प्रधानमन्त्री पुष्पकमल दाहाल ‘प्रचण्ड’ व श्रीलङ्काया राष्ट्रपति रनिल विक्रमासिङ्घे दथुइ भेटावार्ता जूगु दु।

असंलग्न आन्दोलन (नां) या सदस्य राष्ट्रया १९ क्वःगु सम्मेलनय् ब्बति कायेगु निति युगाण्डाया कम्पालाय् निम्हेसिया दथुइ थौं शनिवाः निगु पक्षीय नापा लायेगु ज्या जूगु खः। प्रधानमन्त्री प्रचण्डं असंलग्न परराष्ट्र नीतिया मामिलाय् नेपाः व श्रीलङ्का छगु हे थासय् च्वना क्षेत्रीय सहकार्य व निम्ह देय् दथुइ सहकार्य याना न्ह्यावनेमाःगुलि बः बियादीगु खः ।

अथेहे श्रीलङ्काया राष्ट्रपति विक्रमासिङ्घे न सार्कयात सक्रिय याना न्ह्याकेगु निति थःम्हेसिया न ग्वाहालि यायेगु धका धयादीगु खः।

उगु ज्याझ्वलय् प्रधानमन्त्री प्रचण्डनापं परराष्ट्रमन्त्री एनपी साउद, प्रधानमन्त्रीया परराष्ट्र मामिला सल्लाहकार डा रूपक सापकोटा, परराष्ट्र सचिव सेवा लम्साल नाप परराष्ट्र मन्त्रालयया अधिकारी पिनिगु न ब्बति दुगु खः ।

यलया लगंख्यलय् च्वंगु वडा प्रहरी कार्यालयया  प्रमुख प्रहरी बरिष्ठ नायब निरीक्षक याम केसीपाखें थःगु ज्याकुथि व प्रहरी बिटय् नेपाःया मौलिक लिपि रंजना लिपिपाखें नां च्वयेगु ज्या याःगु दु।

स्थानीय वडा, सामाजिक संस्था, व्यवस्थापन समिति व अग्रज व्यक्तित्वपिनिगु उपस्थितिइ प्रमुख प्रहरी बरिष्ठ नायब निरीक्षक याम केसीपाखें थथे रंजना लिपि नां च्वयेगु ज्या याःगु खः।

थुगु रंजना लिपि नां च्वयेगुलि बज्र अमित, रवि तण्डुकार, दिपक महर्जन, बालकृष्ण महर्जन, सुदन मानन्धर, महेश बज्राचार्यपिन्सं ग्वाहालि यानादीगु खः।

शितला माध्यमिक विद्यालयय् सामाजिक परीक्षण सुनुवाइ ज्याझ्वः क्वचाःगु दु।

विद्यालयया संस्थापक, पुलांम्ह प्रधानाध्यापक शुक्रलाल श्रेष्ठया अध्यक्षताय् जूगु उगु ज्याझ्वलय् येँ महानगरपालिका १६ वडाया वडा सदस्य शारदा सुवेदी, तरुण स्रोत केन्द्रया स्रोत शिक्षक नारायण प्रसाद नेपाल, समाजसेवी श्याम श्रेष्ठ, प्रकाश बलामी, उद्धव थापा, शिक्षक अभिभावक संघया अध्यक्ष केशव खड्कानापं थीथी संघसंस्थाया प्रतिनिधि, शिक्षक, अभिभावक, विद्यार्थीपिनिगु ब्वति दुगु खः।

विद्यालयया लेखासहायक कमल पौडेलं आर्थिक आयव्यय विवरण, सहायक प्र.अ. ईश्वरी अधिकारीं शैक्षिक विवरण न्ह्यब्वयादीगु उगु ज्याझ्वलय् विद्यालयया प्रशासनिक तथा भौतिक अवस्थाया बारे न्ववासें प्रधानाध्यापक लक्ष्मण श्रेष्ठं वइगु दिनय् विद्यालयं आर्थिक पारदर्शिता व सयेका कायेगु गुणस्तर विकासय् अझ अप्वः न्ह्यचिलेगु खँय् प्रतिबद्धता प्वंकादिल । वय्कलं शिक्षाया गुणस्तर वृद्धि यायेत शिक्षक, विद्यार्थी, अभिभावक नापं संघ संस्थाया तःधंगु भूमिका जुइगु खँय् बः बियादिगु खः।

स्रोतकेन्द्रया स्रोत शिक्षक नारायण प्रसाद नेपालं विद्यालयया आर्थिक पारदर्शिता व कुशल व्यवस्थापनया प्रशंसा यासे शैक्षिक गुणस्तर सुधारय् विद्यालय प्रशासन व शिक्षकत न्ह्याबलें सतर्क जुइमाःगु बिचाः तयादिल । ज्याझ्वलय् प्रकाश बलामी, श्याम श्रेष्ठ, केशब खड्का, प्रतिभा रिजाल लगायतं शैक्षिक सुधार नापं अतिरिक्त क्रियाकलापय् थःपिंसं ग्वाहालि यानाः न्हयाः वनेगु प्रतिवद्धता व्यक्त यानादीगु खः ।

विद्यालयं थःपिनिगु विद्यालयय् खेलकुद, तालिम, स्वास्थ्य सुविधा व प्राथमिक उपचार, नापं मेमेगु शैक्षिक गतिविधि नापनापं न्ह्याका यंकेगु प्रतिवद्धता नं प्वंकादिल ।

वरिष्ठ गायक लिसें संगीतकार योगेश वैद्य मंत । वयकः विहीवाः चान्हसिया १२ः३० बजे मदुगु खः।

विहीवाः न्हिनय् स्वास्थ्यय् छुं भचा समस्या पिहां वःगु खःसां चान्हय् तच्वः जुयाः अस्पताल यंकूगु खःसा अन हे वासः याकुयाकुं मदुगु खँ छेँजःपिंसं धाःगु दु। सासः ल्हायेत समस्या जुइवं वयकःयात येँया लुँहितिइ च्वंगु काठमाडौं भ्याली अस्पतालय् यंकूगु खः।

वयकःयात चान्हय् १२ बजे अस्पताल यंकाः आईसीयुलय् भर्ना याःगु खःसा १२ः३० बजे वासः याकुयाकुं मदुगु खँ महर्जनं कनादिल । गायक वैद्य ७७ दँ दुम्ह खः।

वयकःया म्ह्याय् निम्ह व काय छम्ह दी । वंगु माघ १ गते घ्यःचाकु संल्हू कुन्हु तिनि वयकःयात गंकी धुस्वां–बसुन्धरा प्रतिष्ठानपाखें ‘धुस्वां सायमि सिर्जना सिरपाः’ लःल्हाःगु खः। मदुम्ह योगेश वैद्यं नेपालभाषा व खस नेपाली भाय्या आपालं लोकंह्वाःगु म्ये हालादीगु दु।

नेपाली भाषाय् वयकःया म्ये ‘सपना भुलाइ सारा आँशु लिएर जाऊ‘’, ‘मेरो आँशुमा नहाँसे‘.’, ‘नेपाल मेरो उपहार भो‘’ आदि तसकं लोकंह्वाः । अथे हे नेपालभाषाय् ‘जय नमो सिरि बुद्ध भगवान‘’, ‘जिमि यःम्ह थौं जिथाय् वइ‘.’ आदि अतिकं लोकंह्वाः।

लिपांगु इलय् वयकलं गायिका रीता महर्जनलिसे जानाः न्हूगु नेवाः म्ये कम्पोज यायेगु लिसें पुलांगु म्येयात न्हूकथं हालेगु ज्या यानादीगु खः । शुक्रवाः पशुपतिइ वयकःया अन्तिम संस्कार यायेगु तयारी दुगु खँ छेँजःपिंसं कनादीगु दु।

प्रधानमन्त्री पुष्पकमल दाहाल प्रचण्ड असंलग्न आन्दोलन (नाम) या १९ क्वःगु शिखर सम्मेलनय् ब्बति कायेगु निति युगान्डाय् वंगु दु।

वयकलं नेपाली प्रतिनिधिमण्डलया नेतृत्व यानादीसे थौ सुथय् कतार एअरलाइन्सया विमानं झायादीगु खः। सम्मेलन थ्व हे माघ ५ देखि ६ गते तक गणतन्त्र युगान्डाया राजधानी कम्पालाय् जुइ।

प्रधानमन्त्री नेतृत्वया प्रतिनिधिमण्डलय् वयकःया म्ह्याय् गङ्गा दाहाल, परराष्ट्रमन्त्री नारायणप्रकाश (एनपी) साउद, परराष्ट्र सचिव सेवा लम्साल व नेपाल सरकारया वरिष्ठ अधिकारीपि दुथ्यागु दु।