येँ महानगरपालिकाय् ईन्जिनियर, डाक्टर व नर्स तयेगु तयारी याउगु दु।

महानगरं ३२ म्ह ईन्जिनियर, २५ म्ह डाक्टर व २५ म्ह नर्स करारय् तयेगु तयारी याउगु दु धका छम्ह कार्यपालिका सदस्यं धाउगु दु।

थौंया कार्यपालिका बैठकय् उगु एजेण्डा पास यायेत मेयर बालेनं तयारी दुगु तर फोहोरया एजेण्डाय् जक छलफल यायेगु धका कार्यपालिका सदस्यपिन्स सः तयेवं करारय् कर्मचारी तयेगु ऐजेण्डा रोके जूगु दु।

थौं कार्यपालिकाय् १३ गु एजेण्डामध्ये फोहोर व्यवस्थापनया ऐजेण्डाय् जक छलफल जूगु खः।

प्रमुख प्रतिपक्ष दल नेकपा एमाले न प्रतिनिधि सभा व प्रदेश सभा निर्वाचन तयारी नाप सञ्चालनया लागि केन्द्रीय निर्वाचन परिचालन कमिटी गठन याउगु दु।

केन्द्रीय कार्यालय च्यासलय् थौं बिहीवाः च्वंगु सचिवालयया बैठकं अध्यक्ष केपी शर्मा ओलीया संयोजकत्वय् केन्द्रीय निर्वाचन परिचालन कमिटी गठन याउगु खः।

परिचालन कमिटीइ केन्द्रीय कमिटीया दक्को सदस्य नाप केन्द्रीय निकाय व आयोगया पदाधिकारी, जनसङ्गठनया अध्यक्ष व महासचिव नाप पार्टीया प्रदेश कमिटी अध्यक्ष, केन्द्रीय विभागया सचिव दइगु कथं गठन जुगु धका प्रचार विभाग प्रमुख पृथ्वीसुब्बा गुरुङं जानकारी बिउगु दु।

बैठकं भदाया ७ गते स्थायी कमिटी, ९ गते पोलिटब्युरो व ११ गते केन्द्रीय समितिया बैठक सःत्येगु निर्णय जूगु दु।

सत्ता गठबन्धनं सिट बाँडफाँटया लागि दयकूगु कार्यदलया थौं बिहीवाः च्वंगु बैठकं छु न निष्कर्ष पिहा मवःगु दु।

प्रधानमन्त्री निवास बालुवाटारय् च्वंगु बैठकय् नेकपा माओवादी केन्द्र, नेकपा एकीकृत समाजवादी व जनता समाजवादी पार्टी न २०७४ सालया लिच्वःया आधारय् सिट भागबन्डा यायेमाः धका धाउगु खः।

तर नेपाली कांग्रेसं धाःसा पालिका चुनावया लोकप्रिय मतया आधारय् सिट बाँडफाँट यायेमाःगु अडान कायेवं बैठक निष्कर्षय् थ्यकेमफुगु खः। थौंया बैठकय् सिट बाँडफाँटया मोडालिटीइ छलफल व सैद्धान्तिक रूपं सहमति जूग्ु खः।

चुनावय् तालमेलया लागि सिट बाँँडफाँटयात टुङ्गे यायेत सत्ता गठबन्धनं ११ म्ह सदस्यीय कार्यदल दयकूगु खः।

येँया रामशाहपथय् च्वंगु न्याय परिषद सचिवालय थौं बिहीबाः तोडफोड याउगु दु।

गोरखाय् छेँ दुम्ह नुरप्रसाद अधिकारीं सचिवालयया कम्प्युटर व झ्याःया न्ह्याकं तोडफोड याना बिउगु दु धका सचिवालयया कर्मचारीं धाउगु दु। जिल्ला अदालत ललितपुरं अधिकारीयात उपस्थित जुइत म्याद जारी याउगु खः।

न्याय परिषदया प्रवक्ता मानबहादुर कार्कीय कथं  अधिकारी थःत म्याद जारी यायेत न्यायाधीशयाके कारबाहीया माग कया परिषदया सचिवालय वःगु खः।

परिषदया कर्मचारीं अथे कारबाही याये मज्यू धका धायेवं अथे तोडफोड याउगु खः।

वंगु २४ घण्टाया दुने देयन्यक थप ८१५ म्हेसित कोरोना संक्रमित जूगु दु। अथेहे कोरोना संक्रमणं न्याम्ह सीउगु दु धका स्वास्थ्य तथा जनसंख्या मन्त्रालयं धाउगु दु।

मन्त्रालयया कथं ४ हजार ५३४ म्हेसिगु परीक्षण यागुलि ८१५ म्हेसित संक्रमण पुष्टि जूगु खः।देयन्यक २ हजार ४११ म्हेसिगु पीसीआर परीक्षण याउगुलि ४६५ म्ह व २ हजार १२३ म्हेसित एन्टिजेन परीक्षण याउगुलि ३५० म्हेसित संक्रमण जूगु दु धका मन्त्रालयं धाउगु दु।

स्वास्थ्य मन्त्रालयया कथं दकलय् अप्पो येँ १८३ म्हेसित कोरोना सक्रमण जूगु दु। अथेहे, कास्कीइ ६८, यलय् ५९ व कैलालीइ ३५, रुपन्देहीइ २०, संखुवासभाय् १५ व सुनसरीइ १० म्हेसित कोरोना संक्रमण पुष्टि जूगु दु।