वाःया न्हापागु दिं थौं आइतबाः सेयर बजाः तसकं कुहावःगु दु। थौं आइतबाः सेयर बजाः ३१.९७ अंकं घटे जुया १८८५.३१ विन्दुइ कुहावःगु दु।

थ्व धइगु १.६७ प्रतिशतं कुहावःगु खः। थौं २५३ सूचीकृत धितोपत्रय् २४ हजार ६४४ गु कारोबारपाखे ३५ लाख १२ या ८३४ कित्ता सेयर किनबेच जूगु खः सा १ अर्ब १० करोड ३४ लाख ४ हजार ४५ रुपैयाँ बराबरया कारोबार जूगु खः।

बैंकिङ उपसूचक २.३० प्रतिशतं थौं घटे जूगु दु। सीवाईसी नेपाल लघुवित्त वित्तीय संस्थाया सेयर भाःसा सकारात्मक सर्किटय् वःगु दु। थुकिया भाः १६९.८० रुपैया न थहवना १८६८ रुपैयाँ थ्यःगु दु। थ्व बाहेक समिट लघुवित्त वित्तीय संस्था, मैलुङखोला जलविद्युत कम्पनीया भाः ९.९९ व ९.५० प्रतिशतं थहावःगु दु।

थौं दकलय् अप्पो नेडेप लघुवित्त वित्तीय संस्थाया सेयर भाः कुहावःगु दु । थुगु कम्पनीया भाः नकारात्मक सर्किटय् वःगु दु। पाँचथर पावर कम्पनीया ६.९७ प्रतिशतं भाः कुहावःगु दु सा नेपाल इन्भेष्टमेन्ट बैंकया लगानीकर्तापिन्स ५.७४ प्रतिशतं घाटा जूगु दु।

शिवम् सिमेन्ट, नविल बैंक, हिमालय डिष्ट्रिलरी लगायत कम्पनी दकलय् अप्पो कारोबार जूगु दु।

दक्षिण एसियाली श्रमजीवि पत्रकारपिनिगु मंकाः मञ्च सार्क जर्नालिष्ट फोरम नेपाल च्याप्टरं पत्रकार प्रकाश सिलवालया नेतृत्वय् ११ म्ह सदस्सीय सचिवालय गठन याःगु दु।

फोरमया अध्यक्ष राजु लामाया मूपाहाँसूइ व नेपाल च्याप्टरया संयोजक प्रकाश सिलवालया अध्यक्षताय् थौं शनिबाः च्वंगु् बैठकं अथे निर्णय याःगु खः।

थौं च्वंगु निर्णय कथं सचिवालयय् अध्यक्ष प्रकाश सिलवाल, संगठन विभागया प्रमुखय् रूपेश आचार्य, प्रचार प्रसार विभागय् रत्नकाजी महर्जन,आर्थिक विभागय् सुरेन्द्रभक्त श्रेष्ठ च्वंगु दु।

अथेहे दुजलय् कविता थापा, नृपेन्द्रलाल श्रेष्ठ, सुनिल महर्जन व माधव तिवारीपि च्वंगु दु सा मेपि दुजः लिपा नियुक्त यायेगु निर्णय याःगु दु। थौंया बैठकं भारतया राजधानी न्हुगु दिल्लीं थ्व हे वइगु २०२३ जनवरी १० निसे ११ तक जुइगु सार्क जर्नालिजम कन्फ्रेन्सय् नेपालं ब्बति कायेगु व माःगु संयोजन व पुर्वतयारी यायेगु निर्णय तका याःगु दु।

राष्ट्रिय स्वतन्त्र पार्टी नं समानुपातिक पद्धतिपाखे वःगु १३ म्ह सांसदपि ल्ययेगु ज्या क्वचायेकूगु दु।

प्रवक्ता मुकुल ढकालया कथं दलितपाखे सन्तोष परियार व शिव नेपाली, आदिवासी जनजातिपाखे डा. ढाकाकुमार श्रेष्ठ, इन्दिरा राना मगर व सुमना श्रेष्ठ, खस आर्यपाखे डा. चन्दा कार्की, डोलप्रसाद अर्याल व निशा डाँगी, विनिता कठायतपिन्त ल्यःगु दु।

अथेहे मधेशीपाखे लक्ष्मी तिवारी व मनिष झा, थारुपाखे अशोक चौधरी व मुस्लिमपाखे असिम साहयात ल्यःगु दु धका प्रवक्ता ढकालं धाःगु दु।

भाषाथुवाः फणिन्द्ररत्न वज्राचार्ययात न्हापांगु शताब्दीपुरुष सत्यमोहन जोशी नेपाल भाषा साहित्य सिरपाः लःल्हाःगु दु ।

राष्ट्रपति विद्यादेवी भण्डारीं छगू विशेष ज्याझ्वःया दथुइ राष्ट्रपति भवन शीतल निवासय् भाषा थुवाः वज्राचार्ययात न्यय्छद्वः तकादांलिसें हनापौसहितया उगु सिरपाः लःल्हानादीगु खः ।

ज्याझ्लवय् नवासें राष्ट्रपति भण्डारीं नेवाः भाय् व नेवाः तजिलजिया थःगु हे बिस्कं महत्व दुगु खँ कनादिसें रञ्जना लिपि देय्या हे मौलिक लिपि जूगु खँ धयादीगु दु । ज्याझ्वःया विशेष पाहां यल महानगरपालिकाया प्रमुख चिरिबाबु महर्जनं मदुम्ह शताब्दी पुरुष जोशीयात लुमंकाः वय्कलं च्वयादीगु ‘चारुमति’ नांया प्याखं छगू क्यनेगु यानाच्वनागु धासें न्ह्याथे यानाः जूसां उगु प्याखं क्यनाः त्वःतेगु प्रतिवद्धता प्वंकादिल ।

सिरपाः छनोट कमिटीया कजि समालोचकलिसें साहित्यकार डा. पुष्पराज राजकर्णिकरं पुरस्कृत व्यक्तित्व भाषा थुवाः वज्राचार्य भाषा, साहित्य ख्यलय् छम्ह ज्वःमदुम्ह् व्यक्तित्व खः धासें वय्कलं नेपालभाषा परिषद्या ताःईतक नायः जुयाः यानादीगु नेतृत्व व वय्कःया योगदानयात कयाः चर्चा यानादीगु खः ।

उगु इलय् राष्ट्रपति भण्डारीं नेपालभाषा मंकाः खलः यलया संस्थापक नायः छत्रबहादुर कायस्थयात हनापौ देछासे हनेज्या यानादीगु खःसा पुलांम्ह मन्त्री बुद्धिराज वज्राचार्य व समाजसेवी मोतिलाल शिल्पकारयात खलःया मानार्थ दुजः पौ नं लःल्हानादीगु खः ।

मकाः खलः यलया नायः हिराकाजी महर्जनया सभाध्यक्षताय् जूगु ज्याझ्वलय् राष्ट्रपति भण्डारीं खलःया ग्वसालय् जूगु चेस कासाय् विजयी जुयादीपिंत नं सिरपाः लःल्हानादीगु खःसा सिरपाःया नीस्वनेत आर्थिक ग्वाहालि यानादीपिं दातापिंत सुभाय् पौं नं लःल्हानादीगु खः ।