सञ्चार लिसें सूचना प्रविधिमन्त्री जगदीश खरेलं पदपाखें राजीनामा बियादीगु दु। थौं वय्कलं प्रधानमन्त्री सुशीला कार्कीयात राजीनामा लःल्हानादीगु खः।

मन्त्री खरेलं थःगु राजीनामा पत्रय् आःया सरकारया स्वतन्त्र म्हसीकाय् ध्याचः लाके मबीत दलीय राजनीतिया ख्यलय् वनेन्ह्यः पदं राजीनामा बिइगु निर्णय कयागु न्ह्यथनातःगु खः।

“थौंकन्हय्या राष्ट्रिय आवश्यकता, लोकतान्त्रिक प्रणालीया दीर्घकालीन सुदृढीकरण व जनअपेक्षाया परिप्रेक्षय् आः दलीय राजनीतिपाखें सक्रिय लिसें उत्तरदायी भूमिका म्हितेत वाञ्छनीय लिच्वलय् थ्यंगु दु।

उकिं आःया सरकारया स्वतन्त्र म्हसीकाय् ध्याचः लाकेमबीत जिं पदं राजीनामा बिइगु निर्णय यानागु खः”, राजीनामा पत्रय् धयातःगु खः।

बाँके प्रतिनिधिसभा–२ य् नेकपा एमालेपाखे अशोक राई नेतृत्वया जसपा परित्याग याना वःम्ह मोहम्मद इश्तियाक राईयात टिकट ब्यूगु दु।

एमाले अध्यक्ष केपी शर्मा ओलीं वःगु चान्ह्यः इस्तियाकनाप पूर्वमन्त्री प्रदीप यादव, वीरगञ्ज महानगरपालिकाया प्रमुख राजेशमान सिंहयात पार्टी दुकया टिकट ब्यूगु खः।

नेकपा एमालेया अध्यक्ष केपी शर्मा ओली गृहजिल्ला झापाय् थ्यःगु दु।

थ्व हे वइगु फागुन २१ गते जुइगु प्रतिनिधिसभा निर्वाचनया निति ओली झापा–५ पाखे उम्मेदवार जुइगु निति झापाय् वःगु दु।

भारतया नयाँ दिल्ली थ्व हे वइगु जनवरी २४–२५ य् जुइगु निक्वःगु बौद्ध शिखर सम्मेलन (GBS), अन्तर्राष्ट्रिय बौद्ध महासंघ (IBC) न केन्द्रीय संस्कृति मन्त्रालयनाप सहकार्यय् जुइगु ज्याझ्वलय् सार्क पत्रकार मञ्चया अध्यक्ष राजु लामां ब्बति काइगु जुगु दु।

उगु ज्याझ्वलय् हलियकं च्वपि बौद्ध नेतापि, विद्वानहरू व नीति निर्माता छथाय् हयेगु निति उगु ज्याझ्वः जुइत्यःगु खः। भारत मण्डपय् जुइगु उगु शिखर सम्मेलन “सामूहिक बुद्धिमत्ता, संयुक्त आवाज र पारस्परिक सहअस्तित्व“ धइगु विषय ज्याझ्वः जुइत्यःगु खः। प्रधानमन्त्री नरेन्द्र मोदीं २०२३ य् नयाँ दिल्लीइ उलेज्या यानादीगु न्हापागु विश्वव्यापी बौद्ध शिखर सम्मेलनयात निरन्तरता बिइगु कथं थुगु ज्याझ्वःया जुइत्यःगु खः।

सार्क पत्रकार मञ्चया अन्तर्राष्ट्रिय अध्यक्ष राजु लामा शिखर सम्मेलनय् प्रतिनिधि कथं ब्बति काइगु जुगु दु। मञ्चया अध्यक्ष लामां धयादीगु दु, “शिखर सम्मेलनया विषयवस्तु ’सामूहिक बुद्धि, संयुक्त आवाज व पारस्परिक सहअस्तित्व’ खः, थ्व जिमिगु संस्थाया मू आज्जु न खः। थुगु ख्यलय् शान्ति, स्वतन्त्रता व स्थिरता निर्माण यायेगु कथ शिखर सम्मेलनय् ब्बति कायेगु व बुद्ध धर्मया निति समकालीन विश्वव्यापी चुनौतीपाखे यक्को सय्के फइ।“ धका धयादीगु दु।

उगु ज्याझ्वलय् मू वक्ता नाप प्यानललिस्टय् थाइल्याण्डया पूर्व विदेशमन्त्री मारिस संगियाम्पोङ्सा, भियतनामया परम पूज्य थिच डुक थियन; भारतया ग्यालट्रुल जिग्मे रिन्पोछे, भुटानया जोङ्सार जाम्याङ ख्येन्टसे रिन्पोछे म्यानमारया परम पूज्य आशिन कुमारा, नेपालया प्रा.डा.सुवर्णलाल बज्राचार्य,जापानया रेभ कोशो तोमियोका, ताइवानया मास्टर शिह जियान–यिन; भारतया भेन आनन्द भान्ते, संयुक्त राज्य अमेरिकाया प्रख्यात बौद्ध विद्वान प्रो.रोबर्ट थुरमनपिनिगु ब्बति दइ।

पूर्व मन्त्री नाप जसपा नेपालया नेता प्रदीप यादव नेकपा एमाले दुहावःगु दु। थौ चान्ह्यः एमालेय् दुहावःगु दु। एमाले अध्यक्ष केपी शर्मा ओलीं यादवयात खादा न्ययका पार्टीइ लसकुस याःगु खः।

यादवनाप वीरगन्जया मेयर राजेशमान सिंहनाप कार्यकर्ता एमालेय् दुहावःगु खः।यादव, ओली नेतृत्वया सरकारय् खानेपानी मन्त्री जुगु खः। भदौ २३ व २४ या जेनजी युवा आन्दोलनलिपा ओलीनाप सत्याच्युत जुगु खः।

जेनजी आन्दोलनलिपा यादव अशोक राई नेतृत्वय् जसपा त्वःता उपेन्द्र यादव नेतृत्वया जसपा नेपालय् दुहावःगु खः। लिपागु इलय् यादव जसपा नेपालया समन्वय समिति सदस्यय् जुगु खः।प्रतिनिधि सभा निर्वाचनया मनोनयन दर्ता यायेगु न्ह्यः यादव जसपा नेपाल त्वःता एमालेय् दुहावःगु खः।यादव हाकन पर्सा क्षेत्र नम्बर १ पाखे प्रतिनिधि सभा निर्वाचन ल्वायेगु तयारीइ दु।