बोडेया नीलबाराही प्याखं थौं क्वचाःगु दु। प्यन्हु यकं जूगु जात्रा थौं क्वचाःगु खः।

प्यन्हु न्ह्यः नीलबाराही प्याखं बोडेया नारायणस्थानया लाछी सुरु जूया लायकु छें, विष्णु घाट, महालक्ष्मी थान, भाँगुटोल, खोंसी टोल, नीलबाराही जुया नारायणथानय् वया क्वचाःगु खः।

बोडेया थुगु नीलबाराही प्याखं गुंलागा द्धितीया न सुरु जुया थौं गुंलागा पञ्चमीइ क्वचाःगु खः। थुगु प्याखनय् भैरव छम्ह, बाराही प्यम्ह, कुमारी प्यम्ह, सिंहिनी प्यम्ह, द्वारपाल निम्ह व गणेद्यः प्यम्हयाना १९ म्ह द्यःपि दइ।

थुगु देवगण छेँ न पिहावयेगु इलय् जा नये मज्यु व न्ववाय् न मज्यू धइगु मान्यता दु।

येँ न ज्वना वंगु फोहोरया गाडी नुवाकोटया आलेटार व सिसडोलय् थाःगु दु।

बञ्चरेडाँडा जःखः मनू तयेस अवरोध कायमै याना च्वंगुलि फोहोरया गाडी न्ह्यने यकेफूगु मदनि। स्थानीयपिन्स ल्हातय् अप्पा ज्वना डाँडाय् च्वना च्वंगु दु।

येँ महानगरपालिका वातावरण विभाग प्रमुख सरिता राईया कथं फोहोर यके मबिइत डाँडा, खोल्चा–खोल्ची लगायत थाय् थासय् स्थानीयपि मुना च्वंगु दु। थप सुरक्षाकःमि मवतले फोहोर यके फइगु अवस्था मदु।

महानगरं मंगलबाः २ सय ५० गाडी फोहोर लोड यानातःगु दु। जिल्ला प्रहरी कार्यालय नुवाकोटया कथं ४०–५० म्ह प्रहरी बञ्चरेडाँडाय् च्वना च्वंगू दु।

माःगु अवस्थाय् ब्याकअप फोर्स खटे यायेगु तयारी जूयाच्वंगु दु धका नुवाकोटया एसपी रमेश पण्डितं धाःगु दु।

काठमाडौं दरबार स्क्वायर पर्यटन प्रर्वद्धन संघया अध्यक्षय् शैलेन्द्रमान वज्राचार्य निर्वाचित जूगु दु।

संघं म्हिगः सोमबाः वसन्तपुरय् छगु ज्याझ्वः दथुइ न्हुधाः जुगु खः । समितिया महासचिवय् पुरुषोत्तम डंगोल व कोषाध्यक्षय् सञ्जयमान श्रेष्ठ च्वनादीगु खः।

अथेहे कार्यसमिति सदस्यय् दिनेश सुवाल, किरण श्रेष्ठ, चिरनरत्न शाक्य, डिल्लीरत्न तुलाधर, मसिन मुलेपति व अभिनवदास श्रेष्ठ निर्वाचित जुगु दु।

हनुमानध्वाकाया दरबार क्षेत्रय् संस्कृति, सम्पदाया संरक्षण व प्रवद्र्धन यायेगु निति ग्वाहालि यायेगु कथं संघ २०६२ सालय् स्थापना याःगु खः।

इतुंबहाःया भाष्करदेव संस्कारित केशचन्द्रकृत पारावत महाविहारं प्यंगू दशक न्ह्यः खुया यंकूगु कलात्मक त्वरं लित हःगु दु।

वि.सं. २०४२ सालय् तंगु कलात्मक सालभाञ्जिका (यक्षिणी) त्वरं अमेरिकां नेपाः लित हःगु खः। पुरातत्व विभागं अमेरिकां लित हःगु त्वरं आइतवाः सार्वजनिक याःगु खः ।

सार्वजनिक याःगु त्वरंया क्वय् त्वधुलाच्वंगु प्राचीन यक्षया मूर्ति दु । त्वाःदःगु उगु त्वरंया च्वय्पाखे दनाच्वंम्ह यक्षिणी दुगु खःसा उकियात हे त्वाःथलाः त्वरं खुया यंकूगु खँ धाःगु दु ।

उगु इलय् यक्षिणीया स्वंगू काष्ठकलाया मूर्ति खुया यंकूगु खः । त्वरंलिसें प्रस्तर कलापाखें निर्माण यानातःगु निम्ह साधुया दथुइ दनाच्वंम्ह शिवया मूर्ति नं नेपाः लित हःगु दु । सन् १९५५ य् कंगः अजिमा द्यःया न्ह्यःने च्वंगु पःखालं उगु मूर्ति खुया यंकूगु खः ।

थुपिं निगुलिं मूर्ति नेपाः हयेगु निंतिं ‘मेट्रोपोलिटन म्युजियम अफ आर्ट’य् तयातःगु खःसा मूर्ति नेपाःया खः धइगु प्रमाणित जुइवं संग्रहालयं हे बीमा व ढुवानी खर्च यानाः नेपाःयात लित बिउगु खः ।

सभामुख अग्निप्रसाद सापकोटां राष्ट्रपति विद्यादेवी भण्डारीपाखे पुनः बिचाः यायेत लित छ्वंगू नागरिकता विधेयक ऐन २०६३ यात संशोधन याना दयकूगु विधेयकबारे परामर्श न्ह्याकूगु दु।

आइतबाः राष्ट्रपतिं संदेशसहित लित छ्वंगु नागरिकता विधेयक सोमबाः संघीय संसदय् थ्यंगू दु। वया लिपा सभामुखं थुगु विधेयक न्ह्यने यकेगु सन्र्दभय् सरकारया बिचाः व तयारी बिषय गृहमन्त्री बालकृष्ण खाँड व कानुन न्याय तथा संसदीय मामिलामन्त्री गोविन्दी बन्दीनाप छलफल याःगु दु।

सरकारं राष्ट्रपतिया संदेशबारे सदनयात जानकारी बिइगु कार्यसूची तयेगु निति मंगलबाः प्रतिनिधिसभाय् राष्ट्रपतिया संदेशबारे जानकारी बिइगु कार्यसूची तय याःगु दु।

राष्ट्रपतिया संदेशबारे सदनयात जानकारी बिइवं न्ह्यने यकेगु विषय सत्तारुढ गठबन्धनय् दुगु दलपिनिगु छगु हे धारणा जुइ फुगु मदुनि।

सरकारया नेतृत्व यानाच्वंगु नेपाल कांग्रेस फास्ट ट्रयाकय् नागरिकता विधेयक पारित यायेमाःगु पक्षय् दू सा गठबन्धनय् दुगु मेगु दलपि राष्ट्रपतिं छ्वया हःगु संदेशया सन्दभय् छु यायेगु एकीककृत धारणा तय यायेमाःगु पक्षय् दु।