धरान उपमहानगरपालिया प्रमुख हर्क साम्पाङं थःगु पदपाखे राजीनामा ब्यूगु दु।

सुनसरी क्षेत्र नम्बर १ पाखे प्रतिनिधिसभा निर्वाचनय् उम्मेदवारी बिइगु घोषणा याना साम्पाङं थौ आइतवाः कार्यपालिका बैठकय् उपप्रमुख अइन्द्रबिक्रम बेघायात राजीनामा लःल्हागु दु।

साम्पाङ श्रम संस्कृति पार्टीया अध्यक्ष खः।आइतवाः हे पालिकाया बैठकय् धरान–१७ या वडाध्यक्ष सूर्यबहादुर भट्टराई न राजीनामा बिइ धुकुगु दु। भट्टराईयात नेकपां सुनसरी क्षेत्र नम्बर १ पाखे प्रतिनिधिसभाय् उम्मेदवार दयकूगु खः।

प्रतिनिधिसभा सदस्यय् प्रत्यक्षपाखेंया उम्मेदवारया मनोनयन यायेगु दिं न्ह्यने वःगुलि थौं प्रधानमन्त्री सुशीला कार्की व निर्वाचन आयोगया पदाधिकारीपिं दथुइ सहलह जूगु दु।

प्रधानमन्त्री निवास बालुवाटारय् जूगु सहलहय् अर्थमन्त्री रामेश्वर खनाल, कानुन, न्याय लिसें संसदीय मामिलामन्त्री अनिलकुमार सिन्हा, परराष्ट्रमन्त्री बालानन्द शर्मा, कार्यबाहक प्रमुख निर्वाचन आयुक्त रामप्रसाद भण्डारीलिसे पदाधिकारीतय्गु ब्वति दूगु खः।

आः वइगु फागुन २१ गते जुइगु निर्वाचनया निंतिं थ्व हे माघ ६ गते प्रत्यक्षपाखेंया उम्मेदवारी मनोनयन यायेमाःगु ज्या धलः दु।

येँ महानगरपालिकाया उपमेयर सुनिता डंगोलं कार्यवाहक प्रमुखया जिम्मेवारी काःगु दु।

मेयर बालेन शाह न थःगु पदपाखे राजीनामा बिइवं डंगोल स्वतः कार्यवाहकयात जिम्मेवारी वःगु खः।स्थानीय सरकार सञ्चालन ऐन–२०७४ कथं, वयकलं कार्यवाहकया जिम्मेवारी वःगु खः।

मेयरं थःगु पदपाखे राजीनामा बिइवं स्वतः उपमेयर कार्यवाहक जुइगु व्यवस्था ऐनय् दु।

येँ महानगरपालिकाया प्रमुख बालेन्द्र शाहं थःगु पदं राजीनामा बियादीगु दु।

उपप्रमुख सुनिता डङ्गोलया न्ह्यने वय्कलं थनिनिसें लागू जुइगु कथंः राजीनामा न्ह्यब्वयादीगु प्रमुख शाहया सचिवालयं धाःगु दु।

थःगु इच्छां राजीनामा बियागु धयादिसें महानगरप्रमुख शाहं त्यागपत्रय् पदय् च्वनाबलय् थःम्हेस्यां महानगरपालिका व नगरवासीया हितय् इमान्दार जुयाः ज्या यायेगु कुतः यानागु धयादीगु दु।

राष्ट्रियसभाया १९ क्वःगु अधिवेशन थनिनिसें न्ह्यायेत्यंगु दु। न्हू बानेश्वरया अन्तरराष्ट्रिय सम्मेलन केन्द्रय् च्वंगु संसद् भवन जेनजी आन्दोलनया झ्वलय् च्यानाः झौ जूगुलिं सङ्घीय संसद् सचिवालय सिंहदरबारय् अधिवेशन सञ्चालन यायेगु तयारी याःगु दु।

अधिवेशनया तयारीया निंतिं अध्यक्ष नारायणप्रसाद दाहालं शुक्रबाः हे कार्यव्यवस्था परामर्श समितिया बैठक आह्वान यानादीधुंकूगु दु। अधिवेशनया न्हापांगु बैठकय् अध्यक्ष दाहालं राष्ट्रपतिपाखें अधिवेशन आह्वानया पौ ब्वनाः न्यंकीगु व छुं दिं न्ह्यः मदुम्ह नेपाली कांग्रेसया सांसद बलदेव बोहराया निंतिं शोक प्रस्ताव न्ह्यब्वइगु ज्याधलः क्वःछिनातःगु दु।

सङ्घीय संसद् सचिवालयया प्रवक्ता एकराम गिरीया कथं अधिवेशनया फुक्क तयारी पूवनेधंकूगु दु। राष्ट्रपति रामचन्द्र पौडेलं नेपाःया संविधानया धारा ९३ या उपधारा (१) कथं नेपाल सरकार, मन्त्रिपरिषदया वंगु २८ गतेया सिफारिसय् थ्वहे माघ ४ गते आइतबाःया दिं सुथसिया ११ः०० ताः इलय् राष्ट्रियसभाया अधिवेशन आह्वान यानादीगु खः। वंगु भदौ ३१ गते राष्ट्रियसभाया १८ क्वःगु अधिवेशन अन्त्य जूगु खः।

थ्वहे दथुइ ,निर्वाचन आयोगं थ्वहे माघ ११ गते राष्ट्रियसभाया १९ म्ह दुजःया निंतिं निर्वाचनया तयारी नापं याःगु दु। राष्ट्रियसभा सदस्यय् छम्ह निर्विरोध निर्वाचित जुयादीधुंकूगु आयोगं धाःगु दु। प्रतिनिधिसभाया निर्वाचनया तयारी न्ह्यानाच्वंगु व राष्ट्रियसभाय् नापं न्हूपिं दुजःपिं निर्वाचित जुयाः वयेत्यंगु अवस्थाय् थ्व अधिवेशनयात महत्व बियाः कयातःगु दु।