Display Style:
Column Style
किपू नगरपालिका वडा न १ वडाध्यक्ष हिरालाल महर्जन मन्त
लहनान्युज | सिल्लागा द्धादशी ११४४, फागुन २४ बिहीवाः
किपू नगरपालिका वडा नम्बर १ या वडाध्यक्ष हिरालाल महर्जन मन्त। क्यान्सर ल्वचं पीडित जूयाच्वम्ह महर्जन थौ चान्ह्यः वयकःया हे छेँय् मदुगु खः।
अस्पतालं महर्जनलयात म्हिगः हे छेँय् हःगु खः। वडाध्यक्ष महर्जनया पार्थिव शरीर थौ किपू नगरपालिकाया कार्यालयय् श्रद्धाञ्जली बिइगु निति तइगु जुगु दु।
६० दँ दुम्ह वयकः महर्जन २०७९ य् नेपाली कांग्रेसपाखे किपू कीर्तिपुर नगरपालिका वडा नम्बर १ या अध्यक्षय् निर्वाचित जूगु खः।
राष्ट्रिय खड्गी समाज कास्कीया प्यक्वःगु तःमुँज्या क्वचाल
लहनान्युज | सिल्लागा एकादशी ११४४, फागुन २३ बुधवाः
नेपाल राष्ट्रिय खड्गी समाज जिल्ला समिति कास्कीया प्यक्वःगु तःमुँज्या क्वचाःगु दु। उगु ज्याझ्वलय् समाजया केन्द्रीय उपाध्यक्ष अरोजकुमार शाही मूपाहाँ कथं झायादीगु खःसा नेवाः खलः कास्कीया अध्यक्ष अशोक पालिखे, पोखरा मनपा १ वडाया अध्यक्ष साहारा प्रधान विशेष पाहाँ कथं झायादीगु खः।
कास्की जिल्ला समितिया अध्यक्ष हर्खमान शाहीया अध्यक्षताय् जूगु उगु ज्याझ्वलय् जिल्ला सचिव विजय शाहीं न्ह्याकादीगु ज्याझ्वलय् मिलन शाहीं संगठनया बारे खँ तयादीगु खः। ज्याझ्वलय् कास्कीया थीथी संगठनया प्रतिनिधिपिंसं भिंतुना न्वचु बियादीगु खः।
खड्गी समाज कास्की जिल्लाया ज्याथःपिं दुजःपिं लिसें भेट्रान धावक आइलाल शाही, २०७७ निसें २०७९ तकया दुने एसईई पास यानादीपिं संगठनया दुजःपिनि मस्त व संगठनया आर्थिक ग्वाहालि यानादीपिंत सम्मान नं याःगु खः।
ज्याझ्वलय् थीथी सांस्कृतिक ब्वज्या नं जूगु खः । तःमुँज्यां विकल शाहीया अध्यक्षताय् न्हूगु कार्यसमिति नं ल्यःगु दु। न्हूगु कार्यसमितिइ निर्मल खड्गी, सेते शाही, जगत लाल शाही व आनन्द शाही उपाध्यक्ष, बिजय शाही महासचिव, श्याम शाही उप महासचिव, आईलाल शाही सचिव, कृष्णलाल शाही कोषाध्यक्ष, सरिता साही सह–कोषाध्यक्षय् ल्यःगु खःसा यम बहादुर शाही, राज कुमार शाही, राममाया शाही, नुन कुमार शाही, कृष्ण खड्गी, तिर्थमाया शाही, पूर्णसिं खड्गी, सानु शाही व बिष्णु वmुमार खड्गीयात दुजलय् ल्यःगु खः।
‘यल इतिल्हन सम्यक महादान पर्व’ तःजिक हनिइगु
लहनान्युज | सिल्लागा एकादशी ११४४, फागुन २३ बुधवाः
गोल्डेन टेम्पल नामं हलियकं म्हसिगु हिरण्यवर्ण महाविहार, क्वाबहाःया ग्वसालय् थ्व हे वइगु फागुन ३० निसे चैत्र १ गतेतक ‘यल इतिल्हन सम्यक महादान पर्व’ ज्याझ्वः जुइगु दु।
‘दिपंकर पर्व’ या नामं नांजागु उगु पर्व हिरण्यवर्ण महाविहारया स्वर्ण देगः स्थापना याम्ह जुजु भाष्करदेवया सन्तान भलिभारों ‘त्रिरत्नया आशिषं धन वःगु धका बुद्धप्रति कृतज्ञ जुया श्रद्धा नाप दानया उद्देश्यं थीथी विहारया दिपंकर बुद्ध, तारा लगायत मेमेपि द्यःपि, श्रामणेर, ब्रम्हचर्य भिक्षु, शाक्यभिक्षु व बज्राचार्यपिन्त ब्बना सम्यक महादान पर्व याइगु धापू दु।
फागुन ३० गते यलया मू झिच्यागु विहारनापं चापागाउँ, बुंगमति, किपू, येँं, यल, ख्वपया महाविहारपाखे दिपंकर बुद्ध, आर्यतारा लिसे मेमेपि द्यः यलया लाय्कूलि मूनिगु ज्याझ्वः दु। ३० गते बहनि ७ बजे मुनां चान्ह्य ९ बजे बाजं थाना ज्येष्ठवर्ण महाविहार तंगःबहालय् वना बसुन्धरा द्यःयात जात्रा याना यलया लायकूलि हया दक्को दिपंकर बुद्ध व मेमेपि द्यःपि मंगलबजारं नागबहालय् हइ।
सम्यक महादान जुइगु थाय् नागबहालया लुँखाय् लसकुसयाना दुकायेगु याइ।
चैत्र १ गते अथेधायेबलय् सम्यक महादानजुइगु दिंखुन्हु सुथसिया ४ बजेनिसें न्हिनसिया १ बजेतक श्रद्धालु भक्तजनपिंपाखेंविराजमान दिपंकर बुद्ध व.मेमेपिं द्यःपिनिगु पूजा व दर्शन याकेगु, नागबहाः ल्वंहितिछचाःखेरं विशालरुप धाः व बाँसुरी बाजा ब्वज्या जुइसा थुबले हे थुगु पर्वया नितिंअक्षयकोष नीस्वनादीगुलिं यल महानगरपालिकायात हनेगु ज्याझ्वः नं दुगु जुल ।
न्हिनसिया २ ताः इलंनिसें ४ ताःईतक भूमिशोधन पूजालिसें दान बीगु ज्या जुइसा सनिलया ५ ताः इलय् दिपंकर बुद्धव मेमेपिं द्यःपिं थःथःगु विहारय् लिहां बिज्याकीगु ज्याझ्वः दुगु जुल ।
परन्तुतक थुगु पर्व न्ह्यानाच्वनेमाधकाः गुथि स्वनाः आयस्था तयाः भलिभारो परिवारं न्ह्याकूगु थुगु परम्परा ७७३ दँनिसें न्ह्यानाच्वंगु जुल । वि.सं. १८६१ तक दँदँपत्तिं न्ह्यानाच्वंगु थुगुपर्व उबलेया जुजु रणबहादुर शाहं सम्यक गुथिया जग्गा अधिकरण यानाः कासेंलि आयस्थामगानाः प्यदँतकया आयस्था मुंकाः प्यदँ फुनाः न्यादँ क्यनेवं थुगु पर्व यायेगु परम्परान्ह्याःगु खः ।
बुधवाः जूगु पत्रकार सम्मेलनय्जानकारी ब्यूकथं यलया नागबहालय् जुइगु थुगु पर्वया नितिंसम्यक भुतूपुज्यानाः सम्यक मरी छुइगु, नागबहाललय् प्रतिस्थापित बासुकी व चम्पक नागराजयागु प्राणप्रतिष्ठा लिकायेगु ज्या जुइधुंकूगु दुसा फागुन २४ गते यःसिं थनाः हलिपताःब्वयेकेगु, फागुन २८ गते हिरण्यवर्ण महाविहारया दशपारमिता आःजु व विसपारमिताआःजुपिंनाप ग्वसाः खलः सकलें बाजं थानाः सम्यक महादानया ब्वना ब्यूवनेगु ज्याल्यंदनि ।
सुयां नुगलय् मस्याक्क, सकसितलय्ताय्काः थःम्हं कमय् यानागु धन, शुद्ध मनं, निस्वार्थ रुपं दान यायेगु सम्यक सम्बोधियाबोधिसत्व मार्ग खः । सम्यक महादान धइगु हे दानपारमिताया अभ्यास खः ।
न्हुपि मन्त्रीपिन्स शपथ ग्रहणयात
लहनान्युज | सिल्लागा एकादशी ११४४, फागुन २३ बुधवाः
न्हुपि मन्त्रीपिन्स पद व गोपनीयताया शपथ काःगु दु। प्रधानमन्त्री पुष्पकमल दाहाल प्रचण्डं बुधवाः नेकपा एमाले, नेकपा माओवादी केन्द्र व राष्ट्रिय स्वतन्त्र पार्टीया नेतापि दुथ्याका मन्त्रिपरिषद् विस्तार याःगु खः।
न्हुपि मन्त्रीतय्स राष्ट्रपति भवन शीतलनिवासय् राष्ट्रपति रामचन्द्र पौडेलपाखे शपथ काःगु खः। प्रधानमन्त्रीया सचिवालया कथं एमालेया च्याम्ह, माओवादी केन्द्रया न्याम्ह व राष्ट्रिय स्वतन्त्र पार्टीया प्यम्हयाना मन्त्रिपरिषदय् १८ म्ह दुजः थ्यःगु दु।
सरकारय् एमालेपाखे नेतृत्वयासे सचिव रघुवीर महासेठ उपप्रधानमन्त्री लिसे भौतिक पूर्वाधार मन्त्री जुगु दु। अथेहे पदम गिरी कानुन, न्याय लिसे संसदीय मामिला, हरि उप्रेती रक्षा, भगवती चौधरी महिला, बालबालिका लिसे ज्येष्ठ नागरिक मन्त्रालय व राजेन्द्र राई न खानेपानी मन्त्रालयया जिम्मेवारी काःगु दु।
अथेहे दामोदर भण्डारीं उद्योग, वाणिज्य लिसे आपूर्ति, ज्वालाकुमारी साहं कृषि लिसे पशुपक्षी व बलराम अधिकारीं भूमि व्यवस्था, सहकारी व गरिबी निवारण मन्त्रालयया जिम्मेवारी काःगु दु। नेकपा माओवादी केन्द्रपाखे नारायणकाजी श्रेष्ठ उपप्रधानमन्त्री लिसे परराष्ट्रमन्त्री व वर्षमान पुन अर्थमन्त्री जुगु दु।
शक्तिबहादुर बस्नेत ऊर्जा, जलस्रोत लिसे सिंचाइमन्त्री, रेखा शर्मा सञ्चार लिसे सूचनाप्रविधि व हितबहादुर तामाङ संस्कृति, पर्यटन लिसे नागरिक उड्डयनमन्त्री जूगु दु।
राष्ट्रिय स्वतन्त्र पार्टीया सभापति रवि लामिछाने उपप्रधानमन्त्री लिसे गृहमन्त्री जुगु दु। डीपी अर्याल श्रम, रोजगार लिसे सामाजिक सुरक्षा मन्त्री, विराजभक्त श्रेष्ठ युवा लिसे खेलकुद व सुमना श्रेष्ठ शिक्षा, विज्ञान लिसे प्रविधि मन्त्री जूगु दु।
एमालपाखे च्याम्ह मन्त्री जुइगु
लहनान्युज | सिल्लागा एकादशी ११४४, फागुन २३ बुधवाः
नेकपा एमाले न मन्त्री जुइपिनिगु नां क्वछिउगु दु। सत्ता गठबन्धनया नेतातय्स मन्त्रालय बाँडफाँट याये धुका एमालें मन्त्रीपिनिगु नां क्वछिउगु खः।
सरकारय् एमालेयात च्याःगु मन्त्रालय दइगु जुगु दु। सरकारय् पार्टीया नेतृत्व सचिव रघुवीर महासेठं याइगु जुगु दु । महासेठं उपप्रधानमन्त्री लिसे भौतिक पूर्वाधारमन्त्री जुइगु दु।
पदम गिरीं धासा मन्त्री पदया शपथ कायेधुकुगु दु। आः दामोदर भण्डारी, हरि उप्रेती, भगवती चौधरी, राजेन्द्र राई, ज्वालाकुमारी साह व बलराम अधिकारीपि मन्त्री जुइगु दु।
