उपप्रधानमन्त्री नापं अर्थमन्त्री विष्णुप्रसाद पौडेलं सूचना प्रविधिया क्षेत्रय् नेपालय् लगानीया गाक्क हे ह्वताः दूगु व उकिया आकर्षक लिच्वः नं कायेफइगु जूगुलिं धुक्क जुयाः लगानी यानादीत अन्तर्राष्ट्रिय लगानीकर्तातय्त इनाप यानादिगु दु।

अमेरिकी उद्योग वाणिज्य सङ्घं थौं अन ग्वसाः ग्वगु सहलह ज्याझ्वलय् वय्कलं नेपाःया भौतिक पूर्वाधार, पर्यटन, कृषि, ऊर्जालगायत क्षेत्रय् लगानी यानाः फाइदा कयादीत इनाप यानादीगु खः।

नेपाल उद्योग वाणिज्य महासङ्घया नायः चन्द्र ढकालं नेपालय् जलविद्युत् विकास नापं पर्यटन पूर्वाधार निर्माणया ख्यलय् लगानीया गाक्क हे ह्वताः दूगुलिं उकिया उपयोग यायेत अमेरिकी लगानीकर्तातय्त इनाप यानादिगु खः।

ज्याझ्वलय् बहुराष्ट्रिय कम्पनी गुगल, मेट्रा, कोकाकोला लगायत लोकंह्वाःगु अमेरिकी कम्पनीया प्रतिनिधितय्सं ब्वति कयादीगु खः।

नेपाल पञ्चाङ निर्णायक विकास समितिया नायः डा. श्रीकृष्ण अधिकारीं वइगु बैशाख महिनानिसें सूर्य सिद्धान्तया थासय् केतकीय ग्रहगणीत सिद्धान्त लागू याःसां नं तिथिया सवालय् गोलमाल मजुइगु कथं हे पञ्चाङ निर्माण यायेगु जुइ धकाः धयादीगु दु।

वय्कलं सिद्धान्त हिल धाःसा बरु गतेया सवालय् उखथुखे लाइ, तिथि व तारिकयात लिच्वः लाइमखु धकाः धयादिल। नेवाः सांस्कृतिक अभियान्तापिंलिसे पञ्चाङया ज्याकू नाराहिटीइ सहलह ब्याकेगु झ्वलय् समितिया नायः डा. अधिकारीं अथे धयादीगु खः। नेपाल पञ्चाङ निर्णायक समितिं वइगु बैशाखंनिसें लागू जुइगु कथं पञ्चाङया नितिं सूर्य सिद्धान्तया थासय् केतकीय सिद्धान्त नालेगु अवस्थाय् नेपाल संवतया न्हूदँ ११४५ निसें दच्छियंकंया पात्रा पिकाइगु अवस्थाय् गते, तिथि, संस्कृतिइ तकं लिच्वः लायेफु धकाः न्ह्यथसें इलय् हे पञ्चाङ समितिपाखें ठोस निर्णय यायेमाः धकाः डेलिगेशन वंगु खः।

नेवाः देय् दबूया संरक्षक नरेश ताम्रकार, नेवाः देय् दबू स्वनिगः विशेष प्रदेश समितिया नायः श्रीकृष्ण महर्जन नेवाः, बरिष्ठ न्वकू नविन थेच्वमि, हलिं नेवाः गुथिया केन्द्रीय नायः विनोद महर्जन, येँ जिल्ला समितिया नायः धनबहादुर महर्जन तिमिला, यल जिल्ला समितिया नायः रविन्द्र शाक्य, ख्वप जिल्ला समितिया नायः नरेश नेवाः, थीथी नेवाः खलः पुचलय् दुथ्यांपिं याना थ्यं मथ्यं निगू दर्जन ब्यक्तित्वपिं सहभागी जुयादीगु खः।

ज्योतिषत नं सहभागी जूगु उगु ज्याझ्वलय् समयसापेक्ष हिउपाः कथं थःपिन्सं सूर्य सिद्धान्तयात त्वःताः केतकीय सिद्धान्त नालेगु नितिं सरकारयात प्रस्ताव छ्वया तयागु खः धकाः धयादिसें नेपाल पञ्चाङ निर्णायक विकास समितिया कार्यकारी निर्देशक सूर्य प्रसाद ढुंगेलं कन्हय् वना सरकारं निर्णय याइगु अवस्थाय् केतकीय सिद्धान्त लागू जुइ धकाः धयादिल।

उगु इलय् नेपाल संवतया न्हूदँया झ्वलय् आधिकारीक रुपं नेपाल पञ्चाङ निर्णायक विकास समितिपाखें नं पात्रो पिकायेमाःगु नापं सरकारपाखें नं पिकायेके बिइगु नितिं भूमिका म्हितेमाःगु बारे नं सहलह जूगु खः।

यलया दौवहालय् रात्रिकालीन व्यापार मेला जुइगु दु। वडा नं १६ कार्यालयं म्हिगः छगू पत्रकार सम्मेलन याना स्थानीय जात्रा, पहिरन, पहिचान व संस्कृतियात थकायेगु नापं स्थानीय उत्पादनया बजारीकरण यायेगु कुतःया निति यल महानगरपालिकाया वडा नं १६ महिला समितिया ग्वसालय् थ्व हे वइगु कात्तिक ११ व १२ गते सनिलया ४ निसे ९ बजेतक रात्रिकालीन व्यापार मेला याइगु जुगु दु।

वडा नं १६ या अध्यक्ष निर्मलरत्न शाक्यं पर्यटनया यक्को सम्भावना दुगु थाय् जुगुलि स्थानीयतयेत ब्यापार ब्यवसाय् अप्पोकेगु कुतः जुइ धका धयादीगु खः। “थुगु मेलाय् हस्तकला महासङ्घ, पाटन पर्यटन विकास संस्थाया ग्वहालि दइगु, महानगरपालिकाया दीर्घकालीन योजनायात ग्वहालि यायेगु उद्देश्य कथं थुगु ज्या यायेत्यनागु खः।

मिसापिन्स छेँ छेँय् उत्पादन यायेगु हस्तकला लगायत सामग्री मिया आर्थिकोपार्जन यायेगु ह्वता चुलाइ”, धका वयकलं धयादीगु खः। अध्यक्ष शाक्यं थुकिइ स्थानीय श्रम, सीप व क्षमताया बजारीकरण यायेगु नापं समुदायया आयआर्जनय् ग्वहालि जुइगु भलसा दु । मेलाय् इलय् साङ्गीतिक ज्याझ्वः न दु धका वयकलं जानकारी बियादीगु दु।

मेलाय् स्थानीय हस्तकलाया सामग्री, स्थानीय नेवाः नँसाः न दइ धका ग्वसाः खलःपाखे जानकारी ब्यूगु दु। “स्थानीय व्यापार थकायेगु नाप मिसापिनिगु आयआर्जन थकायेगु कुतः खः, यलय् चौबीसै घण्टा ब्यापार ब्यवसायी यायेगु कुतः कथं थुगु मेला यायेत्यनागु खः धका वडाध्यक्ष शाक्यं धयादीगु खः।

राष्ट्रिय समाचार समिति(रासस) पाखें राससनाप स्वापू दूगु ऐतिहासिक महत्वया प्यपाः किपाः त्रिभुवन विशवविद्यालय पत्रकारिता व आमसञ्चार केन्द्रीय विभागयात लःल्हागु दु।

किपाः लःल्हासें राससया कार्यकारी नायः धर्मेन्द्र झा न पत्रकारिता व आमसञ्चार ब्वनिपिं ब्वनामितय् निंति राससपाखें उपलब्ध यानाब्यूगु किपात ज्याःख्यलय् दै धकाः भलसा प्वंका दिल।

विभागया प्रमुख डा कुन्दन अर्यालं पत्रकारिता व आमसञ्चार विषयया उच्चशिक्षाया अध्यापनया नापनापं थुकिया चीहाकःगु तालिम ज्याझ्वः नं याये त्यनागु खँ कनादिल।

उगु ज्याझ्वलय् राससया महाप्रवन्धक सिद्धराज राई, नायब महाप्रवन्धक सोमनाथ लामिछाने, प्रधान सम्पादक उत्तम सिल्वाल व आलेख शाखा प्रमुख कृष्ण अधिकारी नं दूगु खः।

नेपाःलिसें हलिन्यंक पोलियो दिँ हन। थुगु दँया दिँया नारा ‘पोलियो सिधयेके नु’ धैगु खः।दिं हनेगु झ्वलय् स्वास्थ्य नापं जनसङ्ख्या मन्त्री प्रदीप पौडेलंं भिडियो सन्देशपाखें पोलियो ल्वय् न्हंकेगु विश्वव्यापी महान् अभियानय् ब्वति कायेत दकसितं इनाप यानादीगु खः।

वय्कलं सन्देशय् पोलियो न्हंकेगु महान् अभियानय् ब्वति कायेगु धैगु थः मचाखाचातय्त खुदँ दुने हे छला÷छला पाक्क स्वकःतक पोलियो नकेगु धकाः उल्लेख यानादीगु दु। मन्त्री पौडेलं सुइपाखें बिइगु पोलियो खोप नं १४ वाःदुपिं व ९ वाःदुपिं मस्तय्त छकः÷छकः बिइमाःगु खँ कनादि।

“आः नं छुं देशय् पोलियोया न्हू ल्वगित खनेदयाः च्वंगु दनि, विश्वया गुलिखे देशय् लकसय् नं पोलियोया भाइरस खनेदूगुलिं पोलियोया जोखिम ल्यनाच्वंगु हे दनि”, वय्कलं धयादिल, “झीगु देशया सन्र्दभय् नं लकसय् पोलियो भाइरस दूगु÷मदूगुबारे याइगु निगरानीयात अझ स्याचुकूगु दु।” संसारं पोलियो ल्वय् मन्हं तले झीपिं नं पोलियो थें ग्याना पुगु ल्वय्या जोखिमय् हे दइगु खँ मन्त्रीया धापू दु।

वय्कलं नेपालय् नं पोलियोया जोखिम आः नं म्हो मजूगुलिं दक्व अभिभावकतय्त थः मचाखाचातय्त धयातःगु ईलय् हे पोलियो खोप बिइत इनाप यानादीगु खः। म्हुतुं नकीगु खोप (ओरल पोलियो भ्याक्सिन) स्वकः तक मस्त ६ वाः, १० वाः व १४ वाः दइबलय् व सुईपाखें बिइगु खोप (इनएक्टिभेटेड पोलियो भ्याक्सिन) निकःतक १४ वाः व ९ वाः दइलबय् बिइ।

वंगु जेठय् टुकुचा खुसि व बागमती खुसिया दोभान टेकुइ पोलियोया जिवाणु लुया वःबलय् येँगाःया स्वंगू जिल्लाय् न्यादँ स्वयां क्वय्यापिं मस्तय्त पोलियोविरुद्धया खोप ब्यूगु खः।