विश्व कीर्तिमानी आरोही कामिरिता शेर्पां ३१ क्वःगुखुसि सगरमाथा आरोहण ताःलाक्क यानादीगु दु। सोलुखुम्बु थामेया ५५ दँ दुम्ह शेर्पां थौं सुथसिया ४ ताः इलय् सगरमाथाया च्वकाय् थ्यंकाः थ्वसिबें न्ह्यः थःम्हेस्यां हे तयातःगु कीर्तिमान त्वाथलादीगु खः।

थगुने शेर्पां २९ क्वःगु व ३० क्वःगुखुसी सगरमाथा आरोहण यानाः कीर्तिमान तयादीगु खः। पर्यटन विभागया कथं थौं निसें थ्व ‘सिजन’या सगरमाथा आरोहण क्वचाइगु खः।

थ्व ‘सिजन’य् ४६ गू आरोही पुचःया ४५८ म्हे स्यां आरोहण अनुमति काःगु खः। उपिंमध्यय् थ्यंमथ्यं ५०० म्हेस्यां सगरमाथा आरोहण याःगु धाःगु दु।

प्रेस सेन्टर जिल्ला शाखां कृष्ण सेन ‘इच्छुक’या २३ क्वःगु स्मृति दिवसया झ्वलय् कारागारया कैदीबन्दीतय्त फलफूल वितरण याःगु खः।

प्रमुख जिल्ला अधिकारी कुलबहादुर जिसीपाखें कारागारय् हे वनाः कैदीतय्त फलफूल वितरण याःगु प्रेस सेन्टरया जिल्ला नायः मनिष खड्कां जानकारी बियादिगु दु।

कारागारय् १६३ म्ह कैदीबन्दी दःसां नं थ्यंमथ्यं २०० म्हसित गाइगु कथं कारागार प्रशासनयात फलफूल वितरण याना धइगु वय्कःया धापू खः। स्मृति दिवसया झ्वलय् जिल्लाय् मेमेगु ज्याझ्वः नं ग्वसाःग्वयातःगु प्रेस सेन्टर जिल्ला शाखां धाःगु खः।

उच्च अदालत यलं नेवाः देय् दबूयात च्याक्वःगु अधिवेशन पनेत अन्तरिम आदेश जारी मयाःगु दु। थौं सोमवाः उच्च अदालतय् जूगु बहस लिपा अदालतं उकथं आदेश जारी याये म्वाःगु निर्णय याःगु दु।

नेवाः देय् दबूया वंगु जेष्ठ २ गतेनिसें ४ गत ेतक जुइगु धाःगु च्याक्वःगु अधिवेशन देय् दबूया संस्थापन पक्षं संस्थापकपिनिगु अधिकार कटौती याःगु धासें उच्च अदालतय् रिट दायर याःगु खः।

उच्च अदालतं जेष्ठ १२ गते थौं सोमवाः निगुलिं पक्ष सःताः अन्तरिम आदेश जारी यायेगु वा मयायेगु धैगु सम्बन्धय् सहलह ब्याकेत सःतूगु खः। तर अदालतं जेष्ठ २ गते अल्पकालीन आदेश जारी याःगुलिं गण्डकी प्रदेशया कावासोतीइ न्ह्याना च्वंगु च्याक्वःगु अधिवेशन स्थगित याःगु खः।

सोलुखुम्बु सदरमुकाम सल्लेरीया फाप्लु विमानस्थलं येँय् वाःय् प्यन्हु नियमित उडान जुइगु जूगु दु। नेपाल एयरलाइन्सं वाःय् प्यन्हु उडान याये त्यंगु खः।

नेपाल नागरिक उड्डयन प्राधिकरण फाप्लुया कथं आः वाःया सोमबाः, बुधबाः, शुक्रबाः व शनिबाः नेपाल एयरलाइन्सया जहाजं उडान याइगु जूगु दु।नेपाल एयरलाइन्सया जहाजय् वःगु प्राविधिक खराबीया हुनिं ताःई निसें दिना च्वंगु फाप्लु–येँय् हवाई सेवा हाकनं सञ्चालन जूइत्यंगु खः।

प्राधिकरण फाप्लुया वरिष्ठ अधिकृत भानुभक्त आचार्यया कथं जहाज मर्मत क्वचायेके धुंकाः लिपा हाकनं उडान सञ्चालन सम्भव जूगु खः। थ्वसिबें न्ह्यः वाःया छन्हु उडान यानाः वयाच्वंगु जहाज ‘ग्राउण्डेड’ जुयाः ताःई तक फाप्लुइ उडान जुइ मफयाच्वंगु खः।

न्यूनतम सेवा मापदण्ड ज्याझ्वःया अनुगमन लिसें मूल्याङ्कनय् भरतपुर अस्पताल देय् या हे सङ्घीय अस्पतालय् न्हाप लाःगु दु।

स्वास्थ्य लिसें जनसङ्ख्या मन्त्रालयं याःगु मूल्याङ्कनय् ८८ प्रतिशत ल्याः नापं भरतपुर अस्पताल देय् या हे न्हापांगु थासय् लाःगु अस्पताल जूगु दु।अस्पतालं ब्यूगु जानकारी कथं मन्त्रालयं देय् न्यंकंया १५ गू सङ्घीय अस्पतालय् थ्व अनुगमन याःगु खः। अस्पतालया मेडिकल सुपरिटेण्डेण्ट प्राडा कृष्णप्रसाद पौडेलं उत्कृष्ट ल्याः नापं भरतपुर अस्पतालं ‘ग्रिनजोन’ स्टिकर काःगु धयादिल।

‘ग्रिनजोन’ स्टिकर ८५ प्रतिशत स्वया अप्वो ल्याः हःगु अस्पतालयात जक बिइगु याइ। ‘ग्रिनजोन’ स्टिकर काःगु भरतपुर अस्पताल छगू जक अस्पताल जूगु वय्कलं धयादिल। सुशासन लिसें व्यवस्थापन, चिकत्सकीय सेवा व फोहरलिसेंया वस्तुया व्यवस्थापन अन्तर्गत लाःगु ग्वाहालि सेवाया लिधंसाय् न्यूनतम सेवा मापदण्ड ज्याझ्वःया अनुगमन लिसें मूल्याङ्कन यायेगु याइ।

थुजागु अनुगमन मन्त्रालयं दँय् दसं याइ। मन्त्रालयया प्रवक्ता डा प्रकाश बुढाथोकीया नेतृत्वय् दूगु पुचलं भरतपुर अस्पतालया अनुगमन याःगु खः। मेडिकल सुपरिटेण्डेण्ट प्राडा पौडेलं गुणस्तरीय सेवाय् थःपिं मदिक्कं न्ह्याना च्वनागु धयादिल। “अस्पतालया सकल पुचः सेवा सुधारया निंतिं जुया च्वनागु दु। थुकिया लिच्वः बांलागु वल”, वय्कलं धयादिल।

मन्त्रालयं याःगु अनुगमनय् थ्व अस्पतालं दँय्दसं स्तरवृद्धि यानाः वयाच्वंगु दु। अस्पतालया सुचं अधिकारी गोपाल पौडेलया कथं विसं २०७८ या अनुगमनय् ५२ प्रतिशत, २०७९ या अनुगमनय् ६२ प्रतिशत, २०८० या अनुगमनय् ६४ प्रतिशत, २०८१ या अनुगमनय् ७७ प्रतिशत व २०८२ या अनुगमनय् ८८ प्रतिशल ल्याः हःगु दु।