नेपाल सरकार व जेनजी प्रतिनिधिया दथुइ १० गू बुँदे सहमति जूगु दु।

प्रधानमन्त्री ज्याकुथि सिंहदरबारय् म्हिगः सनिलय् ग्वसाः ग्वंगु समारोहय् प्रधानमन्त्री सुशीला कार्की व जेनजी आन्दोलनय् सहिद जूपिं व घाःपाः जूपिनि प्रतिनिधियापाखें भोजविक्रम थापां सम्झौतापौखय् ल्हाःचिं तयादीगु खः।

सहमतिया लिपा प्रधानमन्त्री सुशीला कार्कीं सरकार व जेनजी पुस्ताया प्रतिनिधि दथुइ जूगु सम्झौता ह्यूपाःया निंतिं कोसल्वहंया कथं दयाच्वनीगु भलसा कयादीगु दु। वय्कलं आः जूगु सम्झौता पा कन्हय्या ह्यूपाःयात निर्देशन याइगु धयादिल। प्रधानमन्त्री कार्कीं धयादिल, “थुकिं संविधान दयेकेत गाइड याइ। भविष्यय् रक्तपातया आन्दोलन व विपद् पनेगु कुतः याइ।

झी सकलें छथाय् हे दु। जेनजी जिगु सन्तान खः। झी सकसिया छगू हे बिचाः खः, युवा शक्तिं सत्ता कायेमाः। उमिगु बिचाः कथं राज्य न्ह्यायेमाः। झी सकस्यां थः सन्तानया भविष्य स्वयेगु मंतयाच्वना।”वंगु भदौ २३ व २४ गतेया आन्दोलनया मर्म व भावना नापं जेनजी पुस्तां ल्ह्वनाः वयाच्वंगु सुशासनया मुद्दा, संविधान संशोधन, निर्वाचन प्रणालीइ सुधारलिसेंया विषयत दुथ्याना च्वंगु दु।

उगु झ्वलय् सरकारया मन्त्रीपिं, मुख्यसचिव लिसेंया उच्च अधिकारीपिनिगु नापं उपस्थिति दूगु खः।

सर्वोच्च अदालतं नेपाल विद्युत् प्राधिकरणया कार्यकारी निर्देशकय् हितेन्द्रदेव शाक्ययात पुनस्र्थापित यायेत आदेश ब्यूगु दु। जेनजी आन्दोलनया बलय् ऊर्जा, जलस्रोत नाप सिँचाइमन्त्री दयकूलि प्राधिकरणय् पूर्वप्रबन्ध निर्देशक कुलमान घिसिङं शाक्ययात जल नाप ऊर्जा आयोगय् सरुवा यायेवं उकिइ विरुद्ध शाक्य सर्वोच्च अदालतय् वःगु खः।

उगु रिटय् सुनुवाइ यासे सर्वोच्चया न्यायाधीशपि डा. नहकुल सुवेदी व श्रीकान्त पौडेलया इजलासं शाक्ययात पुनस्र्थापित यायेगु आदेश ब्यूगु खः। असोज ५ गते मन्त्रिपरिषदया बैठकं शाक्ययात जल लिसे ऊर्जा आयोगया विशेष पद सिर्जनायासे सरुवा यायेगु व प्राधिकरणया कार्यकारी निर्देशकय् मनोज सिलवालयात नियुक्त यायेगु निर्णय याःगु खः।उगु निर्णयविरुद्ध शाक्यं  कात्तिक १३ गते सर्वोच्चय् रिट निवेदन दर्ता याःगु खः। 

चैत १५ गते तीनकुने घटनाय् मदुम्ह पत्रकार सुरेश रजकयात सरकारं शहीद घोषणा याःगु दु। रजक २०८१ चैत १५गते प्रदर्शन जुगु झ्वलय् तीनकुनेय् रिर्पोटिग यायेगु झ्वलय् मदुगु खः।

सोमवाः च्वंगु मन्त्रिपरिषद् बैठकं रजकयात राज्यं शहीद घोषणा यायेगु निर्णय जुगु दु धका सरकारया प्रवक्ता नाप सञ्चारमन्त्री जगदीश खरेलं जानकारी ब्यूगु खः।

सुरेश रजकयात शहिद घोषणा यायेमाः धका नेवाः पत्रकार राष्ट्रिय दबू न येँ, यल व ख्वपय् प्रदर्शन याःगु खः।

नेवाः न्ह्यलुवाः नाप न्हुदँ राष्ट्रिय समारोह सचिवालय दुजः व नेवाः देय् दबू येँ जिल्लाया बरिष्ठ उपाध्यक्ष श्रीजनमान श्रेष्ठया अबु मुकुन्द श्रेष्ठ थौ सुथय् आकाझाका मन्त।

बीर अस्पतालय् वासः याकेगु झ्वलय् थौ सुथय् ३ः४५ बजे मदुगु खः। वयक ६९ दँय् मदुम्ह खः। वयकःया अन्त्येष्टि थौ १० बजे पशुपति याइ धका परिवारपाखे जानकारी बिउगु दु।

मदुम्ह मुकुन्द श्रेष्ठया छम्ह जहान, छम्ह काय् व छम्ह म्ह्याय् दिइ।

पूर्वराष्ट्रपति विद्यादेवी भण्डारीं वंगु भदौ २४ गतेया आन्दोलनया हुनिं क्षतिग्रस्त जूगु सिंहदरबार परिसरया संरचना याकनं पुनःनिर्माण जुइगुलिइ विश्वास प्वंकादीगु दु।

वंगु भदौ २४ गतेया आन्दोलनया हुनिं क्षतिग्रस्त जूगु सिंहदरबारया संरचनातय्गु अवलोकन लिपा पूर्वराष्ट्रपति भण्डारीं संरचना ध्वस्त जूगु खनाः थः तसकं दुःख ताःगु व नेपाल सरकारं थुगु संरचनातय्त याकनं पुनःनिर्माण याइ धइगु विश्वास थःम्हेस्यां यानागु धयादीगु दु।

पूर्वराष्ट्रपति भण्डारीं भविषय् थुजाःगु घटना मजुइमा धकाः नापं मनं तुनादिल। वय्कलं न्हापाया प्रधानमन्त्री लिसें मन्त्रिपरिषद्या ज्याकुथिलिसेंया क्षतिग्रस्त जूगु ज्याकुथिया अवलोकन यानादीगु खः। पूर्वराष्ट्रपति भण्डारीयात सञ्चार लिसें सुचं प्रविधिमन्त्री जगदीश खरेलं लसकुस यासें ज्याकुथितय्गु अवलोकन याकादीगु खः।

ज्याकुथि अवलोकन लिपा पूर्वराष्ट्रपति भण्डारीं प्रधानमन्त्री सुशीला कार्कीयात नापलानादीगु खः।