बागमति प्रदेशया मुख्यमन्त्री शालिकराम जम्मरकट्टेलं प्रदेश सरकारयात शिक्षाया लागि अधिकार मदुगु धासें शिक्षा क्षेत्रय् विकासया लागि प्रदेश सरकारं नं योगदान बिइत तयार दुगु धका धयादिगु दु।

ज्ञानोदय माध्यमिक विद्यालयय् बिदाई, सम्मान व आईसीटी ल्याब उलेज्या झ्वलय् वय्कलंं थथे धयादीगु खः । वय्कलं नेपाःया मुख्य पेशाया रुपय् दुगु कृषि क्षेत्रया विकासया लागि शिक्षाय् हे कृषि विषयया पठनपाठन जुइमाःगु धका धयादिगु खः। प्रदेश सरकारं थुकिया निंतिं आह्वान यानाबलय् प्रस्ताव मवःगुलिं दुःख प्वंकुसें ज्ञानोदययात धादिङय् कृषि विद्यालय संचालन याय्त आग्रह यानादिल ।

थुकिया लागि थःम्हं माक्व ग्वाहालि यायेत तयार दुगु नं कनादिल । ज्याझ्वलय् मूपाहाँलिसें विशेष पाहाँपिसं ज्ञानोदय हेराल्डया नं विमोचन याःगु खः ।उगु ज्याझ्वलय् विशेष पाहाँकथं प्रतिनिधि सभाया सांसद विराजभक्त श्रेष्ठं थःगु छेँ नाप दुगु विद्यालयया उन्नतिइ थः लय्तायागु खँ कनादिसे ब्वँमिपिन्त अनुशासित जीवन हनेत इनाप न यानादीगु दु।

येँ महानगरपालिकया उपमेयर सुनिता डंगोलं विद्यार्थीं जीवन चुनौतिपूर्ण जुइगु व विद्यालयय् च्वनेबलय् थःत विद्यालय यइमखु तर त्वतेधुंकाः हाकनं शिक्षकपिं नाप लाय्मास्ति वइ धका धयादीसे वय्कलं औपचारिक शिक्षाया लिसें थःगु रुचिया ख्यलय् नं पलाः न्ह्याकावं च्वंसा जक थःगु आज्जुइ थ्यंके फइगु खँय् नं बः बियादिल । केन्द्रीय शिक्षक संघया दुजः सुन्दर पन्तं ज्ञानोदय मा.वि. नेपाःया हे उत्कृष्ट विद्यालय मध्ये उत्कृष्ट विद्यालय जुइत ताःलाःसां नमूना विद्यालय घोषणा जुइमफुगु छगु दुःखया खँ खः धयादिल ।

अथेहे अखिल नेपाल शिक्षक संघया अध्यक्ष शंकर अधिकारीं शुभकामना मन्तव्य तयादिसें ज्ञानोदय मा.विं नेपाःया सामुदायिक विद्यालय नं गुणस्तरीय दुगु प्रमाण प्रस्तुत यानादिल । राष्ट्रिय परीक्षा बोर्डया अध्यक्ष महाश्रम शर्मां नमुना विद्यालयया लागि जग्गाया खं यानाः नं विद्यालय उत्कृष्ट जुया नं नमुना विद्यालय जुइ मफुगुलिं प्रावधान सचे याय् माःगु खँ कुलादिल । परीक्षाय् वइगु ग्रेड स्वयां नं व्यावहारिकता व शिक्षाया सही सदुपयोग जू कि मजू धइगु खँ महत्वपूर्ण जुइगु खँ वय्कलं कनादिल ।

येँ महानगर १३ वडाया दुजः रामबाबु कोइराला, कामपा शिक्षा विभागया प्रमुख राम प्रसाद सुवेदी, समाजसेवी सुमन साय्मि, यशोधरा छात्रवृत्तिया दाता यशोधरा पन्त लगायतपिन्सं ब्वमिपिन्त सुभाय् देछाःगु खः । वहे ज्याझ्वलय् ब्वनेकुथियात नेपाःया हे उत्कृष्ट ब्वनेकुथिकथं धस्वाकेत ग्वाहालि यानादीपिं स्यनामिपिन्त हनापौ लःल्हासें हंगु खःसा २०७६, ७७ व ७८ सालय् +२ उत्कृष्ट ल्याः हःपिं ब्वमिपिन्त यशोधरा छात्रवृत्ति लःल्हाःगु खः।

विद्यालय व्यवस्थापन समितिया नायः उर्मिला मालीया सभापतित्वय् जूगु ज्याझ्वलय् प्रधानाध्यापक नातिकाजी महर्जनं सकसितं लसकुस यासें ज्याझ्वःया बारे व विद्यालयया बारे नुगःखँ तयादीगु खः ।

येँ महानगरपालिकां न्यायिक समिति राष्ट्रिय सम्मेलन यायेगु तयारी याःगु दु। चैत २४ व २५ गते स्थानीय तहय् न्याय सम्पादनया अनुभव आदान प्रदान यायेगु उदेश्यं उगु सम्मेलन आयोजना यायेत्यःनागु धका महानगरं धाःगु दु।

सम्मेलनया तयारी यायेगु लागि महानगरया उपमेयर सुनिता डंगोल याःगु अध्यक्षताय् ‘न्यायिक समिति मूल समारोह समिति’ गठन याःगु दु। डंगोलया कथं दक्को पालिकाया न्यायिक समितिपाखे  प्रतिनिधित्व यायेगु व बालागु अभ्यास आदान प्रदान यायेगु उद्देश्यं सम्मेलन आयोजना यायेत्यःगु खः। सम्मेलनय् प्यंगु विषय केन्द्रित जुइगु कथं कार्य पत्र महानगरं तयार यानाच्वनागु धका उपमेयर डंगोलं धाःगु दु।

न्यायिक समितिया अवधारणा, थीथी कानुनय् दुगु न्यायिक समिति सम्बन्धी व्यवस्था, न्याय सम्पादनय् न्यायिक समितिया क्षेत्राधिकार व थुकिया प्रचलन मुख्य विषय खः धका महानगरं धाःगु दु। येँ विवाद निरुपण घोषणापत्र २०७९ जारी यासे सम्मेलन क्वचाइ धका महानगरं धाःगु दु।

सम्मेलनलिपा न्यायिक समिति राष्ट्रिय सञ्जाल, प्रदेश सञ्जाल व जिल्ला सञ्जाल ल्यइगु जुगु दु। राष्ट्रिय सञ्जालया पदाधिकारीपि सम्मेलनपाखे यायेत्यःगु दु।

नवनियुक्त स्वम्ह कुलपतिपिन्स पद व गोपनियताया शपथ ग्रहण याःगु दु।

नेपाल प्रज्ञा प्रतिष्ठानया कुलपति भूपाल राई, नेपाल संगीत तथा नाट्य प्रज्ञा प्रतिष्ठानका कुलपति निशा शर्मा व नेपाल ललितकला प्रज्ञा प्रतिष्ठानया कुलपतिइ नारदमणी हार्तम्छालीपिन्स थौं सुथय् शपथ ग्रहण याःगु दु।

स्वम्हेसित थौं प्रधानमन्त्री पुष्पकमल दाहाल प्रचण्डं बालुवाटारस्थित निवासय् पद नाप गोपनियताया शपथ ग्रहण याकूगु खः। शपथ ग्रहण ज्याझ्वलय् संस्कृति, पर्यटन नाप नागरिक उड्डयन मन्त्री सुदन किराँतीया न उपस्थिति दुगु खः।

ग्याँस सिलिन्डर विस्फोट जूया घाःपाः जूम्ह नेपाली कांग्रेसया नेता नाप प्रतिनिधिया सदस्य चन्द्र भण्डारीयात थप उपचारया लागि भारत यकेगु तयारी जुयाच्वंगु दु।

थःगु हे छेँ येँया बुद्धनगरय् वःगु चान्ह्यः विस्फोट जूया भण्डारी व वय्कःया मां उपचार यायेगु निति कीर्तिपुर बर्न अस्पतालय् भर्ना जुगु खः।

२५ प्रतिशत म्ह च्यागुलि भण्डारी आइसियुलय् च्वना उपचार याना च्वंगु दु सा वयकःया मां ७० प्रतिशत म्ह च्यागूलि अवस्था गम्भीर जुगु दु।

भण्डारीया स्वोँय् असर जूगुलि तत्काल भारत यकेगु तयारी जुयाच्वंगु दु। भण्डारीया छ्यनय् व जवःपाखे यक्को असर याःगु दु।

सरकारं नेर्पाल प्रज्ञा प्रतिष्ठानया कुलपति नाप पदाधिकारी नियुक्त याःगु दु।

मन्त्रिपरिषदया बैठकं प्रतिष्ठानया कुलपतिइ भुपाल राई, उपकुलपतिइ विमल निभा (विमलकृष्ण श्रेष्ठ) यात नियुक्त याःगु दु।

अथेहे प्रतिष्ठानया परिषद सदस्यय् मधुसुदन गिरी, डा. कृष्णराज अधिकारी, राजन मुकारुङ, बाबा बस्नेत, डा. कौशिला रिसाल, हंसावती कुर्मी, अमर न्यौपाने, त्रैलोक्यमान बनेपालीपिन्त नियुक्त याःगु दु। सचिवय् डा. धनप्रसाद सुवेदीयात नियुक्त याःगु दु।