नेपाल संवत न्हूदँ आन्न्दोनल नाप नेवाः आन्दोलनया न्ह्यलुवाः पद्मरत्न तुलाधरया प्यक्वःगु पुण्यतिथि थीथी कथं थौं हःगु दु।

थौं शनिवाः सुथय् येँया शखधर पार्कय् पद्मरत्न तुलाधरया झ्वाताय्  पद्मरत्न लुमंन्ति दबूपाखें छगु ज्याझ्वः यानाः वयकःयात लुंमकुगु दु।

उगु ज्याझ्वलय् थीथी ख्यःयापिं ब्यक्तिपिन्सं तुलाधरया यागदानयात कयाः थःथःगु बिचाः प्वंकादिगु खः।

अथे हे थौं सुथय् नेपाल संवत राष्ट्रिय न्हूदँ समारोह समिति ११४३ या नायः प्रा.डा. नरेशमान बज्राचार्य लिसें समारोह समितिया दुजः पिन्सं तुलाधरया झ्वाताय् स्वां देछाया श्रदाभाव प्वंकुगु दु ।

समारोह समितिया नायः बज्राचार्य न तुलाधरं यानादिगु योगदानया लिसें वयकः नाप जुयाःगु ईया लुमंन्ति न्यंकादिगु खः।

वाङ्मय शताब्दी पुरुष सत्यमोहन जोशीया लुमन्ति मुँज्या थौं शनिवाः बसन्तपुरय् जुगु दु।

वय्कः मदुगु दुःखय् वय्कलं यानादीगु योगदानयात लुमंकूसें नेवाः देय् दबूया संयोजनय् थीथी खलः पुचःया मंकाः ग्वसालय् लुमन्ति ज्याझ्वः जुगु खः।

उगु ज्याझ्वलय् जनकवि दुर्गालाल श्रेष्ठं वयकःयात लुमंका कविता वाचन यानादिगु खः। अथेहे ज्याझ्वलय् नेवाः न्ह्यलुवाः मल्ल के. सुन्दर, योगेन्द्र प्रधान, प्रेमशान्ति तुलाधर व डा. पुष्पराज राजकर्निकारपिन्सं जोशी यानादिगु योगदानयात कयाः न्ववानादिगु खः।

देय् दबूया नायः पवित्र बज्राचार्यया सभापतित्वय् जुगु उगु ज्याझ्वः उमेश स्थापितं न्ह्याकादिगु खः।

येँँया थँहिति चुकय् न्हूदँ ११४३ या लसताय् तःजिक भिंतुना कालबिल तुच्चा ज्याझ्वः जूगु दु।

नेपाल संवतया न्हूदँ दकले न्हापां सभा जूगु थँहिति चुकय् थौं शुक्रवाः नेपाल संवत् न्हूदँ राष्ट्रिय समारोह समिति ११४३ पाखें न्हूदँया लसताय् भिंतुना कालबिल व तुच्चा ज्याझ्वःया ग्वसाः ग्वःगु खः।

येँ महानगरपालिकाया उपप्रमुख सुनिता डंगोललिसें थीथी पार्टीया पुलांपिं सांसदपिं, वडा नायःपिं व नेवाः न्ह्यलुवाःपिं उपस्थित जूगु उगु भिंतुना कालबिल व तुच्चा ज्याझ्वलय् सकलसित न्हूदँया भिंतुना देछासें कछलाथ्व पारु (कार्तिक ९ गते) बुधवाः येँया बसन्तपुरं जुइगु भिंतुना ¥याली व भिंतुना सभाय् ब्वति कायेत समितिया नायः प्रा.डा. नरेशमान बज्राचार्यं इनाप यानादीगु खः।

थथे भिंतुना कालबिल ज्याझ्वलय् न्हूदँ ११४२ समारोह समितिं दच्छियंकं न्ह्याकूगु ज्याझ्वःया जानकारी सफू सल्लाहकार समितिया कजि तीर्थराम डंगोल व नायः बज्राचार्यं  पितब्वज्या यानादीगु खः।

नेपाल संवत् राष्ट्रिय न्हूदँ समारोह समिति ११४३ पाखें न्हूदँ सकलसिनं तःजिक हनेगु नितिं थुगु दँया नारा सार्वजनिक याःगु दु।

न्हूदँ समारोह समितिया सल्लाहकार समितिया कजि पुलांम्ह स्वास्थ्य राज्यमन्त्री नेवाः न्ह्यलुवाः तीर्थराम डंगोलया सभापतित्वय् च्वंगु सल्लाहकार मुँज्यां थुगु दँय् नं वंगु दँया हे नारा ‘नेपाःया म्हसीका, नेपाःया गौरव, राज्यं हे छ्यलेमाः नेपाल संवत्’ क्वःछ्यूगु दु ।समितिया सल्लाहकार कजि तीर्थराम डंगोलं दँय् दसं न्हून्हूगु नारा पितबिइगुसिबें पुलांगु हे पूमवंगु नारा पितबिइगु बांलाइगु खनेदूगुलिं वंगु दँय् पितहःगु नारायात हे थुगु दँय् नं निरन्तरता बिइगु खँया जानकारी बियादीगु दु।

लिसें वय्कलं न्हूदँया लसताय् जुइगु सकतां कथंया भिंतुना कालबिल, ¥याली जुलुसलिसें ब्वनापौ, भिंतुना पतिइ थुगु नारा छ्यलाबुला यायेत नं इनाप यानादीगु दु।थुगु दँय् न्हूदँ ने.सं. ११४३ कछलाथ्व पारु (कार्तिक ९ गतें बुधवाः खःसा उगु दिं समारोह समितिं येँया बसन्तपुरं तःजिक भिंतुना जुलुस व भिंतुना सभा ज्याझ्वःया ग्वसाः ग्वयातःगु दु ।

नेपाल संवत् न्हूदँ राष्ट्रिय समारोह समिति ११४३ या ग्वसालय् म्हिगः बिहिवाः जूगुु पत्रकार सम्मेलनय् थुगु दँय् जनस्तरं ल्ह्वंगु न्हूदँया थीथी माग सरकारपाखें पूवंकेगु नितिं निरन्तर न्ह्याकेगु विचाः समारोह समितिं प्वंकूगु दु।

समारोह समितिया नायः प्रा.डा. नरेशमान बज्राचार्यं म्हिगः बिहिवाः जूगु पत्रकार सम्मेलनय् पत्रकारपिंलिसें खँल्हासें उगु विचाः प्वंकादीगु खः। नायः बज्राचार्यं प्रधानमन्त्री शेरबहादुर देउवायात नापलानाः नेपाल संवतयात सरकारं राष्ट्रिय संवत् धकाः घोषणा यायेधुंकाः सरकारपाखें यायेमाःगु थीथी च्यागू बुँदे ध्यानाकर्षण पौ लःल्हायेधुनागु जानकारी बिसें थथे लःल्हाःगु ध्यानाकर्षण पौ कार्यान्वयन याकेगु नितिं दच्छियंकं कुतः यायेगु विचाः प्वंकादीगु खः।

वय्कलं न्हूदँ समारोह समितिं पितब्यूगु प्रेस विज्ञप्ति ब्वनाः न्यंकादीगु खः । समितिपाखें पितब्यूगु प्रेस विज्ञप्तिइ न्हूदँ सकलसिनं तःजिक न्यायेकेत इनाप यानातःगु दुसा अथेहे, न्हूदँ थीथी ज्याझ्वः यानाः दच्छियंकं हनेगु ज्याय् क्रियाशील जुइगु प्रतिबद्धता नं प्वंकातःगु दु।

सार्वजनिक जूगु विज्ञप्तिइ धयातःगु दु, ‘नेपाल संवतयात व्यवहारय् छ्यलाबुला याकेगु नितिं येँ महानगरपालिकाया राजश्व रसिदय् रंजना लिपि व नेपाल संवत् छ्यलेधुंकूगु, शंखधर उद्यान नामाकरण यानाः उगु उद्यानय् शंखधर साख्वाःया पूर्णकदया झ्वाता तयेधुंकूगु व नेपाल सरकारपाखें शंखधरयात राष्ट्रिय विभूति घोषणा यायेगु लिसें नेपाल संवत् राष्ट्रिय संवत् धकाः सरकारं घोषणा यायेधुंकूगुलिं थुगु संवतया सम्मान व नेपाःया संवत् जूगुलिं ब्यवहारय् छ्यलेत माग यानाच्वना ।’

अथेहे, विज्ञप्तिइ न्ह्यःने वयाच्वंगु प्रदेश व प्रतिनिधिसभाया निर्वाचनय् दनाच्वंपिं उम्मेदवारपिन्सं नं नेपाल संवतयात कयाः समारोह समितिं सरकारयात यानावयाच्वंगु ध्यानाकर्षणया विषययात चुनावी मुद्दा कथं दयेकेत नं इनाप यानातःगु दु।

उगु पत्रकार सम्मेलनय् प्रचारप्रसार उपसमितिया कजि नृपेन्द्रलाल श्रेष्ठं सकलसित न्हूदँया प्रचारप्रसार जनस्तरय् थ्यंकेत इनाप यानादीगु खः।