नेपालभाषा, संस्कृति व सम्पदाया संरक्षण नाप राज्यय् पहुँच व प्रतिनिधित्वया विषययात सशक्त यायेगु निति स्यस्यः समाज यलं म्हिगः शनिवाः १२ क्वःगु स्थापना दिवस हंगु दु।

नेपालभाषा जगेर्ना, संस्कृति, सम्पदाया पहिचानय् प्रवद्र्धन यायेत स्यस्यः समाज यल स्थापना जुगु खः। नेवाः समुदायय् मुख्य जातिया म्हसिका स्यस्यः समाज दुने श्रेष्ठ, मुल्मी, जोशी, प्रधान, अमात्य, नेम्कुल लगायत १ सय ७ स्वया अप्पो थर दु। ‘झी स्यस्यः, झी नेवाः, झीगु तजिलजि’ धइगु मूल नारां ज्वना थीथी ज्याझ्वः समुदाय दुने एकताया सन्देश प्रवाह यायेगु समाजया सचिव चन्द्रकृष्ण श्रेष्ठं धयादीगु खः।

सुथय् यल दरबार क्षेत्र मंगलबजारं छगु सांस्कृतिक ¥याली याःगु खः। उगु ¥यालीइ ‘संस्कृति संरक्षणय् झीगु अभियान, झीगु संस्कृति, झीगु पहिचान स्यस्यः समाज न्ह्यावलय् न्ह्यने, झीगु मूर्त, अर्मूत संस्कृति संरक्षण याये, नेवाः संस्कृतिया संरक्षण झीगु अभियान धका थी थी सन्देश दुगु प्लेकार्ड ज्वना ¥यालीइ ब्बति कागु खः।

समाजया अध्यक्ष नवीनमंगल जोशीं नेवाः समुदायया हकहित, भाषा, संस्कृति व पहिचानया संरक्षण नाप राजनीतिक अधिकार कायेगु निति समाज निरन्तर सक्रिय दु धका धयादीगु खः।

मूपाहाँ पूर्वप्रधान न्यायाधीश कल्याण श्रेष्ठं समाजं नेवाः तयेत छप्प छधीइ याना भाषा, संस्कृति व अधिकारया मुद्दाय् सशक्त भूमिका म्हित्येमाः धका बः बियादीगु खः। थुगु इलय् समुदायया मंकाः एजेण्डा नापं समृद्धि, सुशासन व विकासया निति न्ह्यावनेमाः धका धयादीगु खः। उगु ज्याझ्वलय् वरिष्ठ जलतरंग मोहनप्रसाद जोशीयात हंगु खः।

अथेहे संस्कृतिविद् छत्रबहादुर कायष्ठं च्वयादीगु नेपाःया भाषा पुलागु शब्द भण्डार संग्रहित पुलांगु खँग्व धुकु सफू न लोकार्पण याःगु खः। समाजया इलाका नं ५ पूर्णचण्डी शाखा थुगु दय् उत्कृष्ट शाखा जुगुलि शाखाया अध्यक्ष माधव मुल्मीयात रनिङ शिल्ड लःल्हागु खः।

अथेतु, समाजया थीथी ख्यलय् बालगु ज्या यापिन्त हने ज्या नाप स्यस्यः सम्मान, यशस्कर सम्मान, आजीवन सदस्य सम्मान नाप उत्कृष्ट विद्यार्थी पुरस्कार न लःल्हागु खः।

 ब्लड डोनर्स एसोसिएसन नेपाल (ब्लोदान) या ग्वसालय् ११ क्वःगु राष्ट्रिय रक्तदाता दिवस नाप हना ज्या जुगु दु।उ

गु ज्याझ्वलय् मूपाहाँ ब्लोदानया संरक्षक नाप नेपाल मिडिया एलायन्सया अध्यक्ष भाष्करराज राजकर्णिकारं छगु ज्याझ्वः दथुइ उलेज्या यानादीगु खः। वरिष्ठ सल्लाहकार नाप सल्लाहकार समितिया संयोजक सूर्यकुमारी श्रेष्ठ, नेपाल रेडक्रस सोसाइटीया महामन्त्री मीनबहादुर मल्ल, ब्लड डोनर्स अफ अमेरिका (बीडीए) या अध्यक्ष महेश्वर पन्तं नुगँ खँ तयादीगु खः। ब्लोदानया पूर्वअध्यक्ष स्व. महेन्द्र बिलास जोशीयात ब्लोदानया ज्वमदुगु योगदान यागु कदर यासे मरणोपरान्त सम्मान याःगु खः। ख्वप १ य् सांसदय् निर्वाचित जुयादीम्ह रुकेश रंजित नापं ३० गु संघ संस्थायात हंगु खः।

ब्लोदानया अध्यक्ष राजेश श्रेष्ठया सभाध्यक्षताय् जुगु ज्याझ्वलय् थीथी संघसंस्थाया प्रतिनिधि, स्वयंसेवी रक्तदाता नाप नेपाल रेडक्रस सोसाइटीया महामन्त्री मीनबहादुर मल्ल, ब्लड डोनर्स अफ अमेरिका (बीडीए) या अध्यक्ष महेश्वर पन्त विशेष अतिथि नाप ब्लोदानया संस्थापक, सल्लाहकार समितिया संयोजक नाप नेपाल रेडक्रस सोसाइटी केन्द्रीय कार्यसमितिया सदस्य सूर्यकुमारी श्रेष्ठ, ब्लोदानया संस्थापक नाप पूर्वमहासचिव भूषणलाल श्रेष्ठ, इन्टरनेसनल नेपालिज ब्लड डोनर्स एसोसिएसनया केन्द्रीय उपाध्यक्ष डा. मनिता राजकर्णिकार, ब्लोदानया निवर्तमान अध्यक्ष ई. सानुबाबु प्रजापति, परोपकार प्रसूति नाप स्त्रीरोग अस्पताल रक्तसञ्चार सेवाया प्रमुख परशुराम दाहाल, ब्लोदानया वरिष्ठ सल्लाहकार, सल्लाहकार नाप ब्लोदान जिल्ला शाखाया अध्यक्ष तयेगु ब्बति दुगु खःसा ब्लोदानया महासचिव मचाकाजी महर्जनं ज्याझ्वः न्ह्याकूगु खः।

नेपाल प्रेस युनियनया अध्यक्ष शिव लम्सालं पूर्व प्रधानमन्त्री केपी शर्मा ओली व पूर्व गृहमन्त्री रमेश लेखकयात स्पष्ट कानुनी प्रक्रिया मवसे ज्वंगुलि आपत्ति याःगु दु।

लम्सालं उगु पलाः लोकतान्त्रिक पद्धति व कानुनी राज्यया अवधारणा अःखः जुगु धका धाःगु दु। सामाजिक सञ्जालपाखे प्रतिक्रिया ब्यूसे लम्सालं कानूनया आधारबिना ज्वंगुलि लोकतन्त्र व मानव अधिकारय् न्ह्यसः वःगु दु धका धाःगु दु।

वयकलं राज्ययात ओली व लेखकया कानुनी हैसियत स्पष्ट यायेत माग याःगु खः।थज्यागु अभिव्यक्ति लिपा राजनीतिक नाप सामाजिक ख्यलय् चर्चा सुरु जुगु दु।

 नेपालं पूर्वप्रधानमन्त्री केपी शर्मा ओली व नेपाली काँग्रेसया नेता रमेश लेखकया ज्वंगुलि विरोध याःगु दु। संगठनं सरकारया उगु पलाःयात निषेधकारी व प्रतिशोधपूर्ण खः धका धासे याकन त्वःत्येत माग याःगु दु।

वक्तव्यय् भदौ २३ व २४ गतेया घटनाबारे निष्पक्ष छानबिन याये माःगु धका धासे कार्की आयोगया प्रतिवेदनया न्ह्यसः थःगु दु।

सञ्चारकःमि तयगु असुरक्षा व धम्कीयात चौतारीं च्यूता तःगु दु।प्रेस चौतारीं विधिया शासन याःगु पालना यायेमाःगु व देय् द्वन्द्वपाखे यकेगु गतिविधि दिकेत सरकारयात इनाप याःगु दु। नापं, थज्यागु ज्याय् दक्को छप्प जुइत सरोकारवाला तयेत इनाप याःगु दु।

एमाले अध्यक्ष केपी शर्मा ओलीया रिहा यायेत माग यासे एमालेया कार्यकर्ता तयेसं बबरमहलय् प्रदर्शन याना च्वंगु दु।

थौ शनिवाः न्हिनय् निसे माइतीघरय् एमाले नेता कार्यकर्ता तय्स नाराबाजी यासे बबरमहलपाखे न्ह्या वनाच्वंगु दु। बबरमहलया सतकय् प्रदर्शनकारी तय्सं टायर च्याका प्रदर्शन याना च्वंगु दु।