प्रधानमन्त्री नाप कुलपति केपी शर्मा ओलीया अध्यक्षताय् शुक्रवाः जुगु पाटन स्वास्थ्य विज्ञान प्रतिष्ठान, सभाया १५ क्वःगु बैठकं चालु आर्थिक वर्षया योजना, ज्याझ्वः व बजेट स्वीकृत याःगु दु।

प्रधानमन्त्री निवास, बालुवाटारय् जुगु बैठकं प्रतिष्ठानया गुक्वःगु सभाया बैठकपाखे स्वीकृत बहुवर्षीय गुरुयोजनायात कार्यान्वयन यायेगु निति नेपाल सरकार, स्वास्थ्य लिसे जनसङ्ख्या मन्त्रालययात पेस यायेत अनुमति ब्यूगु खः। बैठकं कार्यकारी परिषदया सिफारिसय् सभाया सदस्यय् प्रा.डा. ब्रम्हदेव झायात मनोनयन याःगु दु।

प्रतिष्ठानया कार्यरत पदाधिकारी, शिक्षक व कर्मचारी तय्त आःयागु तलब भत्ताया आन्तरिक स्रोतपाखे बिइगु कथं ५ प्रतिशत अप्पोकेगु प्रस्तावयात धाःसा बैठकं मेगु अध्ययन व सहलह यायेगु कथं प्रस्ताव हय्त निर्देशन ब्यूगु दु।

प्रधानमन्त्री ओलीं विधि व कानुन कथं निर्णय यायेत व इलय् सिनेट बैठक याना वार्षिक बजेट व ज्याझ्वः हया पारित यायेत निर्देशन ब्यूगु दु। वयकलं दीर्घकालीन व आर्थिक कथं प्रभाव लाइगु निर्णययात स्वीकृत बिइ फइमखुगु स्पष्ट यानादीगु खः।

बागमती प्रदेश मन्त्रिपरिषद्या बैठकं प्रदेश चलचित्र सम्बन्धय् व्यवस्था यायेत दयेकूगु विधेयक संसदय् दर्ता यायेगु निर्णय याःगु दु।

थौं च्वंगु बैठकं उद्योग, वाणिज्य व प्रशासन मन्त्रालयया प्रविधि हस्तान्तरण कार्यविधि व तालिम सञ्चालनसम्बन्धी कार्यविधि २०८१ नापं स्वीकृत याःगु सरकारया प्रवक्ता नापं आन्तरिक मामिला व कानुनमन्त्री सुरजचन्द्र लामिछानें धयादिल। वय्कःया कथं बैठकं निम्ह कर्मचारीतय् बढुवा व पदस्थापन यायेगु निर्णय याःगु दु।

सङ्घीय सरकारपाखें सरुवा जुया वःपिं सहसचिव उदय राना मगरयात प्रदेशया युवा व खेलकुद मन्त्रालयया सचिव पदय् कामकाजया निंतिं छ्वयेगु व प्रदेशया सिनियर डिभिजनल इञ्जिनियर नवीन सिंहयात ११ गू तह (सचिव)लय् बढुवा यायेगु निर्णय याःगु खः।

पूर्वाधार विकास कार्यालय यलय् ज्या यानाच्वंम्ह उपसचिवस्तरया सिंहया कार्यसम्पादन नापं योग्यताया लिधंसाय् ११ गू तहलय् बढुवा यायेगु क्वःछ्यूगु खः।अथे हे, थ्व हे फागुन २० गते जुइगु लदी नखःया झ्वलय् माझी समुदायतय्त सार्वजनिक बिदा बिइगु क्वःछ्यूगु दु।

नापं, गुमिँया सम्बन्धय् अष्ट्रेलियाय् अध्ययन नापं अनुगमनया निंतिं प्रदेशया वन नापं वातावरण मन्त्रालयया सचिव केशव बरालया भ्रमण आदेश स्वीकृत यायेगु निर्णय जूगु दु।

नेपाल धितोपत्र बोर्डं धितोपत्र बजारय् ब्वतिकाइपिंत ताः तयाः वित्तीय कारबाहीसम्बन्धी मार्गदर्शन पिथंगु दु। बोर्डं सम्पत्ति शुद्धीकरण (मनी लाउण्डरिङ्ग) निवारण नियमावली, २०८१ या नियम ६९ या उपनियम (३) कथं धितोपत्र बजारय् ब्वतिकाइपिनि निंतिं वित्तीय कारबाही सम्बन्धी मार्गदर्शन पिथनाःगु धाःगु दु।

उगु मार्गदर्शन कथं नेपाः सरकार, गृह मन्त्रालयया वेबसाइटय् सार्वजनिक जूगु संयुक्त राष्ट्रसंघं प्रतिबन्ध यानातःगु धलखय् दुथ्यानाःच्वंपिं व्यक्ति, पुचः बाय् सङ्गठन कारोबारय् दूगु मदूगु क्वछिइमाः। अथे हे, थ्वज्याःगु ज्याय् संलग्न व्यक्ति, पुचः बाय् सङ्गठन धितोपत्र बजारय् ब्वति कयाच्वंम्ह खःसा कारोबारया धलखय् दूगु बाय् मदूगु नियमित कथं क्वछिइगु अद्यावधिक प्रणाली नीस्वने माः धयातःगु दु।

उगु धलः कथं सुं नं सूचीकृत व्यक्ति, पुचः बाय् सङ्गठन बाय् वनापं स्वापू दूपिं मेपिं सुं व्यक्ति, पुचः बाय् सङ्गठनया छुं नं सम्पत्ति बाय् कोष थःके दूगु जुसा तुरुन्त उगु सम्पत्ति बाय् कोष रोक्का यायेमाःगु मार्गदर्शनय् न्ह्यथनातःगु दु।

धितोपत्र बजारय् ब्वति काइम्हेस्यां थःगु ज्या न्ह्याकेबले आतङ्ककारी ज्या बाय् आमविनाशया ल्वाभः निर्माण लिसें विस्तारय् वित्तीय लगानी निवारण सम्बन्धी व्यवस्थात पालना यायेमाः। आतङ्ककारी ज्या बाय् आमविनाशया ल्वाभः निर्माण लिसें विस्तारय् वित्तीय लगानी निवारणनापं स्वापू दूपिं शङ्ककास्पद व्यक्तिया सम्बन्धय् वित्तीय जानकारी इकाईसं रिपोर्टिङ यायेमाःगु व्यवस्था मार्गदर्शनय् दु।

भारतया उडिसा राज्यय् च्वंगु कलिङ्गा इन्स्टिच्युट अफ इन्डस्ट्रियल ट्रेक्नोलोजी (केआइआइटी)इ ब्वनाच्वंपिं सच्छि व ५९ म्ह विद्यार्थी रक्सौल जुयाः स्वदेश लिहा वःगु दु।

केआइआइटीइ ब्वनाच्वंम्ह विद्यार्थी प्रकृति लम्साल शङ्कास्पद जुइक सी धुंकाः दना वःगु विषम परिस्थितिया हुनिं इपिं स्वदेश लिहाँवःगु खः।

पर्साया सहायक प्रमुख जिल्ला अधिकारी सुमनकुमार कार्कीया कथं बिहीबाः बहनी सच्छि व ५९ म्ह विद्यार्थी रक्सौल जुयाः स्वदेश लिहाँवःगु खः।

बिहीबाः बहनी हे वीरगञ्जया युवा तय्सं लम्साल व सिरहाय् बलात्कारलिपा स्याःम्ह रिन्कु सदायात न्याय दयेमाःगु माग यानाः मैनबत्ती जुलुस पिकाःगु खः।

लम्साल व सदाया अस्वाभाविक कथं सीगुलिं न्यायिक छानबिन जुइमाःगु इमिगु माग खः।

थौ अन्तर्राष्ट्रिय मातृभाषा दिवस । नेपालय् न पनि भाषिक जागरुकता, साँस्कृतिक विविधता व साहित्य ज्याझ्वः याना हनेत्यःगु दु।

राष्ट्रिय मातृभाषा दिवस कथं हनिइगु प्रस्तावयात संयुक्त राष्ट्रसङ्घीय शैक्षिक, वैज्ञानिक व साँस्कृतिक संगठन (युनेस्को) न अनुमोदन याना थुगु दिवस हलियक हनेगु याःगु खः। संयुक्त राष्ट्रसङ्घया महासभा सन् २००२ य् गुगु दिवस कथं हनेगु घोषणा याःगु खः।