वाङ्गमय शताब्दि पुरुष नाप संस्कृतिविद् सत्यमोहन जोशी मदुगुलि दुखंकःपि छेँ जःपिन्थाय् विचाः हायेकेत संस्कृति पर्यटन नाप नागरीक उडयन मन्त्री जीवनराम श्रेष्ठ वयकः पिनिगु छेँय् झायादीगु दु।

विहिबाः सुथय् शताब्दि पुरुष या छेँय् थ्यंकादीम्ह मन्त्री श्रेष्ठं शताब्दि पुरुष या जहान ९९ दँ दुम्ह राधादेवी जोशीयात नापलाना दिगु खः ।

विचाः हायेकेगु झ्वलय् मन्त्री श्रेष्ठं शताब्दि पुरुष जोशी देशया लोक संस्कृति, साँस्कृतिक व साहित्यिक ख्यःया जक मखसे हरेक ख्यःया छम्ह विलक्षण व्यक्तित्व खः धका धासे वयकःयात सदां लुमंकेगु कथं सरकारं ल्ह्वने मागु सकतां पलाः ल्ह्वनेगु खँ कनादिगु खः।

नेपालभाषा एकेडेमीया ग्वसालय् दँय् दँसं बियावया च्वंगु दान्यहिरा सिरपा थुगुसिइ स्थगित जूगु दु।

वाङमय शताब्दि पुरुष नाप संस्कृतिविद् डा सत्यमोहन जोशी मदुगुलि स्थगित जुगु खः। दान्यहिरा सिरपा थ्वः हे वइगु कौलागा चःह्रे कार्तिक ६ गते बिइगु कथं ग्वसाः ग्वयातःगु खः।

शताब्दी पुरुष जोशी नेपालभाषा एकेडेमीया पुलांम्ह चान्सलर नाप संरक्षक न खः ।

लुँ तोलां थौं सच्छि थहावःगु दु। अथेहे वहः न तोलां नीतका थहावःगु दु धका नेपाल सुनचाँदी व्यवसायी महासंघं धाःगु दु।

महासंघया कथं लुँ तोलां सच्छि थहावना ९३ हजार ४ सय रुपैयाँ थ्यःगु दु।

अथेहे, वहः न तोलां नीतका थहावना १ हजार १ सय ८० रुपैयाँ न कारोबार जुगु दु धका धाःगु दु।

नेवाः जागरण मञ्चया संस्थापक दुजः ईश्वर डंगोल मन्त। नेवाः जागरण मञ्चया स्थापनाकालनिसें क्रियाशील जुयाच्वंम्ह ईश्वर डंगोल म्हिगः बहनी सोमवाः ११ः३० ता इलय् मन्त ।

वय्कःया छेँजःपिन्सं ब्यूगु जानकारी कथं वय्कः म्हिगः वासः याकेगु झ्वलय् मनमोहन अस्पतालय् मदुगु खः। मदुम्ह डंगोल नेवाः जागरण मञ्चया संस्थापक दुजः खःसा मञ्चं न्ह्याकूगु थीथी ज्याझ्वलय् वय्कः अतिकं सक्रिय व्यक्तित्व खः।

मदुम्ह डंगोल ६३ दँया खःसा वय्कःया अन्तिम संस्कार थौं मंगलवा सुथय् पशुपति दीपय् जूगु दु । मदुम्ह डंगोलया जहानलिसें निम्ह म्ह्याय् व छम्ह काय् दी।

नेपाल संवत् राष्ट्रिय न्हूदँ समारोह समिति ११४३ या नायः प्रा.डा. नरेशमान बज्राचार्य थौं मंगलवाः सुथय् छगू विज्ञप्ति पितब्यूसें थुगुसीया न्हूदँ तःजिक हनेत सकलसित इनाप यानादीगु दु।

वय्कलं न्हूदँया तयारीया नितिं समारोह समितिं थीथी ज्या न्ह्याकावयाच्वंगु जानकारी बिसें न्हूदँ राष्ट्रिय पर्व जक मजुसे नेपाःया संस्कृति जूगुलिं न्हूदँ व थ्वः लिसे स्वाःगु स्वन्ति नखः स्वन्हुयंकं झ्वःलाक्क न्यायेकेत नं इनाप यानादीगु दु।

लिसें नायः बज्राचार्यं उगु विज्ञप्तिपाखें सकलसित मदुम्ह वाङ्मय शताब्दी पुरुष संस्कृतिविद् युगपुरुष सत्यमोहन जोशी मदुगु दुःखयात थ्व दँय् शक्ति कथं न्ह्यःने यंकाः न्हूदँ ज्याझ्वः न्हापालिपासिबें जनचेतना थनेगु कथं व नेपाःया मौलिक राष्ट्रिय संवत् नेपाल संवत् हलिंन्यंकं च्वनाच्वंपिं नेपाःमिपिन्त भिंतुना बिइगु कथं व नेपाल संवत् राष्ट्रिय संवत् धायेधुंकाः सरकारपाखें यायेमाःगु ज्या याकेगु नितिं दबाब बिइगु कथंया ज्याझ्वः यायेत नं इनाप यानादीगु दु।