निर्वाचन आयोगं प्रतिनिधि सभा व प्रदेश सभा चुनावया लागि दल दर्ता यायेत आह्वान याउगु दु।

आयोगं थौं शुक्रवाः च्वंगु बैठकलं झीन्हुया दुने दल दर्ता यायेत आह्वान यायेगु निर्णय कथं वइगु आइतवाः निसे दल दर्ता आह्वान यायेगु धका आयोगं धाउगु दु। निर्वाचन आयोगय् आःतक ११६ गु राजनीतिक दल दर्ता जुइ धुकुगु दु।

आयोगय् दर्ता जुगु दलपिन्स न चुनावया प्रयोजन लागि हाकनं दर्ता यायेमाःगु व्यवस्था दु धका आयोगं धाउगु दु। सरकारं म्हिगः बिहीवाः वइगु मंसीर ४ गतेया लागि प्रतिनिधि सभा व प्रदेश सभा चुनावया मिति तोके याउगु खः।

चुनावया मिति घोषणानाप थौंनिसे मतादाता नामावली सङ्कलन कार्य बन्द याना चुनावया तयारी याउगु दु धका आयोगं धाउगु दु।

किपूलिइ ऐतिहासिक व साँस्कृतिक सम्पदायात जगेर्ना नाप पर्यटन प्रबद्र्धनया लागि थ्व हे वइगु श्रावण २७ गते शुक्रबाः चान्ह्यः सम्पदा यात्रा जुइगु दु।

थ्व २७ गते चान्ह्यः सम्पदा यात्रा जुइगु धका जोशी ननी हेरिटेज होम्सय् थौं छगु पत्रकार सम्मेलन याना जानकारी बिउगु खः। परम्परागत रूपं सापारु कुन्हु हना वयाच्वंगु “बहाः चाः हिलेगु” थुगुसि पर्यटन प्रबद्र्धन यायेगु निति प्रचार यायेगु कथं ज्याझ्वः जुइ धका थौं छगु पत्रकार सम्मेलनयासे जानकारी बियादीगु खः।

उगु सम्पदा यात्राय् किपूया ५३ थासय्  अवलोकन याकेत्यःगु खः। लिच्छबीकालनिसे किपूया नेवाः बस्ती, विहार, चिभाः व चुकः नाप स्वापू दुगु सम्बन्धित सभ्यताया अवलोकन याये दइगु कथं सम्पदा यात्रा जुइत्यःगु धका धाउगु दु।

उगु थासय् अप्पो याना बन्द हे जुयाच्वनिइगु जुगुलि उगु दिं बहाः बहीइ दुने द्यःया अवलोकन याये दइ धका ग्वसाः खलकं धाउगु दु।

वंगु २४ घण्टाया दुने देयन्यक थप ९१२ म्हेसित कोरोना संक्रमण पुष्टि जुगु दु। अथेहे छम्हेसिगु ज्यान वंगु दु।

स्वास्थ्य तथा जनसंख्या मन्त्रालयया कथं ६ हजार ४९१ म्हेसिगु परीक्षण याउगुलि ९१२ म्हेसित संक्रमण पुष्टि जुगु दु।

उकि मध्ये २ हजार ९४१ म्हेसिगु पीसीआर परीक्षण याउगुलि ५२९ म्ह व ३ हजार ५५० म्हेसिगु एन्टिजेन परीक्षण याउगुलि ३८३ म्हेसित संक्रमण जुगु दु धका मन्त्रालयं धाउगु दु।

थ्व नाप कोरोना भाइरसया सक्रिय संक्रमितपिनिगु ल्याः ५ हजार ७६० म्ह थ्यःगु दु सा ३७० म्ह संक्रमणमुक्त जुगु दु।

शेयर बजाः थौं शुक्रवाः ३४ दशमलव ८५ अङ्कं घटे जुगु दु। थौं नेप्से २ हजार १ सय १३ दशमलव ३० बिन्दुइ कुहावंगु दु।

थौं म्युचल फन्डबाहेक दक्को समूहया शेयर घटे जुगु दु सा बीमा, विकास बैंक, व्यापार, फाइनान्स व जलविद्युत् समूहया शेयर यक्को अङ्कं कुहावंगु दु।

शेयर बजारय् २१३ गु कम्पनीया ६४ लाख १६ हजार कित्ता शेयर २ अर्ब ६२ करोड रुपैयाँया कारोबार जुगु दु। दकलय् अप्पो शिवम् सिमेन्ट्सया १५ करोड ६६ लाख रुपैयाँया शेयर किनबेच जूगु दु।

थौं मैलुङ खोला जलविद्युत् कम्पनीया शेयर ७ प्रतिशत स्वया अप्पो घटे जुगु दु। समग्र बजाः घटे जूसां जोशी जलविद्युत् कम्पनीया शेयर ६ प्रतिशत स्वया अप्पो थहावंगु दु।

लुँया भाः थौं न तोलां न्ह्यसः थहावंगु दु। थौं लुँया भाः तोलां न्ह्यसः थहावना ९६ हजार ८ सय रुपैयाँ थ्यःगु दु।

वहः तोलां न थौं झीतका थहावंगु दु। वहः तोलां न झीतका थहावना १ हजार २ सय २० रुपैयाँ न कारोबार जुगु दु।