नेवाः पत्रकार राष्ट्रिय दबूया सल्लाहकार ईश्वर जोशीया मां रत्नमाया जोशी थौं सुथय् मन्त।

८५ दँ दुम्ह रत्नमाया जोशी थौं सुुथय् ७ः४५ बजे थौं हे छेँय् मदु धका परिवारपाखे जानकारी बिःगु दु।

नेवाः देय् दबू येँ जिल्ला समितिया ग्वसालय् वल्र्ड नेवाः अर्गनाइजेसन (डब्लुएनओ)या ग्वसालय् न्ह्यानाच्वंगु गुगलय् नेपालभाषा दुथ्याकेगु विषययात कयाः छगू गोष्ठि जुगु दु ।

उगु ज्याझ्वः वल्र्ड नेवाः अर्गनाइजेसन नेपाः देय् मूकवःया समन्वयय् जूगु खः । ज्याझ्वलय् गुगलय् नेपालभाषा दुथ्याकेत न्हियान्हिथं जुयाच्वंगु ज्याझ्वःया नेपाःपाखें संयोजन यानाच्वनादीम्ह शाक्य सुरेनं गुगलय् नेपालभाषा दुथ्याकेत गुकथंया गतिविधि जुयाच्वन, थुगु परियोजनाया निंतिं गुकथं विचाःत वल धइगु बारे कनादीगु खः ।

वय्कलं नेवाः भाय्यात नं विश्वव्यापीकरण यायेगु कुतःयात कयाः सहलह जुयाच्वंगु इलय् गुगलय् नेवाः भाय् दुथ्याकेगु परियोजना वःगु जानकारी बियादिल । डब्लुएनओया केन्द्रीय दुजः नापं गुगल ट्रान्सलेसन परियोजनाया कजि दिपेशमान शाक्यं गुगल ट्रान्सलेसन छु खः व गुगलय् छाय् नेवाः भाय् दुथ्याके माल धइगु विषयय् थःगु खँ तयादीगु खः । वय्कलं गुगल ट्रान्सलेसन वा गुगलय् नेवाः भाय् दुथ्याकेगु फाइदाया बारे कनादिसें थौंकन्हय् न्हू पुस्तां धमाधम नेवाः भाय् ल्हायेगु त्वःता हयाच्वंगु अवस्थाय् झी सकसिनं नेवाः भाय् म्वाकेमाः धयाच्वना ।

ब्लुएनओया गुगल नेपालभाषा ट्रान्सलेसनय् न्हियान्हिथं भाय् हिलाः ग्वाहालि याना वयाच्वनादीम्ह पौभाः साय्मिं गुगलय् गुकथं भाय् हिलेगु, भाय् हिलेबलय् छु गज्याःगु समस्या खने दइ, छु छु खँय् ध्यान बीमाः धइगु बारे जानकारी बियादीगु खः । मूपाहांकथं झायादीम्ह नेवाः देय् दबूया नायः पवित्र वज्राचार्यं नेवाः भाय् ल्हायेगु व च्वये अःपुसां न्हूपुस्तां धमाधम त्वःता हयाच्वंगु इलय् भाषा थथे हे यायेमाः, अथे हे यायेमाः, जिं धया थें यायेमाः धयाच्वन धाःसा आः दुपिंसं नं त्वःता हयेफु धासें कन्हय् वनाः झीगु भाय् हे मदया वनी धयादिल ।

ज्याझ्वलय् गुह्येश्वरी श्रेष्ठ, रत्नज्योति शाक्य, अञ्जना ताम्राकार, उदेन न्हूसाय्मि, त्रिप्रसाद धौभडल लगायतं गुगलय् नेवाः भाषाय् एकरुपता दयेमाःगु नापं उकिया निंतिं यायेमाःगु थीथी ज्यायात कयाः सल्लाह सुझाव बियादीगु खः ।

देय् दबू येँ जिल्ला समितिया नायः धनबहादुर महर्जन तिमिलाया सभापतित्वय् जूगु ज्याझ्वलय् प्रतिभा समाजया नायः डा. वज्रराज शाक्य, हलिं नेवाः दबू नेपाः देय् मूकवःया नायः सुरेन्द्रभक्त श्रेष्ठ, देय् दबू स्वनिगः विशेष प्रदेशया न्वकु नविन थेच्वमिं नं थःथःगु नुगःखँ तयादीगु खः ।

नेपाल आदिवासी जनजाति पत्रकार महासंघ (फोनिज) युके पत्रकारिता सम्मान पत्रकार रमिता लामा व पुरस्कार पत्रकार नृपेन्द्रलाल श्रेष्ठलाई बिइगु जुगु दु।

पुरस्कार छनौट समितिया संयोजक नाप फोनिज युकेया प्रमुख सल्लाहकार मेजर रिटायर्ड सोनामछिरिङ शेर्पाया अध्यक्षताय् च्वंगु समितिया बैठकं सर्वसम्मत कथं लामायात सम्मान व श्रेष्ठयात पुरस्कार बिइगु निर्णय याःगगु खः। रामेछाप दोरम्बाय् जन्म जुम्ह लामा २०४९ सालनिसे पत्रकारिता ख्यलय् वःम्ह खः। वयकः रेडियो नेपालया समाचार महाशाखाय् समाचार वाचक नाप सम्पादक न जुयादीम्ह खः।

समाजसेवा नाप रेडियो कार्यक्रम सञ्चालनपाखे पत्रकारिता शुरु यानादीम्ह लामां तामाङ भाषाया समाचार बिइगु नाप सांसद फोन इन व तामाङ भाषाया ज्याझ्वः श्यालगार न सञ्चालन यानादीइ। वयकः नेपाल पत्रकार महासंघ, क्रियाशील महिला पत्रकार संघ नाप फोनिजमा आवद्ध जुयादीम्ह खःसा नेपाल तामाङ महिला घेदुङया अध्यक्ष न खः।

अथेहे येँ जन्म जुयादीम्ह श्रेष्ठ २०४९ सालनिसे पत्रकारिताया ख्यलय् प्रचलित लिपिया लय् पौं म्हसिकाया सम्पादक जुयादीम्ह खः। वयकलंं म्हसिका लय् पौं नाप सम्यक पौं, नेवाः पौ लये पौं, लिपि पौ लय्पौं, लहना वाःपौं नाप लहनान्युज डटकमया प्रधान सम्पादन न जुयादीइ। अथे हे नेपालभाषाया ज्याझ्वः न टेलिभिजनय् निर्माणयाना न्ह्याकेदीइ धुकुगु दु। श्रेष्ठ नेवाः पत्रकार राष्ट्रिय दबूया केन्द्रीय अध्यक्ष खः। नेपाल पत्रकार महासंघ नाप थीथी भाषिक, साँस्कृतिक व सामाजिक संस्थाय् आवद्ध जुयादीइ। वयकलं येँ महानगरपालिकापाखे सुशासन पत्रकारिता पुरस्कार, त्रिमूर्ति निकेतन, खड्गी सेवा समिति, गोविन्द किपू प्रतिष्ठानपाखे सम्मानीत जुयादीइ धुकुम्ह खः।

फोनिज युके न दँय् दँसं नेपालय् ज्या यानाच्वपि निम्ह पत्रकारयात पुरस्कार नाप सम्मान यानाच्वंगु खः। सम्मान नाप पुरस्कारया नगद २५ हजार व हनापौं लःल्हाइगु खः। थ्व स्वया न्ह्यः गोपाल छाङ्छा राई, रामविकास चौधरी, गणेशमान गुरुङ, मिलन लिम्बु, शान्ति गुरुङ, सन्त गाहामगर, राजेश चाम्लिङ, टेकराज थामी, टीकाराम प्रधान व निलिफा सुब्बायात लःल्हाये धुकुगु खः।

ल्यज्या  समितिइ सल्लाहकार दुत पुन, फोनिज युकेया पूर्व अध्यक्ष प्रमिला लाबुङ राई, वर्तमान अध्यक्ष गोमा राना व सचिव लीला सेलिङ माबो सदस्य खः।

नेपालभाषा एकेडेमीया साहित्य कवःया ग्वसालय् मुखू ब्यूंगु कविताया सवाः धका मयजुपिनिसं च्वयादीगु कविता वाचनया ज्याझ्वः जूगु दु।

नेपालभाषा एकेडेमीया सभाहल किपुलिइ जूगु उगु ज्याझ्वलय् डा.ज्योतिप्रभा तुलाधरया अवधारणा व संयोजनय् जूगु खः। चिनाखँ ख्यलय् च्वसा न्ह्याका वयाच्वंपिं मय्जुपिन्त कविता च्वकाः नेपालभाषाया काव्यख्यः चक्कंकाः यंकेगु तातुनाः थुगु ज्याझ्वःयात अभियान कथं न्ह्याका यंकेगु ज्या न्ह्याःगु खः धका ग्वसाः सहसंयोजक कवियत्री रजनीमिलां धयादिगु खः।

उगु सृजनात्मक च्वज्या व कविता कार्यशाला गोष्ठिया निगूगु चरणय् झींखुम्ह च्वमि पिनिगु कविता झींप्यम्ह च्वमिपिन्सं ब्वना न्यंकादिल । उगु ज्याझ्वलय् रोनिका श्रेष्ठ, युक्ता बज्राचार्य, ज्ञानकेशरी श्रेष्ठ, दिलकुमारी महर्जन, सविना महर्जन, रुपा शाही, रहेना नकर्मी मानन्धर, मिनर्वा शर्मा राजोपाध्याय, बिनिता बज्राचार्य, मिमला शर्मा राजोपाध्याय, हिसिलिना शाक्य, शोभा महर्जन, कृता बज्राचार्य, विणा नेम्कुल, मन्दिरा श्रेष्ठ, मंजुसिंह श्रेष्ठ पिन्सं कविता ब्वना न्यंका दिगु खः ।

उगु चिनाखँयात कया ध्रुब मधिकर्मी व नेपालभाषा केन्द्रिय विभागया प्रमुख सहप्राध्यापक रास जोशीपिंसं टिप्पणी यानादिगु खः। अथे, हे सुरेश किरण, राजेन्द्र पुता, नवीन प्रकाश श्रेष्ठ, वसन्त नकःमि, राज अक्षोभ्य, कविन्द्रलाल प्रधान व न्हू पिलवूम्ह कवि राजेन्द्र महर्जनपिन्सं नं कविता बाचन यानादिइगु खः।

नेपालभाषा एकेडेमीया चान्सलर यज्ञरत्न धाख्वाःया सभाध्यक्षताय् जूगु उगु ज्याझ्वलय् एकेडेमीया साहित्य कवःया कःजि त्रिरत्न शाक्यं लसकुस यानादिइगु खः।

कैलाली निर्वाचन क्षेत्रनम्बर २ पाखे निर्वाचित प्रतिनिधि सभा सदस्य अरुण चौधरी रिहा जूगु दु।

नागरिक उन्मुक्ति पार्टीपाखे निर्वाचित जूम्ह चौधरीयात प्रजातन्त्र दिवसया लसताय् राष्ट्रपति विद्यादेवी भण्डारीं आममाफी बिःगु खः।

१३ दँया पुलागु आगजनी मुद्दाय् दोषी ठहर जुइवं चौधरी सांसद निर्वाचित जुइ धुका वंगु माघ १९ गते बाँकेपाखे ज्वःगु खः। वयात कैलाली जिल्ला कारागारय् तयातःगु खः।

वि.स. २०६६ भदौ ३ गते लु२त २११ नम्बरया ट्रयाक्टर च्याकूगु द्धपनय् दोषी ठहर जुइवं चौधरीं कैद भुक्तान याये ल्यदनिइगु माफि बिःगु खः ।कारागारं रिहा जुइवं सांसद चौधरीयात पार्टी अध्यक्ष रञ्जिता श्रेष्ठलगायतपिन्स लसकुस याःगु खः।