राष्ट्रिय समाचार समिति (रासस) या नवनियुक्त महाप्रबन्धक सन्दीप राईं पदबहाली यानादीगु दु। रासस केन्द्रीय ज्याकुथि भद्रकालीइ थौं वय्कलं पदबहाली यासें पद व गोपनीयताया शपथ कयादिल। महाप्रबन्धक राईयात लसकुस यानादिल।

अथे हे, नेपाल पत्रकार महासङ्घ रासस शाखा व रासस कर्मचारी सम्बद्ध सङ्घ, सङ्गठन व युनियनया पदाधिकारी नापं प्रतिनिधिलिसें राससकःमिपिंसं वय्कःयात लसकुस यानादिल।सञ्चार नापं सूचना प्रविधि मन्त्रालयं न्हूम्ह महाप्रबन्धकया छनोट प्रक्रिया अन्तर्गत दरखास्त आह्वान यानाः आवेदकतय् कार्ययोजना प्रस्ताव प्रस्तुतिलिसें अन्तर्वार्ता समेतया आधारय् सिफारिस जुइत ताःलाःम्ह राई नेपाल सरकार मन्त्रिपरिषदया वंगु साउन २६ गतेया मन्त्रिपरिषदया निर्णयपाखें महाप्रबन्धक पदय् नियुक्त जुयादीगु खः।

पदबहालीया झ्वलय् कार्यकारी अध्यक्ष झां युवा व ऊर्जाशील व्यक्तित्व महाप्रबन्धकय् छनोट जूगुलिं लसता प्वंकादिसें राससयात च्वन्ह्याकेगु नापं बृहत्तर हितयात केन्द्रय् तयाः समन्वय व सहकार्य यानाः न्ह्याःवनीगु भलसा बियादिल। वय्कलं धयादिल, “युवा नेतृत्व वःगुलिं रासस छेँजः लसता व गौरवान्वित जू। न्हूगु ऊर्जा, जोस व जाँगर ज्वनाः नवनियुक्त महाप्रबन्धक झायादीगु दु । राससया विकास व उन्नयनया निंतिं प्रतिबद्धता ज्वनाः छधी जुइक न्ह्याःवनेनु । राससया राष्ट्रिय व अन्तरराष्ट्रिय छवियात अझ न्हूगु जालय् थ्यंकेत फयांफक्व कुतः याये।”

कार्यकारी अध्यक्ष झां कर्मठ, योग्य, इमानदार व सःस्यूम्हेसिगु नेतृत्व राससयात दूगु कनादिसें राससयात अन्तरराष्ट्रियस्तरया बुखँ समितिकथं स्थापित यायेगु अभियानय् सकलसिगु साथ व ग्वाहालि दइगु भलसा प्वंकादिल। नवनियुक्त महाप्रबन्धक राईं थःगु कार्यकालय् पारदर्शिता व निष्पक्षतायात मूल मन्त्रकथं कायेगु प्रतिबद्धता प्वंकादिल । वय्कलं राससयात ‘डिजिटाइज’ यानाः उपलब्ध स्रोतसाधनतय्त फयाफक्व अप्वः छ्यलाः अझ गतिशील व विश्वसनीय बुखँ संस्था कथं स्थापित याकेत फयांफक्व कुतः यायेगु धयादिल।

महाप्रबन्धक राईं धयादिल, “२०१८ सालय् स्थापित राससया बुलेटिन ‘मेनुअल’ रुपं दयाच्वंगु खः । थुकियात ‘डिजिटाइज’ यायेगुपाखे जिगु कुतः जुइ । राससया सुविधांजाःगु भवन दःसां नं गुलिखे खँत डिजिटाइज यायेमानिगु दु । ‘वेबसाइट, एप्स’लिसें निर्माण यानाः नेपाल सरकारया ‘डिजिटल फ्रेमवर्क’या अवधारणा अन्तर्गत नागरिक एप्सय् स्वाकेफःसा अझ अप्वः सेवाग्राही दथुइ थ्यनी।” महाप्रबन्धक राईं नेपाली भाषीतय् बाहुल्यता दुगु दक्षिण एसिया, युरोप, अमेरिकालिसें देशय् राससया उपस्थिति बल्लाकेत कुतः यायेगु धयादिल।

वय्कलं थौंकन्हय् मन्त्रालयय् दूगु रासस कर्मचारी सेवासर्त विनियमावली याकनं हयाः कर्मचारीतय् हितया पक्षय् ज्या यायेगु प्रतिबद्धता प्वंकादिल। वय्कलं अस्थायी, करार कर्मचारीतय् समस्यायात राससया आन्तरिक स्रोतया अवस्थायात ध्यानय् तयाः राससया अध्यक्ष, सञ्चालक बोर्डलिसे सहलह ब्याकाः  व्यवस्थापन यायेगु कुतः यायेगु भलसा बियादिल।राससया वरिष्ठ कार्यकारी व्यवस्थापक शीतलप्रसाद महतों व्यवस्थापन व कर्मचारीदथुइया प्रभावकारी समन्वय नापं सहकार्यय् राससया सेवायात चुस्त व प्रभावकारी दयेकेगु भलसा प्वंकादिल।

नेपालभाषा एकेदेमि व यल महानगरपालिकाया न्ह्यब्वया खःप्याखं धकाः म्हसिका दयाच्वंगु दबू प्याखंयात हाकनं न्ह्याकीगु जूगु दु। न्हापा न्हापा येँयाःया इलय् थथे खः प्याखं अर्थात् दबू प्याखं क्यनेगु चलन दुगु खःसा लिपा न्हनावंगु खः।

नेवाःतय्सं न्ह्याकाच्वंगु थज्याःगु अमूल्य धरोहरयात ल्यंकाः तयेमाः धइगु मनंतुना लोकंह्वाःगु थज्याःगु खः प्याखंयात हाकनं पुनःजीवित यायेगु कुतः जुइत्यंगु खँ आइतवाः जूगु पत्रकार सम्मेलनय् जानकारी बिउगु दु। थ्वहे खँयात वाःचायेकाः नेपालभाषा एकेदेमिं यल महानगरपालिकालिसे जानाः खः प्याखं न्ह्यब्वयेत्यंगु खः।

उगु खःप्याखं क्यनेज्या ताःलाकेया निंतिं नेपालभाषा एकेदेमिया दबू प्याखं क्यनेज्या समिति नं नीस्वंगु दु। उगु समितिया कजि विजयरत्न असंबरें न्ह्याकादीगु उगु पत्रकार सम्मेलनय् समितिया दुजः प्राज्ञ राजितबहादुर श्रेष्ठं  प्रेस वक्तव्य ब्वनाः न्यंकादीगु खः।नेपालभाषा एकेदेमिया चान्सलर मल्ल के सुन्दरं मू खँ तयादीगु ज्याझ्वलय् यल महानगरपालिकाया प्रवक्ता वडा नं ९ या वडाध्यक्ष राजु महर्जन व एकेदेमिया सदस्य सचिव महेन्द्र गोपाल कर्माचार्यं नं खँ तयादीगु खः।

नेपालभाषा एकेदेमिया ग्वसालय् यल महानगरपालिकाया आर्थिक ग्वाहालिइ खः प्याखंया प्रवद्र्धन यायेत्यंगु खः। आइतवाः ग्वसाः ग्वःगु पत्रकार सम्मेलनय् उकिया जानकारी बिउगु खः।यलया कलाकार व प्याखं च्वमिपिंत दुथ्याकाः खःप्याख क्यनेगु तयारी जुयाच्वंगु जानकारी एकेदेमिया चान्सलर मल्ल के. सुन्दरं बियादीगु खः।

खःप्याखंया निंतिं दकलय् न्हापां प्रस्ताव आह्वान यायेगु व वया लिपा उकिया मूल्यांकन यानाः खःप्याखं दयेकेगु पुचःया घोषणा यायेगु खँ नं वय्कलं कनादिल।न्हापाखुसि यलया स्वंगू दबुलीइ खः प्याखं क्यनेगु ज्या जुइ। वयां लिपा स्थानीय जनताया माग कथ मेगु थासय् क्यनेफइगु जानकारी नं चान्सलर मल्ल के सुन्दरं बियादीगु खः। पत्रकार सम्मेलन यल महानगरपालिकाया बैठक हलय् जूगु खः।

बागमती प्रदेशका मुख्यमन्त्री इन्द्रबहादुर बानियां लोकतान्त्रिक गणतन्त्रय् फुक्कं जातजातिया मातृभाषा संरक्षण यायेगु सरकारया दायित्व जूगु खँ धयादीगु दु।

३१क्वःगु तामाङ प्रशारण दिवसया अवसरय् हेटौंडाय् ग्वसाः ग्वःगु अन्तरक्रिया लिसें सिरपा इनेगु ज्याझ्वलय् मुख्यमन्त्री बानियां तामाङ भाषा, संस्कृति व परम्पराया संरक्षणय् प्रदेश सरकार प्रतिबद्ध दुगु खँ नं धयादीगु दु। मुख्यमन्त्री बानियां जाति व भाषाया नामय् राजनीति धाःसा याये मजिउगु खँ धयादिल।

जाति व भाषाया नामय् राजनीति यायेबलय् थुकिं समाजयात विभाजन पाखे यंकीगु खतरा दुगु खँ नं वय्कलं धयादिल। ज्याझ्वलय् मुख्यमन्त्री बानियां तामाङ पत्रकार संघ, बागमतीयात अक्षयकोष नीस्वनेत २ लाख तका ग्वाहालि यानादीगु दु । अक्षय कोष नीस्वनेत मुख्यमन्त्री बानियां २ लाखया चेक पत्रकार संघया प्रदेश अध्यक्ष ज्ञानेन्द्र तामाङयात हस्तारण यानादीगु खः।

मुख्यमन्त्री बानिया ‘अबु छेमबहादुर बानियाँ व दाजु राजकुमार बानियाँ’ या स्मृतिइ अक्षय कोष नीस्वनेत उगु ध्यबा बियादीगु खः। उकथं हे ज्याझ्वलय् निम्ह तामाङ पत्रकारतय्त सम्मान याःगु दु।

तामाङ डाजाङया प्रकाशक अर्जुनबहादुर तामाङ व पत्रकार भुवन घलानयात सम्मान याःगु खः। तामाङ ‘आईतेसिं–बुद्धिमाया रुम्बा स्मृति तामाङ पत्रकारिता’ पुरस्कारं सम्मानित जूगु खःसा घलान ‘तामाङ पत्रकारिता पुरस्कारं’ सम्मानित जूगु खः। सम्मान कथं तामाङयात १० हजार १ सय व घलानयात ५ हजार तका बियाः सम्मान याःगु खः।

सूचना प्रविधिमन्त्री पृथ्वीसुब्बा गुरुङं याकन हे फाइब जी (५ जी) सेवा न्ह्याइगु खँ धयादीगु दु। प्रधानमन्त्री केपी शर्मा ओली नाप थःम्हं यानागु कार्य सम्झौताय् उगु विषय दुथ्याःगु धासें उकियात कार्यान्वयन यायेगु प्रतिवद्धता प्वंकादीगु दु। तामाङ पत्रकार संघया ३१ क्वःगु प्रसारण दिवसया लसताय्् जूगु ज्याझ्वलय् वय्कलं उगु खँ धयादीगु खः। स्वनिगः व पोखराय् न्हापागु पटक फाइबजी सेवा सुरु यायेगु जानकारी नं वय्कलं बियादीगु दु।

प्रविधिइ मेमेगु देशय् यक्को ह्यूपा वयेधुंकुगु व नेपालय् फाइबजी सेवा सुरु यायेगु इलय् मेमेगु देशं ६ जी सेवा सुरु याइगु खँ नं वय्कलं धयादिल। नेपाल टेलिभिजन व रेडियो नेपाल सरकारयात स्वयां जनता प्रति जिम्मेवार दयेकेगु कथं सार्वजनिक सेवा प्रसारण (पिएसबी) या कथं सञ्चालन यानागु खँ नं वय्कलं धयादिल।

संस्थान व राष्ट्रिय समाचार समिति (रासस) याःगु पुलांगु ऐनया थासय् न्हूगु ऐन दयेका संरचनागत सुधारया कुतः मन्त्रालयं यानागु जानकारी नं बियादीगु दु। तामाङ पत्रकार संघया ३१ क्वःगु प्रसारण दिवसया लसताय् निम्ह पत्रकारयात सम्मान याःगु दु।

मूपाहाँ मन्त्री गुरुङं पत्रकार टीकाराम तामाङ (नुवाकोट) व मालती मोक्तान ‘मानवी’ (धनकुटा) हनापौ लःल्हानादीगु खः। उगु सिरपाया १० हजार १ सय तकया खः।

संघया नायः नेत्र तामाङया सभाध्यक्षताय् जूगु ज्याझ्वलय् बागमती प्रदेशया खानेपानी, सिंचाइ लिसे ऊर्जा मन्त्री कृष्णकुमार तामाङ, नेपाल तामाङ घेदुङया अध्यक्ष मोहनकुमार गोले, नेपाल आदिवासी जनजाति पत्रकार महासंघ (फोनिज) या अध्यक्ष लक्की चौधरी, प्रेस चौतारी नेपालया महासचिव हिरामान लामा, नेपाल प्रेस युनियनया सचिव लालकुमार मोक्तान, प्रेस सेन्टरया उपमहासचिव बुद्ध लोप्चन, संघया सल्लाहकार प्रतीक तामाङ नाप नेवाः पत्रकार राष्ट्रिय दबूया नायः नृपेन्द्रलाल श्रेष्ठं ब्बति काःगु खः। सरकारं २०५१ भदौ १ गते रेडियो नेपालपाखे तामाङ भाषाया समाचार प्रकाशन यागु दिंयात तामाङ समुदायं प्रसारण दिवस कथं हना वयाच्वंगु खः।

राष्ट्रपति रामचन्द्र पौडेलनाप नेपाः भ्रमणय् झाया च्वनादीम्ह भारतया विदेश सचिव विक्रम मिश्रीं राष्ट्रपति भवन शीतल निवासय् नापलानादीगु दु।

उगु झ्वलय् राष्ट्रपति पौडेलं सत्तीगु जःला खःला देय् भारतं याःगु प्रगतिपाखें नेपालं लाभ काःगु व अझं अप्वः लाभान्वित जुइ मःदूगु धयादिल। “छगू न्ह्यावनाच्वंगु अन्तरराष्ट्रिय शक्तिया कथं भारतं सामाजिक–आर्थिक व प्राविधिक ख्यलय् याःगु प्रगतिं जिपिं तसकं लय्ताना च्वना, छम्ह पासा लिसें सत्तीगु जःला खःलाया ल्याखं भारतया प्रगतिं नेपालं नं लाभ कयागु दु व अझं अप्वः लाभान्वित जुइ मःदु”, राष्ट्रपति यादवया धापूयात न्ह्यथंसें वय्कःया प्रेस सल्लाहकार किरण पोखरेलं धयादिल।

वय्कलं नेपाः व भारत दथुया सलंसः दँनिसेंया सामाजिक, सांस्कृतिक, धार्मिक, आध्यात्मिक, आर्थिक लिसें जनस्तरया सत्तीगु स्वापू दूगु खँ ल्ह्वनादिसें निगू देय् दथुया स्वापू सार्वभौमिक, समानता, मैत्रीपूर्ण ग्वाहालि, थःथवंय् सम्मान यानाः नापं विश्वासय् लिधनाच्वंगु धयादिल।“नेपालं भारतनाप स्वापूयात न्ह्याबलें उच्च प्राथमिकताय् तःगु दु, जःला खःलापिं नापया स्वापूयात विशेष महत्व बिइगु भारत सरकारया ‘जःला खःला न्हापा नीति’ या नेपाः च्वछाना च्वनी”, राष्ट्रपतिं धयादिल।

विदेश सचिव मिश्रीं भारतया प्रधानमन्त्री नरेन्द्र मोदीं जःला खःला देय् लिसेया स्वापूयात प्राथमिकताय् तयेगु नीति कथं नेपाः प्राथमिकताया धलखय् च्वये लाःगु धयादीगु प्रेस सल्लाहकार पोखरेलं धयादिल। विदेशसचिवं थःगु भ्रमणया झ्वलय् आधुनिक युगय् निगूलिं देय् दथुया प्रगति व विकासया निंतिं ‘कनेक्टिभिटी’ तब्याकेगु नापनापं थःथवंय् हित व चिउताःया विषयय् स्वापू दूपिं अधिकारीपिंनाप सहलह यायेगु ह्वःताः चुलाःगु धयादिल।