कृषि नापं वन विज्ञान विश्वविद्यालयया कार्यकारी परिषदं स्वम्ह डीन व छम्ह निर्देशक नियुक्त याःगु दु ।

विश्वविद्यालयया उपकुलपति प्राडा शारदा थपलियाया कथं कृषि सङ्कायकय् अर्जुनकुमार श्रेष्ठ, भेटेनेरी सङ्कायकय् प्रा डा भूमिनन्द देवकोटा व वन सङ्कायकय् प्रा वासुदेव पोखरेल नियुक्त जुयादीगु खः।

परिषदं प्राडा निराजन भट्टराईयात अनुसन्धान निर्देशक कथं नियुक्त याःगु खः। विश्वविद्यालयकय् १० म्ह निर्देशक तय्गु दरबन्दी दु।

मधेश प्रदेश सभाय् प्रदेशया सरकारी कामकाजया भाषा सम्बन्धया व्यवस्था यायेत दयेकुगु विधेयक, २०८१ या प्रस्ताव सदनय् पेश याःगु दु।

शिक्षा व संस्कृति मन्त्री रानीकुमारी शर्मा तिवारी सदनय् उगु विधेयक पेश याःगु खः। बैठकय् पेश याःगु विधेयक यात कयाः छलफलया निति प्रस्तुत याःगु दु। विधेयकय् मधेशया सरकारी कामकाजया भाषा नेपाली भाषाया अतिरिक्त मैथिली, भोजपुरी, बज्जिका, हिन्दी व अंग्रेजीयात दुथ्याकिइगु जुगु दु।

विधेयकया दफा २ या उपदफा (ख)य् सरकारी कामकाजया भाषा धइगु ‘मधेश प्रदेशया सरकारी कार्यालयलय् लिखित वा मौखिक कथं प्रयोग जुइगु नेपाली भाषाया अतिरिक्त मैथिली, भोजपुरी, बज्जिका, हिन्दी व अंग्रेजी कथं न्ह्यथंनातःगु दु।

नेपालभाषा साहित्यकार नाप नेवाः देय् दवूया सल्लाहाकार त्रिरत्न शाक्य मन्त।

वयकः म्हिगः बहनि १० बजे जुया ४० मिनेटय् मदुगु खः।

प्रधानमन्त्री केपी शर्मा ओलीं सुचं व प्रविधिया ग्वाहालिं छेँ च्वनाः छन्हुं हे कम्पनी व भ्याट दर्ता थेंजाःगु ज्या याये फइगु प्रणालीया विकास यायेगु धकाः धयादीगु दु।

प्रधानमन्त्री निवास, बालुवाटारय् थौं सुचं प्रविधि ख्यःया उद्यमी व विज्ञतलिसे सहलह यानादिसें प्रधानमन्त्री ओलीं आःया ई सुचं व प्रविधिया ई जुगुलिं थुकियात थुइकाः ज्या यायेमाः धइगु खँय् थःम्हेसिनं न्हापांनिसें हे कुतः याना वयाच्वनागु खँ ध्वाथुइकादिल।

उगु ज्याझ्वलय् ब्वति काःपिं उद्यमी व विज्ञतय्सं सरकारं आः नकतिनि धइ थें हःगु अध्यादेशय् नेपाःमितय्सं सुचं प्रविधि ख्यलय् अन्तर्राष्ट्रिय कम्पनी चायेके फइगु व लगानी स्वदेश व विदेशय् कालबिल जुइगु कथं सहजीकरणया व्यवस्था जुगुलिं थःपिंत लसता जूगु धयादिसें प्रधानमन्त्री ओली व सरकारयात सुभाय् बियादिल।

परराष्ट्रमन्त्री डा आरजु राणा देउवां संयुक्त राज्य अमेरिकाया ७२ क्वःगु विदेशमन्त्रीइ मार्को रुबियो नियुक्त जुयादीगुलिं भिंतुना बियादीगु दु।

सामाजिक सञ्जाल एक्सपाखें वय्कलं नवनियुक्त अमेरिकाया समकक्षी रुबियोयात भिंतुना बियादीगु खः।परराष्ट्रमन्त्री देउवां भिंतुना बियादिसें नेपाः व अमेरिका दथुइ स्वापूयात अझ क्वातुका यंकेत विदेशमन्त्री रुबियोनाप मंकाः ज्या यायेत थः न्ह्याबलें तयार दु धका एक्सय् न्ह्यथनादीगु दु।

नवनियुक्त अमेरिकी विदेशमन्त्री रुबियो फ्लोरिडाया राज्यसभा दुजः खः। ५३ दँ दुम्ह वय्कःया नियुक्तिया प्रस्तावयात सिनेटपाखें ९९ गू मतं अनुमोदन याःगु खः। वय्कःयात विदेशमन्त्री नियुक्ति यायेत राष्ट्रपति डोनाल्ड ट्रम्पं न्ह्यब्वगु प्रस्तावया विपक्षय् छगू मत नं मवःगु अन्तरराष्ट्रिय सञ्चारमाध्यमं धाःगु दु।