यल महानगरपालिका १६ वडाया ग्वसालय थौ यल महानगरपालिका दुने संघसंस्था ब्यबसाय पिन्तः नेपाल भाषा लिपि छ्यलेगुबारे बिशेष मुँज्या जूगु दु।

यल महानगरपालिका १६ वडाया अध्यक्षं निर्मलरत्न शाक्यं थ्व हे असार मसान्ततक दुने संघ संस्था, पसःया साइनबोर्ड, बिल व लेटरप्याडय् नेपाल लिपि व नेपाल भाषा अनिवार्य छ्यलेत धाःगु दु।

थौ छगु बिशेष मुँज्याय् थीथी खलः पुचः नाप ब्यवसायी तय्गु ब्बति दुगु खः। 

गृहमन्त्री रमेश लेखकं जिल्ला प्रहरी ज्याकुथिया निरीक्षण यानादीगु दु। लेखकं थौं सुथय् जिल्ला प्रहरी ज्याकुथिया अनुगमन नापं निरीक्षण यानादीगु बैतडीया प्रहरी प्रवक्ता, प्रहरी निरीक्षक बलराम पाण्डेयं जानकारी बियादिल।

निरीक्षणया झ्वलय् लेखकं जिल्ला प्रहरी ज्याकुथिलिसें जिल्लाया मेमेगु प्रहरी युनिट व शान्ति सुरक्षाया अवस्थाया जानकारी कयादीगु खः। गृहमन्त्री लेखकयात भवन अभावलिसें विषय जानकारी ब्यूगु प्रहरी प्रमुख, प्रहरी नायब उपरीक्षक मकेन्द्र मिश्रं कनादिल।

वय्कलं धयादिल, “जिल्ला प्रहरी ज्याकुथिइ मिसा मस्तय्गु सेवा केन्द्र व व्यारेक भवन निर्माणया  निंतिं आवश्यक बजेट हयेत कुतः यायेत इनाप यानागु खः।” लिसलय् गृहमन्त्रीं थःगु कार्यकालय् भवन निर्माण यायेत बजेटया व्यवस्था याये धकाः धयादिल।

गृहमन्त्री लेखकं जिल्लाया मुक्कं शान्ति सुरक्षाया बारे नं जानकारी कयादिल। गृहमन्त्री लेखकं थौं सुथय् थनया जगन्नाथ देगलय् दर्शन यानादिल। गृहमन्त्री लेखक थौं हे बैतडीं लिहाँवइगु ज्याझ्वः दु।

नेपालय् थी थी ख्यलय् लगानीया सम्भावना व ह्वःताःया विषयकय् खँल्हाबल्हा यायेत प्रधानमन्त्री केपी शर्मा ओलीलिसे मलेसिया–नेपाल बिजनेस काउन्सिलया प्रतिनिधिमण्डलं थौं नापलाःगु दु।

प्रधानमन्त्री निवास, बालुवाटारय् नाप लायेगु झ्वलय् प्याराडाइज्ड ग्रुप कम्पनी, मलेसियाया कार्यकारी अध्यक्ष प्रदीपकुमार कुक्रेजा (दातो) या नेतृत्वय् वःगु २० म्ह दुजःया प्रतिनिधिमण्डलं थःपिं नेपालय् न्हूगु उद्यमितय्गु नितिं अर्थपूर्ण व्यावसायिक नापं निगू देय्या सम्बन्ध स्थापित यायेत व नेपाःया व्यावसायिक वातावरणबारे दुग्यंक थुइकेत भ्रमणय् वयागु धकाः कनादिल। प्रधानमन्त्री ओलीं नेपाःया समृद्धिया निंतिं विदेशी लगानीयात हःपाः व सहजीकरण यायेत सरकारं कानुुनी व संरचनात्मक सुधारत याना वयाच्वंगु जानकारी बियादिसें नेपालय् लगानी यायेत इनाप यानादिल।

वय्कलं वइगु इलय् छु गजाःगु सुधार व सहजीकरण आवश्यक जू धइगुलिइ सरकारं न्ह्याबलें व्यवसायीतलिसे सहकार्य याइगु जानकारी बियादिल। प्रतिनिधिमण्डलं थःपिंसं नेपालय् फोहोर (प्लास्टिक) प्रशोधन, सूचना प्रविधि उद्यान, पर्यटन आदि ख्यलय् ज्या यायेत उत्सुक जूगु धाःगु दु। उगु झ्वलय् नेपालय् पर्यटन, कृषि, सूचना प्रविधि, जनशक्ति, कापः व थी थी ख्यलय् लगानीया सम्भावनाबारे सहलह जूगु खः।

मलेसियाय् च्वंगु नेपाःया दूतावासया सहकार्यय् वःगु उगु प्रतिनिधिमण्डल स्वन्हुया निंतिं थ्व हे असार १८ गते येँय् वःगु खः। उगु झ्वलय् प्रधानमन्त्रीया मुख्य सल्लाहकार विष्णुुप्रसाद रिमाल, आर्थिक मामिला सल्लाहकार डा युुवराज खतिवडालिसें ब्वति दूगु खः। 

सञ्चार नापं सूचना प्रविधिमन्त्री पृथ्वी सुब्बा गुरुङं सङ्घीयता, समानुपातिक व समावेशी प्रणालीयात निरुत्साहित यात धाःसा जनतायात अन्याय जुइ धका धयादीगु दु।

यलया गोदावरीइ ग्वसाः ग्वःगु लोकतान्त्रिक आदिवासी जनजाति महासङ्घया केन्द्रीय पदाधिकारी नापं सचिवालयया विस्तारित बैठकयात संबोधन यानादिसें सञ्चारमन्त्री गुरुङं नारा जक ‘समृद्ध नेपाः सुखी नेपाःमि’ धयाः जक मज्यू धकाः धयादिल। समृद्ध व सुखी नेपाःमि जुइकेत शान्ति, स्थिरता, सङ्घीय ढाँचाया समावेशी राज्य, अधिकारया ब्वथला, इमिगु थःपिनिगु प्रतिनिधित्व आवश्यक जूगु वय्कलं न्ह्यथनादिल।“

समाजय् भाषिक समुदाय, जातीय समुदाय दथुइ असमानता दु, दकसिबे अप्वः वर्गीय असमानता दु, बहुसंस्कृति माने याइगु देसय् समतामूलक समाज निर्माण यायेत सङ्घीयता माःगु खः, फुक्कसित धार्मिक समानता दयेमाः, छुं नं छगू धर्मया पृष्ठपोषण यातधाःसा धार्मिक युद्ध जुइ”, सञ्चारमन्त्री गुरुङं धयादिल। वय्कलं पार्टीदुने तसकं दुःख यानाः थकाःगु आदिवासी जनजाति समुदायतय् म्हसीका कायम याना तयेफयेमाः धकाः धयादिल।

“पार्टीया न्याक्वःगु महाधिवेशनय् नं जाति, भाषा व धर्मया विषयकय् यक्व खँ थंगु खः, सांस्कृतिक अधिकार दयेमाः धइगु यक्वसिगु माग खः, थ्व लोकतान्त्रिक आदिवासी जनजाति महासङ्घ आः नं समस्याय् लानाच्वंगु दु, पार्टीया नीतिदुने च्वनाः आदिवासी जनजातिया ख्यलय् ज्या याइगु संस्था खः, आदिवासी जनजातितय् ख्यलय् ज्या यायेफयेमाः, न्ह्याबलें नं संवेदनशील जुइमाः”, सञ्चारमन्त्री गुरुङं धयादिल।

“नेपाली भाषा मूल भाषा खः,अन्तरजातीय समुदायतदथुइ सम्पर्कया भाषा नं खः, तर थःपिनिगु भाषिक अधिकार, उत्थान व समानताया खँ ल्हायेबलय् नेपाली भाषाया विरोध यायेमज्यू, मुक्तिया निंतिं सः थनीपिं छथ्वः दु, प्रभुत्वया निंतिं सः थनीपिं नं दु, झीसं समानता, अधिकारया निंतिं वर्गीय व जातीय शोषणविरुद्ध चेतनाया आधारय् सः थनेमाः”, सञ्चारमन्त्री गुरुङं धयादिल लोकतान्त्रिक आदिवासी जनजाति महासङ्घया नायः पासाङ शेर्पां इलय् हे महासङ्घया महाधिवेशन यायेमाःगुलिइ बः बियादिल। थनिंनिसें न्ह्याःगु उगु बैठक शनिबाःतक जुइ।