प्रदेशसभां प्रधानमन्त्री केपी शर्मा ओलीयात प्रदेशसभाया मुँज्याय् विशेष संबोधनया निंतिं ब्वना ब्यूगु दु। थ्व हे वइगु फागुन ५ गते सोमबाः च्वनीगु प्रदेशसभाया मुँज्याय् विशेष संबोधनया निंतिं थौं प्रधानमन्त्री ओलीयात ब्वना ब्यूगु प्रदेशया मुख्यमन्त्री चेतनारायण आचार्यं धयादिल।

सभामुख तुलाराम घर्ती मगरं मुख्यमन्त्री आचार्यपाखें प्रधानमन्त्री ओलीयात विशेष संबोधनया निंतिं थौं ब्वना बियादीगु खः। लुम्बिनी प्रदेशसभा नियमावली, २०७९ या नियम २२० या उपनियम (२) कथं ब्वना ब्यूगु खः।

प्रधानमन्त्री ओलीं फागुन ५ गते प्रदेशसभाया मुँज्यायात बिशेष संबोधनलिपा दाङया घोराहीइ ग्वसाः ग्वयेत्यंगु सभा यात संबोधन यायेगु व ६ गते राप्ती स्वास्थ्य विज्ञान प्रतिष्ठानया सिनेट मुँज्याय् ब्वति कायेगु ज्याझ्वः क्वःछि धुंकूगु मुख्यमन्त्री आचार्यं धयादिल।

कम्बोडियाया निंतिं नेपाःया गैरआवासीय राजदूत धनबहादुर ओलीं अनया नरेश नरोदम सिहामोनीयात न्होमपेनय् च्वंगु लाय्कुलिइ बिहीबाः ग्वसाः ग्वःगु विशेष ज्याझ्वलय् थःगु ओहोदाया दसिपौ न्ह्यब्वयादीगु दु।

ओहोदाया दसिपौ न्ह्यब्वयादी धुंका नरेश सिहामोनीनाप जूगु नापलायेगु झ्वलय् राजदूत ओलीं राष्ट्रपति रामचन्द्र पौडेलपाखें कम्बोडियाया नरेशया व्यक्तिगत सुख, भिं–उसाँय्या नापनापं कम्बोडियाली जनताया निरन्तर प्रगतिया कामना यानादिल। बैंककय् च्वंगु नेपाली दूतावासया कथं राजदूत ओलीयात लसकुस यासें कम्बोडिया नरेशं राष्ट्रपति पौडेलया व्यक्तिगत सुख, भिं–उसाँय्या नापं नेपाली जनताया प्रगतिया कामना यानादिल।

वस्पोलं राजदूत ओलीया कार्यकालय् कम्बोडिया व नेपाः दथुइ ग्वाहालिया स्वापू अझं धिसिलाना वनीगु भलसा प्वंकादिल। ज्याझ्वलय् कम्बोडियाया उपप्रधानमन्त्री नापनापं लाय्कूया उच्च अधिकारीपिनिगु नं उपस्थिति दूगु खः।

प्रधानमन्त्री केपी शर्मा ओलीं विकास–निर्माणया परियोजना पूवंकाः हे त्वतेगु प्रतिबद्धता प्वंकादीगु दु। नापं वय्कलं थुज्याःगु परियोजनायात क्वःछिनातःगु इलय् क्वचायेकेगु सरकारया प्राथमिकता जूगु नं धयादीगु दु।

सामाजिक सञ्जाल फेसबुकय् ‘बन्दैछ नेपाल’ शीर्षकय् सतक दयेका च्वंगु भिडियो तयादिसें वय्कलं विकास निर्माण व आयोजनाया प्रगतिया बारे थौं न्हय्गू हे प्रदेशया मुख्यमन्त्रीपि नापं ‘एक्सन रुम’पाखें सहलह ब्याकेत्यंगु खँ न्ह्यथनादीगु खः।

प्रधानमन्त्री ओलीं निर्माण व्यवसायीतय्त ३० अर्ब दां भुक्तानी याये धुकाःगु दु धकाः नं कनादीगु दु। “भिं सुथ ! झीगु विकास निर्माण व आयोजनातय्गु प्रगतिया बारेया न्हय्गू हे प्रदेशया मुख्यमन्त्रीपि नाप एक्सन रुमपाखें थौं सहलह जुइत्यंगु दु। जिमिगु प्राथमिकता दु – न्ह्याकागु ज्या पूवंकेगु।

विकास परियोजना क्वचायेकूपिं ठेकेदारतय्त भुक्तानी नापं मब्यूगु न्हापाया अवस्थायात भिंकाः ३० अर्ब ध्यबाः बक्यौता भुक्तानी यानाःगु दु”, प्रधानमन्त्रीं च्वयादीगु दु, “पूर्वाधार निर्माण सम्बन्धी दिनाच्वंगु यक्वः हे ज्यात द्रूत गतिइ न्ह्यावना च्वंगु दु।”

बेलायतया राजकुमार एडवार्ड व राजकुमारी डचेस सोफी पोखराय् वःगु दु।

वयकःपिन्त पोखराया मेयर धनराज आचार्य, प्रमुख जिल्ला अधिकारी भरतमणि पाण्डे न लसकुस याःगु दु। राजकुमार एडवार्ड न कन्ह्यः शुक्रवाः बेलायती सेनाय् न्हुपि भर्ना जूपिन्त नेपाली ल्याय्म्ह तय्त पोखराया ब्रिटिस क्याम्पय् पद व गोपनियताया सपथ नकिइगु ज्याझ्वः दु।

कन्ह्यः हे लुम्लेय् हाइकिङ यायेगु, घान्द्रुक चाःहिलिइगु चन्द्रकोटय् वनिइगु ज्याझ्वः दु।

दयेकिगु वेदकोट नगरपालिका–९ सुन्दरपुरय् च्वंगु उदयदेव माध्यमिक ब्वनेकुथिया भवन भारतीय दूतावासया ग्वाहालिइ दयेकेत्यंगु दु।

भवन दयेकेत दूतावासं प्यंगू क्वःति ९९ लख ९८ द्वः ६४० ध्यबाः बिइ त्यंगु वेदकोट नगर प्रमुख भोजराज बोहरां कनादिल।

“दूतावासय् उदयदेव व शारदा माध्यमिक ब्वनेकुथिया भवन निर्माणया प्रस्ताव यंकाःगु खः”, वय्कलं धयादिल, “उदयदेवया भवन निर्माणया निंतिं प्रस्ताव स्वीकृत जूगु दु।” ब्वनेकुथिया भवन निर्माणया झिगू प्रतिशत लाय् पालिकापाखें तइ।