शेयर बजाः थौं बुधवाः निगु अङ्कं थहावःगु दु। शेयर बजाः परिसूचक नेप्से थौं २३ दशमलव ३९ अङ्कं थहावना १ हजार ८ सय ४५ दशमलव शून्य १ विन्दुइ थ्यःगु दु।

दक्को समूहया शेयर थहावसां बीमा, विकास बैंक व जलविद्युत् समूहया शेयर तसकं थहावःगु दु। बजाः नाप थौं कारोबार रकम न थहावःगु दु।

२६६ गु कम्पनीया २५ लाख ७७ हजार कित्ता शेयर ८५ करोड ७६ लाख रुपैयाँ न कारोबार जुगु दु। दकलय् अप्पो शिवम् सिमेन्टया ५ करोड ४६ लाख रुपैयाँया शेयर किनबेच जूगु खः।

थौं दकलय् अप्पो आत्मनिर्भर लघुवित्तया शेयर १० प्रतिशत व इस्टर्न हाइड्रोपावर लिमिटेड, ग्रीनलाइफ हाइड्रोपावर लिमिटेड व आदर्श लघुवित्तया शेयर साढे ९ प्रतिशत स्वया अप्पो थहावःगु खः।

समग्र बजाः थहावंसा थौं दलकय् अप्पो माईखोला जलविद्युत् कम्पनीया शेयर झन्डै ८ प्रतिशत कुहावःगु दु।

लुँ तोलां थौं १ हजार १ सय रुपैयाँ कुहावःगु दु। लुँ तोलां १ हजार १ सय रुपैयाँ कुहावया थौं १ लाख १० हजार रुपैयाँ न कारोवार जुगु दु धका नेपाल सुनचाँदी व्यवसायी महासंघं धाःगु दु।

अथेहे वहः तोलां न्यातका कुहावःगु दु। वहः तोलां न्यातका कुहावया १ हजार ३ सय ७० रुपैयाँ न कारोबार जुगु दु धका महासंघं धाःगु दु।

नेपाल आयल निगमं डिजेल व मचिकंया भाः झीतका कुहावःगु दु। सोमवाः च्वंगु निगम सञ्चालक समितिया बैठकं डजेल व मचिकंया भाः झीतका क्वकायेगु निर्णय याःगु खः।

आः डिजेल व मचिकं लिटरं १५५ रूपैयाँ कायम जूगु दु। थ्व स्वया न्ह्यः डिजेल व मचिकं लिटर १६५ रूपैयाँ खः।

किपूया प्यंगःथामय् स्थापना याःगु मूर्तियात व्यवस्थापन मयातले ह्यागृब भैरबनाथ नाप ३२ पानेजु संघं याकःमिसायात स्वां तयेमयेकिइगु अडान मत्वःतूगु दु।

थौं विवाद ज्यकेगु निति यल महानगरपालिकां सरोकार पक्षपि नाप च्वंगु बैठकय् पानेजु संघं अथे थःपिनिगु अडान तःगु खः। पानेजु संघं मूर्ति व्यवस्थापनया लागि किपू नगरपालिकायात थ्व हे जेठ ४ गते तकया ई बिःगु दु।

सुखी गँछेः समाजं वंगु मंसिर १५ गते प्यंगःथामय् स्थापना याःगु मूर्तियात गुठी संस्थानय् मयकूतले बुगंद्यःया स्वां किपूलि मयकेगु अडान पानेजु संघं यायेवं थौं च्वंगु बैठक विनानिष्कर्ष क्वचाःगु खः। उगु बैठकय् किपू नगरपालिका व अनच्वपि स्थानीयपिन्स मूर्ति स्थापना याःगु थासं मुर्ति चिइके धुकुलि व बन्द कोठाय् तयातःगुलि स्वां तयेहया परम्परा कायम यायेमाःगु धका धाःगु खः।

तर, ३२ पानेजु संघया अध्यक्ष यज्ञरत्न मानन्धरं मूर्ति गुठी संस्थान, पुरातत्व विभाग वा राष्ट्रिय संग्रालयय् तयेगु विकल्प दु। अय्न, किपूलिइ स्थापना याःगु थासं नगरपालिकां मुर्ति बन्द कोठाय् तयाःगुलि गूठी संस्थानय् यकेम्वाः धका धाःगु खः।

संघया अध्यक्ष मानन्धरं नक्कली मूर्ति चिइकेमाःगु धका धासे स्वां तयेयकेत उगु मूर्ति किपूलि हे चिइकेमाः धा अडान तःगु खः। ‘धार्मिक महत्व व ऐतिहासिकतायात निरन्तरता यायेगु लागि पुरातत्व विभागय् परिपत्र तक यायेगु आधारय् किपूया प्यंगःथामय् स्थापना याःगु मूर्ति उगु थासं चिइकेमाः। तर, उगु मूर्ति थ्व हे जेठ ४ गते दुने व्यवस्थापन यायेमाःगु सहमति जुगु दु’ धका मंकाः बैठकय् निर्णय याःगु खः।

थौं च्वंगु बैठकय् याकःमिसाया धार्मिक महत्वयात राष्ट्रिय मान्यता कायम यायेत म्हति न ५ हजार १ सय १ रुपैयाँ वार्षिक दरबन्दी कायम यायेगु धका गुठी संस्थानं ज्या न न्ह्याकेगु निर्णय जूगु खः।

सरकारं म्वाःम्ह शहीद धका म्हसिउम्ह मुकेश कायस्थयात राष्ट्रिय शहीद घोषणा याःगु दु।

थौं मंगलवाः च्वंगु मन्त्रिपरिषदया बैठकं कायस्थयात राष्ट्रिय शहीद घोषणा याःगु दु धका सञ्चार लिसे सूचना प्रविधि मन्त्री रेखा शर्मां जानकारी बिःगु दु।

२०६२÷०६३ या निगुगु जनआन्दोलनया झ्वलय् घाःपाः जूम्ह काभ्रेया कायस्थ वंगु वैशाख २८ गते मदुगु खः।