नेकपा एमालेया सचिव महेश बस्नेतं ख्वपया निर्वाचन क्षेत्र नम्बर २ पाखे उम्मेदवारी मनोनयन दर्ता याःगु दु।

नेता–कार्यकर्तानाप मंगलबार निर्वाचन अधिकृतया कार्यालय वना बस्नेतं उम्मेदवारी मनोनयन दर्ता यागु दु।

भरतपुर महानगरपालिकाया प्रमुख रेनु दाहालं थौं राजीनामा बियादीगु दु। वय्कलं उपप्रमुख चित्रसेन अधिकारीयात राजीनामा पत्र लःल्हानादीगु खः।

दाहालं प्रतिनिधिसभा निर्वाचनय् उम्मेदवारी बिइगु निंतिं महानगर प्रमुखया पदपाखें राजीनामा बियादीगु खः। नेपाली कम्युनिष्ट पार्टीपाखें चितवन क्षेत्र नं ३ या उम्मेदवार जुयादीत्यंम्ह दाहालं कार्यपालिकाया बैठक लिपा थःगु निगूगु कार्यकालय् आःतक ग्वाहालियाःपिं सकसितं सुभाय् देछानादिल।

दाहालया राजीनामालिसें उपप्रमुख चित्रसेन अधिकारी कार्यवाहक प्रमुख जुयादीगु दु। अधिकारीं दाहालया नेतृत्वय् याये ल्यंदनीगु ज्यायात प्राथमिकता बिइगु धयादिल।

शिक्षा, विज्ञान लिसें प्रविधिमन्त्री महावीर पुनं थःगु पदपाखें राजीनामा बियादीगु दु।

मन्त्री पुनं सोमबाः सनिलय् प्रधानमन्त्री सुशीला कार्कीयात राजीनामा बियादीगु प्रधानमन्त्रीया प्रेस सल्लाहकार रामबहादुर रावलं धयादिल।

थ्वसिबें न्ह्यः ऊर्जा, सिँचाइ लिसें जलस्रोतमन्त्री कुलमान घिसिङ, सञ्चार लिसें सुचं प्रविधिमन्त्री जगदीश खरेल व युवा लिसें खेलकुदमन्त्री बब्लु गुप्तां नं थःथःगु पदपाखें राजीनामा बियादीगु खः।

नेपाल कम्युनिष्ट पार्टी (एमाले)या नायः लिसें पूर्वप्रधानमन्त्री केपी शर्मा ओलीं लोकतन्त्रय् विश्वास याइगु पार्टी जूगुलिं नेकपा एमाले न्ह्याथेंजाःगु अवस्थाय् नं चुनावय् न्ह्यब्वाइगु धयादीगु दु।

प्रतिनिधिसभा दुजःया निर्वाचनया सन्दर्भय् थौं गृहजिल्ला झापा थ्यंकादीबलय् चन्द्रगढी विमानस्थलय् सञ्चारकःमितलिसे खँल्हाबल्हा यानादिसें वय्कलं उगु धारणा प्वंकादिल। “शान्तिसुरक्षाया अवस्था बांलायेमाः,” वय्कलं धयादिल, “झीसं न्ह्याथेंजाःगु अवस्थाय् नं चुनावय् ब्वति कायेगु जुइ ।” निर्वाचन शान्तिपूर्ण, भयमुक्त व निष्पक्ष रुपं पूवनेमाःगु वय्कलं इनाप यानादिल।

थौं हे वय्कः येँपाखें चन्द्रगढी विमानस्थलय् थ्यंकादीबलय् कोशी प्रदेशया मुख्यमन्त्री हिक्मतकुमार कार्की, पार्टीया जिल्ला नायः प्रेम गिरीलिसें कार्यकर्तातय्सं लसकुस याःगु खः।न्ह्यःने वयाच्वंगु प्रतिनिधिसभा दुजःया निर्वाचनया ज्याधलःकथं थ्व हे माघ ६ गते उम्मेदवारतय्गु मनोनयन दर्ता जुइ।

नायः ओली झापा निर्वाचन लागा ल्याः ५ य् थःगु उम्मेदवारी दर्ता यायेत झायादीगु जिल्ला नायः गिरीं धयादिल।पार्टीं निर्वाचनया सन्दर्भय् ग्वसाःग्वइगु कार्यकर्ता भेला व बैठकतय्त नायः ओलीं संबोधन याइगु नं ज्याझ्वः दूगु वय्कलं कनादिल । वंगु भदौलय् जेनजी आन्दोलनं यानाः प्रधानमन्त्री पदं राजीनामा बिइ धुंकाः नायः ओली गृहजिल्लाय् न्हापांखुसी झायादीगु खः।

सञ्चार लिसें सुचं प्रविधि मन्त्रालयं थौं हे राजीनामा बियादीम्ह सञ्चार लिसें सुचं प्रविधिमन्त्री जगदीश खरेलयात बिदाइ याःगु दु।

थौं सनिलय् ग्वसाः ग्वःगु ज्याझ्वलय् मन्त्रालयया निमित्त सचिव उदय रानां वय्कःयात माला, खादा व दोहलपा बियाः मन्त्रालयपाखें बिदाइ यानादिल। मन्त्री खरेलं थौं हे सनिलय् प्रधानमन्त्रीयात थःगु राजीनामा पेस यानादीगु खः। जेनजी आन्दोलनया झ्वलय् नीस्वंगु वर्तमान सरकारय् वय्कः वंगु असोज ६ गते मन्त्री नियुक्ति जुयादीगु खः।

बिदाइ ज्याझ्वलय् वय्कलं प्यलाया दुने सञ्चार लिसें सुचं प्रविधिमन्त्रीया कथं देय् व जनताया सेवा यायेगु महत्वपूर्ण ह्वःताः चूलागु धयादिल। निवर्तमान मन्त्री खरेलं मन्त्रालय व मातहतया निकायपाखें थ्व ई जःछि पूवंकं ग्वाहालि जूगुलिं चिहाकःगु ई दुने नं यक्वः हे महत्वपूर्ण ज्या यायेगु ह्वःताः चूलागु धयादिल। वय्कलं धयादिल, “बःचा हाकःगु इलय् जुसां राज्य सञ्चालनया विषयय् यक्वः खँ सयेकेगु ह्वःताः चूलात, थन कयागु अनुभव देय् व जनताया निंतिं समर्पित यानागु दु।

जिगु ज्या पारदर्शी जू, मूल्याङ्कन यानादिसं। मन्त्रीया कथं ज्या सम्पादन यानाबलय् दुःखद् अनुभूति छुं यायेम्वाल। सकलें सुखद् व उपलब्धिमूलक, परिणाममुखी नापं सौहार्दपूर्ण जुल।” वय्कलं कर्मचारी बाय् राजनीतिकःमिया याकःचिया कुतलं देय् न्ह्याये मफइगुलिं निम्हेसियां मंकाः कुतः जुइमाःगुलिइ बः बियादिल।

मन्त्रालयया निमित्त सचिव रानां राजनीतिक वृत्तया अनुभव मदुसां पत्रकारिता ख्यलय् ताःई तक ज्या यानादीगु अनुभवं मन्त्री खरेलया बःचाः हाकःगु ई महत्वपूर्ण व ज्वमलाःगु ज्याया धलः जूवंगु धयादिल।