नेत्री झाँक्री व छेँ लिहाँवा राष्ट्रिय अभियान अन्तर्गत थौं नेपाल कम्युनिष्ट पार्टी (एकीकृत समाजवादी) या नेत्री रामकुमारी झाँक्री, किसान श्रेष्ठलिसेंया नेता कार्यकर्तात नेपाल कम्युनिष्ट पार्टी (एमाले)य् लिहाँवःगु दु।

राष्ट्रियसभा गृहय् थौं ग्वसाः ग्वंगु ‘छेँ लिहाँवा राष्ट्रिय अभियान घोषणा’ ज्याझ्वलय् नेकपा (एमाले) या नायः केपी शर्मा ओलीं नेत्री झाँक्री, किसान श्रेष्ठलिसेंपिंत एमालेय् लसकुस यानादिल।एमालेया ज्याकुथिया छ्याञ्जे डा भीष्म अधिकारीं ‘छेँ लिहाँवाः राष्ट्रिय अभियान घोषणा’ यानाः सुरुआत जक जूगु व देय् न्यंकं थ्व अभियान न्ह्यानाच्वनीगु धयादिल।

एमाले नायः ओलीं छन्हु निन्हु न्ह्यः न्हापा एमाले त्वःतावंपिंत पार्टीइ लिहाँवयेत आह्वान यानादीगु खः। उगु हे आह्वान कथं छेँ लिहाँवाः अभियान अन्तर्गत थौं १५० स्वयां अप्वः नेता कार्यकर्ता एमालेय् दुहाँवःगु धाःगु खः।

नेपाल ललितकला प्रज्ञा प्रतिष्ठानया मंकाः ज्या नापं जिन्जा ग्यालरी जापान व बिन्दु स्पेस फर आर्टिस्ट नेपालया मंकाः ग्वसालय् सांस्कृतिक कालबिल यायेगु तातुना म्हिगःनिसें येँय् अन्तरराष्ट्रिय कला प्रदर्शनी न्ह्याःगु दु।

‘बोडरलेस स्माइल फर स्माइल’ शीर्षकय् न्ह्याःगु प्रदर्शनीया नेपाल ललितकला प्रज्ञा प्रतिष्ठानया कुलपति नारदमणि हार्तम्छालीं उलेज्या यानादिल। चित्रकला प्रदर्शनी सांस्कृतिक कालबिल जुइगु छगू माध्यम जूगु व थुपिं कलापाखें थःगु ब्यागलं म्हसिका, तजिलजि पिब्वइगु व कलापाखें शान्ति व सौहार्दया सन्देश दइगु वय्कलं धयादिल।

प्रतिष्ठानया पूर्वकुलपति किरण मानन्धरं प्रष्तिठानं मित्रराष्ट्रनाप जानाः ग्वसाः ग्वइगु थुजाःगु कला प्रदर्शनीया ज्या तसकं च्वछायेबहः जूगु धयादिल। वय्कलं विज्ञान व प्रविधि थेँ हे कलानं न्ह्याः वनाच्वंगु बिचाः तयादिल। जिञ्जा ग्यालरी जापानया निर्देशक तामाकी कानों नेपालय् थुगु कथंया प्रदर्शनी यायेखनाः तसकं लय्ताःगु धयादिल। वय्कलं थुगुसीया प्रदर्शनीइ बालकलायात दुथ्याकाःगु धयादिल। प्रदर्शनीया क्युरेटर नापं बिन्दु स्पेस फर आर्टिस्टया निर्देशक पृथ्वी श्रेष्ठं प्रदर्शनीइ ब्वतिकयादीपिं सकलें कलाकार लिसें ग्वाहालिमियात सुभाय् देछानादिल।

प्रदर्शनीइ नेपाः, जापान, दक्षिण कोरिया, जर्मनीलिसें देय्या ७५गू कलाकृति दुथ्याकातःगु दु। गुकी नेपाःपाखें कुलपति नारदमणि हार्तम्छाली, उपकुलपति लालकाजी लामा, प्राज्ञपरिषद् दुजःपिं सौरगङ्गा दर्शनधारी, दिनेश्वर महतो, सञ्जय वान्तवा, अरुणा हिङमाङलिसें कलाकारपिं प्रदीप शाक्य, सुन्दर सिंख्वाल, एरिना ताम्राकार, पृथ्वी श्रेष्ठ, मनिषलाल श्रेष्ठ, आशा डङ्गोल, सम्झना राजभण्डारी, अनिल शाही, भाइराजा महर्जन, विनोद लिम्बू, विनोद प्रधान, दीपक आउजीया कलात दुथ्यानाच्वंगु दु। पर्यटन प्रवद्र्धनया निंतिं थ्व प्रदर्शनीं ग्वाहालि याइगु विश्वास यानातःगु दु । प्रदर्शनी थ्वहे कात्तिक २७ गतेतक न्ह्याइगु जूगु दु।

मधेस प्रदेशया मुख्यमन्त्रीइ सरोजकुमार यादव नियुक्त जुयादीगु दु।

प्रदेश प्रमुख सुमित्रा सुवेदीं संविधानया धारा १६८या उपधार ३ कथं नेकपा (एमाले) मधेस प्रदेश संसदीय दलया नेता यादवयात मुख्यमन्त्रीइ नियुक्त यानादीगु खः।

वरिष्ठ मनोचिकित्सक व नेपाल सरकारया पूर्व स्वास्थ्य सचिव डा. निराकारमान श्रेष्ठया सफू “सङ्घर्षबाट सफलता – जीवनका अनुभव र अनुभूतिहरु” पिदन । ४२ दँ मानसिक स्वास्थ्य ख्यःलिसें ५२ दँया चिकित्सा ख्यलय् सक्रिय डा. श्रेष्ठं थःगु पूर्खा, मचाईनिसें थौंतकया जीवनया थथ्याःक्वथ्याः थःगु थुगु आत्मकथा सफुतिइ च्वयादीगु दु । 

सफू पिथना ज्याझ्वःया मूपाहां वरिष्ठ बालरोग व जनस्वास्थ्य विशेषज्ञ डा. बद्रीराज पाण्डें पिदंगु सफुतिं न्हूगु पुस्तायात लँ क्यनीगु खँ न्ह्यथनादिल । सफूया समालोचना यानादीम्ह संसद सचिवालयया पूर्व सह–सचिव तोयानाथ भट्टराईं आत्मकथा इमान्दार जुयाः च्वयादीगुया प्रशंसा यासें सफू ब्यक्तियागु खःसां थुकिं नेपाःया हे स्वास्थ्य ख्यःया तथ्य न्ह्यब्वयाच्वंगु खँ तयादिल । ज्याझ्वलय् पाहांपिं खाद्य प्रविधि विशेषज्ञ, पूर्वाञ्चल विश्वविद्यालयया पूर्व उपकूलपति प्रा. जगतबहादुर के.सी., नेपाल सरकारया पूर्व स्वास्थ्य सचिव रामचन्द्र मान सिँह, सफूया सम्पादक लक्ष्मण अधिकारीं भिंतुना न्वचु तयादीगु खः । च्वमि डा. श्रेष्ठया काय् डा. सन्तोषमान श्रेष्ठं लसकुस यानादीगु थुगु ज्याझ्वलय् सफू मूपाहां व पाहांपिंपाखें उलेज्या जूगु खः । 
ज्याझ्वःया ग्वसाः व सफू पिथनादीम्ह डा. श्रेष्ठया जहान श्रीमती शुक्रराज ट्रपिकल तथा सरुवा रोग अस्पतालका पूर्व निर्देशक डा. कोकिला श्रेष्ठ खःसा भाषा शुद्धी रोहिणी प्रसाद घिमिरें स्वयादीगु खः । सफू पिथना ज्याझ्वः सञ्चारकःमि सुरजवीर बज्राचार्यं न्ह्याकादीगु खः । 

नेपाल सरकारया स्वास्थ्य सेवाय् ३६ दँ सेवा यानादीम्ह डा. श्रेष्ठं “आफ्नो मूल थातथलो, बाल्यकाल, ऊ बेलाको समाज, कलेज जीवन, डाक्टर बन्न लखनऊतिर, सरकारी जागीर, धनकुटाको संस्मरण, दाङ अस्पताल, भक्तपुर गएपछि विद्रोह, नसोचेको कार्यालयमा दुई बर्ष, जोमसोम पुगेर टेकु, अचानक साइकियाट्रीतिर, मानसिक स्वास्थ्य सेवा, लण्डनमा थप अध्ययन, स्वास्थ्य मन्त्रालयको अनुभव, विदेश भ्रमणका स्मरणीय क्षण, केही महत्वपूर्ण अनुभव, उपचारमा विद्यमान समस्या, मानसिक स्वास्थ्य सेवा सुदृढ गर्ने उपाय, आफूले अनुभव गरेका केही स्वास्थ्य समस्या, जीवनका तीन खतरनाक दुर्घटना, नीजि तथा पारिवारिक सन्दर्भ, जनचेतनासम्बन्धी लेख, साहित्यिक सिर्जना, मेरो वंशावली” शीर्षक बियाः थीथी उपशीर्षकय् थःगु जीवनया संस्मरण लिपिवद्ध यानादीगु खः । ४०० पाः पौ दुगु थुगु सफू न्ह्यः नं च्वमि डा. श्रेष्ठं १० मानसिक स्वास्थ्य सम्बन्धी सफू चवयादीधुंकूगु दुसा मानसिक स्वास्थ्य सम्बन्धी लेख रचना नं थीथी पत्रपत्रिकाहरुमा नियमित च्वयाच्वनादीगु दु । थौंकन्हे त्रिपुरेश्वरय् थःगु हे क्लिनिकं स्वास्थ्य सेवा बियाच्वनादीम्ह  डा. श्रेष्ठयात मानसिक स्वास्थ्य ख्यलय् ह्यूपाः थनादीम्ह न्ह्यलुवाःकथं कायेगु याः । 

 

प्रधानमन्त्री सुशीला कार्कीया न्ह्यने चिकित्सा शिक्षा सुधारया माग तसें डा गोविन्द केसीं झिगू बुँदाय् ज्ञापनपौ लःल्हानादीगु दु।

प्रधानमन्त्री कार्कीयात सिंहदरबारय् थौं नापलानाः डा केसीं ज्ञापनपौ लःहानादीगु प्रधानमन्त्रीया प्रेस संयोजक रामबहादुर रावलं धयादिल । ज्ञापनपौ लःल्हानाकायेगु झ्वलय् प्रधानमन्त्री कार्कीनाप गृहमन्त्री ओमप्रकाश अर्याल, शिक्षामन्त्री महावीर पुन, स्वास्थ्यमन्त्री डा सुधा गौतम नापं चिकित्सा शिक्षा आयोगया उपाध्यक्ष डा अञ्जनी झा व डा केसीनापं चिकित्सा शिक्षा आयोगया पूर्वउपाध्यक्ष श्रीकृष्ण गिरी नापनापं प्राडा जगदीशप्रसाद अग्रवाल नापं दुथ्यानादीगु खः।

ज्ञापनपतिइ सरकारी अस्पताल नापं स्वास्थ्य सेवा संस्थाय् आःया आवश्कता कथं जनशक्ति दरबन्दी अप्वयेकेगु, चिकित्सकलिसें स्वास्थ्यकःमिया लजगाःया ह्वःताः सिर्जना यायेमाःगु माग तयातःगु दु।