सङ्घीय मामिला लिसें सामान्य प्रशासनमन्त्री राजकुमार गुप्तां थःगु पदपाखें राजीनामा बिउगु दु।

वय्कलं थौं प्रधानमन्त्री केपी शर्मा ओलीयात राजीनामा बियादीगु खः।मन्त्री गुप्तां थःत लाकूगु द्वपनय् अनुसन्धान यानाः सत्यतथ्य पिकायेत ग्वहालि जुइमा धकाः राजीनामा बियाःगु धकाः धयादिगु दु।

वय्कलं थौंतक थःत ग्वहालि याःपि सकसितं सुभाय् बियादिसें आः वइगु दिनय् पार्टीं ब्यूगु भाला निष्ठापूर्वक पूवंक यायेगु प्रतिबद्धता प्वंकादिल।

वय्कःया बारेय् थीथी सञ्चारमाध्यम लिसें सामाजिक सञ्जालय् लखौँ ध्यबा घूस काःगु श्रव्य सामग्री सार्वजनिक जूगु दु।

बिपी राजमार्गय् चलखं याना स्वंगू थासय् सतक अवरुद्ध जुयाच्वंगु दु। म्हिगः बहनी अवरुद्ध सतक थौं सुथंनिसें चायेकेगु कुतः जुयाच्वंगु जिल्ला प्रहरी ज्याकुथि धौख्यलं धाःगु दु।

ज्याकुथिया कथं काभ्रेया रोशी गाउँपालिका–११ माम्तीया सतकय् ध्याचः बाः वयाः सतक अवरुद्ध जुयाच्वंगु खः। अथे हे उगु राजमार्गया रोशी–९ या खहरे खुसिया ध्याचः वयाः बहनी सतक अवरुद्ध जूगु खः।

वहे इलय् वहे वडाया बिरुवाडाँडाय् खहरे खुसिया ध्याचः लँय् वयाः सतक अवरुद्ध जूगु ज्याकुथिया सुचं अधिकारी मीनबहादुर घलें धयादिल। वय्कःया कथं स्थानीय जनप्रतिनिधिया समन्वयय् सतक चायेकेगु कुतः जुयाच्वंगु दु। वंगु असार २५ गते नं मङ्कलटारया बिरुवाडाँडाय् सतक अवरुद्ध जूगु खः।

उगु राजमार्ग अन्तर्गत रोशी लागाया थी थी थासय् आइतबाः सनिलंनिसें वःगु वानापं ध्याचः बाः वःगुलिं सतक अवरुद्ध जूगु खः। चच्छि जेसिभी छ्यलाः ध्याचः चिइकाः सोमबाः सुथय्निसें निखेरं यातायात सञ्चालनय् हःगु खः । उगु रागमार्गया हे पिन्थलीइ थ्वसिबें न्ह्यः नं तक्वः तक सतक अवरुद्ध जुयाः च्वया च्वंगु दु।

थ्व हे असारया १६, २५ व २६ गते नं पिन्थलीइ सतक अवरुद्ध जूगु खः।

थनया घरपझोङ गाउँपालिका–२ व १ स्वाइगु कालीगण्डकी खुसिइ बेलिब्रिज निर्माण पूवंगु दु। निदँय् थ्व बेलिब्रिज निर्माण क्वचाःगु खः।

बेलिब्रिज निर्माणया निंतिं सङ्घीय विशेष अनुदानया १ करौड ९७ लाख व घरपझोङ गाउँपालिकाया ९० लाख लागत साझेदारी यानाः मुक्कं २ करौड ८७ लाख २६ हजार तकाय् बेलिब्रिज निर्माण याःगु धकाः गाउँपालिकाया सबइन्जिनियर राजन कँडेलं धयादिल।

उगु बेलिब्रिजया हाकः ४२ मिटर व ब्या ४.२० मिटर दु । बेलिब्रिज निर्माणया निंतिं रविचक्र निर्माण सेवां ठेक्का काःगु खः । राष्ट्रिय गौरवया बेनी–जोमसोम सतक राजमार्ग सतिक लानाः नं कालीगण्डकी पारि लिकुनाच्वंगु घरपझोङ–१ छैरो व चिमाङ गांया स्थानीय किसानयात बेलिब्रिज निर्माणं राहत जूवंगु उगु वडाया वडाध्यक्ष आशबहादुर थकालीं धयादिल।

नेपाःया न्हापांगु निजी टेलिभिजन च्यानल इमेज च्यानलया व्यवस्थापनय् हिउपाः वःगु दु । न्हूगु व्यवस्थापनया कार्यकारी अध्यक्ष पदय् युवा व सशक्त संचार व्यवसायीलिसें कामना प्रकाशन गृहया सीईओ दिरेकलाल श्रेष्ठयात ल्यःगु दु।

अथे हे न्हूगु व्यवस्थापनय् मेम्ह संचार व्यवसायी चेङ अग्रवालयात प्रबन्ध निर्देशक नियुक्त याःगु दु। सोमवाः लाजिम्पाटय् च्वंगु इमेज च्यानलया ज्याकुथिइ जूगु छगू विशेष ज्याझ्वः दथुइ इमेज ग्रुप अफ कम्पनीया नायः आरके मानन्धरं न्हूगु व्यवस्थापनयात जिम्मेवारी लःल्हाःगु खः।वंगु २७ दँनिसें मानन्धरया अध्यक्षताय् संचालन जुयाच्वंगु इमेज च्यानल टेलिभिजन २०८२ साल १ श्रावणनिसें न्हूगु व्यवस्थापनय् संचालन जुइगु जूगु दु।

आः इमेज च्यानल टेलिभिजनया नापनापं इमेज एफएम ९७.९ व इमेज खबर डटकम नं न्हूगु व्यवस्थापनय् संचालन जुइगु जूगु दु। इमेज च्यानल टेलिभिजन नीस्वंगु इलंनिसें ज्या याना वयाच्वंम्ह जगदीश खरेलयात नं न्हूगु व्यवस्थापनं समाचार प्रमुखया जिम्मेवारी ब्यूगु दु।

उगु ज्याझ्वलय् नायः मानन्धरं युवा संचार व्यवसायीपिन्त जिम्मेवारी लःल्हाय् खनां थः लय्ताःगु खँ कनादिल।उगु लसताय् नवनियुक्त कार्यकारी अध्यक्ष दिरेकलाल श्रेष्ठं इमेज च्यानल टेलिभिजनया छवियात ध्यानय् तयाः प्रभावकारी रुपं कम्पनीयात न्ह्यःने यंकेगु प्रतिबद्धता प्वंकादीगु खः।

थःम्हं कामना प्रकाशनपाखें नैतिक पत्रकारिता सयेकागु धासें अध्यक्ष श्रेष्ठं अमेरिका व नेपाःया प्रिन्ट मिडियाय् निगू दशक स्वया अप्पो अनुभव व इमेजया स्वंगू दशकया गौरवपूर्ण इतिहासयात स्वानाः कम्पनीयात न्हूगु उचाइलय् थ्यंकेगु संकल्प प्वंकादिल।

युवा संचार व्यवसायी श्रेष्ठयात आः नेपाल समाचारपत्र, इमेज टेलिभिजन व इमेज एफएम नीस्वनाः पत्रपत्रिका, टेलिभिजन व रेडियोयात छक्वलं अग्रसर यायेगु भाला बिउगु दु। न्हूगु व्यवस्थापनं प्यंगू हे माध्यम टेलिभिजन, रेडियो, अनलाइन व प्रिन्टपाखें थःत अझ सशक्त व प्रभावकारी रुपं न्ह्यब्वयेगु प्रतिबद्धता नं प्वंकूगु दु।

सञ्चार नापं सूचना प्रविधिमन्त्री पृथ्वीसुब्बा गुरुङं सार्वजनिक सेवा प्रसारण नेपालया ‘एनटिभी वल्र्ड’ असोज ३ गते दुने हे सञ्चालन यायेत निर्देशन बियादीगु दु।

सिंहदरबारय् च्वंगु नेपाल टेलिभिजनय् झायाः वय्कलं एनटिभी वल्र्डया तयारी जुया च्वंगु निरीक्षण यासें व्यवस्थापनय् माःगु निर्देशनात्मक सुझाव बियादिल। मन्त्री गुरुङं एनटिभी वल्र्डं हलिंलिसें नेपाः स्वायेत महत्वपूर्ण भूमिका म्हिती धकाः न्ह्यथनादिसें थुकिया सञ्चालन याकनं याये माःगुलिइ बः बिइमाः धकाः धयादिल।

सञ्चार मन्त्रालयया सचिव राधिका अर्यालं नेपाःया मौलिकता व विशेषतायात कायम यायेगु कथं एनटिभी वल्र्डया ज्याझ्वः न्ह्यब्वयेत सुझाव बियादिल। लिसें वय्कलं हलिमय् नेपाःया म्हसीका स्थापित यायेगु विषयकय् बः बिइत इनाप यानादिल। पिएसबीया नायः डा महेन्द्र विष्टं एनटिभी वल्र्डया मर्म व तातुना पूवंकेत व्यवस्थापनय् जुयाच्वना धकाः धयादिल। थुकिया निंतिं मन्त्रालयया सहकार्यं हे ज्या सम्पादन यायेत ग्वाहालि जूगु वय्कलं जानकारी बियादिल।

सीमित स्रोत व साधनया दथुइ एनटिभी वल्र्डयात हलिंन्ह्यःने योग्य दयेकेत कुतः यानाच्वने धइगु वय्कःया प्रतिबद्धता दु। ज्याझ्वलय् डा टङ्क उप्रेतीं एनटिभी वल्र्ड सञ्चालनया पूर्वतयारीबारे ज्यापौ न्ह्यब्वयादिल। वय्कःया प्रस्तुति एनटिभी वल्र्ड सञ्चालनया ढाँचा, सामग्री व रचनात्मक संरचनाय् केन्द्रित जूगु खः।