय तःधंकाः पत्रकारिता व सञ्चारमाध्यम सम्बन्धी सामग्री सङ्कलन यायेगु अभियान न्ह्याकूगु धयादिल। वय्कलं धयादिल, “राससया सफू सङ्कलन अभियानयात पूवंकेत सफू उपलब्ध याना बिइत थी थी मनू नापं निकाय व प्रकाशक तय्त आह्वान यानागु खः।

जिमिगु आह्वानयात स्वीकार यानाः फोरमं पत्रकारिता व सञ्चारमाध्यमलिसे सम्बन्धित महत्त्वपूर्ण सफू उपलब्ध यानाः ग्वाहालि यानादीगुलिं दाहाललिसें मुक्कं फोरम छेँजःपिंत सुभाय् बियाच्वना।” फ्रिडम फोरमया कार्यकारी प्रमुख नापं सस्थापक अध्यक्ष तारानाथ दाहालं प्रेस स्वतन्त्रता व पत्रकारितालिसे सम्बन्धित विषयगत सफू राससया निंतिं उपयोगी जुइगु चायेकाः उपलब्ध यानागु धयादिल। वय्कलं धयादिल, “३१ गू सफुली पत्रकारिता, सुशासन, पारदर्शीता, सूचनाया हकलिसें ख्यलय् जूगु थी थी अध्ययन सम्बन्धी बहुउपयोगी सफू राससया पुस्तकालयया निंतिं उपलब्ध यानागु दु।”

फोरमं ‘सर्वोच्च अदालतबाट प्रतिपादित सूचना तथा सञ्चार सम्बन्धी नजिरहरू’, ‘पत्रकारिता नीति तथा कानुन’, ‘असली समाचारः स्रोत तथा प्रशिक्षण दिग्दर्शन’, ‘नेपालमा बजेट पारदर्शीता’लिसें सफू राससयात लःल्हाःगु खः। रासस मिडिया सङ्ग्रहालयय् अवलोकनकर्तातय् आकर्षण अप्वोया वनाच्वंगु दु। मिडिया सङ्ग्रहालय सञ्चालन जुसांनिसें विज्ञ, स्वापू दूगु निकायया प्रतिनिधि, विद्यार्थीलिसेंपिंसं अवलोकन याःवयाच्वंगु दु। लिसें रासस बुखँ बुलेटिन कक्ष व पुस्तकालयप्रति पाठक, विज्ञ नापं स्वापू दुपिनि च्यूताः अप्वोया वनाच्वंगु दु।

राससं थःगु ६४ क्वःगु वार्षिकोत्सवया झ्वलय् विसं २०८१ फागुन ७ गतेनिसें ‘रासस मिडिया सङ्ग्रहालय, बुखँ बुलेटिन कक्ष’ सर्वसाधरणतय् निंतिं चायेकूगु खः। बुखँ कक्षय् विसं २०१८ फागुन ७ गतेनिसें आःतकया बुखँ सामग्री तयातःगु दु। रासस पुस्तकालयय् थ्यंमथ्यं निद्वः ताजि सफू तयेगु योजना दु। थौं पुस्तकालयय् न्हय्द्वःया लिक्क पत्रकारिता सम्बन्धी सफूत दु। रासस मिडिया सङ्ग्रहालय, रासस बुखँ बुलेटिक कक्षप्रति अवलोकनकर्तातय् न्हिया न्हिथं आकर्षण अप्वयावनाच्वंगु दु ।

राससया पुस्तकालयया निंतिं थ्व स्वयां न्ह्यः सेन्टर फर मिडिया रिसर्च, नेपालं थी थी १५ गू शिर्षकया ३० गू सफू लःल्हाःगु खः।

सरकारं नागढुङ्गा सुरुङमार्ग उपभोग यायेगु भाः क्वछिगु दु। मन्त्रिपरिषदं वःगु साउन २६ गते च्वंगु बैठकं सुरङमार्गपाखे वयेगु वनि याइगु सवारी साधनया निति भाः क्वछिगु दु।

सरकारया प्रवक्ता नाप सूचना लिसे सञ्चार प्रविधिमन्त्री पृथ्वीसुब्बा गुरुङं उगु सुरूङमार्गपाखे वयेगु वनिइगु यातायातया साधनय् ६० तका निसे ६०० तका तक दस्तुर क्वछिगु दु धका जानकारी बियादीगु खः।

नागढुङ्गा सुरुङमार्ग उपभोग दस्तुर सरकारं कार व भ्यानयात येँ वयेगु निति ६५ व वनेत ६० तका कायम याःगु दु। अथेहे मिनी बस व ट्रकया निति येँ वयेत ११५ व वनेत ८० तका क्वछिगु दु।

सरकारंं बस व ट्रक येँ वयेत २६० व वनेत २०० तका दस्तुर काइगु जुगु दु।अथेहे मेमेगु भारी उपकरण येँ वयेत ६०० व वनेत २५० तका दस्तुर कायेगु निर्णय जुगु दु धका प्रवक्ता गुरुङं धयादीगु दु।