वरिष्ठ मानवअधिकारवादी नेता नाप नेवाः न्ह्यलुवा पद्मरत्न तुलाधरया लुमन्तिइ नीस्वनातःगु ‘पद्मरत्न मानवअधिकार सम्मान’ छगु ज्याझ्वः दथुइ उपराष्ट्रपति नन्दबहादुर पुनं मानवअधिकारवादी नेता नाप नेवाः न्ह्यलुवा मल्ल के. सुन्दरयात लःल्हाःगु दु ।

विश्व मानवअधिकार दिवसया लसताय् ग्वसाः ग्वःगु १४ क्वःगु राष्ट्रय मानवअधिकार महाभेला –२०७९ ज्याझ्वलय् न्यय्द्वः तका दांया उगु सिरपाः वय्कःयात लःल्हाःगु खः ।

मदुम्ह तुलाधरया लुमन्तिइ वय्कःया छेँजःपिंसं स्वनादीगु थुगु सिरपाः थ्व स्वयां न्ह्यः डा. मथुराकृष्ण श्रेष्ठ, दमननाथ ढुंगाना र डा. रेणु अधिकारीयात लःल्हायेधुंकूगु दु।

अथे हे महाभेलाय् सिरहाया मिसा मानवअधिकारवादी नेतृ देवकुमारी महरा व डा. गणेश गुरुङयात नं थीथी मानवअधिकार सिरपाः लःल्हाःगु खः ।

स्वर सम्राट नारायण गोपालया झ्वाताः छगु ज्याझ्वः दथुइ येँ महानगरपालिकाया मेयर बालेन शाह न उलेज्या यानादीगु दु।

स्वर सम्राट नारायण गोपाल बुगु थाय् येँ महानगरपालिका वडा १८ या आर्थिक ग्वाहालि उगु झ्वाताः किलागलय् तयेगु ज्या जुगु खः।

उगु ज्याझ्वलय् येँ महानगर १८ वडा अध्यक्ष न्हुच्छेकाजी महर्जन थुगु १८ वडा दुने यक्को सष्टापि दुगु थाय् थौं स्वर सम्राट नारायण गोपालया झ्वाताः वयकः बुगु थाय् हे पलिस्था जुगु दु धका धयादीगु खः।

येँ महानगर १८ वडा दुने वडा अध्यक्ष महर्जनं पुष्पलाल, पद्मरत्न, शंखधर लगायत पिनिगु झ्वाता तयेगु ज्या यायेधुकुगु खः। स्वर सम्राट नारायण गोपालया झ्वाताः मूर्तिकार श्याम तुलाधरं दयकादीगु खः।

संसद् सचिवालयया महासचिव भरत गौतमं निलम्बित अवस्थाय् च्वनाच्वम्ह प्रधानन्यायाधीश चोलेन्द्रशमशेर जबराया महाभियोग प्रस्ताव निष्प्रभावी जूगु धासे बिगु खः।

उगु पौंपाखे उत्पन्न जूगु परिस्थिति आः न साम्य जूगु मदुनि। महासचिवया उगु पौं ज्वना सर्वोच्चय् वनेगु तयारी दुम्ह राणायात पनेत थौं न बारया पदाधिकारीपि लुँखाय् धर्ना च्वनेत तयारी यानाच्वंगु दु।

छु ईलिपा हे धर्ना च्वनेगु जुइ धका सर्वोच्च बारया अध्यक्ष पूर्णमान शाक्यनाप गुम्ह पदाधिकारीपिन्स दायर याःगु रिटय् थौं हे संवैधानिक इजलासया सुनुवाइ यायेत पेसी तोके याःगु दु।

मेलम्ची खानेपानी आयोजनां स्वनिगलय् थौंनिसे लः वितरण याइगु जुगु दु।

खानेपानीमन्त्री उमाकान्त चौधरीं महाँकालय् च्वंगु काठमाण्डौ उपत्यका खानेपानी लिमिटेडं वितरण केन्द्रपाखे ताचाः चायेका लःत्वनिइगु जुगु दु ।

मेलम्ची खानेपानी आयोजनाया कार्यकारी निर्देशक कमलराज श्रेष्ठया कथं स्वनिगः दुने झीगः दयकेमाःगुलि गुुगः दयेकेगु ज्या क्वचाये धुकुगु दु। मेगु ख्वपया कटुञ्जेय् लःया ट्याङ्की निर्माणाधीन अवस्थाय् दु।

आयोजनाया कथं आरुबारी, महाँकाल चौर, बाँसबारी, पानीपोखरी, बालाजु व यलया खुमलटारय् ट्याङ्की निर्माण याये धुकुगु दु। उगु ट्याङ्कीइ ७४ हजार ५ सय घनमिटर लः सङ्कलन जुइ।

नेवाः न्ह्यलुवाः नाप मानव अधिकारवादी नेता पद्मरत्न तुलाधरया नामं निस्वनातःगु ‘पद्मरत्न मानव अधिकार नाप शान्ति सिरपाः’ थुगु दँय् नेवाः न्ह्यलुवा मल्ल के. सुन्दरयात बीइगु जूगु दु ।

मानव अधिकार दिवसया लसताय् ह्युमेन राइट्स म्याग्नेटिकपाखें याइगु छगू ज्याझ्वलय् उगु सिरपाः लःल्हाइगु ग्वसाः दु ।

मदुम्ह तुलाधरया छेँजःपिनि सक्रियताय् लःल्हाइगु थ्व सिरपाः ५० द्वः तकाया खः ।