देवदास मानन्धरं यानादीगु थीथी ज्यायात लुमंकाः लक्ष्मीदास मानन्धर स्मृति प्रतिष्ठानं येँया नेपाः बैक्वटय् देवदास मानन्धर लुमन्ति पुथि उलेज्या याःगु दु।

नेपालभाषा एकेडेमिया नायः मल्ल के. सुन्दरया मू पाहाँसुइ जूगु ज्याझ्वलय् नेवाः न्ह्यलुवाः साहित्यकार हितकरबीर सिं कंसाकार लिसें आपालं नेवाः न्ह्यलुवापिं पाहाँ कथं उपस्थित जुुगु खः।

ज्याझ्वलय् देवदास मानन्धरया जहान सरोज मानन्धरं लसकुस यानादिगु खः।ज्याझ्वलय् लुमन्ति पुथि च्वसु च्वयादिपिं १६० म्हसित सुभाय् पौ व लुमन्ति पुथि पिकायेत विशेष ग्वाहालि यानादीपिं खुम्हसित लुमन्ति चिं लः ल्हाःगु खः।

लक्ष्मीदास मानन्धर स्मृति प्रतिष्ठानया नायः नारायणदास मानन्धरया सभापतित्वय् जूगु ज्याझ्वलय् लुमन्ति पुथि सुफूया सम्पादक बिष्णु चित्रकारं सफूयात कयाः थःगु नुगः प्वंकादीगु खः।

गोरखापत्र संस्थानया सम्पादक सल्लाहकार उपेश महर्जनयात आइतबाः बिदाई ज्याझ्वः याःगु दु। २०८० जेष्ठ १२ गते च्वंगु मन्त्रिपरिषदया बैठकं वय्कःयात सम्पादक सल्लाहकार नियुक्त याःगु खःसा वय्कःया निदँया कार्यकाल पूवंकाः बिदाई याःगु खः।

विदाई ज्याझ्वलय् संस्थानया कार्यकारी अध्यक्ष विष्णुप्रसाद सुवेदी व महाप्रबन्धक लालबहादुर ऐरीं वय्कःयात मतिनाया चिं लःल्हाःगु खः। वय्कःयात संस्थानया प्रकाशन प्रमुख व विभागीय प्रमुख लगायत सहकर्मीपिन्सं नं बिदाई याःगु खः। सम्पादक सल्लाहकार महर्जनं संस्थानया पत्रकार व सम्पादक सल्लाहकारया रुपं १७ दँ १० ला व २७ न्हु तक सेवा यायेगु अवसर चूलाःगु खँ कनादिल।

गोरखापत्रनापया घनिष्ठ स्वापू सदां दयाच्वनीगु विश्वास प्वंकादिसें वय्कलं गोरखापत्र छगू ऐतिहासिक संग्रहालय व नेवाः पत्रकारिताया विद्यालय जूगु उल्लेख यानादिल।

गोरखापत्र दैनिकया कार्यवाहक प्रधान सम्पादक जुनारबाबु बस्नेत, डिजिटल प्रमुख नारद गौतम, योजना विभाग प्रमुख भगीरथ बस्नेत व गोरखापत्र संस्थान नेपाल राष्ट्रिय कर्मचारी संगठन २०६३ का सभापति विष्णुप्रसाद खनालं सम्पादक सहकार्य व वयागु सल्लाहकार सहकार्यया बारे चर्चा यानादीगु खः।

प्रधानमन्त्री केपी शर्मा ओली व सत्तारुढ दल नेपाली कांग्रेसया सभापति शेरबहादुर देउवा दथुइ नापलायेगु ज्या जुगु दु।

सिंहदरबारय् सत्तारुढ दलया शीर्ष नेतापि लिसे सहलह जुइ धुका बालुवाटारय् ओली–देउवा दथुइ नापलायेगु ज्या जुगु खः। समसामयिक राजनीति लगायतबारे सहलह जुगु दु धका स्रोतं धाःगु दु।

ओली प्रधानमन्त्री लिसें नेकपा (एमाले)या अध्यक्ष केपी शर्मा ओलीं स्थानीय तहया निर्वाचित वडाध्यक्षं जनता व पार्टीलिसे घनिष्ठ स्वापू बल्लाकाः विकास व सुशासनया नितिं ज्या यायेमाः धका धयादीगु दु।

आइतबाः नेकपा (एमाले)या बागमती प्रदेशस्तरय् निर्वाचित वडाध्यक्षपिन्त प्रशिक्षण ज्याझ्वःया उलेज्या यासें अध्यक्ष ओलीं निर्वाचित नगर मेयर, उपमेयर व मेमेगु दलपि नाप विकास व सुशासनया लिसें जनतालिसे बांलाःगु स्वापू कायम यानाः ज्या यायेत इनाप यानादिल। “छितः पार्टीं निर्वाचित यानाः जिम्मेवारी कयादीगु दु।

चुनाव त्याके धुंकाः छिं पार्टीलिसेया स्वापू भुतुमालीया सुका थे त्वाःथले थें त्वाःथले मजिउ । जिं त्यात धकाः धायेमफु, जिगु मेगु छुं स्वार्थ मदु। मेगु चुनाव जुइ। उकिं आः छिं पार्टीया नीति व निर्देशनयात पालना यायेमा।” ओलीं धयादी, “थ्व पार्टी वास्तविक लोकतन्त्रया निंतिं गठन जूगु खः।“

प्रधानमन्त्री ओलीं पार्टीयात कम्युनिष्टया रुपय् एकीकरण यानाः पार्टीया थ्यंमथ्यं निगू तिहाइ थ्यंगु नेकपां विभाजनया अपराध यानाः एमालेया देय् निर्माणया अभियानयात पनेगु कुतः यानाच्वंगु टिप्पणी यासें एमालेयात आन्तरिक व विदेशी शक्तिं याःगु आक्रमण गुम्हेस्यां थःत देय् विरुद्ध दयेके बीमखु धकाः धयादिल।“उपिं धाथें कम्युनिष्ट मखु, उमिसं मेपिनिगु विरोध मयासे एमालेया विरोध जक याइ, अले वामपन्थीत एकता जुइमाः धाइबलय् झी गुलिखे पासापिन्त गलत थुइका च्वंगु दु ।“

माधव व झलनाथं पार्टी प्रमुख जुया च्वंगु इलय् प्रभावकारी रुपं पार्टी चले याये मफुत । प्रक्रियावादी तय्सं झीलिसे ल्वायेगु कुतः याःगु दु, झीसं थ्व खँय् सचेत जुइमाः, आपसी द्वन्द्व व विवादया प्रवृत्तिइ लायेमते झीसं थ्व खँ जनतायात थुइकेमाः।”

भौतिक पूर्वाधार लिसें यातायातमन्त्री देवेन्द्र दाहालं येँया ग्वार्काेय् दयेका च्वंगु फ्लाईओभरया ज्या थ्वहे जेठय् दुने पूवनीगु धयादीगु दु।

थौं सुथय् फ्लाईओभर निर्माण क्षेत्रया स्थलगत निरीक्षणया झ्वलय् वय्कलं ल्यंगु ज्या याकनं क्वचायेकेत निर्माण कम्पनीयात निर्देशन बियादिल। जेठ जःछिं निर्माण सिधय्वं फ्लाईओभरं सवारीसाधन सञ्चालनया तयारी यायेगु वय्कलं धयादिल। “आः नं लिबाकेगु छुट मदु”, मन्त्री दाहालं धयादिल, “परिस्थिति पिनेया प्राकृतिक विपद् मवःसा जेठया लिपांगु दिं तकया दुने सवारीसाधन सञ्चालनया तयारी यायेमाः। थ्व छगू पियाच्वनागु आयोजना जूगुलिं याकनं सञ्चालन यायेमाः।”

फ्लाईओभर अन्तर्गत ३५ मिटर स्पानया प्यंगूलेन प्रिकाष्ट ग्रिडर पुलनापं एप्रोच सतक लिसें पिच निर्माण ज्या जुयाच्वंगु दु। फ्लाईओभरय् ट्राफिक लाइट जडानया ज्या नं जुइ त्यंगु दु। अनुगमनया झ्वलय् मन्त्रालयया सचिव केशवकुमार शर्मां निर्माणया झ्वलय् छुं प्राविधिक समस्या खने दूगु धयादिसें उगु समस्या ज्यंकेधुंकूगु धयादिल।

सडक विभागया महानिर्देशक रामहरि पोखरेलं राजधानीया सवारी व्यवस्थापनया निंतिं ग्वार्काे फ्लाईओभर महत्वपूर्ण योजनाया कथं जगुलिं थुकियात प्राथमिकता बियाः पूवंकेमाःगु बिचाः तयादिल। सडक विभागया गुणस्तर अनुसन्धान लिसें विकास केन्द्रया प्रमुख दिप बराहीया कथं भौतिक पूर्वाधारया प्रमुख ज्या सिधयेधुंकूगु दुसा आः माःगु ब्वय् पिच यायेगु ज्या जुयाच्वंगु दु ।