उपराष्ट्रपति रामसहायप्रसाद यादव फ्रान्सया राष्ट्रिय दिवसया झ्वलय् नेपाःया निंतिं फ्रान्सया राजदूत भिर्जिनी कोर्तभालं थौं न्हिनय् थन ग्वसाः ग्वःगु लसकुस समारोहय् झायादीगु दु।

उगु झ्वलय् बःचाहाकलं मन्तुना प्वंकादिसें राजदूत कोर्तभालं फ्रान्स–नेपाः दथुइया ७६ दँनिसें थवंथः सम्बन्ध थौं नं अझ सुदृढ जुया वनाच्वंगु चर्चा यानादिसें आः नकतिनि धइथें क्वचाःगु निगूपक्षीय परामर्शय् जलवायु ह्यूपाःया ख्यलय् साझेदारी अप्वयेकेगु बारे दुग्यंक सहलह जूगु धयादिल।

अन्नपूर्ण आरोहणया ७५ क्वःगु वार्षिकोत्सव थुगुसी लाःगुलिं दच्छि यंकं पर्वतीय विषय केन्द्रित जुयाः निगुलिं देसं थी थी ज्याझ्वः ग्वसाः ग्वयेत्यंगु कनादिसें फ्रान्सेली राजदूतं नेपाःया विकासया कुतलय् थःपिनिगु देय्पाखें मद्दिक ग्वाहालि बियाच्वनी धइगु प्रतिबद्धता प्वंकादिल।

उगु झ्वलय् मन्त्रिपरिषदया दुजः, पूर्वप्रधानमन्त्री, सांसद, थन च्वंगु कूटनीतिक नियोगया प्रमुख नापं पदाधिकारी, ज्याया झ्वलय् थन वयाच्वंपिं फ्रान्सेली नागरिक, वरिष्ठ सञ्चारकःमिलिसें समाजया नांजाःपिं मनूतय् ब्वति दूगु खः।

प्रधानमन्त्री केपी शर्मा ओलीं त्रिभुवन विश्वविद्यालय, शिक्षण अस्पतालया विस्तारित सेवा भवनया थौं उलेज्या यानादीगु दु।

भाटभटेनी सुपर मार्केटया ग्वाहालिइ दयेकूगु उगु भवन शिक्षण अस्पताल ४३ क्वःगु दँय् थ्यंगु लसताय् महाराजगञ्जय् ग्वसाः ग्वःगु ज्याझ्वलय् प्रधानमन्त्री ओलीं उगु भवनया उलेज्या यानादीगु खः।

ज्याझ्वलय् प्रधानमन्त्री ओलीं नेपाल सरकारं ‘निरोगी नेपाल’या नारा ज्वनाः ज्या याःगुलिं फयांफच्छि बिरामी मजुइगु यानाः आहार, विहार व आरामय् ध्यान बिइगु व बिरामी जु हे जुसां गुण्स्तरीय व अःपुकं सेवा बिइमाःगु धयादिल।

वय्कलं दुःख यानाः ध्यबाः मुंकाः सामाजिक ज्याय् दान यानादीपिं भाटभटेनीया सञ्चालक मीनबहादुर गुरुङ व सावित्री गुरुङया तच्वकं प्रशंसा यानादिल। “गुलिस्यां ध्यबा कमेयानाः जू म्हिताः फुकी, गुरुङ त्यपुं अस्पताल दयेकेत दान याइ। जू म्हितीपिं भिंगु लँपुइ वने, गुरुङ त्यपुया दान यायेगु क्षमता अप्वःया वनेमाः।”

मध्यपश्चिम विश्वविद्यालयया थौं क्वचाःगु १७ क्वःगु सभा बैठकं आः वइगु आर्थिक दँ २०८२÷८३ या निंतिं छगू अर्ब ३६ क्वति ७७ लख २१ द्वः तकाया बजेट पारित याःगु दु।

प्रधानमन्त्री निवास, बालुवाटारय् प्रधानमन्त्री लिसें कुलपति केपी शर्मा ओलीया नायःसुइ च्वंगु बैठकय् विश्वविद्यालयया रजिष्ट्रार प्राडा शोभाकर कँडेलपाखें न्ह्यब्वयादीगु पुँजीगत पाखे ४६ क्वति २५ लख तका व सञ्चालनपाखे ९० करौड ५३ लाख २१ हजार तकाया बजेट लिसें ज्याझ्वः स्वीकृत जूगु खः।

प्रधानमन्त्री केपी शर्मा ओलीं हुलाकी राजमार्ग अन्तर्गत गौरीगञ्ज–आमबारी ब्वःया झापा व मोरङ स्वाइगु रतुवा ताँया थौं उलेज्या यानादीगु दु।

भौतिक पूर्वाधारलिसें यातायात मन्त्रालयया हुलाकी सतक निर्देशनालयपाखें ग्वसाः ग्वगु ज्याझ्वलय् प्रधानमन्त्री ओलीं उगु ताँया उलेज्या यानादीगु खः। उगु झ्वलय् प्रधानमन्त्री ओलीं बुँ सतिक खुसि दुसां नं सिँचाइ व उत्पादन मजुइगु स्थिति अन्त्य यासें विकास निर्माणयात तब्याकाः आःया झिंन्यादँया दुने देसं गरिबी न्हंका छ्वयेमाः धकाः आह्वान यानादिल।

वय्कलं कृषिया आधुनिकीकरण व व्यावसायिकरण यानाः नमुना ज्या यायेत स्थानीय तहयात इनाप यानादीगु प्रधानमन्त्रीया सचिवालयं धाःगु दु।