ख्वप नगरपालिकां थ्व हे वइगु मङ्सिर २८ निसें पुस २ गतेतक ख्वप महोत्सव २०८१ यायेत्यःगु दु। नगरपालिकां सःतूगु ख्वप महोत्सव मूल समितिया सहलहलय् समितिया नायः नापं नगरपालिकाया प्रमुख सुनिल प्रजापतिं महोत्सवया तयारी यायेत्यनागु दु धका धयादिगु दु।

ज्याझ्वलय् नगर प्रमुख प्रजापतिं ख्वप महोत्सव ख्वप नगरपालिकाया जक मखुसे दक्व ख्वपया जनताया महोत्सव खः धकाः धयादिल। प्रमुख प्रजापतिंं धयादिल, “ख्वप नगरपालिकाया ग्वसालय् २०८१ मङ्सिर २८ निसें पुस २ गते तक न्यान्हुयंक ख्वप महोत्सव यायेगु ज्याझ्वः दु, ख्वपया मौलिक व ऐतिहासिक कला, संस्कृति, जात्रा, पर्व व जीवनशैली अन्तर्राष्ट्रिय रुपं प्रचार यायेत ख्वप महोत्सवया आयोजना यायेत्यनागु खः।”

वय्कलं महोत्सवं ख्वपय् च्वंपिं नगरबासीतय्गु अर्थोपार्जन यायेगु उद्देश्य कयाः थी थी लजगाः व बन्जाःतय्त ग्वाहालि जुइगु आशा यानादीगु दु। ज्याझ्वलय् ख्वप नगरपालिकाया उपप्रमुख रजनी जोशी, प्रमुख जिल्ला अधिकारी रोशनी कुमारी श्रेष्ठ, ख्वपया प्रहरी उपरीक्षक माधवप्रसाद बुढाथोकी लगायतं ख्वप महोत्सवयात शान्तिपूर्ण ढङ्गं पूवंकेमाः धकाः धयादिल।

नेपाल संवत न्हूदँ राष्ट्रिय समारोह समिति ११४५ पाखें नेपाल संवतया आन्दोलन व थुकिया महत्वयात कयाः युवापुस्तापिन्त प्रशिक्षण बिइगु ज्याझ्वः याइगु जूगु दु।

न्हूदँ ११४५ या लसताय् समारोह समितिं कछलाथ्व एकादसी (२०८१ कार्तिक १९ गते) सोमवाः न्हिनसिया निताः इलय् येँया नेपाः ब्यांक्वेटय् थथे प्रशिक्षणया ज्याझ्वः ग्वसाः ग्वःगु दु।

नेपाल संवत आन्दोलनयात कयाः अभिलेखीकरण यानाच्वनादीम्ह व नेपाल संवत सफूया च्वमि नेवाः न्ह्यलुवा मल्ल के सुन्दरं थथे छघौ प्रशिक्षण बिइगु खँ समारोह समितिं जानकारी ब्यूगु दु।

सरकारया सच्छि दिंया प्रगति विवरण सार्वजनिक जुगु निगु लिपा सत्ता साझेदार न्ह्यगू दलं न्ह्यगू बुँदे मंकाः वक्तव्य जारी याःगु दु।

शुक्रवाः प्रधानमन्त्रीया निवास बालुवाटारय् सत्ता साझेदार दलतय्गु बैठक च्वना सरकारयात अझ प्रभावकारी दयका यकेगु प्रतिवद्धतानाप मंकाः वक्तव्य जारी याःगु दु।

‘देशय् आःया संकट व चुनौतीया सामना यासे लोकतान्त्रिक भविष्ययात अझ सुदृढ यायेगु आज्जु नापं गठन जूगु वर्तमान सरकारयात थप प्रभावकारी दयकेत‘, न्ह्यगू बुँदेया भूमिका दु धका धयातःगु दु।

अय्न प्रधानमन्त्री केपी शर्मा ओलीं सरकारया सच्छि दिंया प्रगति विवरणय् दुथ्याकातःगु यक्को विषय मंकाः बक्तव्यय् उल्लेख याःगु दु।

बक्तव्यया न्हापागु बुँदाय् सरकारया सच्छि दिंया ज्याया प्रगति जुगु समर्थन यासे वइगु दिं न समर्थन यायेगु प्रतिबद्धता याःगु दु।

भौतिक पूर्वाधार नापं यातायात मन्त्री देवेन्द्र दाहालं मन्त्रालय कःघाःगु सच्छिन्हु कुन्हु ५५ गू उपलब्धि जूगु विवरण सार्वजनिक यानादीगु दु।

थौं मन्त्रालय दुने जूगु पत्रकार सम्मेलनय् वय्कलं सच्छिन्हुया लागि निर्धारित १० गू ज्याया क्षेत्र किटान यानातःगु लक्ष्यमध्ये च्यागू लक्ष्य पूवंगु व छगू पूवनी थें च्वंगु दु धकाः धयादिल। “पुनःनिर्माणया जिम्मेवारीपाखें सरकार लिचिली मखु, वा व खुसिबाःया प्रकोपया हुनिं ब्वलंगु आपत्कालीन लँ व यातायात व्यवस्थापनया ज्याय् जुइमाःगुलिं फुक्क लक्ष्य पूवंकेत थाकूगु खः”, मन्त्री थथे धयादिल –“वा व खुसिबाःया हुनिं स्यंगु संरचनाया पुनःनिर्माणया लागि हाकनं १५ अर्ब १६ करौड अप्वः मालीगु प्रारम्भिक अनुमान याःगु दु।

उगु संरचना निर्माणया लागि थी थी दातृ संस्था व निकायलिसे सहलह ब्याकेगु ज्या जुयाच्वंगु दु।” तर दातृ निकायया जक भर मकाःसे मन्त्रालयं थःगु हे स्रोतपाखें पुनःनिर्माणयात न्ह्याकेगु वय्कःया धापू दु। नीतिगत व कानुनी ज्यायात प्राथमिकताय् तःगु मन्त्रालयं थुगु सच्छिन्हु दुने सरकारं नीतिगत व कानुनी ज्यायात प्राथमिकताय् तइगु धकाः मन्त्रीं धयादिल।

नीतिगत, सुशासन व कानुन भिंकेगु खँय् सच्छिन्हु दुने न्हय्गू उपलब्धि जूगु दु। राष्ट्रिय सडक सुरक्षा विधेयकया अवधारणापत्रय् सहमतिया लागि अर्थ मन्त्रालय छ्वयेगु, डिप्लोमा इञ्जिनियरिङ परिषद् गठन यायेगु सम्बन्धय् व्यवस्था यायेत दयेकूगु विधेयकया मस्यौदाय् राय सहमतिया लागि अर्थ मन्त्रालय छ्वयेगु कथंया ज्या थ्व ई दुने जूगु दु।

अथे हे, मन्त्रालयं नीस्वंगु कार्यदलं स्वंगू नीति, १० गू ऐन, १० गू नियमावली, १३ गू मापदण्ड, ४ गू निर्देशिका, ५ गू गुरुयोजना व ५ गू कार्यविधियात संशोधन वा न्हूगुकथं दयेकेमाःगु कथं म्हसीकूगु दु।

शिक्षा, विज्ञाननापं प्रविधि मन्त्री विद्या भट्टराई न स्थानीय उत्पादनय् आधारित विद्यालय न्हिनेसिया खाजा राष्ट्रिय प्रारूप स्वीकृत जुयाः कार्यान्वयनय् वनाच्वंगु धयादीगु दु।

मन्त्रालय लःल्हानाः काःगु सच्छिन्हुया उपलब्धि म्हिगः सार्वजनिक यासें वय्कलं अनिवार्य व निःशुल्क शिक्षा कार्यान्वयन कार्ययोजना तयार यानागु, विद्यालय तगिंया जाँच व मूल्याङ्कन प्रणाली भिंकेगु कार्ययोजना दयेकूगु धयादीगु दु। वय्कलं धयादिल, “स्थानीय उत्पादनय् आधारित विद्यालय न्हिनेसिया खाजा राष्ट्रिय प्रारूप स्वीकृत जुयाः कार्यान्वयनय् दु, अनिवार्य व निःशुल्क शिक्षाया स्वंगू हे तगिंया सरकारया जिम्मेवारी नापं कार्यान्वयन कार्ययोजना दयेके धुंकूगु दु व माध्यमिक तगिंतकया शिक्षायात अनिवार्य व निःशुल्क दयेकेगु सरकारया बिचाः कथं कार्यान्वयन कार्ययोजना दयेकाः कार्यान्वयनया ज्या न्ह्यज्याके धुंकूगु दु।”

मन्त्री भट्टराई न विद्यालय तगिंया परीक्षा व मूल्याङ्कन प्रणालीइ भिंकेगु कार्ययोजना दयेके धुंकूगु, विश्वविद्यालयया विधेयकया मस्यौदा दयेकाः नेपाः सरकार मन्त्रिपरिषदय् छ्वये धुंकूगु व उच्च शिक्षा विधेयकया मस्यौदा दयेकाः नेपाल कानुन आयोगय् छ्वये धुंकूगु खँ कनादिल। वय्कलं प्राविधिक शिक्षा व व्यावसायिक तालिम विधेयकया मस्यौदा अर्थ मन्त्रालयया सहमतिया लागि छ्वये धुंकूगु व गुसः व २४ गू शैक्षिक परामर्श सेवाप्रदायक संस्थातय्गु न्हूधाः यायेधुंकूगु, उगु संस्थातय्गु आवश्यकता कथं आकस्मिक निरीक्षण अनुगमन यायेगु व नवीकरणपत्र बिइबलय् स्वीकृतिपत्र, राजस्व नापंया भ्वँत परीक्षण यायेगु निर्णय जूगु खँ कनादिल।

वय्कलं थथे धयादिल– “रेडियोकर्मी ज्वलं व विकीरण सुरक्षा सम्बन्धय् मापदण्ड कार्यान्वयनया लागि खुगू स्वास्थ्य संस्थाया अनुगमन सिधयेधुंकूगु दु। थ्व ई दुने प्राविधिक शिक्षा व व्यावसायिक तालिम परिषद्या पाठ्यक्रम भिंकेगु थासा दयेकेधुंकूगु दु व विदेशी विश्वविद्यालयनाप सम्बन्धन दूगु शैक्षिक संस्थातपाखें सञ्चालित उच्च शिक्षाया ज्याझ्वः व्यवस्थित यायेगु कार्ययोजना दयेकूगु दु।”