पुलांम्ह मन्त्री व पुलाम्ह यल नगरपालिकाया मेयर बुद्धिराज बज्राचार्य मन्त। वयकः म्हिगः शनिवाः ८९ दँय् शिक्षण अस्पताल महाराजगञ्जय् मदुगु खः।

वयकःया चिधिम्ह काय् थौं विदेशं लिहां वये धुंकाः अन्तिम संस्कार यायेत्यंगु दु।२०६१ सालय् जुजु ज्ञानेन्द्रया प्रत्यक्ष शासनकालय् संस्कृति, पर्यटन व नागरिक उड्डयन मन्त्री नियुक्त जुयादीम्ह बज्राचार्य स्वयां न्ह्यः २०६० सालय् यल नगरपालिका मेयर जुइ धुंकूम्ह खः।

वय्कलं २०२७ सालय् तत्कालीन यल पञ्चायत १७ या वडाध्यक्ष, २०३२ सालय् न्हापांगुखुसि ललितपुरया प्रधान पञ्चायत, २०५४ सालय् नेकपा (एमाले) पाखें यलया मेयर जुयादी धुकम्ह खः।थौ अन्तिम श्रदाजलि देछायेगु नितिं पुच्वया अक्षेश्वर महाबिहार हिनय् १२ बजे निसें २ बजे तक तइगु जुगु दु।

ठमेलया म्युजियम अफ नेपाली आर्टय् किरण मानन्धरया विशेष चित्रकला प्रदर्शनी न्ह्याःगु दु।

वइगु सेप्टेम्बर तक न्ह्याइगु उगु प्रदर्शनी न्हिंन्हिं सुथसिया १० ताः इलंनिसें सनिलया ६ ताः ईतक अवलोकन यायेखनी। प्रदर्शनीया उलेज्याय् सच्छि स्वयां अप्वो कलाप्रेमीतय्गु ब्वति दूगु खः।

चित्रकला अवलोकनलिपा प्राडा अभि सुवेदीं थःम्हं तःक्वमछि मानन्धरया चित्रकलाबारे समीक्षा च्वयागु कनादिसें किरण मानन्धरया चित्रकलाय् थःम्हं लचकता खना धकाः धयादिल। “किरण मानन्धरया चित्रकलाय् ‘ब्रस स्ट्रोक’ तसकं कलात्मक खनेदु, रङ्गया मिश्रण बजोड जुइ, चित्र स्वयेबलय् यइपुगु  सङ्गीत थें च्वं”, वय्कलं धयादिल, “जिं वय्कःया यक्व चित्रकला स्वयागु दु, वय्कः नेपाःया सम्भवतः दकसिबे अप्वः चित्र च्वइम्ह कलाकारय् लाः, वय्कःया छगू छगू सृजनाय् हे न्हूगुपन लुयावइ, थौं नं न्हूगुपन खंका।”

एनसेल फाण्डेसनया सहकार्यय् न्ह्याःगु प्रदर्शनीइ कलाकार किरण मानन्धरं अवलोकनकर्तालिसे साक्षात्कार यासें अनुभव कनादिल। वय्कलं थुकथंया प्रदर्शनीं नेपाःया कला व संस्कृतिया प्रवद्र्धन व विकासय् महत्वपूर्ण भूमिका म्हिती धइगु धारणा तयादिल। विशेष यानाः न्हूगु पुस्तातय्त ज्ञान, सीप व कला लःल्हायेगुलिइ थुकिं भूमिका म्हिती धइगु वय्कःया धापू खः।

“जिं थुकथंया प्रदर्शनी तःक्वःमछि ग्वसाःग्वयागु दु, थुकिं दर्शकतलिसे साक्षात्कार ययोगु ह्वःताः चूलाःगु लिसें कला व संस्कृतिबारे ज्ञान हिलाकायेत नं ह्वःताः चूलाइ”, वय्कलं धयादिल। प्रदर्शनीइ मानन्धरं थी थी कालखण्डय् च्वयादीगु चित्रकला अवलोकन यायेखनीगु ग्वसाः खलः म्यूजियम अफ नेपाली आर्टया प्रमुख क्युरेटर राजन शाक्यं धयादिल।

नेपाःया कला व संस्कृति, परम्परा, धर्म, मिसा व प्रकृतिलिसे सम्बन्धित थी थी चित्रकला प्रदर्शनीइ ब्वयातःगु दु। अवालोकनकर्तातय्सं प्रदर्शनी अवलोकनया लिसें चित्रकला न्याये नं फइ।उगु झ्वलय् चित्रकलाया मुना सफू नं सार्वजनिक याःगु खः।

थौनिसें धरहरा १२ घौ चालीगु जूगु दु। न्हिंन्हिं सुथसिया ८ ताः इलंनिसें बहनी ८ ताः ईतक धरहरा चालीगु जूगु खः।

नागरिकतय् आवश्यकतायात थुइकाः ई थपे यानाः धरहरा १२ घौ चायेकूगु सहरी विकास मन्त्रालयं धाःगु दु। थनिंनिसें धरहरा १२ घौ चालीगु कनादिसें मन्त्रालयया प्रवक्ता नारायण मैनालीं बिदा कुन्हु नं चाली धकाः धयादिल।

थ्व स्वयां न्ह्यः न्हिंन्हिं सुथसिया १० ताः इलंनिसें सनिलय् ४ ताः ईतक चायेका वयाच्वंगुलिइ थनिंनिसें सुथय् ८ ताः इलंनिसें बहनीसिया ८ ताः ई तक चालीगु वय्कलं जानकारी बियादिल। “आः निगू सिफ्टय् धरहरा सञ्चालन यायेत्यना। धरहरा चाःह्यू वइपिंत सार्वजनिक बिदा कुन्हु नं चाली”, प्रवक्ता नारायण कनादिल।

विसं २०७२ वैशाख १२ गतेया भुखाचं क्वःदःगु धरहरा पुनः निर्माणलिपा वंगु असोज ३ गतेनिसें परीक्षण कथं चायेकूगु खः। वंगु मङ्सिर ९ गतेनिसें सर्वसाधारणतय्त शुल्क कयाः धरहरा चायेकूगुलिइ सर्वसाधारण नागरिकतय्सं धरहरा चालीगु ई म्ह्वः जूगु गुनासो याःगुलिं ई थपे याःगु वय्कःया धापू खः।

उपप्रधान नापं सहरी विकासमन्त्री प्रकाशमान सिंहं नागरिकया् सुझावयात ध्यान बिसें धरहरा सञ्चालनया ई अप्वयेकाः निगू सिफ्टय् सञ्चालन यायेगु तयारी जुयाच्वंगु मन्त्रालयं धाःगु दु । भुखाचं क्षतिग्रस्त धरहरा पुनःनिर्माणलिपा सशुल्क सञ्चालन याःगु न्हय्लां टिकट मियाः ४ करौड ३३ लख ९३ हजार व ६५० दां राजस्व सङ्कलन जूगु सहरी विकास मन्त्रालय अन्तर्गत केन्द्रीय आयोजना कार्यान्वयन इकाई (भवन नापं आवासं) धाःगु खः।

इकाई अन्तर्गत च्वनाः सञ्चालन जुयाच्वंगु धरहराय् आःतक २ लाख ३७ हजार व ६५ म्हेसिनं अवलोकन याये धुंकूगु खः। विशिष्ट संरचना सञ्चालन नापं व्यवस्थापन विकास समिति (गठन) आदेश–२०८१ कथं सशुल्क धरहरा सञ्चालन जुयाच्वंगु खः।

वागमती प्रदेशसभापाखें पारित निगू विधेयक प्रदेश प्रमुख दीपकप्रसाद देवकोटां प्रमाणीरण यानादीगु दु।

प्रदेशसभापाखें पारित आर्थिक दँ २०८२/८३ या सेवा व ज्याया निंतिं प्रदेश सञ्चित कोषपाखें ध्यबा विनियोजन व खर्च यायेगु सम्बन्धय् व्यवस्था यायेत दयेकूगु विधेयक व प्रदेश सरकारया अर्थ सम्बन्धी प्रस्तावयात कार्यान्वयन यायेत दयेकूगु विधेयक प्रदेश प्रमुख देवकोटां बुधबाः प्रमाणीकरण यानादीगु खः।

निगूलिं विधेयक थ्व हे असार २३ गते च्वंगु प्रदेशसभा बैठकं पारित याःगु खः।

प्रेस काउन्सिल, नेपालया पूर्वअध्यक्ष किशोर श्रेष्ठ विश्व प्रेस काउन्सिलया उपाध्यक्षय् ल्यःगु दु। अफ्रिकी देय् ताञ्जानियाय् जुयाच्वंगु काउन्सिलया शिखर सम्मेलनपाखे श्रेष्ठ उपाध्यक्षय् निर्वाचित जूगु खः।

श्रेष्ठ विश्व प्रेस काउन्सिलया निवर्तमान महासचिव जुयादी। काउन्सिलं स्वदँया निति सर्वसम्मतिपाखे न्हुगु नेतृत्व ल्यःगु खः। नेपाःया प्रतिनिधित्व यासे श्रेष्ठया प्रस्तावकय् भारतीय प्रेस काउन्सिलया प्रतिनिधि सुधीरकुमार पण्डा व समर्थकय् जिम्बाब्वेया लफ्टी दुबे, म्यान्मारया डा तिन तुन ओ, कोसोभोया इब्राहिम अर्सलान व तान्जानियाया काजुबी मुकाजांगा च्वंगु खः।

काउन्सिल अध्यक्षय् डेभिड ओम्ओयो (केन्या) व मेम्ह उपाध्यक्षय् अली हान्सेर्ली (साइप्रस) निर्वाचित जूगु खः। तान्जानियाया अर्नेस्ट साम्सोन सुङ्गुरा महासचिव जूगु दु सा टर्कीया तामेर अताबारुत कोषाध्यक्ष जूगु खः। अन्तर्राष्ट्रिय सम्पर्क संयोजकय् भारतया सिके नायक व तान्जानियाया जियादा किलोबोयात ल्यःगु दु।

सोमवाःनिसे तान्जानियाया आरुसाय् जुयाच्वंगु काउन्सिलया विश्व सम्मेलन शुक्रवाः समापन जुइ। सम्मेलनय् नेपाः नाप २७ राष्ट्रया प्रतिनिधिपि तय्गु ब्बति दुगु खः।