यल महानगरपालिकां वइगु आर्थिक वर्ष २०८२–८३ या निति ७ अर्ब ४७ करोड बराबरया बजेट न्ह्यब्बःगु दु।

मङ्गलवाः महानगरपालिकां न्ह्यब्बःगु न्ह्यक्वःगु नगर सभापाखे वइगु आर्थिक वर्षया निति ७ अर्ब ४७ करोड बराबरया बजेट हःगु खः। महानगर उपप्रमुख मञ्जली शाक्य बज्राचाय उगु बजेट वक्तव्य वाचन यानादीगु खः।

महानगरपालिकां वइगु आर्थिक वर्षया निति प्रशासनिक खर्चपाखे २९ प्रतिशत व पुँजीगत खर्चपाखे ६१ प्रतिशत बजेट विनियोजन यानागु दु धका नगरप्रमुख चिरीबाबु महर्जनं धाःगु खः।

वयकलं शिक्षा, स्वास्थ्य व खानेपानीयात विशेष प्राथमिकताय् तया बजेट हयागु खः धका धयादीगु खः।

ऊर्जा, जलस्रोत नापं सिँचाइमन्त्री दीपक खड्का ऊर्जामन्त्रीस्तरीय बैठकय् ब्वति कायेत चीन झायादीगु दु।

साङ्घाई को–अपरेसन अर्गनाइजेसन (एससिओ)पाखें चीनया झेजियाङ प्रान्तया निङ्बो सहरय् ग्वसाःग्वइगु न्याक्वःगु ऊर्जामन्त्रीस्तरीय बैठकय् ब्वति कायेत सोमबाः चान्हय् उखेपाखे झायादीगु खः।

बैठकय् थी थी देसं याःगु ऊर्जा विकास व आः यायेगु सहकार्यया थी थी विषय सहलह जुइगु ऊर्जामन्त्रीया सचिवालयं धाःगु दु। थ्व हे जुन २३ निसें सुरु जूगु बैठक जुन २७ तारिख तक जुइ। उगु बैठकय् ग्वसाः खलः देय् चीनलिसें भारत, इरान, काजकिस्तान, पाकिस्तान, रसिया, ताजकिस्तान, उर्वेस्थानलिसें गुगू दुजः देय्, स्वंगू पर्यवेक्षक देय् व १४ गू संवाद देय्या ऊर्जामन्त्री तय्सं ब्वति काःगु दु।

मन्त्री खड्कां जुन २६ य् जुइगु ‘इन्टरग्रेटेड इनोभेसन फर इनर्जी फ्युचर’ सम्बन्धी ज्याझ्वःया उलेज्याय् मन्तुना तइगु व उकुन्हुया थी थी बैठकय् ब्वति काइगु ज्या धलः दुगु ऊर्जामन्त्री खड्काया सचिवालयं धाःगु दु।

लिसें जुन २७ य् चीनया राष्ट्रिय ऊर्जा प्रशासकलिसे निगूपक्षीय नाप लायेगु नापं सहलह यायेगु ज्याझ्वः नं क्वःछिनातःगु दु।

फोतो पत्रकार क्षितिज अरुण श्रेष्ठ ५५ दँय् आकाझाका मन्त। नेपालभाषाया न्हिंपौं बिश्वभूमिपाखें फोतो पत्रकारता यानादिम्ह श्रेष्ठ लिपाःगु इलय् थीथी संचार माध्यमय् फोतो पत्रकार ज्या यानादिगु खः।

वयकःया कुतलय् नेपाल ओलम्पकि संग्राहलय व नेपाल कल्चर संग्राहलय चायेकादिगु खः। वयकः थ्व निगूलिं संग्राहलयया संस्थापक नायः खः। मदुम्ह श्रेष्ठया जहान नापं छम्ह म्याय् दी।

उपराष्ट्रपति रामसहाय प्रसाद यादवयात नेपाःया नितिं संयुक्त राज्य अमेरिकाया राजदूत डिन आर थम्प्सनं थौं लैनचौरय् च्वंगु उपराष्ट्रपतिया ज्याकुथिइ नापलानादीगु दु।

उगु झ्वलय् भिंतुना कालबिललिसें जूगु खँल्हाबल्हाय् नेपाल–अमेरिका सम्बन्धया थी थी आयाम, निगूपक्षीय ग्वाहालि, कूटनीतिक साझेदारी व आः वइगु सम्भावनाबारे सहलह जूगु उपराष्ट्रपतिया सचिवालयं धाःगु दु।

उपराष्ट्रपति यादवं सन् १९४७ य् कूटनीतिक सम्बन्ध स्थापना जुइ धुंकाः निगुलिं मुलुक दथुइ सुमधुर नापं थ वं थः हनाबना तयेगुलिइ आधारित सम्बन्ध दयावयाच्वंगु धयादिल। वय्कलं धयादिल, “लोकतन्त्र, मानव अधिकार व स्वतन्त्रता झीगु मंकाः मूल्यमान्यता खः, गुकिं झीगु सम्बन्धयात अझ धिसिलाकूगु दु ।”

वय्कलं सन् १९५१ निसें अमेरिकी सरकारं नेपाःयात बिया वयाच्वंगु विकासया ग्वाहालियात सुभाय् बियादिसें आर्थिक–सामाजिक विकास व लोकतान्त्रिक सुदृढीकरणय् अमेरिकाया योगदान च्वछाये बहःजूगु धयादिल। उपराष्ट्रपति यादवं नेपाल सरकारं सानफ्रान्सिस्को व ड्यालासय् स्थापना यानातःगु महावाणिज्य दूतावासपाखें नेपाली डायस्पोरायात कन्सुलर सेवा प्रवाह जुइगु भलसा प्वंकादिसें व्यापार, प्रविधि नापं लगानीया ख्यलय् थवंथः सहकार्य अझ सुदृढ यायेगुपाखे नं नेपाः प्रतिबद्ध दूगु न्ह्यथनादिल।

नेपाः सन् २०२६ तक अल्पविकसित देय्या श्रेणीं स्तरोन्नति जुइत्यंगु सन्दर्भय् उपराष्ट्रपति यादवं थुगु उपलब्धिया नितिं अमेरिका थेंजाःगु विकास साझेदारतय्गु सक्रिय व दीर्घकालीन सहकार्यया आवश्यकता जूगु वय्कलं धयादिल। वय्कलं मिलेनियम च्यालेञ्ज कर्पोरेशन (एमसिसी)अन्तर्गत सञ्चालित पूर्वाधार परियोजना व युएसएआइडीपाखें जुयाच्वंगु ज्याझ्वः पुनःसञ्चालन जुइगुलिइ आशावादी जूगु न्ह्यथनादिल।

उगु झ्वलय् राजदूत थम्प्सनं एमसिसी, युएसएआइडीलिसें मेमेगु विकास परियोजना सकारात्मक रुपं मद्दिक लँपुइ न्ह्याःवनाच्वंगु धयादिल । वय्कलं अमेरिकाय् नेपाःया समुदाय तसकं सक्रिय व जीवन्त भूमिका म्हिताच्वंगु न्ह्यथनादिसें नेपाल व अमेरिका थवंथः सहकार्य यानाः महत्वपूर्ण ज्या यायेफइ धकाः धयादिल।

प्रधानमन्त्री केपी शर्मा ओलीयात राष्ट्रिय सहकारी महासङ्घं सहकारी ख्यःयात नियमनया झ्वलय् लिकुंके मज्यूगु विषयकय् थौं ध्यानाकर्षण याःगु दु।

प्रधानमन्त्री निवास, बालुुवाटारय् थौं नाप लायेगु झ्वलय् महासङ्गया अध्यक्ष ओमदेवी मल्ललिसेंया टोलीं नेपाल राष्ट्र बैंङ्क व सहकारी प्राधिकरणपाखें पिकाःगु निर्देशिका व मापदण्डय् स्रोत सङ्कलनया सीमाअन्तर्गत १० प्रतिशत निक्षेप व १५ प्रतिशत ऋणया व्यवस्था सन्तुुलित मजूगु, दुजः जूगु स्वलाया दुने कारोबार याये फइगु व्यवस्था जुइमाःगु माग तयातःगु दु।

नेकपा (एमाले)या केन्द्रीय सहकारी नापं गरिबी निवारण विभागया प्रमुख खगराज अधिकारी, पूर्वमन्त्री नापं महासङ्घया पूर्व अध्यक्ष केशव बडाल, भूमि व्यवस्था, सहकारी नापं गरिबी निवारण मन्त्रालयया सचिव केदारनाथ शर्मालिसें ब्वति काःगु सहलहय् प्रधानमन्त्री ओलीं सम्बन्धित ख्यःया सहज सञ्चालन व व्यवस्थापनया नितिं कानुन, नीति व निर्देशिकात हइगु जूगुलिं उगु कथं प्रबन्ध यायेत सरकारं सहजीकरण याइगु भलसा बियादिल।

सहकारी सम्बन्धी छुं छुं नेपाल ऐनयात संशोधन यायेत हःगु अध्यादेशयात प्रतिस्थापन यायेत हःगु विधेयकया गुलिखे प्रावधानयात परिमार्जन यायेत सुुझाः लःल्हाःगु खः।