नेवाःपासा मुना पुचः बिर्तामोडया अध्यक्षय् हाकन दिनेश श्रेष्ठ निर्वाचित जूगु दु।

मूपाहाँ प्रदेश सांसद एकराज कार्की न ज्याझ्वःया उलेज्या यानादीगु खः। संस्थाया २९ क्वःगु दँमुज्या व १२ क्वःगु अधिवेशनं श्रेष्ठया अध्यक्षताय् न्हुगु ज्यासना पुचः ल्यःगु दु्।

उगु ज्यासना पुचलय् उपाध्यक्षय् राजिव श्रेष्ठ, सचिवय् मिलन शाक्य, सहसचिवय् समिर ताम्राकार कोषाध्यक्षय् शर्मिला शाक्य व सहकोषाध्यक्षय् गितादेवी श्रेष्ठयात ल्यःगु दु।

अथे हे दुजलय् भोजकुमार मास्के, दिपेश बैध, तारा श्रेष्ठ, निरु खड्का श्रेष्ठ, प्रविन शाक्य, तारामणी श्रेष्ठ व सचिनराज खड्गीयात ल्यःगु खः।

संस्थाया निवर्तमान अध्यक्ष ईश्वरा श्रेष्ठ, लोकचन्द्र (एलसी)श्रेष्ठ, सन्तोष श्रेष्ठ पिनिगु निर्वाचन समिति गठन याःगु खः।

उगु ज्याझ्वलय् अध्यक्ष दिनेश श्रेष्ठ, उपाध्यक्ष राजिव श्रेष्ठ, दिनेश शाक्य, रत्नकुमार श्रेष्ठ, देवीभक्त श्रेष्ठ, रुद्रमणी श्रेष्ठ, काजी श्रेष्ठपिन्स भिंतुना न्वचु तयादीगु खः।

अन्तर्राष्ट्रिय मातृभाषा थौं २४ क्वःगु दिवस लसताय् विश्वन्यंकं थीथी ज्याझ्वः यासें हनिइ जुगु दुु ।

नेपालय् थीथी ज्याझ्वःयाना हनेत्यःगु दु। नेवाः पत्रकार राष्ट्रिय दबूपाखें शुक्रवाः ज्याझ्वः यायेत्यंगु दु  थुगु दिवसया लसताय् राष्ट्र संघीय निकाय युनेस्कोया प्रमुख एण्ड्रिउ एजाउलें छगू सन्देश जारी यासें विश्वया फुक्कं देय्तय्त मातृभाषाय् आधारित बहुभाषी शिक्षा नीति लागू यायेत निर्देशन बिउगु दु ।

बहुभाषी शिक्षां मस्तय्सं याकनं सयेके फइ धइगु खँ थीथी अध्ययनं नं प्रमाणित जुइधुंकूगु दु धासें युनेस्कों थुगु दँया मातृभाषा दिवसया मू नारा हे ‘शैक्षिक रुपान्तरणया लागिं बहुभाषी शिक्षा’ धकाः दयेकूगु दु । विश्वन्यंकंया मांभाय्त बचे यायेगु लागिं युनेस्कों सन् २०२२ निसें २०३२ तक मांभाय् दशक न्यायेकेगु धकाः घोषणा यानातःगु दु ।

थौंकन्हय् विश्वय् ल्यनाच्वंगु ६७०० गू भाय्त मध्य् ४० प्रतिशत भाषाया पहुँच शिक्षाय् मदुगु व थ्व भाय्त लोप जुइगु सम्भावना यक्व दु धासें आः शिक्षाय् मांभाय्या प्रयोग व्यापक रुपं याना यंकेमाःगु खँ नं युनेस्कों धाःगु दु । थौं माभाय् दिवसया लसताय् संयुक्त राष्ट्र संघया ज्याकुथी बंगलादेशी राजदूतावासया ग्वसालय् छगू विशेष गोष्ठी याइगु जूगु दु गुकी थीथी देय्या प्रतिनिधितय्सं ब्वति काइ ।

नेपालय् नं थौैं नेपाल प्रज्ञा प्रतिष्ठान लिसें थीथी भाषिक खलः पुचःतय्सं मातृभाषा दिवस न्यायेकेगु तयारी यानाच्वंगु दु । मातृभाषा दिवस न्यायेकेगु ज्या बंगलादेशं शुरु जूगु जुयाः नेपाः स्थित बंगलादेश दूतावासं नं ज्याझ्वः याइगु ग्वसाः दु ।

सिला चःह्रे कुन्हु सक्वया ज्योतपलिङ्गेश्वर महाद्यः नापं लच्छि माधब नारयण धलं दंपिं यक्वथें चच्छि जागराम च्वनिगु याइ।

सिला चःह्रे कुन्हु लच्छि धलं दनिगु झ्वलय् सावा गण (शंख पुइपिं व तिन्छु थाइम्हः व कजि जुम्हेसिनं पुजा ज्वना सक्वया पुलांगु दिप शाधुस्मशाने वनिगु चलन दु। थुगु शाधुस्मशान दिपे उमा महेश्वर द्यः यात गुँ बिहारया (बज्रयोगिनि) गुर्जुपिं वया तान्त्रिक विधि पुजा याइगु खः। उगु पुजा याइगु झ्वलय् छगु होम न याइगु याइ।

उगु होमय्  हुति, पंन्छि, न्या, ताहा, छ्वः जो, व दुगचा छम्हः न होम याइगु याइ। अथेहे न्याः छम्हः नापंच्वंगु खुसि त्वतिइसा झंग छम्हः ब्वयका छ्वैगु चलन दु ।

दुगचित बलि बिइधुंक दुगुया छ्यँ छगलं जिर्ण मजुतलेय् होमेय् तयेगु याइ। उगु पुजा सिधयका कजि सावा गणपिं ज्योतिलिङ्गेश्वर महाद्यः याथे च्वना चच्छि भजन याइगु याइ।

शालिनादि लच्छि धलं दंपिं थन वपिं सकसिनं हलिमलि हया सकसितं इना बिगु चलन दु । चच्छि जागराम च्वना सुथय् न्हापं सकल गुँ बिहारे ( बज्रयोगिनि) वना अनया द्यः दर्शनयाना थः थःगु छेँ लिहा वनि थनलि लच्छि धलं दंगु पुं वनी धइगु बिश्वास याना तःग्ु दु।

बाग्मती प्रदेश सामाजिक विकास मन्त्री नाप भाषा सम्वन्धी कार्यदलया कजि कुमारी मोक्तानयात भिंतुना नापं माःगु भ्वं भाषा आयोगया सिफारिस हस्तान्तरण यागु दु।

भाषा आयोगया सिफारिस कथं नेपालभाषा व तामाङ भाषायात प्रदेशया कामकाजि भाषाया रूपय् कार्यान्वयनया नीति नेवाः देय् दबू स्वनिगः विशेष प्रदेशया नायः श्रीकृष्ण महर्जन, नेपाल तामाङ घेदुङ बाग्मती प्रदेश नायः लिला कुमार तामाङ, देय् दबू बाग्मती प्रदेश नायः विष्णुकुमार महर्जनपिन्सं मंकाः कथं लःल्हानादीगु ।

मन्त्री मोक्तानं कार्यदलया बैठक याकनं च्वना ज्या न्ह्याकेगु बचं बियादिगु खः।

पूर्वस्वास्थ्यमन्त्री प्राध्यापक डाक्टर मथुराप्रसाद श्रेष्ठ ८८ दँय् मन्त। श्रेष्ठयात उपचार यायेगु झ्वलय् थौं सुथय् माइतीघरस्थित अन्नपूर्ण न्यूरो अस्पतालमा मदुगु धका पारिवारिक स्रोतं धाःगु दु।

मानवअधिकार ख्यलय् ज्या यानाच्वनादीम्ह श्रेष्ठ ताःईनिसे दम व छातीया सङ्क्रमण जुयाच्वःगु खः। वामपन्थी बुद्धिजीवी श्रेष्ठं चिकित्सकपिन्स समुदायय् वना उपचार यायेमाः धका मान्यतायात न्ह्याकूगु खः।

विसं २०४६ या प्रजातन्त्र पुनर्बाहाली लिपा सरकारय् वयकः नागरिक समाजया पाखे स्वास्थ्यमन्त्री जूयादीगु खः। वयकःया खुम्ह काय् व छम्ह म्ह्याय् दी।