नेपाल टेलिकमं ग्राहक सेवाय् सुधार यायेगु तातुनां रोबोट प्रविधिया छ्यलेज्या न्ह्याकूगु दु। सुन्धाराय् च्वंगु टेलिकमया ज्याकुलय् थौं ‘एआई ज्याक’ नांया रोबोट सेवा न्ह्याकूगु ज्याकुया प्रमुख दिनेशचन्द्र पन्थीें कनादिग दु।

वय्कःया कथं ज्याकुथि न्हियान्हिथं निसःनिसें स्वसःतक सेवाग्राही वयाच्वंगु दु। माक्वः जनशक्ति मदूगुलिं याकनं याकनं सेवा बिइत थाकुया च्वंगु खः। “आः धाःसा रोबोटं अप्वः ज्या अपुक्क हे यानायंकीगु अपेक्षा कयागु दु”, वय्कलं धयादिल, “सामान्य न्यनेकने नं निसें एनटिसी सेवाया खुसःति ग्राहकतय्सं न्ह्यसःया लिसः रोबोटपाखेँ न्यने खनी।

” रोबोट सेवायात अप्वः प्रभावकारी दयेकेत न्हुगु प्रणाली जडान यायेगु योजना दूगु धका प्रमुख पन्थीं धयादिगु दु। रोबोटं सेवाग्राहीया एनटिसीया विषयय् न्यंनातःगु लिसःया न्ह्यसः बिइ।

नापं छुं सेवा कायेमाःसा गुगु शाखाय् वनेगु धयागु नक्शा विवरण नं रोबोटं बिइ। प्रमुख पन्थीें विदेशीतय्त नापं सुविधा बिइगु आज्जुं रोबोटय् अङ्ग्रेजी व नेपाली भाय्या सेवाया व्यवस्था यानातयागु धयादिगु दु।(रासस)

न्हापाया सभामुख दमननाथ ढुङ्गाना थौं मन्त। बानेश्वरय् च्वंगु फ्रन्टलाइन अस्पतालय् वासः यायेगु झ्वलय् ८३ दँया वैसय् न्हिनसिया १ः३० ताःइलय् मदूगु ढुङ्गानाया स्वकीय डा रुद्र शर्मां धयादीगु दु।

वरिष्ठ अधिवक्ताया नं जुयादीम्ह वय्कः छुं ई न्ह्यःनिसें स्येँया ल्वचं म्हंमफया च्वंगु खः। विसं २०४८ य् येँ क्षेत्र नं २ नं नेपाली कांग्रेसपाखें प्रतिनिधिसभाय् त्याकादीम्ह वय्कः २०४८ निसें २०५१ तक्क सभामुख जुयादीगु खः।

वय्कया जहान, निम्ह काय् व छम्ह म्ह्याय् दी। मदुम्ह ढुङ्गानाया अन्त्येष्टि कन्हय् जुइ।

येँ महानगरपालिका १८ वडाया ग्वसालय् निन्हुयक छातीया एक्सरे परिक्षण शिबिर जुगु दु। कार्तिक २९ गते व ३० गते निन्हुयक उगु शिबिर जुगु खः।

कार्तिक २९ गते जुगुलि २७५ म्हेसिया परिक्षण याःगु खःसा ३० गते जुगुलि ५१८ म्हेसिया परिक्षण याःगु खः।

येँ महानगरपालिका १७ वडाया ग्वसालय् एसईई ताःपिन्त हने ज्या जुगु दु। ८१ सालय् १७ वडापाखे ३३ म्ह एसईई ताः लापिन्त छगु ज्याझ्वः दथुइ मूपाहाँ सृजना सिंहपाखे हनापौ लःल्हानादीगु खः।

अथेहे १७ वडाय् च्वपिन्त कासामि नाप समजासेविपिन्त न हनेज्या जुगु खः। उगु ज्याझ्वलय् टेबुलटेनिसया निम्ह कासामि, कराटेया छम्ह व बास्केबलया छम्ह कासामि नाप निम्ह कानून ब्यवसायी, समाजसेवि रबि बिक्रम राणा व पुर्व वडाध्यक्ष बद्रीनारायाण मानन्धरयात हने ज्या जुगु खः।

येँ महानगरपालिका १७ या वडा अध्यक्ष नबिन मानन्धरं १७ वडा दुने च्वपि एसईई नाप थीथी ख्यलय् योगदान यानाच्वपिन्त हने ज्या यानागु धका धयादीगु खः।

अथेहे सम्मान ज्याझ्वः लिपा नागरिक सुनुवाई ज्याझ्वः न जुगु खः।

ताम्रकार कुलदेवता उग्रचण्डी संरक्षण समिति, ताम्रकार समाज यलं नेपाल संवत ११४५ या लसताय् भिंतुना कालबिल व कौला ज्याझ्वः याःगु दु।

उगु ज्याझ्वलय् बागमती श्रम लिसे रोजगार मन्त्री प्रेमभक्त महर्जन, संघिय सांसद प्रेम महर्जन, बागमती प्रदेशया सांसदपि रामेश्वर श्रेष्ठ, रघुभक्त महर्जन, यल महानगरपालिकाया कार्यवाहक मेयर मंजली शाक्य, न्हुदँ राष्ट्रिय समारोह समिति ११४५ या नायः राजेन्द्र श्रेष्ठ नाप पत्रकार व समाजसेविपिनिगु ब्बति दुगु खः।

समाजया नायः बिनोद ताम्रकारया सभाध्यक्षताय् उगु ज्याझ्वः जूगु खः।