लुँ तोलां थौ न्यासः थहावंना आःतक या हे न्हुगु कीर्तिमान तःगु दु। लुँ तोलां थौ १ लाख ७१ हजार ३ सय तका न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथेह वहः तोलां थौ झीन्यातका कुहावःगु दु। वहः तोलां झीन्यातका कुहावया १ हजार ९ सय ७० रुपैयाँ कायम जुगु दु धका महासङ्घं धाःगु दु।

अखिल नेपाल भिक्षु महासङ्घं थ्व हे फागुन २० निसें २५ गतेतक लुम्बिनीइ त्रिपिटक वाचन यायेत्यंगु दु। मुलुकय् धार्मिक पर्यटन प्रवद्र्धन नापनापं राष्ट्रिय व अन्तरराष्ट्रिय तहय् बौद्ध साहित्यया प्रचारप्रसार यायेगु निति बुद्ध बूगु थाय् लुम्बिनीइ च्वंगु मायादेवी देगः लागाय् त्रिपिटक पाठ (वाचन) यायेत्यंगु खः।

शाक्यमुनि बुद्धं बोधिसत्व कायेत ताःलाके धुंकाः थ्यंमथ्यं ४५ दँ तक थीथी थासय् मद्दिक ब्यूगु उपदेश नापं आध्यात्मिक ज्ञान सङ्ग्रहित ग्रन्थ त्रिपिटक खः। महासङ्घया दांभरि भिक्षु बोधिज्ञानया कथं अभिधर्म, सुत्र व विनय यानाः स्वब्वय् ब्वथला तःगु त्रिपिटकयात बौद्ध साहित्यया मूल ग्रन्थ धायेगु याः।

उगु ग्रन्थयात थी थी भाषं अनुवाद यानातःगु दु। थेरवाद, महायानलिसें दक्व सम्प्रदायया बौद्ध धर्मावलम्बीतय्सं नालीगु थुगु ग्रन्थयात सम्बन्धित सम्प्रदायया धार्मिक प्रभाव कथं अभ्यास याःगु झीसं खंकेफु। त्रिपिटक वाचनय् नेपाल, भारत, श्रीलङ्का, म्यान्मा, थाइल्यान्ड, कोरिया, जापानलिसें एसियाली देय्या भिक्षु, धर्मगुरु व अनुयायीतय्सं ब्वति काइ।

अन्तरराष्ट्रिय युवा भिक्षु महासङ्घया केन्द्रीय उपाध्यक्ष भिक्षु तपस्वीं अन्तरराष्ट्रिय समुदाय तय्त लुम्बिनीया पुरातात्विक महत्वया सम्पदास्थलबारे प्रचार नापं तीर्थाटन यायेत प्रेरित यायेत, बौद्ध शिक्षा, साहित्य नापं दर्शनया महत्वबारे खँ थुइकेत त्रिपिटक वाचन ज्याझ्वलं ग्वाहालि याइगु धयादिल।

ज्याझ्वलय् बुद्ध वचनया सङ्ग्रं त्रिपिटक अन्तर्गतया विनय पिटक, सूत्र पिटक व अभिधर्म पिटकया वाचन याइगु जुइ।

सरकारं क्वःछिनातःगु मापदण्ड कथं श्रम स्वीकृति कयाः जक वैदेशिक लजगाय् वनेत नेपाली दूतावास बैंककं हाकनं इनाप याःगु दु।

कम्बोडिया, लाओस, म्यानमार व थाइल्याण्डलिसेंया देशय् नेपाली नागरिक अलपत्र जूगु व उद्धारयाये थाकुया च्वंगु धासें दूतावासं प्रक्रिया पूवंका जक वैदेशिक लजगाय् वनेत हाकनं इनाप याःगु खः।

अनलाइन स्क्यामिङ ज्याय् छ्यलातःपिं नेपाःमियात नेपाली राजदूतावासं थाइल्याड सरकारया ग्वाहालिइ म्यानमारया मेवाडीं उद्धार याःगु दु। उगु दूतावासं सोमबाः निम्ह नेपाःमियात उद्धार यानाः नेपाः लित छ्वःगु खः।

दूतावासं सुयागुं लोभय् मलासें याकनं, यक्वः ध्यबाः कमे याये धयागु बिचाः याना वैदेशिक लजगाय् मवयेत स्वापू दूपिं सकसितं हाकनं इनाप याःगु दु।

सञ्चार नापं सूचना प्रविधिमन्त्री पृथ्वी सुब्बा गुरुङं राष्ट्रिय एकता व सामाजिक सद्भाव दयेका तयेत सामाजिक सञ्जालया सञ्चालन, छ्यलाबुला नापं नियमन यायेगु सम्बन्धय् व्यवस्थापन यायेत दयेकूगु विधेयक जरुरी जूगु धयादीगु दु।

न्यूनतम पारिश्रमिक निर्धारण समितिं थौं ‘श्रमजीवी पत्रकार ऐन कार्यान्वयन व ऐन संशोधनया सम्बन्ध’ य् ग्वसाः ग्वःगु अन्तक्र्रिया ज्याझ्वः मन्त्री गुरुङं सामाजिक सञ्जाल नियमन सम्बन्धी दयेकेत्यंगु विधेयकं छुं नं मिडिया व अनलाइन माध्यमत बन्द यायेगु मखुसे सामाजिक सञ्जालय् यःयःथे समाज व राष्ट्र विरोधी अभिव्यक्ति नियमन यायेत्यंगु खँ ध्वाथुइकादिल।

नेपाल सरकारया प्रवक्ता तकं जुयादीम्ह मन्त्री गुरुङं धौं थें ख्वया च्वंगु समाजय् सामाजिक सञ्जालय् प्वंकीगु गुलिखे अराजक अभिव्यक्ति लोकतन्त्र विरोधी जूगु न्ह्यथनादिसें आःया सरकार लोकतन्त्र व प्रेस स्वतन्त्रताया पक्षधर जूगु धयादिल।“जिमिसं विधेयकपाखें सामाजिक सञ्जाल दुरुपयोग याइपिं व लोकतन्त्रय् दख्खल बिइपिंत नियमन यायेत्यंगु खः, छुं नं मिडिया, पत्रकार व नागरिक तय्गु सः क्वतेलेगु कुतः यानागु मखु।” राष्ट्रियसभाय् सहलहया झ्वलय् दूगु उगु विधेयकय् नेपाल पत्रकार महासङ्घ व स्वापूदुपिंसं सांसद तय्त आवश्यक दफावार संशोधन यायेत सुझाः बिइ फइगु मन्त्री गुरुङया धापू खः।

नेपाल पत्रकार महासङ्घं विधेयकविरुद्ध आन्दोलन यायेगु पलेसा विधेयक जनमुखी दयेकेत दफावार सहलह याना सुझाः बिइ फइगु वय्कलं धयादिल। “पत्रकारतय्सं आन्दोलन यायेगु मखु, बरु विधेयक बालांक दयेकेत थप सुझाः बिइमाः”, वय्कलं धयादिल, “सामाजिक सञ्जालसम्बन्धी दयेकेत्यंगु विधेयक बन्देज मखु, नियमन जक खः।”

अथे हे, मन्त्री गुरुङं न्यूनतम पारिश्रमिक निर्धारण समितिया ऐन संशोधन यायेगु नापं सशक्त निकाय दयेकेगुलिइ मन्त्रालय न्ह्याबलें मंकाःज्या यायेत तयार दूगु धयादिल।ज्याझ्वलय् राष्ट्रिय सूचना आयोगया प्रमुख आयुक्त डा सुरेश आचार्यं न्यूनतम पारिश्रमिक निर्धारण समितियात आर्थिक, जनशक्ति व ऐन स्वंगुलिं पक्षपाखें धिसिलाःगु संयन्त्र दयेकेमाःगु धारणा तयादिल।

सञ्चार मन्त्रालयया सचिव राधिका अर्यालं ऐन संशोधन यायेगु व आवश्यक बजेटया व्यवस्थापन यायेत थः प्रतिबद्ध जुयाच्वना धकाः धयादिल। वय्कलं मन्त्रालयया प्राथमिकताय् पत्रकारिता ख्यः तयातःगु खँ कनादिसें समितिया नीतिगत सुधार नापं आर्थिक सुधारय् मन्त्रालय सक्रिय जुइगु धयादिल।

ज्याझ्वलय् सार्वजनिक सेवा प्रसारण संस्था (पिएसबी)या अध्यक्ष डा महेन्द्र विष्ट, नेपाल प्रेस काउन्सिलया अध्यक्ष बालकृष्ण बस्नेत, नेपाल पत्रकार महासङ्घया अध्यक्ष निर्मला शर्मा, पत्रकार बबिता बस्नेत, सामाजिक सुरक्षा कोषया कार्यकारी निर्देशक कविराज अधिकारी, न्यूनतम पारिश्रमिक निर्धारण समितिया अध्यक्ष सङ्गीता खड्कापिन्स श्रमजीवी पत्रकार व पत्रकारिताया पक्षय् धारणा तयादीगु खः।

महाशिवरात्रिया झ्वलय् पशुपतिइ शोभायात्रा पिकाःगु दु। पशुपति क्षेत्र विकास कोषया ग्वसालय् पशुपतिनाथ मू देगः न्ह्यःनेया पश्चिम ध्वाखां न्ह्याकूगु उगु शोभायात्राया शुभारम्भ संस्कृति, पर्यटन नापं नागरिक उड्डयनमन्त्री बद्रीप्रसाद पाण्डें यानादीगु खः।

शोभायात्रा पश्चिम मू ध्वाखां भुवनेश्वरी चोक, चारशिवालय, पिङ्गलास्थान, गौशाला, जयवागेश्वरी, सिफल, लामपोखरी, चाबहिल गणेद्यः, चावहिलचोक, मित्रपार्क, उमाकुण्ड जुयाः भुवनेश्वरी चोकय् थ्यंकाः क्वचायेकूगु खः।

शोभायात्राय् मन्त्री पाण्डे व राज्यमन्त्री अरुणकुमार चौधरी, छ्याञ्जे विनोदप्रकाश सिंह, कोषया सदस्य सचिव डा मिलनकुमार थापा, दांभरि नारायणप्रसाद सुवेदी, कोष सञ्चालक परिषद्या दुजःत, कोषया कर्मचारी, स्थानीय सङ्घ संस्थाया प्रतिनिधि, साधुसन्त तय्गु नं ब्वति दूगु खः।