कोशी प्रदेशया राजधानी विराटनगरय् थौनिसे पर्यटन फोटो पत्रकारिता तालिम सुरु जूगु दु।

नेपाल पर्यटन बोर्ड व संयुक्त राष्ट्रसङ्घीय विकास कार्यक्रम (युएनडिपी) या ग्वसालय् जुगु उगु ज्याझ्वलय् दिगो पर्यटन परियोजना (एसटिपी) न राष्ट्रिय फोटो पत्रकार समूह (एनएफपिजे) या सहकार्यय् निःशुल्क फोटो पत्रकारिता तालिम सुरु जुगु खः। 

विघटित प्रतिनिधिसभा पुनःस्थापनया माग तसें नेपाल कम्युनिष्ट पार्टी (एमालें) देय्या ७५३ गू हे पालिकाय् जनप्रदर्शनया ज्याझ्वः न्ह्याकूगु दु।

पालिकाय् स्थानीय नेता लिसें कार्यकर्ताया उपस्थितिइ प्रदर्शन यानाः कोणसभा यायेगु एमालेया ज्याझ्वः दु।

उगु पार्टीया केन्द्रीय प्रचार लिसें प्रकाशन विभाग प्रमुख राजेन्द्र गौतमं संविधान व लोकतन्त्रया रक्षा यायेगु निंतिं सुथंनिसें फुक्क पालिकास्तरय् प्रदर्शन लिसें ¥याली ग्वसाः ग्वयागु धयादिल।

जनकपुरधाम–१६ छेँ जुयाः येँ महानगरपालिका–३५ च्वनिम्ह रक्कीप्रसाद साह व सिराहा नगरपालिका–२० या सुजित यादवं प्रदेश प्रमुख सुमित्रा सुवेदी भण्डारी व मुख्यमन्त्री नापं मन्त्रिपरिषदया ज्याकुथियात प्रतिवादी दयेकाः सर्वोच्चय् रिट निवेदन दर्ता यानाः उत्प्रेषण परमादेशया माग यानादीगु दु।

साहव यादवं नेपाःया संविधानया धारा १६८ या उपधारा २ अःखः संविधान हाचांगायाः उपधारा ३ कथं सरकार गठन याःगुलिं उत्प्रेषणया आदेशमार्फत मुख्यमन्त्रीया नियुक्ति खारेजीया माग यानादीगु खः।वंगु शनिबाः मधेस प्रदेशया मुख्यमन्त्री पदपाखें जीतेन्द्रप्रसाद सोनार सोनलं राजीनामा बिइधुंकाः आइतबाः यादवयात नियुक्त यानाः सोमबाः सुथय् बर्दिबासया छगू होटलय् प्रदेश प्रमुख सुमित्रा सुवेदी भण्डारीं सपथ ग्रहण याकादीगु खः।

अथे हे, काननुया विद्यार्थी लिसें पर्सा जिल्लाया सखुवा प्रसौनी गाउँपालिका–६ छेँ जुयाः येँ महानगरपालिका–११ च्वनिम्ह अर्जुन साहनं मुख्यमन्त्रीया नियुक्ति अवैधानिक जूगुलिं बदर माग यासें सर्वोच्च अदालतय् रिट दर्ता यानादीगु दु।

किरात धर्मावलम्बीया महागुरु फाल्गुनन्दया १४१ क्वःगु जन्मजयन्ती थौं थीथी ज्याझ्वःत ग्वसाः ग्वयाः न्यायेकेत्यंगु दु।विसं १९४२ कात्तिक २५ गते इलामया सामान्य परिवारय् फाल्गुनन्दया जन्म जूगु खः।

किरात भाषा, लिपि, तजिलजि नापं समाज सुधारय् वय्कःया महत्वपूर्ण योगदान दयाच्वंगु दु। समाज सुधारया निंतिं फाल्गुनन्दं नीति निर्माणनापं यानादीगु खः। थुकियात सत्य धर्म मुचुल्का धायेगु याः। थ्व १९८८ साल वैशाख २४ गते जारी याःगु खः।किरात समाज सुधारया निंतिं नीतिनापं दयेकाः योगदान यानादीम्ह फाल्गुनन्द विसं २००५ य् मदूगु खः।

किरात समाज सुधारय् वय्कलं यानाथकूगु योगदानयात च्वछासें वय्कःयात २०६६ मङ्सिर १६ गते सरकारं राष्ट्रिय विभूति घोषणा याःगु खः।वय्कःया योगदानया कदर यासें किराती समुदाय बाय् च्वनीगु पूर्वी पहाडी जिल्ला ताप्लेजुङ, तेह्रथुम, पाँचथर, इलाम, झापालिसेंया जिल्लाय् फाल्गुनन्द जयन्ती न्यायेकेगु याइ।

स्वनिगलय् नं थीथी ज्याझ्वःत यानाः किरात समुदाय तय्सं महागुरु फाल्गुनन्द जयन्ती न्यायेकेगु याना वयाच्वंगु किरात ज्योतिष सङ्घया नायः चन्द्र कुमार शेर्मां धयादिगु दु।

सरकारं नेपाल प्रहरीया महानिरीक्षक पदय् प्रहरी अतिरिक्त महानिरीक्षक दानबहादुर कार्कीयात नियुक्त यायेगु निर्णय याःगु दु।

मन्त्रिपरिषदया थौंया बैठकं कार्कीयात थ्व हे कात्तिक २७ गतेनिसें लागू जुइ कथं महानिरीक्षक पदय् नियुक्त यायेगु निर्णय याःगु सरकारया प्रवक्तातकं जुयादीम्ह सञ्चार नापं सूचना प्रविधिमन्त्री जगदीश खरेलं जानकारी बियादिल।