टीकापुर घटनाय् जन्मकैदको सजाय फयाच्वम्ह रेशमलाल चौधरी थौं त्वःतुगु दु।

गणतन्त्र दिवसया लसताय् राष्ट्रपति रामचन्द्र पौडेलपाखे आममाफी बिइवं चौधरी थौं कारागारपाखे रिहा जूगु खः। मन्त्रिपरिषदं म्हिगः आइतवाः सुथय् रेशमया करिब १५ दँया कैद सजाय माफी यायेगु सिफारिस याःगु खः।

न्यादँ व स्वला जेल सजाय काटे याये धुकुम्ह चौधरीया १४ दँ व गुंला जेल सजाय छुट जूगु दु।

थुगु पटक चौधरीनाप १९ म्ह संविधानया धारा २७६ व मुलुकी फौजदारी कार्यविधि संहिताया दफा १५९ बमोजिम गणतन्त्र दिवसया लसताय् माफी बिउगु खः।

वइगु आर्थिक वर्ष २०८०÷८१ या बजेट थौ न्हिनसिया ४ बजे सार्वजनिक याइगु जुगु दु।

थ्व स्वया न्ह्यः राष्ट्रपति रामचन्द्र पौडेलपाखे प्रस्तुत याःगु सरकारया नीति तथा कार्यक्रम निगुलि सदनपाखे पारित जुइवं सरकारं थौं बजेट हयेत्यःगु खः ।

थौ न्हिनय् च्वनिइगु राष्ट्रिय सभा व प्रतिनिधि सभाया मंकाः बैठकय् अर्थमन्त्री प्रकाशशरण महतं बजेट प्रस्तुत हइगु कार्यसूची दु। जेठया १५ गते दुने बजेट हयेमाःगु बाध्यकारी संवैधानिक व्यवस्थाय् दु।

बजेट सार्वजनिक याइगु ज्याझ्वलय् प्रधानमन्त्री, मन्त्रिपरिषदया सदस्य, राष्ट्रिय योजना आयोगया उपाध्यक्ष, गभर्नर लगायतपिनिगु सहभागिता दइगु प्रचलन दु।

राष्ट्रपति रामचन्द्र पौडेलं जन्मकैदया सजाय फयाच्वम्ह रेशम चौधरीयात कैद सजाय माफी बिःगु दु।

मन्त्रिपरिषदया सिफारिसय् रेशम चौधरीनाप १९ म्हेसित कैद सजाय माफी बिइगु धका राष्ट्रपति कार्यालयं धाःगु दु। मन्त्रिपरिषदया थौं आइतवाः सुथय् च्वंगु बैठकं रेशमया कैद माफीया लागि सिफारिस यायेगु निर्णय याःगु दु।

अथेहे न्ह्यम्ह ज्येष्ठ नागरिकपि नाप ४८२ म्हेसित ल्यः दुगु कैद सजाय माफी याःगु दु । संविधानया धारा २७६ व फौजदारी कसुुर (सजाय निर्धारण व कार्यान्वयन) ऐनया दफा ३७ नाप ज्येष्ठ नागरिक ऐनया दफा १२ बमोजिम उमित ल्यः दुगु कैद सजाय माफी बिःगु दु।

गोरखापत्र संस्थानया सम्पादक सल्लाहकारय् उपेश महर्जन नियुक्त जगु दु।

थौं आइतवाः च्वंगु मन्त्रिपरिषदया बैठकं महर्जनयात सम्पादक सल्लाहकारय् नियुक्त यायेगु निर्णय याःगु खः।

महर्जनयात निदँया लागि नियुक्त याःगु खः।

महर्जनं त्रिभुवन विश्वविद्यालयय् समाजशास्त्रय् एमफिल तक यानादी दुकुम्ह खः।

मिस नेपाल वर्ल्ड २०२३ या उपाधि श्रीच्छा प्रधानं त्याकूगु दु। थौं शनिवाः गोदावरीस्थित सनराइज सम्मेलन हलय् जूगु ज्याझ्वलय् ग्राण्ड फिनालेय् प्रधान त्याकूगु खः।

वंगु दँया मिस नेपाल प्रियंकारानी जोशीं प्रधानयात ताज पूइकाबिगु खः। फिनालेय् प्रसिद्धी शाहं मिस नेपाल इन्टरनेसनल व रैना मजगैयाँ मिस नेपाल अर्थया उपाधि त्याकूगु खः।

उगु ज्याझ्वलय् १२ सहविधाया विजेता तक घोषणा याःगु खः । मिस नेपाल विजेता प्रधान येँ च्वम्ह खः। प्रधान थःत वातावरण अभियन्ताया कथं म्हसिका वयाच्वम्ह खः । २३ दँ दुम्ह श्रीच्छां फेस अफ द इयर व मिस डीएचआईया सहविधा न त्याकूगु खः।

अथेहे मिस पपुलर च्वाइस प्रसिद्धी शाह, ऐश्वर्या श्रेष्ठ मिस फिटनेस क्वीन व मिस इन्टलेक्चुअल, ग्रिष्मा अधिकारी मिस ग्ल्यामर, मिस कन्फिडेन्ट प्रज्ञा बज्राचार्य, मिस हेल्दी स्किन रायना मजगैयाँ, मिस मल्टिमिडिया सुहानी खड्का क्षेत्री, फेस अफ द इयर व मिस डीएचआई श्रीच्छा प्रधान, वुमन थि द विंग्स उन्नती गुरुङ, मिस फोटोजेनिक कीर्तिक खड्का, मिस ब्यूटी विथ द पर्पस आयुष्मा बराल घोषित जूगु खः।

फिनालेय् ११ म्ह निर्णायकपि पत्रकार दिलभूषण पाठक, क्रिकेटर ज्ञानेन्द्र मल्ल, होटल एसोसिएसन नेपालया अध्यक्ष विनायक शाह, सर्वोच्च अदालत बार एसोसिएसनया अध्यक्ष पूर्णमान शाक्य, अग्नि गु्रपया अध्यक्ष क्याबिनेट श्रेष्ठ, नेपाल क्लियरिङ हाउसया प्रमुख कार्यकारी अधिकृत निलेशमान सिंह प्रधान, मिस नेपाल वल्र्ड–२०२० नम्रता श्रेष्ठ, मिस नेपाल अर्थ–२०१७ रोजिना श्रेष्ठ, अब्सोल्युट एस्थेटिक क्लिनिकया निर्देशक सुरुजना श्रेष्ठ, अभिनेत्री आँचल शर्मा व महिला उद्यम व्यवसायी महासंघया अध्यक्ष नीरु रायमाझीपि च्वनादीगु खः।