येँया मखंस्थित महिन्द्रेश्वर महाःद्यःयाथय् तःजिगु धार्मिक अनुष्ठान यासें राजोपाध्याय समाजं पञ्चाभिषेक रूद्रीया समापन याःगु दु । समाजं लयपतिकं स्वनिगःया स्वंगुलिं शहरया शिवालयस यानावःगु पंचाभिषेक रूद्रीया समापन याःगु खः ।

वंगु मंगलबाः महिन्द्रेश्वर महाःद्यःयाथाय् राजोपाध्याय द्यःब्रह्मू ११म्हेसिनं लघु रूद्राभिषेक, गुम्हेसिनं नवचण्डीलिसें पंचाङ्ग पाठया नापं १०द्वः संख्याया अयुताहुती यज्ञतकं याःगु खः ।

सुथय् १०८ कलश यात्रां न्ह्याःगु ज्याझ्वः लघुरूद्री, नवचण्डी, पंचाङ्ग व होम धुंकाः बहनी भजन व आरती तकं यानाः क्वचायेकूगु खः ।

ज्याझ्वलय् संस्कृति पर्यटन तथा नागरिक उड्डयन मन्त्री जीवनराम श्रेष्ठ तकं उपस्थित जुयाः पूजा तकं यानादीगु खः । व हे झ्वलय् मन्त्री श्रेष्ठं येँया ओमधरानन्द राजोपाध्यायं मुंकादीगु कान्तिपुरया ‘रूद्राभिषेकपद्धति’ नं लोकार्पण यानादीगु खः ।

पूजा व सफू लोकार्पण धुंकाः बःचाहाकलं खँ ल्हासें मन्त्री श्रेष्ठं नेपालया मौलिक पहिचान व संस्कृतिया संरक्षण, प्रवद्र्धन यायेत थुकथंया अनुष्ठान यानाच्वनेमाःगु बिचाः तयादिल ।

स्वनिगःया आदिवासी राजोपाध्याय ब्राह्मणतय् कुसा संगठन राजोपाध्याय समाजं कोरोना महामारीं मुक्तिया कामना यासें थगुनेया श्रावण महिनानिसें पञ्चाभिषेक रूद्री पाठ न्ह्याकूगु खः ।

२०७८ श्रावण १२ गतेनिसें न्ह्याःगु अनुष्ठानय् स्वनिगःया स्वंगुलिं शहरया शिवालयस छन्हुं हे छगू हे इलय् न्याम्ह न्याम्ह द्यःब्रह्मूपिनिगुपाखें रूद्री पाठ जुयावःगु खः ।

व झ्वलय् येँया महिन्द्रेश्वर महाःद्यः मखनय्, यलय् विश्वेश्वर महाःद्यः मंगलबजार व ख्वपय् तिलेश्वर महाःद्यः तःमारिइ लयपतिकं रूद्री पाठ जुयावःगु खः ।

वंगु असार ११ गते १२क्वःगु रूद्री पाठ ज्याझ्वः क्वचायेकाः वंगु मंगलबाः थुकिया औपचारिक समापन याःगु खः ।

मध्यपुर थिमिइ उपराष्ट्रपति नन्दबहनदुर पुन (पासाङ) न ऐतिहासिक लायकू भैल जात्रा अबलोकन यानादीगु दु।

प्यन्हुनिकं न्ह्याइगु उगु जात्राया न्हापागु दिं उपराष्ट्रपति नन्दबहनदुर पुन नाप नगरप्रमुख सुरेन्द्र श्रेष्ठ, उपप्रमुख विजयकृष्ण श्रेष्ठ, बागमती प्रदेश सांसद् डा. राजन्द्रमान श्रेष्ठ, प्रतिमा श्रेष्ठ, ४ नं. वडाध्यक्ष बालकृष्ण पात्या श्रेष्ठ, ६ नं. वडाध्यक्ष ज्ञानदास प्रजापति, ८ नं. वडाध्यक्ष रमेश थापा श्रेष्ठ, प्रजिअ दुर्गादेवी शर्मालगायत पिनिगु न उपस्थित दूगु खः।

स्वनिगःया थीथी थासय् तसकं वाः वंगु दु। उकिया कारणं खुँसि बाः वंगुलि खुँसि सिथय् च्वपि व करिडोरया सतक छ्यले बिचाः यायेत बाढी पूर्वानुमान महाशाखां धाउगु दु।

“मदिक्क वाः वंगुलि स्वनिगःया थीथी थाय् मनोहरा, गोदावरी खुँसिइ, वाग्मती, बिष्णुमती जलाधारय् यक्को थासय् यक्को वाः वंगु दु,” महाशाखां थौं सुथय् ५ बजे छगु सूचं जारी यासे  धाःगू दु, “दक्को खँुसिइ जलसतह अप्पोगु दु, मनोहराय् जलसतह सतर्कता जःखः थ्यनेफु।

मेगु ३ घण्टा खुँसि सिथय् वनेत तसकं सतर्कता अपने याये।” अथेहे, देय् या थीथी थासय् थौं सुथंनिसे मदिक्क वाः वयाच्वंगु दु। थौं सुथय् गण्डकी व लुम्बिनी प्रदेशय् न वाः वयाच्वंगु दु।

वइगु प्रतिनिधिसभा व प्रदेशसभा सदस्य निर्वाचनया लागि थौंतक थीथी ४० राजनीतिक दलं दल दर्ता याये धूकुगु दु।

नेकपा (एमाले), लोकतान्त्रिक समाजवादी पार्टी (लोसपा), नेकपा (एकीकृत समाजवादी) लगायत दलपिन्स वइगु निर्वाचनय् भाग कायेत दल दर्ता याये धूकुुगु दु धका आयोगं धाःगू दु।

आयोगं प्रतिनिधिसभा व प्रदेशसभा सदस्यया न्हापां निर्वाचित जुइगु प्रणाली व समानुपातिक निर्वाचन प्रणालीपाखे निर्वाचनय् ब्बति कायेगु निति थ्व हे साउन २२ निसे ३१ गते तक दल दर्ताया लागि आह्वान याःगू खः।

सार्वजनिक बिदाया दिं न आयोगया कार्यालय खुल्ला जुइगु व निर्वाचन नाप सम्बन्धित ज्या नियमित रूपं सम्पादन जुइ धका धाःगु दु।

थ्व हे साउन १९ गतेतक आयोगय् दर्ता कायम जूपि राजनीतिक दलं वइगु प्रतिनिधिसभा व प्रदेशसभा सदस्य निर्वाचनय् ब्बति काये दइगु जूगुलि आयोगय् दल दर्ता यायेमाः।

सुन्दरीजलया खुँसिइ कुतुवना बेपत्ता जूम्ह छम्हेसित प्रहरीं उद्धार याःगू दु।

शनिबाः न्हिनय् २ः३० बजे सुन्दरीजलया खुँसिइ चूलुया कुतुवःम्ह छम्हेसित प्रहरीं उद्धार याःगू दु धका जिल्ला प्रहरी परिसर काठमाडौया प्रहरीं धाःगू दु।

प्रहरीं वयात खुँसि सिथय् ल्ह्वंतय् थाना च्वंगु अवस्थाय् लूइकुगु खः। घटनास्थलय् स्थानीय, नेपाल प्रहरी व नेपाली सेनाया टोलीपि न खटे जूगु खः।