नेवाः पत्रकार राष्ट्रिय दबू न म्हिगः संचार व सूचना प्रबिधि मन्त्री रेखा शर्मायात सिहदरबारय् नाप लाना मातृभाषा पत्रकारितया अवस्था व नेपाल टेलिभिजनय् नेपालभाषं न समाचार तयेगु बिषय ध्यानाकर्षण याकूगु दु। दबूया स्थापनाकालनिसे न्ह्याका वयाच्वंगु बिचाः नाप मुद्दा व पैरवी याना वयाच्वंगु एजेण्डा विषय नाप २०७९ पुस २३ गते क्वचाःगु प्यक्वःगु महाधिवेशन व झीक्वःगु दँ मुज्या वंगु २०७९ माघ १९ व २० गते लुम्बिनीइ जुगु न्हापागु पुर्ण केन्द्रीय समितिं पारित याःगु विषययात मन्त्री शर्मायात ध्यानाकर्षण पौं लःल्हाःगु खः।

दबूया अध्यक्ष नृपेन्द्रलाल श्रेष्ठया नेतृत्वय् मन्त्री शर्मायात ध्यानाकर्षण पौं लःल्हागुलि मातृभाषाया पत्रकारिता याःगु विकास व विस्तारया लागि राज्यं थप सहुलियत, सुविधायात नीतिगत रुपं सम्बोधन यायेत संचार व सूचना प्रबिधि मन्त्रालय न प्रभावकारी भूमिका निर्वाह यायेमाःगु माग यानादीगु खः। अध्यक्ष श्रेष्ठं नेपालय् मातृभाषा पत्रकारिताया शुरुजूगु सच्छि दँ थ्यनेत्यःगु दु। थ्व हे नेपाल संवत् १०४५ अर्थात् वि.सं. १९८२ सालया बुद्ध जयन्तीया दिं नेपालभाषाया माध्यमं न्हापागु पत्रिका बुद्ध धर्म प्रकाशित जुगु जानकारी बिःगु खः। धर्मादित्य धर्माचार्य (जगतमान वैद्य) न भारतया कलकत्तां प्रकाशित याःगु उगु पत्रिका नेपालय् हे न्हापागु  मातृभाषा न प्रकाशित याःगु न्हापागु पत्रिका खः धका अध्यक्ष श्रेष्ठं दाबी यानादीगु खः।

पत्रकार दबू न नेपाल आदिवासी जनजाति पत्रकार महासंघया समन्वय न धर्मादित्य धर्माचार्यया बुदिं बुद्ध जयन्तीया छन्हु न्ह्यः वःगु न्ह्यदँनिसे मातृभाषा पत्रकारिता दिवस कथं हन वया च्वनागु खँ मन्त्री शर्मायात जानकारी बियादीगु खः। वयकलं पत्रकार दबू न नेपाल संवत् ११४४ अर्र्थात् वइगु २०८० साल कार्तिकनिसे मेगु कार्तिक तक मातृभाषा पत्रकारिता शताब्दी महोत्सव हनेगु तयारी दु धका जानकारी बियादीगु खः। शतवार्षिकीया लसताय् न्हापाम्ह मातृभाषाया पत्रकार धर्मादित्य धमाचार्य (जगतमान वैद्य) या जीवनी प्रकाशित यायेगु, वयकःया कृतित्व व व्यक्तित्व चर्चा, वयकः शालिक अनावरण यायेगु, हुलाक टिकट प्रकाशित यायेगु, मातृभाषा पत्रकारिताबारे थीथी गोष्ठी नाप सार्क स्तरया गोष्ठी, सभा, प्यानल सहलह यायेगु योजना दु धका धयादीगु खः।

अथे हे  समावेशी सञ्चार क्षेत्रया विषय सञ्चारकःमिपिन्त दक्षता, क्षमता अभिवृद्धि, अभिमुखीकरण, युवावर्गपिन्त सञ्चार क्षेत्रय् आकर्षित यायेगु विषयलय् न बःबियादीसे नेवाः लगायत आदिवासी जनजाति पत्रकारपिन्त उत्पादन व पुनःताजगी तालिम संचालन यायेगु ज्यााझ्वः दु धका मन्त्री शर्मायात जानकारी बियादीगु दु। दबू न सरकारी सञ्चारमाध्यम नेपाल टेलिभिजनय् छु ई न्ह्यः जक तामाङ व लिम्बु भाषाय् समाचार प्रसारण शुरु यागुलि सुभाय् बियादीसे थुजाःगु ज्याझ्वः न सञ्चारमाध्यमय् सकसिगु सः व मातृभाषां सूसुचित यायेगुे हकउात सम्मान यागु दु धका धयादीगु खः।

दबू न नेपाल टेलिभिजनय् न नेपालभाषाया माध्यमपाखे समाचार प्रसारण यायेत मन्त्री शर्मायात ध्यानाकर्षण याकूगु खः। अथेहे मातृभाषा पत्रकारिता यानाच्वपिन्त राज्यं बियाच्वंगु लोककल्याणकारी विज्ञापन, झीन्यादँनिसे पत्रकारिता यानाच्वपि बिशेष भत्ता व मेमेगु अनुदान वितरण यायेगु इलय् समानुपातिक समावेशीतायात प्राथमिकता बिइत नाप समावेशीताया लागि प्रोत्साहन यायेमाःगु, सञ्चार सम्बन्धी आः अस्तित्वय् दुगु व  भविष्यय् गठन जुइगु दक्को निकाययात पूर्ण समावेशी यायेमाःगु माग दबू न याःगु दु। अथेहे मातृभाषी पत्रकारिता बिकास यायेगु निति धर्मादित्य धर्माचार्य संचार प्रतिष्ठान गठनया माग न यानादीगु खः।

गुगु बुँदे ध्यानाकर्षण पौं लःल्हानाकयादीसे मन्त्री शर्मा न नेवाः पत्रकारपिनिगु योगदानको प्रशंशा यानादीसे थीथी भाषाभाषी दुथ्याका नेपाल टेलिभिजनपाखे नेपालभाषाया समाचार प्रशारणया लागि थःम्हेसिया कुतः याये। छु दिं लिपा हे नेपालभाषाया समाचार नाप मेमेगु भाषाया न समचार वइ धका बचं बियादीगु खः।दक्को भाषाभाषीपिन्स थःगु मांभाय् यात मतिना यायेमाः व राज्य न थुकियात सम्मान यायेगु जुइ धका धयादीगु खः। वयकलं पत्रकार महासंघं दक्को पत्रकारपिन्त नापयकें माःगुलि बः बियादीगु खः। नेपाःया न्हापाम्ह मातृभाषी पत्रकार धर्मादित्य धर्माचार्य प्रतिष्ठान दयकेगु गः सकारात्मक दु धका धयादीसे राज्यं छगु प्रतिष्ठान दयकेगु लागि छगु हे समिति गठन याना उकिया अन्तर्गत दक्को कुतः यायेगु जुइ धका धयादीगु खः ।

अथे हे दबूया दुजःपि नेपाल टेलिभिजनया महाप्रवन्धक फुलमान बलयात नापलाना नेपाल टेलिभिजनय् नेपालभाषां न समाचार तयेमाःगुलि ध्यानाकर्षण पौं लःल्हागु खः।

ध्यानाकर्षण पौं लःल्हायेगु निति नृपेन्द्रलाल श्रेष्ठया नेतृत्वय् नेपाल जनजाती पत्रकार महासंघया उपाध्यक्ष अमरध्वज लामा नाप सुनील महर्जन, सुरेन्द्र भक्त श्रेष्ठ, रचना श्रेष्ठ, केके मानन्धर,राजु नापित, बाबुकाजी साःछेँ श्रेष्ठ, सुनिता महर्जन, मिना बज्राचार्य, दानदास श्रेष्ठ, पूर्णभक्त दुवाल, विगेन तुलाधर, शोभा श्रेष्ठ व ईश्वर श्रेष्ठपि वःगु खः।

राष्ट्रपति विद्यादेवी भण्डारीं मदन भण्डारी स्वास्थ्य विज्ञान प्रतिष्ठान, हेटौँडा अस्पतालं बिइगु सेवा सर्वसुलभ व गुणस्तरीय जुइगु भलसा काःगु दु।

अस्पतालं स्वगू तल्ला न्हुगु भवन थौं मङ्गलवाः उलेज्या यानादीसे राष्ट्रपति भण्डारीं प्रतिष्ठान न सर्वसुलभ व गुणस्तरीय स्वास्थ्य सेवा बिइगु भलसा कयादीगु खः।

जननेता मदन भण्डारीया नामं स्थापित जुगु थुगु अस्पतालं स्वास्थ्य सेवा बालाक्क बिइ धक राष्ट्रपति भण्डारीं धयादीगु खः। वयकलं जनस्वास्थ्य ज्याझ्वः नागरिकपिनिगु छेँतक थ्यकेत इनाप यानादीगु खः।

ज्याझ्वलय् बाग्मती प्रदेशया मुख्यमन्त्री शालिकराम जम्कट्टेल, पूर्वमुख्यमन्त्री डोरमणि पौडेल, स्वास्थ्य मन्त्री रामेश्वर श्रेष्ठ लगायतपिन्स अस्पतालं थःगु सेवायात अझ प्रभावकारी दयका यकिइगु भलसा कयादीगु खः।

राष्ट्रपति निर्वाचनय् ८८१ म्ह मतदातापि दु। निर्वाचन आयोगं तयार याःगु मतदाता नामावलीइ ८८१ म्हेसिगु नां दथ्याःगु दु।

प्रतिनिधिसभा सदस्य २७५, राष्ट्रियसभा सदस्य ५९ व प्रदेशसभा सदस्य ५५० याना राष्ट्रपति निर्वाचनय् ८८४ म्हेसिया मतदान याये दइ। तर थुगु पटकया राष्ट्रपति निर्वाचनय् स्वम्ह मतदाता कम जुइफइ धका निर्वाचन आयोगया प्रवक्ता शालिग्राम शर्मा पौडेलं धाःगु दु।

प्रतिनिधिसभाय् २७५ मध्ये चितवन २ पाखे निर्वाचित रवि लामिछाने पदमुक्त जुगु दु सा मनाङपाखे निर्वाचित टेबहादुर गुरुङ निलम्बन जुगु कारण मतदान याये दइमखु। अथे हे छम्ह मतदाताया विषय आयोगं निर्णय याये ल्यःदनिइ। छम्हेसिगु नां आयोगं खुले जुगु मदुनि। अय्न, महोत्तरी–१ पाखे निर्वाचित प्रतिनिधिसभा सदस्य लक्ष्मी चौधरी कोइरी न मतदान याये दइ व मदइ धइगु विषय आयोग निर्णय याःगु मदुनि।

प्रतिनिधिसभा नियमावली २०७९ राष्ट्रपतिया निर्वाचन न्ह्यः हे पारित जूलकि मतदानय् ब्बति काये खनिइ मखु । राष्ट्रपति निर्वाचन तालिका कथं निर्वाचन आयोगं बुधबाः मतदाता नामावली प्रकाशन याइ।

वयालिपा दाबी, विरोध व उजुरीया ज्या जुइ। उजुरीलिपा छानबिन फागुन ११ व १२ गते जुइ। लिपागु मतदाता नामावली फागुन १२ गते हे प्रकाशन याइगु धका आयोगया कार्यतालिकाय् दु। राष्ट्रपतिया लागि मनोनयन दर्ता फागुन १३ जुइ। २५ गते निर्वाचन जुइ। 

नेपाल रेडक्रस सोसाइटी मध्यपुर थिमि उपशाखाया ग्वसालय् छगु अन्तरक्रिया ज्याझ्वः जनआदर्श क्याम्पसय् जुगु दु।

उपशाखाया सभापति बाबुकाजी श्रेष्ठया सभाध्यक्षताय् जुगु उगु ज्याझ्वलय् युवा रेडक्रस सर्कलपिनिगु गठन पुर्नगठन सम्बन्धी अन्तरक्रियाय् मानवीय सेवाय् ल्याम्ह्यपिनिगु भूमिका महत्वपूर्ण दु धका बः बिःगु दु।

मध्यपुर थिमि उपशाखा अन्तर्गत खुगु विद्यालयय् ल्याम्ह्य्पिनिग रेडक्रस सर्कल व ४ नं. वडाय् ल्याम्ह्य् रेडक्रस सर्कल दुगु जानकारी बिउसे ल्याम्ह्यपिगिनु सकारात्मक बिचाः विकास, व्यक्तित्व विकास, रचनात्मक क्रियाकलापया लागि युवा रेडक्रस सर्कल अनिवार्य दुगु धका उपशाखाया पूर्वसभापति नाप शिक्षक नायक भुवन चरण श्रेष्ठं प्रशिक्षण बियादीगु खः।

उपशाखा अन्तर्गत युरेस उपसमितिया संयोजक अर्जेन श्रेष्ठं लसकुस यानादीगु उगु ज्याझ्वलय् च्याःगु विद्यालयया शिक्षक नायक नाप यरेसया अध्यक्षपिनिगु न सहभागिता दुगु खः। उपशाखाया सचिव जीवन श्रेष्ठं न्ह्याकादीगु उगु ज्याझ्वलय् युरेसयात क्रियाशीलन दयकेगु निति उपशाखां अभिभावकत्व ग्रहण याना थीथी ज्याझ्वः युरेसपाखे संचालन यायेगु व थीथी गतिविधिइ उपशाखा न ब्बति कया ग्वाहालि यायेगु व संघसंस्था नाप न सहकार्य याना वनेगु धका धयादीगु खः।

नेवाः पत्रकार राष्ट्रिय दबूया नायः नृपेन्द्रलाल श्रेष्ठं थौं अन्तर्राष्ट्रिय मातृभाषा दिवसया लसताय् छगु प्रेस बिज्ञप्ती पिथना भिंतुना बिःगु दु।

दँय्दसं फेब्रुअरी २१ तारिखयात अन्तर्राष्ट्रिय मातृभाषा दिवसकथं हनावयाच्वंगु नाप सन् १९५२ य् तत्कालीन पूर्वी पाकिस्तान (थौंकन्हय् बंगलादेश) य् बङ्गाली भाय् (मांभाय्) न्ववाये दयेमाः धकाः माग याःबलय् अनया विद्यार्थीपिं स्याःगु घटनायात लुमंकाः थुगु दिवस हनेज्या न्ह्याःगु खँ न्ह्य थनादीगु दु ।

सन् १९९९ नोभेम्वर १७ य् युनेस्को व सन् २००० स संयुक्त राष्ट्र संघं थुकियात मान्यता बी धुंकाः अन्तर्राष्ट्रिय मांभाय् दिं कथं थुगु दिंयात हनेज्या जुयावयाच्वंगु खः । विश्वया भाषिक विविधताया रक्षा व उकिया प्रवद्र्धनया निंतिं थुगु दिवस महत्वपूर्ण दिवसकथं कयातःगु दु । थुगुसी मातृभाषा दिवसय् ‘बहुभाषिक शिक्षा – शिक्षा परिवर्तनया निंतिं आवश्यकता’ धइगु नारा बियातःगु दु धका न्ह्यथनादीगु दु । नेपाः नं भाषिक विविधतां जाःगु देय् खः । थनया भाषिक विविधतायात संरक्षण संवद्र्धन याय्गु निंतिं नं थुगु दिवस नेपाःमिपिनि निंतिं अतिकं महत्वपूर्ण दिं खः ।

थ्व हे खँयात वाःचायेकाः नेवाः पत्रकार राष्ट्रिय दबूपाखें नं प्यदँ न्ह्यःनिसें थीथी ज्याझ्वःयासें थुगु दिवस हनावयाच्वनागु दु । थुगुसी नं थ्व हे २०७९ फागुन १२ गते शुक्रवाः नेपाल प्रेस काउन्सिलया सभाहलय् मातृभाषा दिवसया विशेष ज्याझ्वः याय्गु ग्वसाः दु धका जानकारी बियादीगु दु ।नेपाःया पत्रकारिता ख्यलय् मातृभाषा पत्रकारिताया विकास नेवाः पत्रिकापाखें हे न्ह्याःगु खः । नेवाः पूर्खा धर्मादित्य धर्माचार्यजुं थौंस्वयां ९८ दँ न्ह्यः न्ह्याकूगु ‘बुद्धधर्म’ पत्रिका हे नेपाःया न्हापांगु मातृभाषी पत्रिका खः । थुकथं नेवाः पत्रकारिता ख्यः मातृभाषा विकासया निंतिं थःगु न्हापांगु पलाःनिसें हे सक्रिय जुयाः न्ह्यज्यानाच्वंगु दु ।

थ्व ज्यायात नेवाः पत्रकार राष्ट्रिय दबूपाखें निरन्तर न्ह्यज्याका यंकाः मातृभाषा पत्रकारिताया विकासया निंतिं निरन्तर ज्याझ्वःत यानावं वनेगु जुइ धका धयादीगु दु। वयकलं हलिंया सकल मांभाय् ह्यमिपिन्त २४ क्वःगु अन्तर्राष्ट्रिय मातृभाषा दिवसया लसताय् भिंतुना देछानाच्वना धका बिज्ञप्ती न्ह्यथनादीगु दु।