सञ्चार लिसे सूचना प्रविधिमन्त्री पृथ्वीसुब्बा गुरुङं नेपाली सञ्चार माध्यम व सञ्चार सम्बद्ध संघ संस्थायात समावेशी दयकेगु निति थःगु पाखे माःगु कुतः यायेगु जुइ धका धयादीगु दु।

नेवाः पत्रकार राष्ट्रिय दवू न थौ मातृभाषा पत्रकारिता बिषया ध्यानाकार्षण पौ लःल्हायेगु ज्याझ्वलय् वयकलं अथे धयादीगु खः। नेपाली सञ्चार माध्यम लिसे सञ्चार सम्बद्ध संघ संस्था समावेशी जुइ मफुगुुलि दक्को समुदायया सः याःगु प्रतिनिधित्व जुइ मफुगु धका धयादीसे वयकल थःगु पाखे मागु कुतः यायेगु धका धयादीगु खः।

दबू न थौ च्यागु बुँदे ध्यानाकर्षण पौ लःल्हाना कयादीसे सञ्चार सम्बद्ध संघ संस्थायात संरचना समावेशी दयेकेत माग यानादीगु खः। प्रेस काउन्सिल, सूचना विभाग, न्यूनतम पारिश्रमिक निर्धारण समिति नाप सरकारी सञ्चार माध्यमया नेतृत्वय् समानुपातिक सहभागिताया आधारय् समावेशी दयकेत दबू न माग यानादीगु खः।

सरकारं लोक कल्याणकारी विज्ञापन बिइगु इलय् मातृभाषाया न सन्देश बिइगु कथं दबू न मन्त्री गुरुङया ध्यानाकर्षण याकूगु खः। अथेहे, सञ्चार मन्त्रालयय् पाखे पत्रकार सम्बद्ध संघ संस्थायात बियावया च्वंगु अनुदानय् न जातीय पत्रकार संघयात दुथ्याकेत दबू न माग यानादीगु खः।

उगु ज्याझ्वलय् दबूया अध्यक्ष नृपेन्द्रलाल श्रेष्ठं जगतमान वैद्य (धर्मादित्य धर्माचार्य) या नामय् हुलाक टिकट प्रकाशन यानादीत न माग यानादीगु खः। वि.सं. १९८२ सालय् न्हापां वैद्यं नेपालभाषां ‘बुद्ध धर्म’ पत्रिका प्रकाशन यागु इतिहास दु धका वयकलं धयादीगु खः।

ज्याझ्वलय् नेपाल आदिबासी जनजाति पत्रकार महासंघ (फोनिज) या वरिष्ठ उपाध्यक्ष लक्की चौधरी, उपाध्यक्ष अमरध्वज लामा, दबूया निवर्तमान नायः सुरजबीर बज्राचार्य, बरिष्ठ न्बकु सुनिल महर्जन, न्वबु सुरेन्द्रभत्त श्रेष्ठ सल्लाहकारपि बिजयरत्न असबरे, किरण शाक्य नाप केन्द्रिय सदस्य नाप येँ, यल व ख्वप जिल्लाया प्रतिनिधिपिनिगु ब्बति दुगु खः।

प्रधानमन्त्री केपी शर्मा ओलीयात नेपाः भ्रमणय् वयाच्वंम्ह संयुक्त राज्य अमेरिकाया व्यवस्थापन लिसे स्रोतसम्बन्धी उप—विदेशमन्त्री रिचार्ड आर बर्मां थौ लापलागु दु।

प्रधानमन्त्री लिसे मन्त्रिपरिषदया कार्यालय, सिंहदरबारय् नापलायेगु झ्वलय् निगु पक्ष दथुइया सम्बन्ध व हितया विषय सहलह जूगु दु। नेपाःया आर्थिक व सामाजिक विकासया ख्यलय् सन् १९५० निसे अमेरिकी सरकारं निसे निरन्तर ग्वहालिया निति सुभाय् बियादीगु खः।

प्रधानमन्त्री ओलीं नेपाःया विकासय् थीथी ख्यलय् ग्वहालि याइगु भलसा कयादीगु खः। प्रधानमन्त्री ओलीं नेपाल सन् २०२६ दुने अल्पविकसित देय् या स्तनोन्नती जुइगु झ्वलय् व राजनीतिक सहमतिया आधारय् नेपाःया सङ्क्रमणकालीन न्यायसम्बन्धी कानुनया विषय क्वछिइगु झ्वलय् दु धका जानकारी बियादीगु खः।

अथेहे उपमन्त्री बर्मां निगु देशय् दथुइ ७७ दँनिसे दुगु सम्बन्धय् निगु पक्ष दथुइया सम्बन्ध लुमकादीसे नेपाःया विकासय् साझेदार जुइ दइगु अमेरिकाया निति लसताया विषय खः धका धयादीगु खः। वयकलं धयादीगु दु नेपाःया संक्रमणकालीन न्याय क्वछिइ थाय् थ्यःगुलि भिंतुना देछानादीगु खः।

नापालायेगु ज्याझ्वलय् प्रधानमन्त्रीया मुख्य सल्लाहकार विष्णुप्रसाद रिमाल, प्रमुख स्वकीय सचिव राजेश बज्राचार्य, पराराष्ट्र मन्त्रालयका अधिकारीपिनिगु ब्बति दुगु खः।

यलय् थुगुसि मतयाः जात्रा लोककीर्ति महाविहार नकबहिलिं जुइत्यःगुु दु ।

दँय्दसं गुलांगा दुतिया कुन्हु जुइगु मतयाः जात्रा यलया झिगू त्वालं पाः कयाः न्ह्याका वयाच्वंगु कथं थुगुसी नकबहीयात पाः लाःगु दु। न्यकू जात्रा मतयाः संचालन मूल समारोह समिति क्षेत्र नं. १ नकबहिलिं म्हिगः छगू पत्रकार सम्मेलनय यासें जानकारी बिउगु दु।

थ्व हे वइगु भदौ ५ गते बुधवाः सुथसिया ४ बजे नकबहिली मुनाः मतयाः न्ह्याकेगु जानकारी बिउगु खः। झिंप्यसःदँ न्ह्यः लिच्छवि जुजु बालार्चन देवं ज्येष्ठवर्ण महाविहार तंगःबहाः स्थापना याःगु लसताय् मतयाः जात्रा न्ह्याकूगु व थुगु जात्रा निरन्तर रुपं न्ह्याना वयाच्वंगु खँ समितिया महासचिव आशारत्न शाक्यं कनादीगु दु।

मदयेधुंकूपिं थः छेँजःपिनि आत्माशान्ति व निर्वाण कामना यासें मतयाः वनेगु चलन दु । मतयाः वनेबलय् द्यःथाय् पतिकं धुं, धुपाँय्, कपू, ध्यबा, मरिचरि आदि छायेगु चलन दु।

शेयर बजारय् थौ झण्डै ३० अर्ब तका ऐतिहासिक कारोबार जूगु दु। थ्व स्वया न्ह्यः वंगु सोमवाः २७ अर्ब २४ करोड तकाया कारोबार जुगु खःसा थौ २९ अर्ब ९५ करोड तका स्वया अप्पो कारोबार जूगु दु।

६ करोड ८९ लाख ८० हजार कित्ता शेयर २९ अर्ब ९५ करोड ८५ लाख तकाया कारोबार जूगु खः। दकलय् अप्पो हिमालयन रि इन्सुरेन्स कम्पनीया ९१ करोड ३३ लाख तकाया शेयर कारोवार जुगु दु। नेप्सेय् थौ ३ हजार विन्दुइ थ्यःगु दु।

नेप्से थौ ४३ दशमलव शून्य ५ ल्याखं थहावना ३ हजार दशमलव ८१ विन्दइ थ्यःगु दु। न्हिनय् २ बजे शेयर बजाः ३ हजार ३६ विन्दुइ तक थ्यःगु दु। बन्द जुइगु इलय् धासा ३ हजार विन्दइ थ्यःगु खःसा नेप्से थौ स्वदँलिपा दकलय् अप्पो विन्दुइ थ्यःगु खः।

स्वगू कम्पनीया थौ शेयर थौ १० प्रतिशत स्वया अप्पो थहावंगु खः। समग्र बजाः थहावंगु दिं नेपाल फाइनान्सया शेयर धासा १० प्रतिशतले कुहावंगु खः।

नेपाल आयल निगमं पेट्रोल, डिजेल व मचिकंया भाः क्वकाःगु दु। थौ बिहवाः बहनी च्वंगु आयल निगमया संचालक समितिया बैठकं पेट्रोलया भाः लिटरं न्यातका, डिजेल व मचिकं लिटरं स्वतका क्वकाःगु दु।

न्हुगु भाः थौ बिहीवाः चान्ह्यः १२ बजे निसें लागू जुइ। अथेहे चराली, विराटनगर, जनकपुर, अमलेखगंज, भलबारी, नेपालगंज, धनगढी व वीरगंज क्षेत्रय् पेट्रोल लिटर १६२, डिजेल व मचिकं १५२ कायम जुइ।

सुर्खेत व दाङय् पेट्रोल १६४, डिजेल व मचिकं १५४ तका क्वःछ्यूगु दु। स्वनिगः, पोखरा व दीपायलय् पेट्रोल लिटर १६५ व डिजेल व मचिकं लिटरं १५५ क्वःछ्यूगु दु धका निगमं जानकारी ब्यूगु दु।