ताम्रकार समाजया नीन्ह्यय् क्वःगु मंकाः मुज्या व नीछक्वःगु साधारण सभा क्वचागु दु। नेपालभाषा एकेडेमिया चान्सलर नाप नेवाः न्ह्यलुवाः मल्ल के सुन्दरं छगु ज्याझ्वःया उलेज्या यानादीगु खः।

उगु मुँज्यां विनोद ताम्रकारयात सर्वसम्मत अध्यक्ष ल्यःगु दु। अथेहे दुजलय् शम्भुगोविन्द ताम्रकार, दिपेश ताम्रकार, विमल ताम्रकार, बिजय ताम्रकार, मनोज ताम्रकार(नक्साः), प्रवल ताम्रकार, मिला ताम्रकार, मनोज ताम्रकार (हौगः), निता ताम्रकार, सजेश ताम्रकार निर्वाचित जुगु दु।

समाजया विधान कथं सदस्यय् निर्वाचित जुपि न्हुगु कार्यसमितिया मुँज्यां पद बिभाजन याइ। निर्वर्तमान अध्यक्ष रविन्द्रराज ताम्रकार पदेन कथं कार्यसमितिइ दुथ्याइ।

साहित्यकार जितेन्द्र रसिकया मचा बाखं सफू “बेलबहादुरको बिहे“ स्वगुगु ब्बः छगु ज्याझ्वः दथुइ पितब्बज्या जुगु दु।

एजुकेश्नल पब्लिसिङ हाउसं प्रकाशन याःगु उगु सफू भजन राउत, शिवराम श्रेष्ठ, गजेन्द्र ङाखुसी व रमण राउतं पब्लिसिङ हाउसय् पित ब्बज्या याःगु खः।

नेवाः संस्कृतिइ “इहि“ दुने दुगु जीवन विज्ञान दुथ्याःगु उगु सफूतिइ नेवाः समुदाय दुने इहि याइगु इलय् मू फल बेलयात बाखनय् दुथ्याकगु धका बाखं च्वमि जितेन्द्र रसिकं धाःगु दु।

बाखनय् किपाः मदुम्ह नांजाम्ह कलाकार एक्काराम सिं न च्वयादीगु खः।

मध्यपुर थिमि बचत तथा ऋण सहकारी संस्थाय् डा.उज्ज्वल जोशीया नेतृत्वय् न्ह्यय्म्हेसिगु न्हुगु सञ्चालक समिति गठन जूगु दु।

शनिवाः क्वचाःगु संस्थाया १८ क्वःगु दँ मज्या व खुक्वःगु अधिवेशनं डा.उज्ज्वल जोशीयात अध्यक्ष ल्यःगु खः। अथेहे समितिया उपाध्यक्षय् अनिल श्रेष्ठ, सचिवय् कृष्णकाजी मानन्धर, कोषाध्यक्षय् सञ्जयकुमार श्रेष्ठ निर्विरोध जूगु खः। अथेहे सदस्यय् रमेश थुसा श्रेष्ठ, तुलसीराम श्रेष्ठ व प्रेम सुन्दर श्रेष्ठयात ल्यःगु खः।

अधिवक्ता लक्ष्मी केशरी भासिङ्कया संयोजकत्वया निर्वाचन समितिं सन्चालक समिति व लेखा सुपरिवेक्षण समितिया निति न याकूगु खः। लेखा सुपरिवेक्षण समितिया संयोजकय् कृष्णसुन्दर प्रजापति व दुजलय् नरेन्द्र श्रेष्ठ व कान्छी माया श्रेष्ठयात ल्यःगु खः।संस्थाय् १ हजार ५ सय २६ म्ह सेयर सदस्य दु।

नेपाली साङगितिक ख्यलय् लोकंह्वाना च्वम्ह उजं शाक्ययात छगु ज्याझ्वः दथुइ हंगु दु।

श्री भाष्करदेव संस्कारित केशचन्द्रवृmत पारावत् महाविहार इतुंबाहाः संरक्षण समाजया २० क्वःगु साधारण सभाय् गायक उजं शाक्य व मूर्तिकार ज्ञानबहादुर शाक्ययात इतुंबाहाः संरक्षण समाजया अध्यक्ष प्रज्ञारत्न शाक्यं दोसल्ला न्यय्कां हनापौ लःल्हागु खः।

गायक उजं शाक्यं थःगु थासय् सम्मान जुइ दया तसकं लय्तागु दु धका धयादीगु खः। शाक्य इतुंबहाःया हे काय् मचा खः। मैँचा, बेबी, कुमारीलगायतया म्हे तसकं थौकन्ह्य लोकंह्वाःगु दु।

अथेहे मूर्तिकार शाक्यं आर्थिकरुपं स्वया पुण्य दइगु बिचाःपाखे थःम्हेसिया बुद्धमूर्ति निर्माण यायेगु ज्या यानागु धका धयादीगु खः। वयकलं इतुबहाःया ध्यानकुथीइ स्थापना यायेत बुद्ध, धर्म व संघया स्वगू मूर्ति निर्माण याःगु खः। मूर्तिकार शाक्यया कथं उगु स्वगू बुद्धमध्यय् प्रज्ञापारमिता (संघ)या मूर्ति ‘मास्टरपिस’ खः धका धयादीगु खः।

श्री हल्चोक आकाश भैरव गुथिया ग्वसालय् श्री हल्चोक आकाश भैरव देगः परिसरय् दयकूगु सांस्कृतिक भजन छेँया छगु ज्याझ्वः दथुइ मूपाहाँ वागमती प्रदेशया सभासद प्रकाश श्रेष्ठ, विशेष पाहांपिं नागार्जुन नगर पालिकया कावा मेयर सुशिला अधिकारी व येँ महानगर पालिकया पूर्वंमेयर विद्या सुन्दर शाक्यं मंकाःकथं उलेज्या यानादीगु खः।

हल्चोक आकाश भैरव गुथिया नायःपि शेर बहादुर पुतुवारया सभाध्यक्षय् जुगु उगु ज्याझ्वलय् मूपाहां सभासद श्रेष्ठं विद्या सुन्दर शाक्ययात हनापौ देछानादीगु खःसा नागार्जुनया कावा मेयर सुशिला अधिकारीं दोसल्लां न्ययका हनेज्या यानादीगु खः।उगु ज्याझ्वलय् मूपाहां सभासद प्रकाश श्रेष्ठ, नागार्जुन नगर पालिकाया कावा मेयर सुशिला अधिकार, कार्यकारी अधिकृत गणेश प्रसाद अर्याल, ३ वडाया वडा अध्यक्ष उमेश लामापिन्त न हनेज्या जुगु खः।

गुथिया नायः शेर बहादुर पुतुवारं लसकुस न्वचु बिया न्ह्याःगु उगु ज्याझ्वलय् नागार्जुन नगरपालिकाया कावा मेयर सुशिला अधिकारी, वडा ३ या वडा अध्यक्ष उमेश लामा, पूर्वमेयर विद्या सुन्दर शाक्य, नागार्जुन वडा ३ या पूर्व वडा अध्यक्ष प्रेमलाल श्रेष्ठं सांस्कृतिक भजन छेँ निर्माण सम्वन्धि थःथःगु नुगः खँ तयादीगु खः। ज्याझ्वलय् संचार ख्यःया व्यत्तित्वपिं राजु नापित, सुगत रत्न सिन्दुराकार, प्रेरणा शाक्य, सुनिता महर्जन, गंगादेवी महर्जन, रत्नकाजी महर्जन, रवि महर्जन व नबिन महर्जनयात न सुभाय् पौ लःल्हाःगु खः।

गुथिया नायः अर्जुन पुतुवारं सुभाय् बियादीग्ु जिवन पुतुवारं न्ह्याकादीगु उगु ज्याझ्वलय् हलिं नेवाः दबूया केन्द्रिय न्वकु सुरेन्द्रभक्त श्रेष्ठ, नेवाः पत्रकार राष्टिय दबूया नायः नृपेन्द्रलाल श्रेष्ठ लगायतपिं नं पाहां कथं झायादीगु खः।