प्रधानमन्त्री पुष्पकमल दाहाल प्रचण्डया राजीनामा माग यासे डा. गोविन्द केसीं २२ क्वःगु आमरण अनशन सुरु याःगु दु।

थौ शनिवाः अनशन सुरु याये न्ह्यः छगु प्रेस विज्ञप्तिइ पिकासे धाःगु दु सशस्त्र द्वन्द्वकालय् मानवताविरोधी अपराध व युद्ध अपराधय् संलग्न प्रमुख नेताया हैसियतं प्रधानमन्त्री पदपाखे प्रचण्डया राजीनामा फ्वंगु खः।

केसीं निष्पक्ष कथं पीडिततय्त न्याय अनुभूत जुइगु कथं संक्रमणकालीन न्यायया प्रक्रिया क्वछिइगु सुनिश्चित यायेत न माग याःगु दु।

बुंगःद्यःया रथ सालेगु जात्रा थौनिसे सुरु जूगु दु। थौ पूच्वोनिसे रथ साला गाःबहालय् थ्यकूगु खः।

वंगु  वैशाख १२ गते रथ दयकेगु ज्या न्ह्यागू खःसा वैशाख २७ गते द्यः रथय् तःगु खः।

रथ यात्रा स्वयेगु निति यल महानगरपालिकाया नगरप्रमुख चिरीबाबु महर्जनं युरोपेली युनियन, फ्रान्स, इजरायल, नर्वे, दक्षिणकोरिया, स्विट्जरल्याण्ड, थाइल्याण्ड, संयुक्त अधिराज्य लगायत देशया राजदूत व विश्व बैंक, युनिसेफ, युएसएआईडी, एसियाली विकास बैंक लगायत निकायया प्रतिनिधिपि वःगु खः।

नेवाः पत्रकार राष्ट्रिय दबू ख्वप शाखाया नायः रामगोपाल तमखुया अबु रामप्रसाद तमखू मन्त।

वयकः शहिद गंगालाल ह्रदय रोग केन्द्रय् उपचार यायेगु झ्वलय् थौ चान्ह्यः मदुगु खः।

वयकः ८१ दँय् मदुगु खः।

येँ महानगरपालिका वडा नं १६ या न्हुगु वडा कार्यालय भवन उलेज्या जुगु दु। उगु वडा कार्यालय भवनय् मदुम्ह वडाअध्यक्ष मुकुन्द रिजालया झ्वाताः न उलेज्या जुगु दु।

येँ महानगरपालिकां ७ करोड ५३ लाख लगानीइ चःमतीइ दयकुगु खः भवन व झ्वाताः येँ महानगरपालिकाया उपप्रमुख सुनिता डंगोलं उलेज्या याःगु खः। उगु ज्याझ्वलय् येँ महानगरपालिकाया पूर्वप्रमुख विद्यासुन्दर शाक्य न झायादीगु खः।

२०७६ सालय् येँ महानगरपालिकां विष्णुमति करिडोरस्थित चःमतीइ १ रोपनी ४ आना जग्गा न्याना विस २०७८ साउन ३० गते शिलान्यास जुगु खः धका येँ महानगरपालिका वडा नं १६ या कार्यवाहक अध्यक्ष पुष्प महर्जनं जानकारी बियगु खः।

भूमिगत पार्किङनाप खुगु तल्ला दुगु उगु भवन ३ हजार वर्गफिट क्षेत्रफल दु। उगु भवनया कार्यादेश रकम ७ करोड ५३ लाख २२ हजार खः। मदुम्ह वडाअध्यक्ष रिजालया झ्वाताः मूर्तिकार महेश तुलाधरं दय्कुगु खः।

प्रमुख प्रतिपक्षी नेपाली कांग्रेसया सांसदतय्सं थौ प्रतिनिधि सभा बैठकय् नाराबाजी याःगु दु।

थःथःगु थासय् दना कांग्रेस सांसद तय्सं संसदीय छानबिन समिति गठन याः, सहकारी पीडिततय्त न्याय ब्यु धका नाराबाजी थ्वय्कूगु खः।

व स्वया न्ह्यः ईकया न्ववासे कांग्रेस महामन्त्री गगनकुमार थापां संसदीय समिति गठन मयातले संसदया ज्या न्ह्याइ मखु धका धयादीगु खः।

संसदय् न्यनिइगु न्ह्यसः न्यपिन्त गःपः तिइगु ज्या जुयाच्वंगु धका धासे थापां चेतावनीपूर्ण भाषां धाःगु दु, ‘छु यायेगु बिचाः याःगु दु, उकिया मू पुलेमालिइ।’