भारतया उत्तराखण्ड प्रदेशय् जुइत्यंगु पञ्चायत निर्वाचनया निंतिं बैतडी व दार्चुला जिल्लाया नेपाः व भारत सीमा नाका बन्द जुइत्यंगु दु।

थ्व हे जुलाई २४ व २८ (आः वइगु साउन ८ व १२ गते) भारतया उत्तराखण्ड प्रदेशय् पञ्चायत निर्वाचन जुइत्यंगु दु। उगु निर्वाचनयात कयाः बैतडी व दार्चुलाया भारतनाप सीमा स्वाःगु नाकात बन्द यायेगु निर्णय यानागु धकाः प्रमुख जिल्ला अधिकारी पुण्यविक्रम पौडेलं धयादिल।

वय्कःया कथं दार्चुलाया पुलघाट नाका जुलाइ २१ (साउन ५ गते) बहनी निसें जुलाई २४ (साउन ८गते) सुथय् तक बन्द जुइत्यंगु दु। अथे हे, बैतडीया झुलाघाट नाका साउन ९गतेनिसें साउन १२ गतेतक बन्द जुइगु वय्कलं धयादिल।

उगु इलय् आकस्मिक कथं नाका चायेकेमाःसा निगूलिं देय्या सहमतिइ जक चायेके फइगु वय्कलं धयादिल।

वीरगञ्जलिसें मधेसया थी थी थासय् ब्वलंगु त्वनेगु लःया सङ्कट ज्यंकेत मधेस प्रदेश विपद् व्यवस्थापन कार्यकारी समितिं वारणयन्त्रपाखें लः आपूर्ति यायेगु निर्णय याःगु दु।

प्रदेश सरकारयाके दूगु न्याद्वः लिटर क्षमताया च्यागः वारुणयन्त्र थौं वीरगञ्ज छ्वःगु दु। मुख्यमन्त्री सतिशकुमार सिंहं त्वनेगु लःया समस्या समाधानया निंतिं थः क्रियाशील जुयागु धयादीगु दु।

त्वनेगु लःया समस्या जूगु थासय् वारुणयन्त्र नीप्यघौं हे छ्यलेगु धयादिसें वय्कलं वारुणयन्त्रया व्यवस्थापन व लः आपूर्ति नेपाली सेनां याइगु धयादिल। नापं सेनां थःके दूगु न्हय्गः ट्याङ्करपाखें नं लः आपूर्ति यायेगु तयारी यानागु धाःगु दु।

थ्वसिबें न्ह्यः वन विभागं स्वंगः ट्याङ्करपाखें सुख्खाग्रस्त लागाय् त्वनेगु लः आपूर्ति यानाच्वंगु खः।

गुणस्तर, परिमाण, मू व नापतौलय् हिलाबुला नापं रिलेबलिङ याःगु खनेदूुगुलिं वाणिज्य, आपूर्ति लिसें उपभोक्ता संरक्षण विभागं निगू व्यापारिक फर्मयात कारबाही याःगु दु।

विभागं श्रीराम टोबाको उद्योग प्रालियात स्वंगू लख तका ज्वःया बं पुइकूगु दु। अथे हे, एसवीएल प्रोफेसनल प्रालियात निगू लख न्याद्वः तका ज्वःया बं बुइकूगु विभागं धाःगु दु। ‘अधिकतम खुद्रा मू’ मतसें सामान मिइगु यानाच्वंगुलिं कारबाही यानागु धकाः विभागं धाःगु दु।

विभागया कथं न्हय्गू फर्मयात माःगु भ्वँ ज्वनाः विभागय् हाजिर जूवयेत निर्देशन ब्यूगु दु। अथे हे, येँ व यलया न्यागू फर्मयात व्यवसायलिसें स्वापू दुगु कागजात ज्वनाः स्वन्हुया दुने हाजिर जुइत निर्देशन ब्यूगु दु। विभागं उपभोक्ता संरक्षण ऐन, २०७्र५ व उपभोक्ता संरक्षण नियमावली, २०७६ कथं माःगु निर्देशन लिसें कारबाही यानागु धाःगु दु।

विभागं असार ३१ गते गुंगू, ३० गते नं उलि हे फर्मयात कारबाही याःगु खः। गुलिसितं धाःसा सामान्य निर्देशन ब्यूगु दुसा गुलिसितं भ्वँ ज्वनाः वयेत धाःगु दु। अथे हे, असार २९ गते गुंगू, असार २७ गते न्यागू, असार २६ गते झिंखुगू, असार २५ गते झिंछगू फर्मयात अनुगमन यानाः माःगु कारबाही यानागु धाःगु दु।

छुं दिंया निंतिं सङ्घीय संसदया निगूलिं सदनया बैठक मजुसां थौं प्यंगू संसदीय समितिया बैठक च्वनेत्यंगु दु।

थौं कानुन, न्याय लिसें मानवअधिकार समिति, सार्वजनिक नीति लिसें प्रत्यायोजन विधायन समिति, सङ्घीयता सवलीकरण लिसें राष्ट्रिय सरोकार समिति व ‘राज्यया निर्देशक सिद्धान्त नीति व दायित्वया अनुगमन लिसें मूल्याङ्ककन (मंकाः)’ समितिया बैठक च्वनेत्यंगु दु।

नेपाल आयल निगमं पेट्रोल, डिजेल व मचिकंया भाः घटे याःगु दु।निगम सञ्चालक समितिया बैठकं थौ चान्ह्यः निसे लागु जुइगु कथं पेट्रोल लिटरं न्यातका व डिजेल व मचिकं लिटरं छतका घटे याःगु दु।

न्हुगु भाः कथं स्वनिगः, पोखरा व दिपायलय् पेट्रोल लिटरं १ सय ६० तका जुगु दु। अथेहे डिजेल लिटरं १ सय ४८ तका जुगु दु।