संस्कृति, पर्यटननापं नागरिक उड्डयन मन्त्री बद्री पाण्डें विविधतां जाःगु कला व संस्कृतियात हलिंन्यंक प्रचार यायेमाःगु खँय् बः बियादीगु दु।

यल संग्रहालयया २७ क्वःगु दँ मुँज्याझ्वलय् मन्त्री पाण्डें विविधतां जाःगु कला व संस्कृतियात हलिंन्यंक प्रचार यानाः छकः नं नेपाः मवःपिं मनूतय्त खुला सम्पदाया देशय् वनेमाः धइगु भावना ब्वलंकेमाः धकाः धयादिल।

मन्त्री पाण्डें थथे धयादिल, “झीगु गौरवत सङ्ग्रहालय दुने जक लिकुंनाच्वंगु मदु, झीथाय् च्वापुगुँ, हाकुगुँ व तराईलय् विविधतां जाःगु कला दु, विश्वय् च्याद्वः मिटरसिबें तजाःगु च्वापुगुँत थन दु, थुगु खँयात हलिंन्यंक च्वंपिं मनूतय्त सिइके बिइमाः,” वय्कलं नेपाःया सर्गः सुरक्षित व गतिशील दु धइगु नं प्रत्याभूति यायेमाःगु भाला दु धासें मन्त्रालयं उकी तदारुकता कथं वनावच्वंगु खँ कनादिल। भुखाचं क्षति याःगु संरचनात गथे खः अथे हे दयेकूगु खँ कँसें मन्त्री पाण्डें पुरातात्विक ल्याःखँ झीगु कला संस्कृतियात न्हू दयेकूगु संरचनां थातं तःगू दु धकाः धयादिल।

संस्कृति महाशाखाया प्रमुख सुरेश सुरज श्रेष्ठं थी थी विषयया संग्रहालययात कःघानाः व व्यवस्थित यायेमाः धैगु तातुनाः सङ्ग्रहालय ऐन दयेकेगु कुतः जुयाच्वंगु धकाः धयादिल। पुरातत्व विभागया महानिर्देशक सौभाग्य प्रधानं सङ्ग्रहालयलिसे सम्बन्धित सामग्रीया मुँज्या, ब्वज्या, सुरक्षा यायेगु ज्या, सूचं न्यंकेगु, अध्ययन अनुसन्धानया ज्या व्यवस्थित यानाः राजस्व म्हयेगु ज्या यानाच्वंगु धासें यल लाय्कू सङ्ग्रहालयात च्वछाया दिल।

यल लाय्कू सङ्ग्रहालयया कार्यकारी निर्देशक मञ्जुसिंह भण्डारीं मल्लकालीन, शाहकालीन व राणाकालीन सम्पदाया विशिष्टतां यानाः सन् १९७९ य् विश्व सम्पदा धलखय् लायेत ताःलाःगु खँ कनादिल। ज्याझ्वलय् संस्कृति पर्यटननापं नागरिक उड्डयन मन्त्रालयया छ्याञ्जे व पाटन सङ्ग्रहालय विकास समितिया नायः डा गणेश प्रसाद पाण्डेय, प्रतिनिधिसभाया सदस्य उदयशम्शेर राणा, प्रेमबहादुर महर्जन यलया थी थी ज्याकुथिया प्रमुखलिसें प्रतिनिधितय्सं नं ब्वतिकयादीगु खः।

उपप्रधानमन्त्रीनापं सहरी विकास मन्त्री प्रकाशमान सिंहं राजनीतिक स्थिरताया लागि आःया सरकार निस्वंगु खः धयादिउगु दु।

नेपाली कांग्रेस चितवनं ग्वसाः ग्वःगु स्वन्ति विशेष ज्याझ्वलय् राजनीतिक स्थिरता व स्थायित्व बियाः जनतायात समस्यापाखें याकनं मुक्त यायेत आःया सरकार न्ह्यब्वाय् धुंकूगु धयादिल। सरकार ताःईतक म्वाकाःतयेत नं आःया गठबन्धन जूगु वय्कःया धापू दु। उपप्रधानमन्त्री सिंहं धयादिल, “विधिया शासन कायम यायेत जिमिगु कुतः जुयाच्वनी।” ब्यागलं प्रसंगय् वय्कलं कांग्रेसयात केन्द्रय् तयाः न्ह्यावनेमाःगु खँय् बः बियादिल।

उपप्रधानमन्त्री सिंहं थथे धयादिल, “पार्टी स्वयां नं मनू व पुचःयात महत्व बिइबलय् झीपिं वनेमाःथाय् थ्यंनीमखु। पार्टी दुनेया हाथ्या धैगु व्यवस्थापन हे खः।” नेपाली कांग्रेसया नेतृत्वपाखें पितब्यूगु सङ्घीय लोकतान्त्रिक समावेशी संविधानया भावना व मर्मकथं उकियात आखः ग्वपतिं पालना यानाः उकिया लिधंसाय् राजनीतिक स्थायित्व दयेकाः विकासयात नापं यंकेमाःगु खँ वय्कलं धयादिल।

नेपाली कांग्रेस चितवनया सभापति राजेश्वर खनालं क्रान्तिकारी ह्युपाःपाखें राज्ययात न्हू ढंग न्ह्याकेत कांग्रेस सक्षम जू धकाः धयादिल। उकिया लागि दक्व छप्पँ छधीः जुयाः न्ह्याः वनेमाः धकाः वय्कलं छ्याता नं बियादिल। उगु झ्वलय् नेपाली कांग्रेस चितवनया उपसभापति राजीव न्यौपाने, मिसा विभाग सदस्य कलावती भट्टराईपिंसं नं थः थःगु धारणा तयादिइगु खः।

न्याय परिषद वइगु मङ्सिर १६ गते जुइगु उपनिर्वाचनया नितिं मू निर्वाचन अधिकृत व निर्वाचन अधिकृततयेगु नां सिफारिस याःगु दु।

परिषदं ३१ गू जिल्लाय् मू निर्वाचन अधिकृत तोकेयायेत निर्वाचन आयोगस नां सिफारिस याःगु खः। परिषदं न्हू गठन जूगु उपभोक्ता अदालतया न्यायधीशय् जिल्ला अदालत येँया न्यायधीश रामप्रसाद शर्मा व दुजलय् गेहेन्द्रराज रेग्मीयात तोके यायेत नं सिफारिस याःगु दु।

जिल्ला न्यायाधीतयेत मू निर्वाचन अधिकृत कथं ल्यःगु दु। अथे हे खुगू स्थानीय तहलय् निर्वाचन अधिकृत खटेयायेत नं परिषदं सिफारिस याःगु दु।

१४ दँ स्वयां क्वंपि मस्तय् क्यान्सरया उपचार सित्तिकं याइगु सरकारी अस्पतालय् १४ दँ स्वयां क्वंपि मस्तय् क्यान्सरया उपचार सित्तिकं याइगु जूगु दु।

स्वास्थ्यनापं जनसङ्खया मन्त्री प्रदीप पौडेलं मन्त्रीस्तरीय निर्णय याःकथं कान्ति बालअस्पताल, येँ, ख्वप क्यान्सर अस्पताल, ख्वप व बिपी कोइराला मेमोरियल क्यान्सर अस्पताल, भरतपुरय् निःशुल्क उपचार याइगु जूगु दु। थ्व हे मंसिर १ गतेनिसें निर्णय लागु जुइकथं व्यवस्था जूगु स्वास्थ्य मन्त्रालयं धाःगु दु। मन्त्री पौडेलं पदय् च्वसांनिसें मस्तय्त क्यान्सर उपचार सेवा निःशुल्क यायेगु कुतः यानाच्वनादीगु खः।

सरकारं दक्व मनूतय्त उपचार यायेत बिइगु ध्यबा मगाःत धाःसा मन्त्रालयया आन्तरिक स्रोतपाखें व्यवस्थापन याइगु खँ प्रवक्ता डा. प्रकाश बुढाथोकीं कनादिल। नेपालय् सीपिनिगु ल्याःमध्ये ७१ प्रतिशत सरे मजुइगु ल्वचं कयाःसिनाच्वंगु दु। उकिसनं ११ प्रतिशत क्यान्सरं सिनाच्वंगु खँ मन्त्रालय अन्र्तगतया इपिडिमियालोजी व रोग नियन्त्रण महाशाखापाखें पिकाःगु तथ्याङ्कय् न्ह्यथनातःगु दु।

थन सन् २०२२ य् २२ द्वः न्हूपिं ल्वगित खने दूगुलिइ १४ द्वः सिबे अप्वः मनूत सीगु दु। नेपालय् दँय्दसं थ्यंमथ्यं द्धःछि व न्यासः मस्तय्त क्यान्सर जुइगु खँ महाशाखां धाःगु दु।

प्रधान सेनापति अशोक राज सिग्देलयात नेपाः चाःह्यू वयाच्वंपिं भारतया राष्ट्रिय क्याडेट कोर (एनसिसी)या पुचलं नापलाःगु दु।

भारतीय सेनाया विङ कमान्डर पिआर पोनप्पाया नेतृत्वय् नेपाः चाःह्यूवयाच्वंपिं १८ दुजःया पुचलं नापलाःवःगु खँ सैनिक जनसम्पर्क नापं सूचना निर्देशनालयं धयादीगु दु। राष्ट्रिय सेवा दलया दच्छिया ज्याझ्वः मध्ये जुयाच्वंगु थ्व ल्याय्म्ह कालबिल चाःहिलेगु ज्याझ्वलय् ब्वति कायेत भारतया पुचः वंगु कात्तिक ५ गते थन वःगु खः।

नेपाः चाःहिलेत वःपिं भारतया पुचःयात लक्ष्य यानाः दयेकूगु थी थी ज्याझ्वलय् नेपाःया राष्ट्रिय सेवा पुचःया विद्यार्थीपिन्सं नं ब्वतिकाःगु दु। विसं २०२२ य् नेपालय् नीस्वंगु राष्ट्रिय सेवा पुचःया तालिम कयाच्वंपिं ब्वनामिपिंसं नं विसं २०२६ पाखें थी थी देशय् जुयाच्वंगु तालिमय् ब्वतिकयाः वयाच्वंगु नं निर्देशनालयं धयादीगु दु।

नेपाःपाखें राष्ट्रिय सेवादलया ब्वनामिपिंसं भारत, श्रीलङ्का, बङ्गलादेश, भूटान, मालदिभ्स, पाकिस्तान व सिङ्गापुरय् चाःहिलेगु ज्या सिधयेधुंकूगु खँ कनादिल। नेपालय् थौंतक ७४ द्वः प्यसः व ८० म्ह ब्वनामितय्सं सिनियर व जुनियर डिभिजनय् च्वनाः राष्ट्रिय सेवा पुचःया तालिम कायेधुंकूगु खँ नं निर्देशनालयं धयादीगु दु। थुगु दँय् जक न्हयद्वः व न्हयसः व प्यम्ह ब्वनामितय्सं उगु तालिमय् ब्वतिकाःगु खः।