राष्ट्रिय भूमि आयोग व किपू नगरपालिका दथुइ किपू नगर दुने थीथी थासय् च्वंपिं भूमिहीन सुकुम्वासी, अव्यवस्थित रुपं बसोबास यानाच्वंपिंत जग्गा वितरणया निंतिं आवश्यक प्रक्रिया न्ह्याकेगु ल्याखं छगू सम्झौता जूगु दु ।

किपू नगरपालिकाय् जूगु सम्झौताय् नगरपालिकापाखें नगर प्रमुख राजकुमार नकःमि व आयोगया अध्यक्ष केशव निरौलां सम्झौता पती ल्हाःचिं तयादीगु खः । सरोकारवाला निगू पक्षया दथुइ जूगु सम्झौता लिपा आयोगं सार्वजनिक रुपं सुचं जारी यायेधुंकाः नगरपालिकां थःगु क्षेत्र दुने च्वंपिं भूमिहीन, सुकुम्वासी व अव्यवस्थित रुपं च्वनाच्वंपिं, दलितया लगत संकलन यायेगु व उकियात प्रणालीइ प्रविष्ट यायेगु ज्या याइ धाःगु दु ।

प्रक्रिया न्ह्याकेत किपू नगरपालिकां स्थानीय सेवा केन्द्र स्थापना याइगु जूगु दुसा उकिया निंतिं आयोगया येँ जिल्लां जनप्रतिनिधिलिसें नगरपालिकाया कर्मचारीतय्त प्रशिक्षण बीगु जूगु दु ।

सम्झौता पती ल्हाःचिं तयेगु ज्याझ्वःया इलय् नगर उपप्रमुख शुभलक्ष्मी शाक्य, प्रमुख प्रशासकीय अधिकृत लक्ष्मीप्रसाद बास्कोटा, आयोगया येँ जिल्ला अध्यक्ष श्यामकृष्ण प्रजापतिलिसें सदस्यपिनिगु उपस्थिति दुगु खः ।

मुम्बईलय् वासः याकाच्वम्ह नेपाली कांग्रेसया नेता चन्द्र भण्डारीया थौं निक्वःतक शल्यक्रिया याइगु जुगु दु।

सुथय् १०ः३० बजे न्हापागु व न्हिनय् १ः३० बजे निक्वःगु शल्यक्रिया जुइ धको भण्डारीनाप मुम्बईलय् च्वम्ह नेपाली कांग्रेसया नेता योगराज कँडेलं जानकारी बिःगु दु।

भण्डारी भारतया मुम्बइलय् नेशनल बर्न सेन्टरया भेन्टिलेटरय् दु। डा. केस्वानीया कथं कँडेल न धाःगु दु भण्डारीया म्हय् फ्लुइडया मात्रा डबल याना सुथय् १०ः३० बजे न्हापागु व न्हिनय् १ः३० बजे निक्वःगु सर्जरी याइ ।

अथे हे डाक्टर संदीपया कथं भण्डारीया दक्को पारामिटर नर्मल दु सा ४८ घण्टा भेन्टिलेटरय् तयेमाः।

नेकपा एमाले निकट अनेरास्ववियुया केन्द्रीय अध्यक्षय् समिक बडाल विजयी जूगु दु। २३ क्वःगु राष्ट्रिय महाधिवेशन अन्तर्गत वंगु चान्ह्यः जूगु निर्वाचनय् निवर्तमान महासचिव बडाल अध्यक्षय् विजयी जूगु दु।

सहमतिइ नेतृत्व ल्ययेगु कुतः ताःमलायेवं विद्युतीय मेसिनपाखे मतदान जुगु खः। निर्वाचनय् १५१७ मत कुहावःगु खः। निर्वाचन समितिं औपचारिक रुपं मतपरिणाम सार्वजनिक याये ल्यं दनिइ।

छम्ह नेतां बिगु जानकारी कथं उपाध्यक्षय् गोविन्द गिरी, धर्म गिरी, नारायण घर्ती व मार्यादा विष्ट, महासचिवय् नरेश रोकाया नाप कोषाध्यक्षय् संगम अर्याल विजयी जूगु दु।

अथे हे सचिवय् सन्जीव धिताल, सुजन कडरिया, प्रकाश पौडेल, दीपेश प्रसाईं, अन्जना शिवाकोटी, आरती भट्टराई व बिनिता काफ्ले निर्वाचित जुगु दु धका धाःगु दु।

नेकपा एमाले निकट अनेरास्ववियुया नेतृत्व ल्ययेगुया लागि प्रज्ञा भवन मतदान जुयाच्वंगु दु।

फागुन २ गते निसे न्ह्यानाच्वंगु २३ क्वःगु महाधिवेशनं नेतृत्वया लागि न्याम्हेसिया प्रतिस्पर्धा यानाच्वंगु दु। अध्यक्ष पदया लागि आरसी लामिछाने, समिक बडाल, याङ्छु योञ्जन, मोती विक व लोकेश निरौलापिन्स उम्मेदवारी बिःगु खः।

प्यम्ह उपाध्यक्षया लागि १७ म्ह प्रतिस्पर्धा याःगु दु। महासचिव पदया लागि न्याम्ह दथुइ प्रतिस्पर्धा जुयाच्वंगु दु। सुदर्शन सिवाकोटी, भाष्कर खनाल, नरेश रोकाया, उमेश आचार्य व कल्पना वाइवा महासचिव पदया लागि प्रतिस्पर्धा यानाच्वंगु दु।

झीम्ह  सचिव पदया निति ५८ म्हेसिगु उम्मेदवारी दुगु खः। कोषाध्यक्षय् न न्याम्हेसिगु उम्मेदवार दुगु खः। संगम अर्याल, सुजन कार्की, प्रज्वल फुँयाल व प्रदीप बीसीं कोषाध्यक्षया उम्मेदवारी बिःगु खः।

चुनावी मैदानय् ६१४ म्ह दु धका अध्यक्ष मण्डलया सदस्य रचना खड्कां धाःगु दु। वयकःया कथं, आः ४२ मत केन्द्रपाखे मतदान जुयाच्वंगु दु। थौं हे लिच्वः वइ धका धाःगु दु। थुगु महाधिवेशनय् १५ सय ८८ म्ह प्रतिनिधिपि दु।

येँ महानगरपालिकां चिकित्सा शिक्षा अध्ययननिसे पत्रकारिता अध्ययन याइपि विद्यार्थीपिन्त छात्रवृत्ति बिइगु जुगु दु।

महानगरपालिकां विपन्न नाप जेहेन्दार विद्यार्थीपिन्त लक्षित याना च्यागु विषय छात्रवृत्ति बिइगु लागि कार्यविधि दयकूगु दु ।

महानगरया छात्रवृत्ति कार्यविधि कथं एमबीबीएस ज्याझ्वः, इन्जिनियरिङ, वातावरण विज्ञान, शिक्षा, कानुन, व्यवस्थापन, भाषा/साहित्य/समाजशास्त्र वर पत्रकारिताया विषय अध्ययन याइपि विद्यार्थीपिन्त छात्रवृत्ति बिइत्यःगु खः।

छात्रवृत्ति माग याइपि/छात्रा महानगरय् च्वपि जुइमाःगु कार्यविधिइ उल्लेख दु। कार्यविधि कथं छात्रवृत्ति माग याइपि छात्र/छात्राया परिवार आर्थिक अवस्था विपन्न जूया शैक्षिक संस्थायात बुझे यायेमाःगु शुल्क बुझे याये मफूपि जुइमाः धका धाःगु दु। छात्रवृत्ति सिफारिस यायेत महानगरपालिकाय् छगू छात्रवृत्ति समिति दइ।

सामाजिक समितिया संयोजक जुइगु कथं प्यम्ह महानगरया कर्मचारीपिनिगु समिति गठन याइगु उल्लेख दु। महानगरं छात्रवृत्तिया रकम निर्धारण याइगु इलय् शैक्षिक ज्याझ्वःया आधारय् छकलं, दच्छि छकलं बुझे यायेगु किस्ता रकम वा शैक्षिक ज्याझ्वः निर्धारण याइगु कथं कार्यविधिइ दयकूगु दु।

छात्रवृत्तिया रकम काइम्ह छात्र/छात्राया नामय् वा सम्बन्धित शैक्षिक संस्थाया खाताय् जम्मा यानाबिइगु व्यवस्था महानगरं याःगु दु।