विकासया निंतिं वित्तसम्बन्धी प्यक्वःगु अन्तरराष्ट्रिय सम्मेलनय् ब्वति कायेत स्पेनया भ्रमणय् झाया च्वनादीम्ह प्रधानमन्त्री केपी शर्मा ओली थौं स्वदेश लिहां झायादीत्यंगु दु।

सुचं लिसें प्रसारण विभागं थौं न्हिनसिया ३ः४५ ताः इलय् प्रधानमन्त्री ओली त्रिभुवन अन्तरराष्ट्रिय विमानस्थलय् थ्यंकः झाइगु धाःगु दु। नेपाली प्रतिनिधिमण्डलया नेतृत्व यानादीसें प्रधानमन्त्री ओली थ्व हे असार १४ गते शनिबाः स्पेन झायादीगु खः।

स्पेनय् च्वनादीबले प्रधानमन्त्री ओलीं संयुक्त राष्ट्रसङ्घया महासचिव एन्टेनियो गुटेरसयात नापलानादीगु खः। प्रधानमन्त्री ओलीं स्पेन सरकारया अध्यक्ष (प्रधानमन्त्री) पेड्रो साञ्चेजनाप नं नापलानादीगु खः। अथे हे, स्टोनियाया राष्ट्रपति अलार कारिस, इजिप्टया प्रधानमन्त्री डा मोस्तफा कमाल माडबुली व पोर्चुगलया प्रधानमन्त्री लुइ मोन्टेनेग्रोयात नं नापलाादीगु खः।

प्रधानमन्त्री ओलीं विकासया निंतिं वित्तसम्बन्धी प्यक्वःगु अन्तरराष्ट्रिय सम्मेलनयात सम्बोधन यानादिल। अल्पविकसित देय्तय्गु उच्चस्तरीय बैठकया अध्यक्षता यानादिल। अथे हे, थी थी सहलह सत्रय् प्रधानमन्त्री ओलीया सक्रिय ब्वति दूगु खः। विकास ग्वाहालिइ न्हूगु बिचाः सम्बन्धी उच्चस्तरीय सहलहया नापनापं मेमेगु साइड इभेन्टसय् प्रधानमन्त्री ओली नेतृत्वया नेपाली प्रतिनिधिमण्डलं ब्वति काःगु खः।

विहीबाः जक वय्कलं स्पेनया मेड्रिडय् च्वंगु हलिंन्यंकं लोकंह्वाःगु फुटबल क्लब रियल मेड्रिडया सान्टियागो बर्नाबाउ रङ्गशाला भ्रमण यानादिल। स्पेनय् च्वंगु नेपाली दूतावासया निरीक्षणया नापं नेपाली समुदायनाप सहलह ब्याकादीगु खः।

स्पेनया औपचारिक भ्रमणय् झायाच्वनादीम्ह प्रधानमन्त्री केपी शर्मा ओली स्वदेश लिहांझायेगु झ्वलय् थौं कतारया दोहा झायादीगु दु।

प्रधानमन्त्री ओली मेड्रिडया अडोल्फो सौरेज बराजाज विमानस्थलं स्थानीय ई कथं बहनीसिया ११ ताः इलय् दोहाया निंतिं झायादीगु खः। प्रधानमन्त्री दोहा झाये न्ह्यः वय्कःयात स्पनेया निंतिं नेपाली राजदूत शनिल नेपाल व अधिकारीपिंसं विदाइ यानादिगु खः।

स्पनेया सेभियाय् क्वचागु संयुक्त राष्ट्रसङ्घया ‘विकासया निंतिं वित्त (फाइनान्सिङ फर डेभलपमेन्ट) प्यक्वःगु अन्तरराष्ट्रिय सम्मेलन’य् ब्वति कयाः मेड्रिडया ज्याझ्वः क्वचायेकाः प्रधानमन्त्री ओली स्वदेश लिहां झायादित्यंगु दु।

वंगु असार १४ गते स्पेन झायादीम्ह प्रधानमन्त्री ओली शुक्रबाः सनिलया ५ ताः इलय् येँय् थ्यंकःझाइगु ज्या धलः दु।

स्पेनया औपचारिक भ्रमणय् झायाच्वनादीम्ह प्रधानमन्त्री केपी शर्मा ओलीं थौं मेड्रिडय् च्वंगु प्रादो राष्ट्रिय सङ्ग्रहालयया अवलोकन यानादीगु दु। युरोपया हे पुलांगु मध्ये छगू लाःगु उगु कला सङ्ग्रहालयया अध्यक्ष जाबियर सोलानें प्रधानमन्त्री ओलीयात लसकुस यानादिल।

सङ्ग्रहालयकय् युरोप व स्पेनया इतिहास, संस्कृतिलिसे सम्बन्धित घटनातय्त कलात्मक ढंगं न्ह्यब्वयातःगु खः। अवलोकनया झ्वलय् न्हापांम्ह मिसा राधिका शाक्य, प्रधानमन्त्रीया मुख्य सल्लाहकार विष्णुप्रसाद रिमाल, खानेपानीमन्त्री प्रदीप यादव, परराष्ट्र मन्त्रालयया सचिव अमृतबहादुर राई, अर्थ मन्त्रालयया सचिव घनश्याम उपाध्यायया ब्बति दुगु खः

स्पेनया सेभियाय् ग्वसाःग्वःगु संयुक्त राष्ट्रसङ्घया विकासया नितिं लगानीसम्बन्धी प्यक्वःगु अन्तरराष्ट्रिय सम्मेलनय् ।ब्वति कयाः प्रधानमन्त्री ओली मेड्रिडया ज्याझ्वलय् झायादीगु खः। प्रधानमन्त्री ओली थौ शुक्रबाः सनिलया ५ ताः इलय् स्वदेश लिहाझाइगु ज्याझ्वः दु।

सहरी विकास मन्त्रालयं येँया चोभाः गल्छीया ल्वहं तःछ्याइ मखु धकाः ध्वाथुइकूगु दु। मन्त्रालयं थौं छगू विज्ञप्ति पिकासें निकास विन्दु कथं दूगु गल्छीया ल्वहं तमछ्याइगु न्ह्यथँसें अन च्वंगु फोहोर धाःसा चीकेगु धाःगु खः।

मद्दिक वा वइबलय् चोभाः गल्छी लिक्क डुबान जुइगु समस्या वयाच्वनीगुलिं फोहोर व्यवस्थापन यायेत स्वयाच्वना धइगु मन्त्रालयया धापू खः। मन्त्रालयया प्रवक्ता नारायणप्रसाद मैनालीं ऐतिहासिक ल्वहंत चीकेगु छुं नं योजना मदूगु न्ह्यथनादिसें म्वाःमदुगु भ्रम च्वयेकेगु ज्या जूगु धयादिल।

“गल्छी लिक्क च्वंगु लागाय् न्हापा चुइकाः हयातःगु फोहोर चीकेगु, चलः वनीथें जाःगु सम्भावित थाय्त म्हसीकाः रोकथाम यायेगु व दीर्घकालीन समाधान यायेत आवश्यक प्राविधिक अध्ययनलिसें कार्ययोजना तयार यायेगु झीगु मू तातुना खः,” वय्कलं धयादिल, “मन्त्रालयं चोभाः गल्छी तब्याकेगु वा प्राकृतिक रूपं दूगु ऐतिहासिक ल्वहंत चीकेगु छुं नं योजना मदूगु ध्वाथुइकाः थजाःगु ज्याया भ्रम च्वयेकेगु धइगु पाय्छि मजू।”

मैनालीया कथं चोभाः गल्छी स्वनिगःया प्रमुख लःया निकास बिन्दु खः गन सहरय् दूगु दक्व खुसिं वइगु लः ल्वाकःज्याः वइगु व वाः वइगु इलय् लःया निकास पनीगु इलय् सहरया थी थी थासय् डुबान जुइगु जोखिम अप्वया वनाच्वंगु दु।वय्कलं थ्व लागाया दीर्घकालीन व्यवस्थापन यायेत सहरी विकास मन्त्रालयं थःगु तातुना ध्वाथुइकुसें धार्मिक, सांस्कृतिक नापं ऐतिहासिक महत्व दूगु चोभाः गल्छीया मौलिक स्वरूपयात बचे यानाः डुबान न्यूनीकरण यायेत फोहोरया व्यवस्थापन यायेगु धकाः धयादिल।

“प्राकृतिक सम्पदातय्गु संरक्षण यानाः मानव सुरक्षाय् बः बिइगु नीति कथं चोभाः लागाय् ज्या न्ह्याकेगु जुइ ”, विज्ञप्तिइ धयातःगु खः।थ्व हे असार १४ गते च्वंगु विपद् जोखिम न्यूनीकरण नापं व्यवस्थापन प्राधिकरण कार्यकारी समितिया ३२ क्वःगु बैठकं चोभाः गल्छीइ सम्भावित डुबान न्यूनीकरण यायेत नेपाली सेनालिसे समन्वयकय् आवश्यक पलाः न्ह्याकेत निर्देशन बिइधुंकाः सामाजिक सञ्जाल व थी थी राजनीतिक वृत्ततय्के थ्व विषययात कयाः थी थी धारणा सार्वजनिक जूगु धासें मन्त्रालयं असन्तुष्टि प्वंकूगु खः।

विपद् न्यूनीकरणलिसे सम्बन्धित निर्णयतय्के मनूतय् च्यूता अप्वया वनाच्वंगु इलय् मन्त्रालयया थ्व स्पष्टिकरणं विवादयात ज्यंकीगु अपेक्षा याःगु दु।

निक्वःगु अन्तर्राष्ट्रिय मातृभाषा पत्रकार सम्मेलनया घोषणापत्र संयुक्त राष्ट्र संघयात थौ छगु ज्याझ्वः दथुइ नेवाः पत्रकार राष्ट्रिय दबूया नायः नृपेन्द्र लाल श्रेष्ठं लःल्हानादीगु दु।

उगु ज्याझ्वलय् सार्क जनलिष्टया अध्यक्ष राजु लामा पत्रकार दबूया सचिव राजु नापित व सिर्जना नेवाःयापिनिगु उपस्थितिइ पत्रकार दबूया नायः श्रेष्ठं संयुक्त राष्ट्र संघ नेपालया प्रतिनिधि सिम्रिका शर्मायात घोषणापत्र हस्तान्तरण यानादीगु खः।

“नेपालय् मातृभाषा पत्रकारिताया सम्बन्धय् नेवाः पत्रकार राष्ट्रिय दबूया व सार्क जनलिष्ट नाप ज्या यायेत व सहकार्य यायेत संयुक्त राष्ट्र संघ सकारात्मक दु,“ धका शर्मा धाःगु दु। शर्मा मातृभाषा संरक्षणया निति नेवाः पत्रकार राष्ट्रिय दबूया व सार्क जनलिष्टया कुतःया प्रशंसा न यानादीगु दु।

सार्क पत्रकार मञ्चया अध्यक्ष राजु लामां सम्मेलनया उद्देश्य स्पष्ट यानादीसे मातृभाषा पत्रकारिताया कुतः संयुक्त राष्ट्र संघयात ग्वहालि यायेतइनाप यानादीगु खः।

अथेहे पत्रकार दबूया अध्यक्ष नृपेन्द्र लाल श्रेष्ठं १३ व १४ जुन २०२५ य् जुगु निक्वःगु अन्तर्राष्ट्रिय मातृभाषा पत्रकार सम्मेलनया घोषणापत्रयात समर्थन याना संयुक्त राष्ट्र संघयात मातृभाषा पत्रकारिता कया याना वयाच्वंगु ज्याझ्वःयात ग्वहालि यायेत इनाप यानादीगु खः।