राष्ट्रिय स्वतन्त्र पार्टीया महामन्त्री पदं बर्खास्त जूम्ह मुकुल ढकालं अध्यक्ष रवि लामिछानेयात छानबिन याये मागु माग याःगु दु।

पार्टीं कारवाही याःगु कन्हय् कुन्ह थौ बुधवाः हे पत्रकार सम्मेलन यासे ढकालं पार्टी अध्यक्ष लामिछानेयात कयाः न्ह्यसः तःगु खः। १९ गतेया बैठकय् म्हुतुइ हाकुगु टेप तयाः च्वनेगु थःगु कमजोरी जुइफुगु खँ वय्कलं कनादिगु दु।

अध्यक्ष लामिछानेयात तसकं असन्तुष्ट जुयाः वय्कलं सहकारी ठगी प्रकरणया छानबिन यायेत माग न यानादीगु खः। वंगु इलय् सर्वोच्च अदालतं लामिछानेयात कयाः छानबिन जुइमाः धकाः धाःगु खः, “थुकियात कयाः रास्वपाया बिचाः छु दु?” पार्टीं छगू स्वतन्त्र छानविन समिति नीस्वनेमाः।

थज्याःगु समितिइ च्वनीपिं मनूत राजदूत ल्ययेगु थेंज्याःगु हे प्रक्रियां च्वनिपि माः धका धयादीगु खः।वय्कलं थम्हं जनताया खँ ल्हायेबलय् कारवाही याःगु व वइगु महिनानिसें प्रस्ताव यात्रा न्ह्याकेगु व जनतायात गुकथं वनेगु धकाः न्यनेगु जुइ धका धयादीगु दु।

नागरिक उन्मुति पार्टी (नाउपा) न सरकारयात बियातःगु समर्थन लित काःगु दु। नाप प्रधानमन्त्री पुष्पकमल दाहाल प्रचण्डं थ्व हे वइगु असार २८ गते विश्वासया मत काइगुलि मत मबिइगु निर्णय नं याःगु दु।

नाउपाया प्रतिनिधिसभाय् प्यम्ह सांसदपि दु। न्हापांनिसें प्रधानमन्त्री प्रचण्डयात समर्थन याना वयाच्वंगु खः। कांग्रेस व एमालेया न्हूगु गठबन्धनयात समर्थन यायेगु निर्णययासे प्रचण्ड सरकारयात बियातःगु समर्थन लित कायेगु धका छम्ह नेतां धाःगु दु।

एमालें पार्टीया सकल केन्द्रीय दुजःपिन्त थःगु हे भूगोलया जिम्मेवारीइ लित छ्वयेगु निर्णय याःगु दु। पार्टीया सकल केन्द्रीय दुजःपिन्त थःथःगु भूगोलं पिने जिम्मेवारी ब्यूगु दु।

उपमहामन्त्री प्रदीप ज्ञवालीं बुधवाः एमाले सचिवालयं थःगु हे भूगोलया जिम्मेवारीइ लिहाँ वनेगु निर्णय याःगु उपमहासचिव ज्ञवालीया कथं आः न्हूगु कार्यविभाजनया आधार केन्द्रीय दुजःपाखें जुइगु जानकारी बियादीगु दु।

प्रतिनिधिसभा व प्रदेशसभा निर्वाचन क्षेत्रया दकलय् च्वय् च्वंगु इकाइया रुपय् इन्चार्ज जुइगु, अले जिल्ला वा प्रदेश नं थःम्हं कायेफइगु।

वय्कलं दकलय् आधारभूत इकाइ निर्वाचन क्षेत्र समन्वय समिति (क्षेत्र)या आधारय् ज्या विभाजन यायेगु जानकारी बियादिगु खः। वंगु दँय् हे पार्टीया दक्वं केन्द्रीय दुजःपिन्त थःथःगु भूगोलं पिनेया जिम्मेवारी बिइगु निर्णय जुगु खः।

परराष्ट्र सचिव सेवा लम्साल थौं बुधवाः भारत वनेत्यंगु दु।

सचिव लम्साल आइतवाः व शुक्रवाः न्हू दिल्लीइ जुइगु निक्वःगु बिमस्टेक मन्त्रीस्तरीय बैठकय् ब्वति कायेगु निति थौं भारत वनेत्यंगु खः।

परराष्ट्र मन्त्रालयया कथं वय्कलं नेपाःया प्रतिनिधिमण्डलया नेतृत्व यानादी। उगु बैठकय् क्षेत्रीय सहकार्य, समन्वय, सहकार्य आदि विषयस सहलह जुइगु खँ धाःगु दु।

बिमस्टेकय् ब्वति काइपिन्सं भारतीय प्रधानमन्त्री नरेन्द्र मोदीलिसे नं सहलह याइगु ज्याझ्वः दु।वयकःपि शनिवाः लिहाँ वइगु ज्याझ्वः दु।

नेकपा एमालें प्रधानमन्त्रीयात विश्वासया मत प्रस्तावया विरुद्ध मतदान यायेत ह्वीप जारी याःगु दु।

एमालेया प्रमुख सचेतक महेश बर्टौलां प्रधानमन्त्रीया प्रस्ताव विरुद्ध मतदान यायेत थः सांसदपिन्त ह्वीप जारी याःगु दु।

प्रधानमन्त्री प्रचण्डं थ्व हे वइगु शुक्रवाः २८ गते विश्वासया मत कायेगु तयारी याःगु खः।