संचार नाप सूचना प्रविधिमन्त्री रेखा शर्मा भारत भ्रमणय् वःगु दु। मन्त्री शर्मा बुधबाः व बिहीबाः न्हुगु दिल्लीइ जुइगु थीथी ज्याझ्वलय् ब्बति कायेगु निति मंगलबाः बहनि भारत वंगु खः।

मन्त्री शर्मा बुधबाः अन्तर्राष्ट्रिय दूरसञ्चार संघ (आइटीयू) या क्षेत्रीय कार्यालय उलेज्याझ्वलय् ब्बति कायेगु निति उखे वंगु खः।

न्हुगु दिल्लीइ स्थापना जुइत्यःगु आइटियू एशिया प्रशान्त क्षेत्रीय कार्यालय भारतीय प्रधानमन्त्री नरेन्द्र मोदीं उलेज्या याइगु ज्याझ्वः दुगुलि थीथी देय्या सन्चारमन्त्रीपिन्त ब्बंगु खः।

मन्त्री शर्माया नापं नेपाल दूरसन्चार प्राधिकरणया अध्यक्ष पुरुषोत्तमप्रसाद खनाल, मन्त्रालयया सहसचिव गौरव गिरी, मन्त्री शर्माया स्वकीय सचिव हेमराज शर्मा पोख्रेल, नेपाल टेलिकमया प्रबन्धक बिमल आचार्य भारत भ्रमणय् वःगु खः।

महाकवि गिरिजाप्रसाद जोशीया ८५ क्वःगु बुदिं सुकुन्दा साहित्य पाःलाः (आरआर क्याम्पस)या ग्वसालय् छगू ज्याझ्वः हंगु दु।

उगु ज्याझ्वःया मूपाहां कथ प्रा. डा. चुन्द्रमान वज्राचार्यं त्वाःदेवाय् मत च्याकाः उलेज्या यानादीगु खः। वय्कलं शिथिल अवस्थाय् थ्यनेधुंकूगु साहित्यिक ज्याझ्वःयात हाकनं पुनःजीवन बिउगु धासें ग्वसाः खलःयात सुभाय् देछानादिल । लिसें वय्कलं वइगु दिनय् मेमेपिं साहित्यकारयात नं लुमंकाः थुकथं हे थीथी ज्याझ्वः पाःलाःपाखें याना वनीगु आशा नं प्वंकादिल।

पाहांकथं झायादीम्ह महाकवि गिरिजाया काय यचु जोशीं नेपाःमि जनतां देय्या इतिहासयात बांलाक थुइकेगु कुतः मयासे राजनीति यानाच्वंगुलिं देशय् शासन व्यवस्थाय् हिउपाः वःसां नं आम जनतां उकिया खास हे अनुभूति याये मखनाच्वंगु खः धयादिल । नेवाः बस्ती नेवाः स्कुल अभियानया संयोजक दीपक तुलाधरं थौंया पुस्ता नं नेपालभाषाया अभियानय् सक्रिय जुया वयाच्वंगुलिं मातृभाषा संरक्षणय् ग्वाहालि जुयाच्वंगु दु धयादिगु खःसा मदनसेन वज्राचार्यं महाकवि गिरिजाप्रसाद जोशी मांभाय्या साहित्य ख्यःया छम्ह सशक्त जन साहित्यकार खः धासें वय्कःया कृति अध्ययन याना वनेबलय् राज्यपाखें गुकथंया शोषण वदमन यानातःगु धइगु खः सीके फइ धयादिल। लिसें वय्कलं महाकवि गिरिजाया अप्रकाशित कृतित पिथनेमाःगु खँय् नं बः बियादिल ।

नेवाः विद्यार्थी युनियनया संस्थापक मनिष मानवं महाकवि गिरिजाया बुन्हिया लसताय् लाकाः झण्डै निगू दशक लिपा क्याम्पसपाखें ‘सुकुन्दा’ दँपौ नं पिथनेगु ज्यां लसता वःगु खँ कनादिल। पाःलाःया नायः प्रशान्त डंगोलया सभापतित्वय् जूगु ज्या पाहांकथं झायादीम्ह अनुपसिंह सुवाल, पाःलाःया छ्याञ्जेनापं ज्याझ्वःया कजि रिदेन महर्जनं नं नुगःखँ तयादीगु खः ।

यलया ओल्खु त्वाःया अष्टमान महर्जनं मंगलबजारया मूचूकं याकः सलं जात्रा जुगु दुु।

उम्ह सलंयात मूचूकं सुरु जूया ओल्खु, नेउत, लोहलँ, भोल गणेश जूया बालकुमारीइ क्वचाय्किइगु खः। बालकुमारीया सिवाचा द्यःया थाय् चाःहिला भोलध्वाकाय् लिहावइगु खः।

बालकुमारी–भोलध्वाकाये स्वकः चाःहिइकेगु याइ। वया लिया उम्ह सलं गयावम्ह गुथीयारयात खेँ सगं बिया सलंजात्रा क्वचायेकिइ याइ।

प्रधानमन्त्री पुष्पकमल दाहाल प्रचण्डबिरुद्ध बानेश्वरय् नाराबाजी यागु दु। ५८ क्वःगु अन्तर्राष्ट्रिय जातीय भेदभाव उन्मुलन सार्वजनिक समारोहय् वनाच्वःगु इलय् स्वम्हेसिया प्रधानमन्त्री बिरुद्ध नाराबाजी याःगु खः।

ज्याझ्वलय् छम्हेसिया थःगु खँ तये दय्माःगु धका इनाप याःगु खः। तर प्रहरीं उम्ह मनूयात ज्वनेत स्वयेवं प्रचण्डबिरुद्ध नाराबाजी याना बिरोध याःगु खः। अथे छम्हेसिया म्हुतुप्वाः तिइ दइमखु धका नारा थ्वयकूगु खः। निम्हेसित प्रहरीं गाडीइ तयेवं उपि निम्हेसिया न मूल्यवृद्धि खारेज गर्, नालयक सरकार होसियार, ल्याय्म्हपिन्त स्याये दइमखु थज्याम्ह सरकार माःगु मदु, ७७ जिल्लाय् च्वपि ल्याय्म्ह छवाः जू धका नाराबाजी याःगु खः।

उमित प्रहरीं नियन्त्रणय् काय्वं प्रधानमन्त्री प्रचण्ड ज्याझ्वलय् थ्यःगु खः। प्रधानमन्त्री दाहाल ज्याझ्वलय् वनाच्वंगु इलय् वया न्ह्यने हे छम्हेसिया बैंकया मिटर ब्याज मिनाह याः धका नारा थ्वय् कूगु खः। वयात न प्रहरीं अन हे नियन्त्रणय् काःगु खः।

स्वंगु दशकनिसे नेपाली साहित्यय् थःगु बिस्कं म्हसिका दुम्ह च्वमि रवीन्द्र समीरया झींस्वंगु सफू कोरोनातन्त्र बजारय् वःगु दु। लघुकथा विधाय् अब्बल सर्जक समीरया थुगु झीगु लघुकथा संग्रह खःसा निगुगु उपन्यास खः।

कोरोनातन्त्र सूत्र उपन्यासदुने सच्छिपू बाखं दुथ्याका उपन्यास तयार यानातःगु दु। कोरोनाया वैश्विक महामारीया सुरुनिसे समाजय् खनेदुगु ग्यानापुगु, हल्ला, उपचारया अनिश्चितता, बेडया अभाव, अक्सिजनया अभाव, सरकारी अकर्मन्यता, खोपबारे उत्पन्न भ्रम नाप महामारीपाखे वःगु मनोसामाजिक अवस्थायात समीरं सुत्रात्मक रुपं न्ह्यब्वयातःगु खः।

कोरोनातन्त्रया हरेक बाखनय् कोरोनाया इलये उखान नाप शास्त्रीय धापू सफुतिइ दथ्याकातःगु दु। सफूया केन्द्रियपात्र डा.शर्मां थःम्हेसिया दुःखसिगु व अनुभवं उपन्यासय् च्वयातःगु खः। महामारीया इलय् जुयाच्वंगु घटनायात शब्दय् संगठित यासे म्हगसय् खंगु व्यङ्ग्यात्मक शैलीइ च्वयातःगु सूत्रउपन्यास खः– कोरोनातन्त्र ।