लुँया भाः थौ तोलां १ हजार ६०० तका कुहावःगु दु। लुँ तोला १ हजार ६०० तका कुहावया थौ २ लाख ७३ हजार ९०० तका न कारोबार जुयाच्वंगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां ८० तका थौ थहावंगु दु। वहः तोलां ८० तका थहावना ४ हजार ५०५ तका न कारोवार जुगु दु धका महासङ्घं धाःगु दु।

राष्ट्रपति रामचन्द्र पौडेलयात निर्वाचन आयोग नेपालं वंगु फागुन २१ गते क्वचाःगु प्रतिनिधिसभा दुजः निर्वाचन २०८२ या प्रतिवेदन पेस याःगु दु।

राष्ट्रपति पौडेलयात राष्ट्रपति भवन शितल निवासय् थौं ग्वसाः ग्वःगु ज्याझ्वलय् आयोगया कार्यवाहक प्रमुख आयुक्त रामप्रसाद भण्डारीं उगु प्रतिवेदन पेस यानादिल।

उगु झ्वलय् राष्ट्रपति पौडेलं कठिन व जटिल परिस्थितिइ नं मन, बचं व कर्मं चान्हि मधाःसे जुयाः निर्वाचन सफल जुइक क्वचाःगुलिं लसता प्वंकादिल। वय्कलं निर्वाचन सफल जुइक पूवंकूगुलिं निर्वाचन आयोग, राष्ट्रसेवक कर्मचारीलिसें सम्बद्ध फुक्क पक्षतय्त सुभाय् बियादिल।

“फागुन २१ गते प्रतिनिधिसभा दुजः निर्वाचन स्वतन्त्र, निष्पक्ष व भयमुक्त वातावरणय् पूवंकाः आयोगं थःगु भाला सफल जुइक पूवंकूगु दु, गुकिं निर्वाचन आयोग व निर्वाचन प्रणालीप्रति आम नागरिकतय्गु विश्वास अभिवृद्धि जुयाः लोकतन्त्र अझ क्वातूगु जिं तायेकागु दु,” राष्ट्रपति पौडेलं धयादिल।

वंगु फागुन २१ गते क्वचाःगु प्रतिनिधिसभा दुजः निर्वाचन  छम्ह मतदाता २८४ तका खर्च जूगु निर्वाचन आयोगं धाःगु दु। प्रतिनिधिसभा दुजः निर्वाचनया मुक्कं प्रतिवेदनय् निर्वाचन लिच्वः राष्ट्रपति रामचन्द्र पौडेलयात लःल्हाये धुंकाः थौं आयोगं ग्वसाः ग्वःगु पत्रकार सम्मेलनय् सहसचिव लिसें प्रवक्ता नारायणप्रसाद भट्टराईं निर्वाचन खर्चयात मितव्ययी यायेत आयोगपाखें थ्व स्वयां न्ह्यः खरिद याःगु सामग्री छ्यलेगु नीति नालाकाःगु जानकारी बियादिल।

निर्वाचन सामग्री खरिदय् सरकारया स्वमित्वय् दूगु सङ्गठित संस्थालिसे सम्झौता यानाः खरिद याःगु नं वय्कलं कनादिल। ५० ताजि निर्वाचन सामग्रीमध्ये ३७ ताजि निर्वाचन सामग्री प्रदेश लिसें जिल्ला निर्वाचन ज्याकुथिपाखें हे खरिद याःगु खः। १३ ताजि सामग्री आयोगं खरिद यानाः जिल्लागत रूपं ढुवानी याःगु खः। निर्वाचन प्रयोजनया निंतिं आयोगं ७ अर्ब ८१ क्वति ५ लख ७६ द्वः दां माग याःगुलिइ अर्थ मन्त्रालयं ६ अर्ब ७६ क्वति ६६ लख ९० द्वःया स्रोत सहमति वःगु खः।

वःगु ध्यबा मध्ये आःतक ३ अर्ब ५४ क्वति २८ लख व ७९६ खर्च जूगु खः। खर्चया दायित्व सिर्जना जूगुमध्ये छुंछुं ध्यबा भुक्तानी याये ल्यंदनिगु जानकारी आयोगं याकूगु खः ।निर्वाचनय् स्वदेशी व विदेशी पर्यवेक्षकतय्सं पर्यवेक्षण यायेगु व्यवस्था दयेकातःगुलिइ अन्तरराष्ट्रिय पर्यवेक्षणपाखे २२ गू कूटनीतिक निकायया १६४ म्ह प्रतिनिधि व स्वगू अन्तरराष्ट्रिय गैरसरकारी संस्थाया प्रतिनिधितय्सं पर्यवेक्षण याःगु खः।

राष्ट्रियपाखे ३५ गू गैरसरकारी संस्थां पर्यवेक्षण याःगु खः। विशिष्ट परिस्थितिइ घोषणा जूगु प्रतिनिधिमूलक लोकतन्त्रया थ्व अभ्यासय् ब्वति कयाः थःगु मताधिकारपाखें प्रतिनिधि ल्ययेगु, कानुन निर्माण व राज्य सञ्चालन प्रक्रियाय् संलग्न जुइगु लिसें सरकार निर्माण व शासन सञ्चालनय् सहभागी जुइगु प्रक्रियायात पूर्ण यानाब्यूगुलिं फुक्क मतदातातय्त आयोगं सुभाय् देछागु दु।

निर्वाचन पूवंकेगु ज्याय् संलग्न जुयाः थःथःगु थासं भूमिका म्हितूगु नेपाल सरकार, प्रदेश सरकार, स्थानीय तह, मुख्य निर्वाचन अधिकृत÷निर्वाचन अधिकृत, फुक्क सुरक्षा निकाय, निर्वाचनय् संलग्न कर्मचारी, सुरक्षाकःमि, राजनीतिक दल, उम्मेदवार, मतदाता, पर्यवेक्षक, अन्तरराष्ट्रिय समुदाय, सञ्चारमाध्यम लिसें सञ्चारकःमि सकलसित नं आयोगं सुभाय् ब्यूगु खः।

वंगु फागुन २१ गते क्वचाःगु प्रतिनिधिसभा सदस्य निर्वाचन अन्तर्गत समानुपातिकपाखे निर्वाचित जूपि ११० म्ह सांसद तय्त दसिपौ थौ लःल्हागु दु।

निर्वाचन आयोगय् छगु ज्याझ्वः दथुइ खुगु दलपाखे समानुपातिक प्रणालीइ निर्वाचित जूपि सांसद तय्त थौ दसिपौ लःल्हायेगु ज्या न्ह्यागु दु।आयोगं वंगु सोमवाः ११० म्ह समानुपातिक सांसद तयेगु धलः सार्वजनिक याःगु खः।

सार्वजनिक याःगु धलः कथं राष्ट्रिय स्वतन्त्र पार्टी (रास्वपा)या ५७, नेपाली कांग्रेसपाखे २०, नेकपा एमाले पाखे १६, नेपाली कम्युनिष्ट पार्टीपाखे ९, श्रम संस्कृति पार्टी व राष्ट्रिय प्रजातन्त्र पार्टी (राप्रपा) पाखे प्यम्ह, प्यम्ह सांसद निर्वाचित जूगु खः।थौ

सांसद तय्त निर्वाचित जूगु दसिपौ लःल्हाय् धुका थौ हे प्रतिनिधिसभा सदस्य निर्वाचन, २०८२ या निर्वाचन लिच्वः याःगु प्रतिवेदन राष्ट्रपति रामचन्द्र पौडेलयात लःल्हायेगु तयारी आयोगं याःगु दु।