कवि पूर्ण बैद्यया स्वक्वःगु पुण्य तिथिइ श्रद्धाञ्जली बिइगु कथं वयकःया शिष्य जानकी रघुवंशीया संकलन व सम्पादनय् “कवि पूर्ण वैद्य झीगु मिखाय्” पितब्वज्या जूगु दु।

नेपाल प्रज्ञा प्रतिष्ठानया कुलपति भुपाल राई न उगु सफू छम्ह हनेबहःम्ह गुरुया लुमन्ति म्वाका तयेत यक्व हे मेहनत याना पिकानादीगु सफू खः का धयादिगु दु।ज्याझ्वलय् भाषा आयोगया दुजः पत्रकार व साहित्यकार सुरेशकिरण मानन्धर सफूया विश्लेषण यानादिगु खः।

अथेहेतुं साहित्यकार राजेन्द्र महर्जन, मोतिलक्ष्मी शाक्यं पूर्ण वैद्यया बारे थीथी खँ कनादीगु खः। श्रीराम श्रेष्ठ व लोककवि राजभाइ जकःमिं कविता वाचन यानादीगुलि प्राज्ञ लक्ष्मी मालि नं नुगःखँ तयादीगु खः।

पूर्ण वैद्यया जहान मीरा बैद्य शाक्य सभाध्यक्षताय् जुगु खः।

यलया दौवहालय् रात्रिकालीन व्यापार मेला न्ह्यागु दु। वडा नं १६ कार्यालयं म्हिगः छगू ज्याझ्वः दथुइ यल महानगरपालिकाया कार्यबाहक मेयर मन्जली शाक्यं उलेज्या यानादीगु खः।

स्थानीय जात्रा, पहिरन, पहिचान व संस्कृतियात थकायेगु नापं स्थानीय उत्पादनया बजारीकरण यायेगु कुतःया निति यल महानगरपालिकाया वडा नं १६ महिला समितिया ग्वसालय् थ्व हे कात्तिक ११ व १२ गते निन्हुयकं रात्रिकालीन व्यापार मेला याःगु खः।

वडा नं १६ या अध्यक्ष निर्मलरत्न शाक्यं पर्यटनया यक्को सम्भावना दुगु थाय् जुगुलि स्थानीयतयेत ब्यापार ब्यवसाय् अप्पोकेगु कुतः जुइ धका धयादीगु खः। “थुगु मेलाय् हस्तकला महासङ्घ, पाटन पर्यटन विकास संस्थाया ग्वहालि दइगु, महानगरपालिकाया दीर्घकालीन योजनायात ग्वहालि यायेगु उद्देश्य कथं थुगु ज्या यानागु खः धका धयादीगु खः।उगु मेलाय् स्थानीय हस्तकलाया सामग्री, स्थानीय नेवाः नँसाःया न ब्यवस्था दु।

हतियार त्वःतगु जक खः धका धया बिइगु धम्कीयात लक्ष्य यासे प्रधानमन्त्री ओलीं चाःया दुने सुचुका खःत नःगु हतियारं आः ज्याय जुइ मखु धका धयादीसे नेपाःया समाजय् मखु प्रचार याना धम्की मबिइत इनाप यानादीगु खः।

थःत अलोकप्रिय जूगु धका टिप्पणी याःपिन्त लिसः बिइगु झ्वलय् प्रधानमन्त्री ओलीं धयादीगु दु, “भाडाय् खटे यानातःपिन्स केपी ओलीया साख घटे जुल धका धाय्फु, सचेत जनतापिन्स स्यु कि झीपि गुलि लोकप्रिय दु धका ओलीया साख घटे जुल धाःपिन्स २०८४ या निर्वाचनय् स्वय्।” प्रधानमन्त्री ओलीं लोकतन्त्र धइगु छाडातन्त्र मखु धका धयादीसे नेपाः ल्वाना दयकागु व ल्वाना बचे यानागु राष्ट्र जुगुलि सिंहदरबार व बालुवाटार कब्जा याये, दाय्, स्याय् धइगु छाडातन्त्र जुगुलि थज्यागु क्रियाकलाप सह्य जुइ मखु धका धयादीगु खः।

वयकलं राष्टया निति माःगु पूर्व सुरक्षाकर्मी एकता व अनुशासन नाप खटे जुइपि व न्हुगु पुस्तायात प्रेरणा बिइमाः धका धयादीगु खः। वयकलं सामाजिक सञ्जालय् यः यः थे न्ह्यब्बइपिन्त उत्तरदायी दयकेगु लँय् सरकार दु धका स्पष्ट यानादीगु दु। सहकारी अपचलनबारे संसदीय समितिया प्रतिवेदनयात सरकारं कार्यान्वयन यानाच्वंगु दु धका धयादीसे प्रधानमन्त्री ओलीं अनुसन्धानया झ्वलय् दुपि मनूतयेगु पक्षय् अदालतया न्ह्यने हे वना हालेगु धइगु लोकतान्त्रिक मान्यतासङ्गत मखु धका धयादीगु दु।

वयकलं थः सूयात न पूर्वाग्रह मदु व न्यायिक निरुपणपाखे जुइपाखे निष्कर्षयात सकसिया न माने यायेमाः धका बःबियादीगु दु। उगु ज्याझ्वलय् नेपाली सेना, नेपाल प्रहरी, सशस्त्र प्रहरी व राष्ट्रिय अनुसन्धान विभागया अवकाश काये धुकुपि उच्चाधिकारीपाखे राष्ट्रिय सुरक्षा व पूर्व सुरक्षाकर्मीया भूमिकाबारे विचाः न्ह्यब्बयादीगु खः।

 झिंन्हयक्वःगु गोदावरी स्वाँया धेँधेँबल्ला लिसें ब्वज्यासं थ्यंमथ्यं ४५ लख बराबरया ब्यापार जुगु दु।फ्लोलिकल्चर एसोसिएशन (फ्यान) नं ग्वसाः ग्वःगु ‘गोदावरी स्वाँ पिये, छेँ लाय्भू सजेयाये’ नारा बिया बिहीवाःनिसें न्ह्यागु मेलाय् निन्हुया दथुइ थुलि ध्यबाःया ब्यापार जुगु खः।

वइगु आइतवाः तक न्हयाइगु उगु मेलाय् छगू करौड मल्याक आर्थिक कारोबार जुइगु आशा यानागु एसोसिएसनया नायः दिलीप बादेजुं जानकारी बियादिगु दु। वय्कया कथं मेलाय् बिहीवा व शुक्रवाः याना १६ द्वः म्हेस्यां मेलाया अवलोकन याये धुंकूगु दु।

अवलोकनय् वयादीपिनिगु मंू आकर्षण गोदावरी स्वाँ जूगु व थुगु स्वाँया ब्यापार ६० प्रतिशत जुइधुंकूगु खँ नं नायः बादें कनादिल । थुगु ब्वज्याय् व्यावसायिक स्टल ६८ गू, धेँधेँबल्ला स्टल निगू, अफिसियल स्टल प्यंगु व किपा पारखीतय् निंति सेल्फी स्टल छगू याना मुक्कं ७५ गू प्रदर्शनी कक्षत तयातःगु दु।

प्रदर्शनीइ गोदावरी स्वाँया धेँधेँबल्लानापं दुगुलिं थुगु स्वाँया थी थी विधाय् धेँधेँबल्ला याना सिरपाः इनेगु ज्याझ्वः दूगु फ्यानं जानकारी ब्यूगु दु।

सरकारं डेङ्गीया महामारी न्यंके मबीगु नितिं देय्न्यंकया सरकारी ज्याकुथीइ सुचुकुचु अभियान न्ह्याकूगु दु। बिहीवाः सनिलया मन्त्रिपरिषद्या मुंज्यां देय्न्यंकका सकल सरकारी ज्याकुथी परिसरस सुचुकुचु यायेगु निर्णय याःगु खः।

स्वास्थ्य व जनसङ्ख्या मन्त्रालयया प्रस्तावय् मन्त्रिपरिषदं उगु निर्णय याःगु सरकारका प्रवक्ता लिसें सञ्चार व सूचना प्रविधि मन्त्री पृथ्वी सुब्बा गुरूङं धाःगु दु। ‘डेङ्गी न्यंके मबीत लः मुनिगु थाय्, मोटर ग्यारेज, कवाडी स्टोरलिसें जोखिम दूगु थाय्या सुचुकुचु अभियान न्ह्याकेगु स्वास्थ्य मन्त्रालयया प्रस्तावया कथं हे डेङ्गु नियन्त्रण अभियान न्ह्याकेगु निर्णय जुगु खः,’ वय्कलं धयादिगु दु।

थ्वहे दथुइ, सञ्चार व सूचना प्रविधि मन्त्रालय नं मन्त्रिपरिषद्या निर्णयकथं थःथःगु ज्याकुथी परिसरय् सुचुकुचु याना डेङ्गी नियन्त्रण अभियान न्ह्याकेत थः क्वय्या ज्याकुथितयत् निर्देशन ब्युगु खः। स्वास्थ्य व जनसङ्ख्या मन्त्री प्रदीप पौडेलं देय्या छुँ जिल्लास डेङ्गी प्रकोप अप्वःयाच्वंगुलिं थुकियात याकनं नियन्त्रण यायेत सरकारं इलय् देयन्यंक पत्ती च्वनिगु थाय् मालेगु व पत्ती नष्ट अभियान यायेगु ज्याझ्वः तयागु खँ कनादिल।

वय्कलं डेङगी नियन्त्रणय् सक्रियरूपं ब्वति कायेया नितिं सरोकारवाला निकाय, निजामती कर्मचारी, सुरक्षा निकाय, सामाजिक अभियन्ता लिसें सकलसित इनाप यानादीगु दु।