येँ महानगरया वइगु आर्थिक वर्ष २०८२/०८३ या बजेट पारित याःगु दु।

येँ महानगरं १७ गु नगरसभाया निक्वःगु बैठकं वइगु आवया बजेट २५ अर्ब ७६ करोड ४३ लाख ४१ हजार तकाया बजेट पास याःगु दु।

चन्द्रागिरि नगरपालिकाया नगरसभां आर्थिक दँ २०८२÷८३ या निंतिं कूल २ अर्ब ९३ करौड ४६ लख बजेट बहुमतं पारित याःगु दु।

नगरसभाया १६ क्वःगु अधिवेशनं चालु खर्च १ अर्ब २२ करौड ७८ लख व पुँजीगत खर्च १ अर्ब ७० करौड ६८ लख दु। सभाय् नगरप्रवक्ता कृष्णप्रसाद खड्गीं उगु बजेट व ज्याझ्वः न्ह्यब्वयादिल।

नगरप्रमुख घनश्याम गिरीं बहुमतपाखें आर्थिक दँ २०८२÷८३ या बजेट व ज्याझ्वः पारित जूगु जानकारी बियादिसें बजेटं नगरवासीतय् माग संबोधन जुइगु भलसा प्वंकादिल। वय्कलं बजेट कार्यान्वयनमुखी जूगु ध्वाथुइकादिसें सहमति, सहकार्य व एकताया माध्यमं नगरया समृद्धिइ न्ह्यज्यायेत आह्वान नं यानादिल।

लुम्बिनी बौद्ध विश्वविद्यालय सभाया १८ क्वःगु बैठकं वइगु आर्थिक दँया निंतिं ४९ करौड ५९ लखया बजेट स्वीकृत याःगु दु।

प्रधानमन्त्री निवास, बालुवाटारय् प्रधानमन्त्री नापं कुलपति केपी शर्मा ओलीया अध्यक्षताय् थौं च्वंगु बैठकय् विश्वविद्यालयया रजिष्ट्रार डा तिलकराम आचार्यपाखें न्ह्यब्वयादीगु बजेट स्वीकृत जूगु खः।

विश्वविद्यालयया आःया बेरुजु ०.५ जक जूगु बैठकयात अवगत यानादिल।कुलपति ओलीया निर्देशनय् फुक्क विश्वविद्यालय (प्रतिष्ठान)तय्सं न्हूगु आर्थिक दँ वयेन्ह्यः हे वइगु आर्थिक दँया बजेट व ज्याझ्वः सिनेट बैठकपाखें अनिवार्य स्वीकृतिया निंतिं तुरुन्त सुचं पिकयाः विश्वविद्यालयया सभा तःगु खः।

राष्ट्रपति रामचन्द्र पौडेलं संसद्पाखें अत्यावश्यक ऐन, कानुन दयेकीगु ज्याय् जुइगु ढिलासुस्तीं झीगु राष्ट्रिय आकाङ्कय् थ्यंकेगुलिइ अवरोध सिर्जना याइ धयादीगु दु।

थौं राष्ट्रपति ज्याकुथिइ संसदीय मामिला पत्रकार समाजआबद्ध पत्रकारतलिसे नापलाना वय्कलं संसदय् ‘डेडलक’या अवस्था वयेके मबीकाः आवश्यक सहलह, सहमति व सहकार्यं संसदीय ज्याखँतय्त अझ जनमुखी दयेकेगु व संसद्प्रति जनताया भलसा थनेगु धयादिल।

राष्ट्रपति पौडेलं नेपालय् प्रजातान्त्रिक अभ्यास म्ह्वः जूगु धासें लोकतान्त्रिक पद्धति हे पाय्छिगु व्यवस्था जूगुलिं थुकिया हे पक्षय् छधी जुयाः थःथःगु भूमिका म्हितेमाःगुलिइ बः बियादिल। वय्कलं लोकतान्त्रिक शासन प्रणालीइ संसद् जनताया सः थ्वयेकेगु व आवश्यक कानुन दयेकेगु थाय् जूगु धयादिसें सत्यतथ्य बुखँ सम्प्रेषण यानाः ऐन, कानुन निर्माण प्रक्रियायात अझ सहज, पारदर्शी व जवाफदेही जुइकेत आमसञ्चारकःमितय् महत्वपूर्ण भूमिका दइ धइगु धारणा प्वंकादिल।

संसद् व संसदीय समितिपाखें जनताया पक्षय् कानुन दयेकेगु व समसामयिक लिसें थौंकन्हय्या समस्या उलाः क्यनेगु संसदीय अभ्यासयात अझ प्रभावकारी व जवाफदेही जुइकेत थ्व ख्यलय् ज्या यानाच्वंपिं आमसञ्चारकःमितय् पाखें खबरदारीलिसें ग्वाहालि व सहकार्य दइ धइगु भलसा प्वंकादिल।

भारतया उत्तराखण्ड प्रदेशय् जुइत्यंगु पञ्चायत निर्वाचनया निंतिं बैतडी व दार्चुला जिल्लाया नेपाः व भारत सीमा नाका बन्द जुइत्यंगु दु।

थ्व हे जुलाई २४ व २८ (आः वइगु साउन ८ व १२ गते) भारतया उत्तराखण्ड प्रदेशय् पञ्चायत निर्वाचन जुइत्यंगु दु। उगु निर्वाचनयात कयाः बैतडी व दार्चुलाया भारतनाप सीमा स्वाःगु नाकात बन्द यायेगु निर्णय यानागु धकाः प्रमुख जिल्ला अधिकारी पुण्यविक्रम पौडेलं धयादिल।

वय्कःया कथं दार्चुलाया पुलघाट नाका जुलाइ २१ (साउन ५ गते) बहनी निसें जुलाई २४ (साउन ८गते) सुथय् तक बन्द जुइत्यंगु दु। अथे हे, बैतडीया झुलाघाट नाका साउन ९गतेनिसें साउन १२ गतेतक बन्द जुइगु वय्कलं धयादिल।

उगु इलय् आकस्मिक कथं नाका चायेकेमाःसा निगूलिं देय्या सहमतिइ जक चायेके फइगु वय्कलं धयादिल।