जनता समाजवादी पार्टी (जसपा) पार्टी अध्यक्ष उपेन्द्र यादवया नेतृत्वय सरकारय् वनिइगु जुगु दु।

प्रधानमन्त्री पुष्पकमल दाहाल प्रचण्डं बुधवाः मन्त्रिपरिषद् विस्तार यागुलि जसपां मन्त्री मछ्वःगु खः। आः पार्टी अध्यक्ष यादव उपप्रधान लिसे स्वास्थ्यमन्त्री जुइ धका जसपा सांसद प्रदीप यादवं जानकारी बिःगु दु।

जसपा नेता यादवया कथं जसपायात मेगु छगु मन्त्रालय बिइगु जुगु दु सा मेम्ह सु मन्त्री यायेगु धइगु क्वछिउगु मदुनि। जसपापाखे मेम्ह मन्त्री यायेगु निति प्रदीप यादव व नवलकिशोर यादव मध्ये छम्ह जुइगु सम्भावना दु।

जसपापाखे राज्यमन्त्रीया निति सुशीला श्रेष्ठयात यायेगु बारे सहलह जुयाच्वंगु दु।

सरकारया प्रवक्ताया जिम्मेवारी सञ्चार लिसे सूचना  प्रविधिमन्त्री रेखा शर्मायात बिगु दु।

थौ बिहीवाः च्वंगु मन्त्रिपरिषदया न्हापागु बैठकय् मन्त्री शर्मायात सरकारया प्रवक्ता दयकेगु क्वछिगु दु। वयकः थ्व स्वया न्ह्यःया सरकारय् न प्रवक्ता जूयादीगु खः।

मन्त्रिपरिषद् बैठकया निर्णय सार्वजनिक यासे प्रवक्ता शर्मां संयुक्त राष्ट्रसंघया कमिसनअन द स्ट्याटस अफ वुमन सीएसडब्ल्यूया ६८ क्वःगु सत्रय् ब्बति कायेगु निति महिला, बालबालिका लिसे ज्येष्ठ नागरिकमन्त्री भगवती चौधरीयात स्वीकृति बिइगु निर्णय जुगु जानकारी बियादीगु खः।

नेपाःया बजारय् लुँ भावं न्हुगु रेकर्ड तःगु दु। लुँया भाः आतक हे दकलय् अप्पो थ्यःगु दु। नेपाल सुनचाँदी व्यवसायी महासङ्घया कथं थौ लुँ तोलां १ हजार ५ सय रुपैयाँ थहावना १ लाख २५ हजार रुपैयाँ थ्यःगु दु।

अथेहे वहःया भाः न थौ तोलां स्वीतका थहावःगु दु। वहः तोलां स्वीतका थहावना १ हजार ४ सय ७० रुपैयाँ न कारोबार जुयाच्वंगु दु धका महासङ्घं धाःगु दु।

समाजसेवी माोतिशान्ति शाक्य ललितपुर उद्योग वाणिज्य संघय् छात्रवृत्ति नाप सामाजिक उत्तर दायित्व समितिइ सल्लाहकार मनोनित जुयादीगु दु।

वयकःयात अध्यक्ष बिश्वराज बज्राचार्यं संघय् छात्रवृत्ति लिसे सामाजिक उत्तर दायित्व समितिइ शर्मिला श्रेष्ठ जोशीया संयोजकत्वय् फाल्गुण २३ गते बुधवाः च्वंगु सचिवालयया वैठकं मनोनित याःगु खः।

किपू नगरपालिका वडा नम्बर १ या वडाध्यक्ष हिरालाल महर्जन मन्त। क्यान्सर ल्वचं पीडित  जूयाच्वम्ह महर्जन थौ चान्ह्यः वयकःया हे छेँय् मदुगु खः।

अस्पतालं महर्जनलयात म्हिगः हे छेँय् हःगु खः। वडाध्यक्ष महर्जनया पार्थिव शरीर थौ किपू नगरपालिकाया कार्यालयय् श्रद्धाञ्जली बिइगु निति तइगु जुगु दु।

६० दँ दुम्ह वयकः महर्जन २०७९ य् नेपाली कांग्रेसपाखे किपू कीर्तिपुर नगरपालिका वडा नम्बर १ या अध्यक्षय् निर्वाचित जूगु खः।