नेकपा माओवादी केन्द्रया अध्यक्ष पुष्पकमल दाहाल प्रचण्ड चःबि दया घाःपाः जुगु दु।

वंगु चान्ह्यः चःबि दगू खः। स्रोतं ब्यूगु जानकारी कथं वयकःया छ्यनय् घाः जुगु दु। चान्ह्यः हे उपचारया निति मेडिसिटी अस्पताल यकूगु खः।

अस्पतालय् सामान्य उपचार लिपा छेँय् लिहावःगु दु।

वामपन्थी नेता प्रदीप नेपाल मन्त। वयकः ७१ दँय् म्हिगः न्हिनय् नर्भिक अस्पतालय् मदुगु खः।

वयकः पार्किन्सन ल्वचं पीडित जुयाच्वंम्ह खः। लिपागु इलय् राजनीति ख्यःपाखे तापाक्क च्वना च्वम्ह खः।

पूर्व शिक्षामन्त्री, सञ्चार, सूचना लिसे प्रविधिमन्त्री जुयादीम्ह नेकपा एमालेया पूर्व स्थायी कमिटी सदस्य न जुयादी।

श्री हल्चोक आकाश भैरव झीनिदँ जात्राया झ्वलय् येँया ताम्सिपाखाय् राजेन्द्र रजकं तरवार छानादीगु दु। तरवार छायेगु झ्वलय् रजकं श्री हल्चोक आकाश भैरव द्यःयात तरवार छायादीगु खः।

अथेहे श्री महाकाली व श्री दक्षिणकालीयात खन्जड छायादीगु खः।

दँय्दसं वैशाख शुक्ल नवमीया दीं न्यायेकीगु राष्ट्रिय विभूति सीता उत्पत्ति दिवस लिसें जयन्ती थौं सीतायात श्रद्धा भक्तिपूर्वक पुजा आराधना यानाः न्यायेकूगु दु।

त्रेतायुगय् मिथिलाया जुजु जनकं तःधंगु यज्ञ यानाः विधि पूवंक बुँ पालेगु झ्वलय् सीता उत्पत्ति जूगु बाखं रामायणलिसें वैदिक दर्शनया धर्मग्रन्थ लिसें पुराणय् वर्णन यानातःगु दु।

भगवान् विष्णुया खुगूगु अवतारया कथं अयोध्याया राजा दशरथया काय् श्रीरामया जन्म जुइ धुंकाः लक्ष्मी सीताया कथं उत्पत्ति जूयादीगु वर्णन थीथी ग्रन्थय् यानातःगु दु। सीतायात सत्यवती, पतिव्रता लिसें आदर्श नारीया कथं हनेगु याइ। अयोध्याया जुजु दशरथया काय् राजकुमार रामनाप सीताया इहिपा जूगु खः।