नेकपा एमालेया चुनावी घोषणापत्र थौं सार्वजनिक याइगु जुगु दु।

थौं न्हिनय् १ः३० बजे होटल याक एण्ड यतीइ अध्यक्ष केपी शर्मा ओलीं घोषणापत्र सार्वजनिक याइगु ज्याझ्वः दु धका नेकपा एमालेया कार्यालय सचिव भिष्म अधिकारीं जानकारी बिःगु दु। अन हे लाइभ डिबेटया ज्याझ्वः दु धका न धाःगु दु।

नेकपा एमालेया केन्द्रीय प्रचार विभाग उपप्रमुख विष्णु रिजालया कथं समृद्धिया मार्गचित्र नाप घोषणापत्र सार्वजनिक जुइ धका धाःगु दु।

नेपाली कांग्रेस, नेकपा माओवादी केन्द्र, एकीकृत समाजवादी, राप्रपा लगायतया दलपिन्स चुनावी घोषणापत्र सार्वजनिक याये धुकुगु दु।

संसदय् स्वंगू शक्ति जुइगु झ्वलय् नेकपा माओवादी केन्द्रं वइगु सरकारय् थःपिन्स नेतृत्व यायेगु घोषणा याःगु दु।

केन्द्रीय कार्यालय पेरिसडाडाँय् म्हिगः ८१ पानाया चुनावी प्रतिबद्धतापत्र सार्वजनिक यासे माओवादी केन्द्रया अध्यक्ष पुष्पकमल दाहाल प्रचण्डयात न्हुम्ह प्रधानमन्त्रीया रुपं न्ह्यने यकूगु दु।

वइगु सरकार निर्माण यायेत निर्णायक जुइगु अनुमान यानातःगु माओवादी केन्द्रं राष्ट्रया नेतृत्व, निकास व विकासया लागि प्रचण्ड हे प्रधानमन्त्री जुइमाःगु निष्कर्ष न्ह्यब्बःगु दु। सोमबाः हे जक पूर्वप्रधानमन्त्री डा. बाबुराम भट्टराई न गोरखाय् वना प्रचण्ड प्रधानमन्त्री जुइ धका धाःगु खः।

घोषणा पत्रय् प्रचण्ड प्रधानमन्त्री जुइमाःगु कारण व उकिइ देय् पाखे लाभबारे क्षेत्रगत व्याख्या यानातःगु दु। थीथी ४८ ख्यः दुथ्याका न्ह्यःब्बःगु घोषणापत्रय् माओवादी नेतृत्वया सरकार व प्रचण्ड प्रधानमन्त्री जुइ धका दुथ्याकातःगु दु। तर मत धाःसा माओवादी केन्द्रं गठबन्धनया निति हे फ्वनातःगु दु।

डेंगू संक्रमणं सीपि आःतक ५३ म्ह थ्यःगु दु।

इपिडिमियोलोजी नाप रोग नियन्त्रण महाशाखाया लिपागु तथ्यांक कथं संक्रमित जूपि आःतक ४६ हजार ४१३ व सीपि ५३ म्ह थ्यःगु दु धका जानकारी बिगु दु।

महाशाखाया कथं दकलय् अप्पो येँ १३ हजार ४४४ म्ह संक्रमण जूगु दु सा ख्वपय् ३ हजार ९६७ व यलय् ९ हजार २९५ म्ह संक्रमित जुइ धुकुगु दु। 

नेपाल लिपि गुथिया पुलाम्ह नायः प्रताप मान शाक्यया मां बालदेबी शाक्य थौं सुथय् १ः४० बजे मन्त।

मदुम्ह शाक्य ७९ दँय् बीर अस्पतालय् मदुगु खः। वंगु झीन्यान्हु न्ह्यःनिसे वासः याकाच्वम्ह वयकः थौं सुथय् मदुगु खः।

मदुम्ह शाक्यया स्वम्ह काय् दी। प्रताप मान शाक्य वयकःया माइलाम्ह काय् खः।

प्रधानमन्त्री शेरबहादुर देउवां संस्कृतिविद् सत्यमोहन जोशीं याउगु बालगु ज्या देय्का लागि शिक्षा, ज्ञान व प्रेरणा खः धका धाःगु दु।

प्रधानमन्त्री देउवा न जोशीं नेपालया भाषा, साहित्य व संस्कृतिया ख्यलय् यानादीगु योगदान व वयकलं च्वयादीगु कीर्ति संरक्षणयासे देश विकास यायेफत धाःसा धाथे वयकःयागु कदर जुइ धका धयादीगु दु। मदुम्ह जोशीया झीस्वन्हुया पुण्यतिथिइ यलय् जूगु छगु ज्याझ्वलय् वयलकं संस्कृतिविद् जोशी देय्या माया याइम्ह देशभक्त व्यक्तित्वया कथं थःम्हेसिया म्हसिकाःगु दु धका धाःगु खः।

उगु ज्याझ्वलय् संस्कृति, पर्यटन नाप नागरिक उड्डयनमन्त्री जीवनराम श्रेष्ठं संस्कृतिविद् जोशीया यानादीगु इच्छा पूवकेगु कथं नेपाल भाषायात व्यावहारिकरूपं छ्यलिइगु कथं याकन हे ज्या न्ह्याकेगु प्रतिबद्धता यानादीगु खः। वयकलं धयादीगु दु जोशीं नेपाःया संस्कृति ख्यलय् यानादीगु योगदान याउगु सरकारं न्ह्यावलय् न कदर याइ धका धयादीगु दु।

अथेहे यल महानगरपालिकाया मेयर चिरीबाबु महर्जनं संस्कृतिविद् जोशीया व्यक्तित्व व कीर्तित्वया न्ववानादीगु खः।