राष्ट्रपति विद्यादेवी भण्डारीं नागरिकता विधेयक संसदय् लितः छ्वंय्वं आः प्रक्रियाबारे बहस सुरु जूगु दु। संविधानया धारा ११३ या उपधारा ४ य् राष्ट्रपतिं सन्देशनाप लितः छ्वंय्वं विधेयकयात कया निगू हे सदनं पुनर्विचाः यायेमाःगू उल्लेख दु।

‘राष्ट्रपतिं छु न विधेयक सन्देशनाप लितः छ्वलकि अज्यागू विधेयकय् निगु हे सदनं पुनर्विचाः याना उगु विधेयक प्रस्तुत रुपं वा संशोधननाप पारित याना हाकन पेस यायेमाः अथेहे पेस जूगु १५ दिं दुने राष्ट्रपतिं प्रमाणित यायेमाः’ संविधानया धारा ११३ या उपधारा ४ य् अथे धयातःगु दु।

राष्ट्रपतिं लितः छ्वंगु विधेयक सरकारं न्ह्यने यके चाहे जूसा आः हाकन संसदय् पुलागु हे प्रक्रिया कथं न्ह्याकेमाः । प्रतिनिधि सभा नियमावली कथं अथे लितः हःगु विधेयकबारे संसदया महासचिव व वयागु अनुपस्थितिइ सचिवं संसदय् जानकारी बिइमाः।संसद् अधिवेशन चालु मजूगु अवस्थाय् सूचं टाँसे याना अथे जानकारी बिइमाःगु नियम दु।

संसद् बैठक कन्ह्य च्वनिइगु दु। प्रक्रिया कथं राष्ट्रपति लितः छ्वया हःगु विधेयक सरकारं हाकन प्रतिनिधि सभाय् टेबुल यायेमाः। अथे टेबुल याःगू विधेयकय् विचाः याये माःगु धासे प्रस्ताव पारित यायेमाः। वयालिपा संसदं विधेयकय् संशोधन यायेत ७२ घन्टाया ई बिइमाः। वया लिपा प्रतिनिधि सभां दफावार छलफलया लागि समितिइ छ्वयेगु वा संसदं क्वछिइमाः।

प्रतिनिधि सभां पास जुइवं विधेयक राष्ट्रियसभाय् छ्वयेमाः। राष्ट्रियसभा न प्रतिनिधि सभाय् थे प्रक्रिया पूरा यायेमाः। राष्ट्रियसभाय् पारित जुइवं विधेयकयात प्रतिनिधि सभां स्वीकृत याना प्रमाणीकरणया लागि राष्ट्रपतिया थाय् छ्वयेमाः। अथे याना छ्वंगू विधेयक राष्ट्रपतिं हाकन लितः छ्वंय् मज्यूगु संवैधानिक व्यवस्था दु।

राष्ट्रपति विद्यादेवी भण्डारीं नागरिकता विधेयक प्रतिनिधि सभाय् लितः छ्वंगु दु। राष्ट्रपति भण्डारीं विधेयकय् पुनर्विचाः यायेमाः धका धासे विधेयक लितः छ्वंगु विज्ञप्तिइ उल्लेख याःगू खः।

विधेयकयात संसदीय समितिं पास याःगू प्रतिनिधि सभाय् छ्वंगु खः। प्रतिनिधि सभां राष्ट्रिय सभाय् छ्वंगू विधेयक राष्ट्रिय सभाय् पारित जूइवं सभामुख अग्नि प्रसाद सापकोटां प्रमाणित यायेत राष्ट्रपतिया थाय् त्वंगू खः।

तर राष्ट्रपति विद्यादेवी भण्डारीं विधेयकसम्बन्धी छू विषय सङ्घीय संसदपाखे पुनर्विचाः यायेमाःगू धासे छगु सन्देश नाप प्रतिनिधि सभाय् छ्वंगु खः।

साउन ६ गते प्रतिनिधि सभा व साउन १२ गते राष्ट्रिय सभाय् बहुमतं पारित विधेयक प्रमाणीकरणया लागि संसदय् साउन १५ गते राष्ट्रपति कार्यालय छ्वंगू खः। १५ दिंया ई म्हिगः क्वचाःगू खः।

नेपालभाषाया सफू ब्वज्या म्हिगः क्वचाःगु दु। वंगु साउन २६ गते प्रज्ञा भवनय् नेपाल भाषा एकादेमिया चान्सलर यज्ञरत्न ध्वाखा न उलेज्या यानादीगु खः।

उगु सफू ब्वज्याय् कवि सिद्धिचरण श्रेष्ठया सीस्वां, फूस्वां व भूषण प्रसाद श्रेष्ठया छन्द ७७ व नेवाः गजल सफू विमोचन जूगु खः।

सफू ब्वज्याय् च्वसापासा, नेपालभाषा एकेडेमी, नेपालभाषा मिसा खलः, ईलोहं प्रकाशन, नागार्जुन पब्लिकेशन, कुतः पिकाक लगायतपिन्स ब्बति काःगू खः।

उपराष्ट्रपति नन्दबहादुर पुनं म्हिगःनिसे न्ह्यागू मध्यपुर थिमीइ भैल द्यःया प्याखं अवलोकन यानादीगु दु।

मध्यपुर थिमि नगरपालिकाया औपचारिक निमन्त्रणाय् उपराष्ट्रपति पुन भैरव नाच स्वयेगु निति बालकुमारी झायादीगु खः। ऐतिहासिक व धार्मिक महत्व जाःगु भैरव द्यःया प्याखं प्रत्यक्ष अवलोकन याःम्ह उपराष्ट्रपति पुन नेपाल सरकारया न्हापाम्ह उच्च पदस्थ अधिकारी जूयादीगु दु।

लायकू भैलः (भैरव नाच) नाप थुगु दँय् दिगु त्वालय् महाकाली, बोडेय् निलबाराही, इन्द्रअप्सरा, भस्मासुर व अष्टमातृका गण नाच प्रदर्शन जूगु दु । सापारुया कन्ह्य कुन्हुनिसे प्यचाः तक थिमिया थीथी त्वालय् प्याखं प्रदर्शन यायेगु परम्परा दु। थुगु ऐतिहासिक प्याखं प्रवर्द्धन यायेगु उद्देश्यं मध्यपुर पर्यटन विकास व प्रवर्द्धन फोरम समेत गठन याःगू खः।

फोरमं संस्कृति, पर्यटन तथा नागरिक उद्दयनमन्त्री, वाग्मती प्रदेशया संस्कृति तथा पर्यटनमन्त्री, सामान्य प्रशासनमन्त्रीनिसे गुठी संस्थानया प्रमुखयात तक प्याखं स्वयेत औपचारिक रुपं पौं छ्वये धुकुगु दु। थुगु प्याखं अवलोकन यायेगु लागि वइपि पर्यटकपिनिगु लागि होटल व लजया व्यवस्था यानातःगू दु।

ने.सं ६३३ सालय् ख्वपय् अनिकाल जूगु इलय् जुजु सुवर्ण मल्लं नवदुर्गा गण प्याखं, बोडेय् निलबाराही, थिमिइ लायकु भैलः व महाकाली प्याखंया सुरुआत यानातःगु धका धाइ।

नेपाल रेडक्रस सोसाइटी येँ जिल्लाय् न्हुगु कार्यसमिति वःगु दु। न्हुगु कार्यसमितइि सभापतिइ स्यामकाजी डोटेल निर्वाचित जूगु खः।

अथेहे उप सभापतिपि बिस्णुमान मानन्धर, अन्जना श्रेष्ठ मास्के, मन्त्री वृद्धिमान शाक्य, कोषाध्यक्ष लक्ष्मीरत्न तुलाधर व उपमन्त्री सुनिल कुमार श्रेष्ठ उप कोषाध्यक्षय् नवराज भन्डारी निर्वाचित जूगु दु।

अथेतु, दुजलय् पुष्कर चालिसे, स्यामलाल तन्डुकार, अमृत नारायण मानन्धर, बिदुर भट्टराई, राजेन्द्र बानियाँ, लक्ष्मी प्रसाद कुईकेल, राजेन्द्रप्रसाद श्रेष्ठ, प्रतिस्था खरेल, मन्जु पाण्डे व सब्बारानी महर्जनपि निर्वाचित जूगु दु।