संस्कृति पर्यटन व सहकारी मन्त्रालयया ग्वसालय् नेवाः देय् दबू व नेपाल तामाङ घेदुङया व्यवस्थापनय् सोमवाः जुइगु लसता ज्याझ्वः लिसें भाषा ऐन लागु जूगु घोषणा ज्याझ्वलय् नेपालभाषा मंकाः खलःया नायः लिसें जनकवि दुर्गालाल श्रेष्ठयात हनीगु जूगु दु ।

उगु ज्याझ्वलय् ताःलाकेगु नितिं नीस्वंगु समारोह समितिया दुजः लिसें नेवाः देय् दबूया न्वकू उमेश स्थापितं बियादीगु जानकारी कथं नेपालभाषाया आन्दोलनया न्ह्यलुवाः व निरन्तर भाषा आन्दोलनय् थःत पानाः वयाच्वनादीम्ह व्यक्तित्व जनकवि दुर्गालाल श्रेष्ठयात बागमती प्रदेश सरकारं नेवाः व तामाङ भाय् प्रदेशस्तरया भाय् ऐन लागु जूगु ऐतिहासिक दिं बसन्तपुरय् जुइत्यंगु लसता सभाय् हनेत्यंगु खः।

बागमती प्रदेश सरकारं भाषा ऐन लागु जूगु घोषणा सोमवाः सुथय् बसन्तपुरं लसता ¥यालि यानाः न्यायेकेत्यंगु दुसा अथेहे सुथय् ९ ता इलय् प्रधानमन्त्री पुष्पकमल दाहाल प्रचण्डया मूपाहाँसुइ भाषा ऐन लागु जूगु घोषणा यायेत्यंगु दु।

महिला, बालबालिका लिसे ज्येष्ठ नागरिक मन्त्री भगबती चौधरीं वइगु आर्थिक दँय् ज्येष्ठ नागरिकया निति विशेष ज्याझ्वः वइ धका धयादीगु दु।

समाज कल्याण परिषद् अन्तर्गत राष्ट्रिय ज्येष्ठ नागरिक कोषं थौ क्यालेण्डर बिमोचन व ज्येष्ठ नागरिकया ख्यलय् समाजसेवा याइपि समाजसेवी सम्मान ज्याझ्वलय् सम्बोधन यासे मन्त्री चौधरीं अथे धयादीगु खः। कोषया सभापति बसन्तराज कार्कीया सभाध्यताय् जुगु उगु ज्याझ्वलय् वयकलं ज्येष्ठ नागरिक झीगु सकसिया न्ह्यलुवा, हनेबम्हपिनिगु दायित्व झी सकसिया निर्वाह यायेमाः धका धयादीगु खः।

राज्यं ज्येष्ठ नागरिकया सम्मानया निति २०५१ सालय् मनमोहन अधिकारीया नेतृत्वय् सरकारं बृद्धभत्ता ज्याझ्वः हःगु खः धका धयादीसे आः उगु ज्याझ्वलं सामाजिक सुरक्षाया कथं अप्पोया वःगु दु धका धयादीगु खः । ‘उगु इलय् ध्यवा म्हो जूसा वयकलं (मनमोहन अधिकारी) ज्येष्ठ नागरिकया सम्मानया निति सुरुआत यानादीगु खः धका धयादीगु खः।

आः व हे सामाजिक सुरक्षा भत्ताया कथं ज्या जुगु दु। थुकिया निति झीसं मदुम्ह मनमोहन अधिकारीयात हने हे माः।’ धका धयादीगु खः। उगु ज्याझ्वलय् समाज कल्याण परिषदया सदस्य सचिव मनोज भट्ट, विशिष्ट पाहाँ शताब्दी पुरुष डा.गौरीशंकरलाल श्रेष्ठ, मदन श्रेष्ठ, अहल्या श्रेष्ठ, भरतलाल श्रेष्ठ, श्यामसुन्दर श्रेष्ठ, रञ्जना श्रेष्ठ, विष्णुप्रसाद नेपाल व फोटो पत्रकार श्याम चित्रकारपिन्त हंगु खः।

अथेहे कोषं क्यालेण्डर विमोचन याःगु खः।

नेपाल भ्रमणय् वयाच्वंम्ह जापानी विदेशमन्त्री खामीखावा योको थौ न्हिनय् वसन्तपुरय् अवलोकन याःगु दु। थौ न्हिनय् २ बजे वसन्तपुरय् थ्यःगु खः।

वयकलं कालभैरव, हनुमानध्वाकाय् दुने सांस्कृतिक सम्पदा  अवलोकन याःगु खः। जापानया विदेशमन्त्री नियुक्त जुइ धुका वयकःया थ्व न्हापागु नेपाः भ्रमण खः।

अथेहे थौ विदेशमन्त्री खामिखावा उपप्रधानमन्त्री लिसे परराष्ट्र मन्त्री श्रेष्ठनाप मन्त्रालयय् नापलाना निगु पक्षीय वार्ता याइगु जुगु दु। उपप्रधानमन्त्री लिसे परराष्ट्र मन्त्री श्रेष्ठं वयकःया सम्मानय् रात्रिभोजया ग्वसाः ग्वःगु दु।

विदेशमन्त्री खामिखावा थौ हे नेपाल वायु सेवाया विमानं जापानय् वनिइगु जुगु दु।

प्रधानमन्त्री पुष्पकमल दाहाल ‘प्रचण्ड’ यात नेपाः भ्रमणय् वयाच्वम्ह जापानी विदेशमन्त्री खामिखावा योको न नापालागु दु ।

प्रधानमन्त्री कार्यालय सिंहदरबारय् थौ निम्ह दथुइ निगुपक्षीय च्युता, आर्थिक सहकार्य लगायतया विविध विषय सहलह जुगु दु धका प्रधानमन्त्रीया परराष्ट्र सल्लाहकार डा.रुपक सापकोटां धाःगु दु।

प्रधानमन्त्री प्रचण्डं नेपाल–जापान दथुइ कूटनीतिक सम्बन्ध स्थापित जूसा निसे नेपाःया आर्थिक नाप सामाजिक विकासय् जापान सरकारं ग्वहालि यानावया च्वंगु व लिपागु इलय् नेपाःया तधःगु पूर्वाधार निर्माण व महत्त्वपूर्ण ग्वहालि याना वयाच्वंगु दु धका धाःगु खः।

वयकलं नेपाःया पूर्वाधार नाप आर्थिक–सामाजिक ख्यलय् जापान सरकारं बियावयाच्वंगु ग्वहालियात सुभाय् देछनादीगु खः। उगु ज्याझ्वलय् प्रधानमन्त्रीया परराष्ट्र सल्लाहकार डा. सापकोटा, परराष्ट्र सचिव सेवा लम्साल, जापानया लागि नेपाःया राजदूत डा. दुर्गाबहादुर सुवेदी, नेपाःया लागि जापानी राजदूत किकुता युताकालगायतया उच्च अधिकारी दथुइ ब्बति दुगु खः।

अन्तराष्ट्रिय हाइकु दिवस अप्रिल १७ या लसताय् थनया गौतम बुद्ध सभाकक्ष, महान्यायाधिवक्ता कार्यालय भवन, सिंहदरवारय् जूगु छगू समारोहस पूर्व प्रधानन्यायाधिस कल्याण श्रेष्ठं नेपालभाषाया आधुनिक गद्य कविताया छम्ह न्ह्यलुवाः, हाइजिन श्यामसुन्दर सयँजुया ‘हाइकु किचः’ नांगु ससफूया विमोचन यानादिल।

उगु ज्याझ्वलय् मूपाहां पूर्व प्रधानन्यायाधिस श्रेष्ठं थःगु मून्वचू बिइगु झ्वलय् म्हो शब्द, गहन बिषय, गहन संप्रेशन, गहन चेतनायात शसक्त रुपं न्ह्यब्वय्गु माध्ययम हाइकु जुयाच्वन धकाः धयादिसें थःत नं हाइकुं सालाकाल धकाः धयादिल। वहुआयामिक व्यक्तित्व श्यामसुन्दरया योगदानयात कदर यायेया निंतिं प्रतिष्ठान चायेकेगु आदि ज्याये थम्हं माक्व ग्वहालि यायेगु बचं नं वय्कलं बियादिल।

थ्व सिबें न्ह्यः नेवाः हाइकु ख्यःया नायः लिसें सभाया नायः जुयादीम्ह भाजु सुरेश प्रधानं नेपालय् हाइकु च्वय्गु ज्या न्ह्याःगु ई ने.सं. १०७९ (२०१६) सालं निसें हे हाइकु च्वयाः वैच्वनादीम्ह श्यामसुन्दर सयँजुया हाइकुत पाण्डुलिपि जक लिकुनाच्वंगुयात पितबिइमाःगु थौंया आवश्यकतायात नेवाः हाइकु ख्यलं महसुस यानाः थ्व ज्या न्ह्याकागु खः धयादिल।

लिसें समालोचक डा. ज्योतिप्रभा तुलाधरजुया धापूयात लिसाकासें वय्कलं सयँजुया हाइकुइ थम्हं न्हियान्हिथंया जीवन क्रमय् खंगु व अनुभव यानागु बिषय,घटना, उकिया दथुइ दुगु अन्तरविरोध, संघर्ष, विडम्बना आदियात थीथी कथं बिश्लेसन यानाः, चिन्तन यानाः अभिव्यक्त याःगु दु धयादिल ।

उगु ज्याझ्वलय् वरिष्ठ कवि, समालोचक डा. आनन्द जोशीं कवि सयँजुया नेपालभाषाया आधुनिक गद्य कविता न्ह्याकामि मध्यय्या छम्ह न्ह्यलुवाः कवि खः धयादिल । लिसें वय्कःया हाइकुं नेपालभाषाय् न्ह्यानाच्वंगु परंपरागत हाइकु व आधुनिक हाइकुया बिचय् च्वनाः ताँया भूमिका निर्वाह याःगु खँ कनादिल ।

अथेहे, सफूया प्रकाशक वरिष्ठ अधिवक्ता, श्यामसुन्दर सयँजुया तःधिकःम्ह म्ह्याय् अमितालक्ष्मी सय्ँजु श्रेष्ठं लिबाक्क हे जूसां थः अबुया कृतियात पिथने दुगुलिं थःपिनि सकल जः तसकं लय्तायाच्वनागु दु धयादिल। थः बाः श्यामसुन्दर सयँजुया वहुआयामिक व्यक्तित्वया थीथी पक्षयात दुवालदिसे वय्कलं थः बाः नं च्वयादीगु रबिन्द्रनाथ टैगोरया अनुवाद ‘गितान्जलि’ व खस् नेपाली भाषाय् च्वयादीगु ‘चस्काहरु घाउका’ धयागु कविता सफू नं याकनं प्रकाशनय् हय्गु खँ कनादिल ।

नेवाः हाइकु ख्यःया ग्वसालय् जूगु उगु ज्याझ्वः धर्मकृष्ण सिकःमिजुं न्ह्याकादीगु खःसा उगु समारोहस साहित्यकार मोहन दुवाल, साहित्यकार डा. सुमन ताम्राकार, हाइजिन लिसें नेवाः हाइकु ख्यःया न्वकू  तुयुपुं नं कवि श्यामसुन्दर व वय्कःया हाइकुया थीथी पक्षयात कयाः थःगु नुगः खँ प्वंकादिल ।