राष्ट्रपति रामचन्द्र पौडेलं निष्ठा, आदर्श व नैतिकतायात बचेयानाः लोकतन्त्र व संविधानया संरक्षण यायेत देय्पाखें वःगु भाला पूवंकेत लगे जुयाच्वनागु खँ कनादीगु दु।

राष्ट्रपति भवन शीतल निवासय् आत्रेय गोत्रीय पौडेल कुलपुजा व्यवस्थापन समितिं याःगु अभिनन्दन ज्याझ्वलय् वय्कलं थःम्हसिनं पद स्वयां नं निष्ठा, आदर्श व नैतिकतायात न्ह्याबलें तःधं तायेका च्वनागुलिं राजनीतिक जीवनय् बांमलाःगु न्ह्यसः वइकथं छुं नं ज्या मयानागु खँ कनादिल। राष्ट्रपति पौडेलं थथे धयादिल, “जित पद स्वयां नं निष्ठा, आदर्श व नैतिकता तःधं ताः। ताःहाकः राजनीतिक ख्यलय् थःगु कुलया इज्जत बचे यानाःतइगु दु।

किचःलाइगु छुं नं ज्या यानागु मदु व गुबलेंयाये नं मखु ।” वय्कलं लोकतन्त्र व संविधानया संरक्षणनापं राष्ट्रिय छवाःया प्रवर्द्धन व देय्या हित जुइगु ज्या न्ह्याबलें यानावनेगु बचं बियादिल । वय्कलं थथे धयादिल, “जित देय्नं ब्यूगु अभिभावकीय भाला पूवंकेगु झ्वलय् छुं नं कथंया कसर ल्यंकाः तयेमखु। जीवनभर निष्ठा, आदर्श व नैतिकता बचे यानाः कुलया जक मखु फुक्क नेपाःमितय्गु हे इज्जत तये।” राष्ट्रपति पौडेलयात कुल वंशीय ज्याथःम्ह दुजः पुण्यप्रसाद पौडेलं अभिनन्दन पौ लःल्हानादीगु खः।

ज्याझ्वलय् कजि साहित्यकार मुकुन्द पौडेलं कूलवंशया परम्पराबारे जःह्वलाः ब्वनातःपिं सकलसित लसकुस यानादिल। कवि व कलाकार रमेश पौडेलं राष्ट्रपति पौडेल आस्था व निष्ठाया आदर्श ज्वना कुलया जः जुयाच्वनादिल धयादिल। अभिनन्दननापं सम्मान ज्याझ्वलय् तनहुँ, चितवन व येँया आत्रेय गोत्रीयलगायत ख्यःया स्याःन्याःपिन्सं ब्वतिकयादीगु खः।

प्रधानमन्त्री केपी शर्मा ओलीं मानवअधिकारवादी नेता नाप पूर्व मन्त्री पद्मरत्न तुलाधरया खुक्वःगु स्मृति दिवसय् वयकःयात लुमकेगु ज्या जुगु दु।

शान्ति व मातृभाषाया अभियन्ता नाप साहित्यकार तुलाधरया लुमन्तिइ थौ पद्मरत्न तुलाधर स्मृति प्रतिष्ठानया ग्वसालय् थौ शंखधर साख्वा स्मृति पार्क, रत्नपार्कय् जूगु खः।

सोमवाः थौ सेयर बजाःया दक्को सूचक थहावंगु दु। नेप्से परिसूचक म्हिगः स्वया थ्व २७.४१ ल्याखं थहावंना नेप्से २६४५ य् थ्यःगु दु।

नेप्सेनापं सेन्सिटिभ सूचक ०.६८ प्रतिशतं थहावंगु दु। दक्को सेक्टरया सूचक थहवंना कारोबार रकम न थहावःगु दु। म्हिगः ४ अर्ब ७३ करोडया कारोबार जूगुलि थौ ५ अर्ब ३४ करोडया कारोवार जूगु दु।

२१३ गु कम्पनीया थहावंगुलि २८ गु कम्पनीया भाः कुहावंंगुलि निगु धाःसा स्थिर जूगु दु। फाइनान्स समूह दक्को हे ३.४६ प्रतिशतं थहावंगु दु। बैंकिङ ०.३६, विकास बैंक १.५७, होटल नाप पर्यटन १.१७, हाइड्रोपावर १.५८, लगानी ०.८५, जीवन बीमा १.८४, उत्पादन १.३४, माइक्रोफाइनान्स १.२६, निर्जीवन बीमा ०.६४, मेमेगु ०.५७ व व्यापार ०.७५ प्रतिशतं थहावःगु दु।

जानाकी फाइनान्स, दोल्ती पावरया भाः १० प्रतिशतं थहावंगु दु सा रिभर फल्स पावर ९.५४, मेन्छियाम हाइड्रोपावरया ९.१३, मायाखोला हाइड्रोपावरया ६.९९, प्रोग्रेसिभ फाइनान्सया ६.६२ व बेस्ट फाइनान्सया भाः ६.५७ प्रतिशतं थहावंगु दु। पाँचथर पावरया भाः ६.०२ प्रतिशतं कुहावंगु दु।

कालिन्चोक दर्शनया ४.३५, समृद्धि फाइनान्सया ३.९६, विन नेपाल लघुवित्तया २.८९, एसबीआई बैंकया २.६३ प्रतिशतं भाः कुहावःगु दु। कारोबार रकमया आधारय् नेपाल फाइनान्स, समृद्धि फाइनान्स, लाइफ इन्स्योरेन्स कर्पोरेसन, जानाकी फाइनान्स, पिपुल्स हाइड्रोपावर न्ह्यने दु।

समता घरेलु लघुवित्तया एफपीओय् थौ सोमवाःनिसे आवेदन चाःगू दु। कम्पनीं ३ लाख ५० हजार ९०४ कित्ता एफपीओ जारी यायेत्यःगु खः।

प्रतिकित्ता १ सयया दरं जारी जुइगु एफपीओय् सर्वसाधारणं थौनिसे कात्तिक २० गतेतक आवेदन बिइफइ। कम्पनीं एफपीओपाखे कुल ३ करोड ५० लाख ९० हजार ४२५ तका संकलन यायेफइ।

अनलाइन प्रणाली मेरोसेयर व थःगु खाता दुगु बैंक व वित्तीय संस्थाया शाखापाखे एफपीओ याये फइ धका धाःगु दु। न्यूनतम १० व अप्पो १ हजार कित्ताया निति आवेदन बिइ फइ।

एफपीओ निष्कासन नाप बिक्री प्रवन्धकय मुक्तिनाथ क्यापिटलयात ल्यःगु दु।बैंक व वित्तीय संस्थां सर्वसाधारणय् म्हति ३० प्रतिशत सेयर निष्कासन यायेमाःगु प्रावधान दु।

नेपाल संवत न्हूदँ राष्ट्रिय समारोह समिति ११४५ पाखें न्हूदँया सिरपाः विष्णु चित्रकारयात लःल्हाइगु जूगु दु।

समारोह समितिया सचिवालयं ब्यूगु जानकारी कथं चित्रकार नेपालभाषा आन्दोलनय् निरन्तर पानाः वयाच्वनादीम्ह व्यक्ति जूगु लिसें जाति भाषा आन्दोलनया न्ह्यलुवाः जूगुलिं वय्कःयात सम्मान कथं नेपाल संवत ११४५ न्हूदँया लसताय् थथे सिरपाः लःल्हायेत्यंगु खः।

चित्रकार तःदँ न्ह्यःनिसें नेपाल संवतया तिथि पौ पिथनेगु पुचलय् च्वनाः ज्या यानाः वयाच्वनादीम्ह खःसा मातृभाषा आन्दोलनया अग्रज व्यक्ति नं खः। थुगु सिरपाः ने.सं. ११४५ कछलाथ्व पारु (कार्तिक १७ गते ) शनिवाः समारोह समितिया ग्वसालय् येँया बसन्तपुरय् जुइगु भिंतुना सभाय् मूपाहाँ कथं झायादीम्ह प्रधानमन्त्री केपी शर्मा ओलीया ल्हाःतं थथे हनापौ लिसें कसाःगा न्ययेकाः हनेत्यंगु खः।