नेकपा (एमाले)या ११ क्वःगु राष्ट्रिय महाधिवेशन उलेज्या जुइगु ख्वपया सल्लाघारी चौरय् निर्माणाधीन मञ्च लगायत संरचना तयार यानाच्वंगु दु।

एमाले महाधिवेशन मंसिर २७ निसे २९ गते तक जुइ। महाधिवेशनया उलेज्या ख्वपया सल्लाघारीइ जुइसा बन्दसत्र भृकुटीमण्डपय् जुइ।

वंगु भदौ २३ व २४ गते जुगु जेनजी आन्दोलनया झ्वलय् करिब ८४ अर्ब ४५ करोड ७७ लाख तका बराबर याःगु भौतिक संरचना क्षति जुुगु तथ्याँक सार्वजनिक जूगु दु।

क्षतिग्रस्त सरकारी संरचना पुनर्निर्माणया निति ३६ अर्ब ३० करोड तका तुइगु अनुमान याःगु खः। क्षतिया मूल्याङ्कन नाप सार्वजनिक संरचनाया पुनःनिर्माण योजना तयार यायेत गठन जूगु समितिं म्हिगः प्रधानमन्त्री सुशीला कार्कीयात लःल्हागु प्रतिवेदनय् भौतिक संरचना अन्तर्गत २ हजार १ सय ६८ सङ्घसंस्था व निकाय प्रभावित जूगु उल्लेख याःगु खः।

आन्दोलनया झ्वलय् न्ह्यय्गू हे प्रदेशय् ५४ गु जिल्ला व २ सय ६२ पालिकाय् क्षति जूगु खः। प्रतिवेदनय् १२ हजार ६ सय ५९ गाडी क्षति जुगुलि १२ अर्ब ९३ लाख ६१ हजार तका बराबरया नोक्सान जुगुलि सरकारी व सार्वजनिक क्षेत्रय् ४४ अर्ब ९३ करोड ७३ लाख रुपैयाँ बराबरया क्षति जुगु खः।

अथेहे, २ हजार ६ सय ७१ भवन क्षति जुगु खःसा उकिया मूल्याङ्कन ३९ अर्ब ३१ करोड ७५ लाख तका बराबर थ्यःगु खः। प्रतिवेदन कथं सामुदायिक व मेमेगु क्षेत्रय् ५ अर्ब ९७ करोड १७ लाख तका बराबरया क्षति जूगु खः।निजी क्षेत्रया क्षति मूल्याङ्कन ३३ अर्ब ५४ करोड ८७ लाख तका बराबर व सरकारी क्षतिइ स्वंगू तहमध्ये सङ्घीय सरकारा ६८ प्रतिशत, प्रदेशया १० व पालिकाया २२ प्रतिशत जुगु दु।

उगु प्रतिवेदन कथं आन्दोलनया कारण २ हजार ९ सय ९९ म्हेसियागु रोजगारी प्रभावित जुगु दु। नापं, १३ अर्ब ८४ करोड ५६ लाख तका बराबर वस्तु व सेवा उत्पादन प्रभावित जुगु दु।

नेपाली कांग्रेस येँया क्षेत्र नम्बर ८ या निति प्रत्यक्षपाखे सपना राजभण्डारी जोशीया नां सिफारिस जूगु दु।विघटित प्रतिनिधिसभा सदस्य राजभण्डारी कांग्रेसया मदुम्ह नेता नवीन्द्रराज जोशीया जहान खः।

राजभण्डारी महासमिति सदस्य न खः।अथेहे प्रत्यक्षपाखे जोशी नापं राजु खरेल, मुस्कान गौतम, रविन्द्रलाल श्रेष्ठ, डा. अमितसिंह कार्की, राजुराज जोशीया नां न सिफारिस जूगु दु।

क्षेत्रीय कार्यसमितिं समानुपातिकपाखे राज्यलक्ष्मी श्रेष्ठ, बद्री नेपाल व राष्ट्रिय सभाय् कृष्णा अमात्यया नां सिफारिस यायेगु निर्णय जूगु दु।

राष्ट्रपति रामचन्द्र पौडेलयात नेपाःया निंतिं नवनियुक्त राजदूतपिंसं थःथःगु ओहोदाया दसिपौ पेस याःगु दु।राष्ट्रपति भवनय् थौं ग्वसाः ग्वगु बिस्कंबिस्कंगु विशेष समारोहय् वय्कःपिंसं थःथःगु ओहोदाया  दसिपौ पेस याःगु राष्ट्रपतिया ज्याकुथिं धाःगु खः।

नेपाःया निंतिं उज्वेकिस्तानया राजदूत सर्दोर मिर्जायुसुपोभिच रुस्तामबायेभ, रोमानियाया राजदूत सेना लतिफ, ताजिकिस्तानया राजदूत लुक्मोर बोबोकालोन्जोदा, आइसल्याण्डया राजदूत बेनेडिक्ट हेओस्कुल्द्सन व क्युवाया राजदूत हुवान कार्लोस मार्सान अगुइलेरां ओहोदाया दसिपौ लःल्हाःगु खः।

उगु समारोहय् नेपाल सरकारया उच्च पदस्थ अधिकारीतय्गु तकं ब्वति दूगु खः। नवनियुक्त राजदूतपिंत लाजिम्पाटंनिसें राष्ट्रपति भवन तक रिसल्ला लिसेंया बग्गीइ सवार याकूगु खः।

प्रधानमन्त्री सुशीला कार्कीं युवापिं बांलाःपिं राजनीतिज्ञ जुइमा व देय् न्ह्याकेमा धइगु थःपिनिगु इच्छ दूगु धयादीगु दु।सरकार र जेनजी समूह दुथइ म्हिगः सिंहदरबारय् जूगु सम्झौता लिपा सम्बोधन यानादिसें प्रधानमन्त्री कार्कीं छगू हे दस्तावेजपाखें सकसियां इच्छा पूमवनीगु खँ ध्वाथुइकादिल।

“गुलि नं झी युवा शक्तिपिं दु, उपिं देसय् हे च्वनेमाः, लजगाः न्ह्याका च्वनेमाः। बांलागु राजनीतिज्ञ जुइमाः व देय् न्ह्याकेमाः धइगु जिमिगु इच्छा दु। छगू हे दस्तावेजं सकसियां इच्छा ला पूवंके फइमखु”, प्रधानमन्त्री कार्कीं धयादिल। वय्कलं उगु सहमति नेपाल राजपत्रय् पिथनीगु व थ्व ऐतिहासिक अभिलेख जुइगु धयादिल।

सम्झौताय् ल्हाःचिं तयेगु समारोहय् ब्वति काःपिं छुं जेनजी प्रतिनिधितय्सं धाःसाः सम्झौता थःपिंत चित्त बुझे मजूगु धकाः ध्याचू प्वंकूगु खः।