म्याग्दीया संस्कृतिकःमि सञ्जयकुमार श्रेष्ठयात ‘सूर्यनारायण पुरस्कार’ लःल्हाःगु दु। सूर्यनारायण पुरस्कार संस्थापाखें थौं बेनीइ ग्वसाः ग्वःगु ज्याझ्वलय् अग्रज कलाकार धनकुमारी थापा व संस्थाया नायः सुवर्णकुमार श्रेष्ठं संस्कृतिकःमि श्रेष्ठयात २५ द्वः दां व कदरपत्र लःल्हानाः दोसल्ला न्ययेकाः हनादिल।

समाजसेवी सूर्यनारायण श्रेष्ठया लुमन्तिइ वय्कःया छेँजःपिंसं स्थापना याःगु संस्थां निदँय् छकः नेपाली लोक संस्कृति, कला व साहित्यया श्रीवृद्धि यायेत योगदान ब्यूपिं म्याग्देलीपिंत उगु पुरस्कार देछाना वयाच्वंगु खः। विसं २०८२ या पुरस्कार श्रेष्ठयात लःल्हाःगु खः।मद्दिक न्यागू दशक तक म्ये, सङ्गीत व नृत्यकलाय् तसकं लगाव तयाः लिसें साहित्यया माध्यमं समाजय् बियादीगु योगदान कथं पुरस्कृत याःगु पुरस्कार छनोट समितिया कजि कृष्णप्रसाद श्रेष्ठं कनादिल।

बेनीया पुलांगु सांस्कृतिक पुचः ‘दोभान ब्यान्ड’या दुजः श्रेष्ठं न्यय्गूगु दशकय् ‘रेल पुग्यो बम्बैमा’, ‘भेट भयो सलल’य् स्वराङ्कन यायेगुलिसें ‘जिस्की नहिँड’ पपगीत एल्बम बजारय् हयादिल । सम्मान र ताली (कथा सङ्ग्रह २०७२) व तिम्रै यादमा (गीत संग्रह २०७८) पिकयादीम्ह श्रेष्ठं वंगु १२ दँ थुखे नेपाल भाषा मंका खःलः म्याग्दीया सांस्कृतिक कजिया भाला कःघाना वया च्वनादीगु खः।

पुरस्कार वितरण समारोहय् संस्थाया ख्वाःपौ ‘गङ्गा’ नंं विमोचन याःगु छ्याञ्जे अजयमिलन श्रेष्ठं जानकारी बियादिल।

च्याचाः व गुन्हुतक न्ह्याइगु ख्वपया लोकंह्वाःगु बिस्काः जात्रा शान्तिपूर्ण कथं न्ह्याकेगु निंतिं सकलें सरोकारवाला सहमत जूगु दु।

ख्वप नगरपालिकाया प्रमुख सुनिल प्रजापतिया नायःसुइ थौं च्वंगु बैठकं लोकंह्वाःगु बिस्काः जात्रा सभ्य, भव्य व शान्तिपूर्ण कथं न्ह्याकेगु निर्णय याःगु दु। उगु बैठकय् जिल्ला प्रशासन ज्याकुथि, गुठी संस्थान, ख्वप नगरपालिकालिसें सरोकारवाला निकाय निर्णयय् सहमत जूगु खः।

प्रमुख जिल्ला अधिकारी उमेशकुमार ढकालं सकसिया मंकाः ऐतिहासिक बिस्काः जात्रायात शान्तिपूर्ण कथं न्ह्याकेत सकस्यां थःथःगु थासं ग्वाहालि जुइगु कथंया भूमिका म्हितेमाःगु धयादिल।

गुठी संस्थान ख्वपया प्रमुख आनन्द कर्माचार्यं बिस्काः जात्राया आःतकया तयारीया बारे जानकारी बियादिसें भैलः व भद्रकालीया खः निर्माण न्ह्यानाच्वंगु, खः सालेगु खिपःलिसें बली बिइम्ह दुगुचालिसेंया ठेक्का बिइ धुंकूगु नापं जात्रा न्ह्याकेत थ्यंमथ्यं स्विगू लख तका मालीगु धुकुमान यानागु धकाः जानकारी बियादिल।

जात्रा थ्वहे चैत २७ गते न्ह्यानाः आः वइगु वैशाख ५ गते क्वचाइगु धयातःगु दु।

नेपाल बार एसोसिएसनं वंगु भदौ २३ व २४ या घटनासम्बन्धी जाँचबुझ आयोग, २०८२ या प्रतिवेदनप्रति असहमति प्वंकूगु दु। बारं थःगु क्षेत्राधिकार पिने वनाः आपत्तिजनक कथं न्यायालयया विषय प्रतिवेदनय् न्ह्यथंगु धासें थौं न्हिनसिया १ः३० ताः इलय् सल्लाहकार समिति बैठक नापं सःतूगु दु।

बारया महासचिव केदारप्रसाद कोईरालां राससलिसे खँल्हासें धयादिल, “न्यायालय व कानुन व्यवसायप्रति समाजय् नकारात्मक लिच्वः लाकीगु यानाः प्रतिवेदन वःगु दु, थुकी जिमिगु असहमति दु । थुकिया बारे कानुन व्यवसायी दथुइ गम्भीर सहलह जुइत्यंगु दु।”न्याय सुलभ यायेत वकिलया ‘फि’लिसें विकृति व विसङ्गति चुइकेगु लिसें न्याययात वकिलया स्वर्ग जुइकेगुपाखें बचे यायेमाःगु लिसेंया विषय प्रतिवेदनय् न्ह्यथनातःगु दु।

“सर्वसाधारणया न्यायय् पहुँच मदूगु, नेपाली नागरिकं सुलभ तरिकां न्याय काये फइगु स्थिति मदु धाइ। पहुँच व ध्यबा मदुपिनि निंतिं न्याय तापागु विषय जूगु दु। पक्षया पाखें वहस यायेमाम्ह वकिलला थुलि थिकेकी साधारण निवेदन च्वयाब्यूगु जकया नापं द्वलंद्वः कायेगु याइ” प्रतिवदेनय् न्ह्यथनातःगु दु।

प्रधानमन्त्री सुशीला कार्कीं स्वंगू महत्त्वपूर्ण दस्तावेज सार्वजनिक यायेगु निर्णय यानादीगु दु।

प्रधानमन्त्री कार्कीं भदौ २३ व २४ गतेया घटनासम्बन्धी जाँचबुझ आयोग, २०८२ या प्रतिवेदन, नेपाल बाल सङ्गठन व बालमन्दिर सम्बन्धी उच्चस्तरीय जाँचबुझ आयोग, २०७७ या प्रतिवेदन व प्रधानमन्त्री लिसें मन्त्रिपरिषदया ज्याकुथिपाखें तयार याःगु सुशासन मार्गचित्र, २०८२ सार्वजनिक यायेगु निर्णय यानादीगु प्रधानमन्त्रीया प्रेस सल्लाहकार रामबहादुर रावलं जानकारी बियादिल।

प्रधानमन्त्री कार्कीं म्हिगः भदौ २३ व २४ या घटनाया सम्बन्धय् जाँचबुझ आयोगं ब्यूगु प्रतिवेदन सङ्घीय संसद् सचिवालयया सफूकुथीइ अभिलेख तयाः सार्वजनिक यायेगु निर्णय यानादीगु खः। थ्वसिबें न्ह्यः म्हीगः (मङ्गलबाः) वय्कलं नेपाल बाल सङ्गठन व बालमन्दिर सम्बन्धी उच्चस्तरीय जाँचबुझ आयोग, २०७७ या प्रतिवेदन सङ्घीय संसद् सचिवालयया सफूकुथीइ अभिलेख तयाः सार्वजनिक यायेगु निर्णय यानादीगु खः।

अथे हे, वय्कलं वंगु चैत ३ गते प्रधानमन्त्री लिसें मन्त्रिपरिषद्या ज्याकुथिपाखें तयार याःगु सुशासन मार्गचित्र, २०८२ कार्यान्वयनया प्रक्रिया न्ह्याकेगु निर्णय यानादीगु दु। थ्व मार्गचित्र प्रधानमन्त्री लिसें मन्त्रिपरिषदया ज्याकुथिं सार्वजनिक याइगु जूगु दु।

नेपाल आयल निगमं थौ बिहीवाः चान्ह्य निसे लागू जुइगु कथं भाः थकाउगु दु।

निगमया कथं पेट्रोलय् १५ तका व डिजेल व मचिनय् १५ तका थकाउगु दु।