नेपालय् अमेरिकाया ग्वहालि याइगु संस्था ‘मिलेनियम च्यालेन्ज कर्पोरेसन’ (एमसीसी) अन्तर्गतया परियोजना स्थगित जूगु दु।

नेपाल सरकारयात थुकिया बारे फागुन २ गते इमेल छ्वया अर्थ मन्त्रालययात जानकारी ब्यूगु खः। उकिइ अमेरिकी सहायता संस्था मिलेनियम च्यालेन्ज कर्पोरेशन (एमसीसी) पाखे नेपालय् सञ्चालित मिलेनियम च्यालेन्ज एकाउन्ट (एमसीए) नेपाःया ज्याझ्वः स्थगन जुगु जानकारी ब्यूगु खः।

अर्थ मन्त्रालयं विज्ञप्ती पिकया स्वलाया निति एमसीए नेपालय् ज्याझ्वः स्थगित जूगु औपचारिक जानकारी ब्यूगु दु।

थौ ७५ प्रजातन्त्र दिवस । देयन्यक थीथी ज्याझ्वः याना प्रजातन्त्र दिवस हनेत्यःगु दु। सरकारी व देयन्यक स्वेच्छिक कथं थीथी ज्याझ्वः याना हनेत्यःगु खः।

विसं. २००७ सालय् क्रान्ति सफल जुगु १०४ दँ ताहाकःगु  निरंकुश राणाशासन अन्त्य याना प्रजातन्त्र स्थापना जुगु लुमन्ती दँय् दँसं फागुन ७ गते प्रजातन्त्र दिवस हनावया च्वंगु खः।

सञ्चार लिसे सूचना प्रविधिमन्त्री नापं नेपाल सरकारया प्रवक्ता पृथ्वीसुब्बा गुरुङं सरकारं हःगु अध्यादेश निगुलि हे सदनपाखे पारित जुइ धका धाःगु दु। वयकलं दक्को राजनीतिक दलया सहमतिइ अध्यादेश पारित जुइ धका धयादीगु दु।

मंगलवाः लमजुङ सदरमुकाम बेसीसहरय् न्हापागु कासा नाप सांस्कृतिक महोत्सवया उलेज्या यानादीसे सरकारं हःगु अध्यादेश ६० दिं दुने निगुलि हे सदनपाखे पारित जुइ कथं न्ह्यावनिइ धका धयादीगु खः। मन्त्री गुरुङं धयादीगु दु, “वर्तमान सरकारं हःगु अध्यादेश लोक कल्याणकारी जुगुलि पारित जुइ।

न्हापानिसे पुलागु कानुन आः न्ह्याना च्वंगु ई कथं न्ह्याकेत थाकुगुलि न्हुगु कानुनया निति अध्यादेश हयागु खः। सूचना प्रविधि, शिक्षा, सुशासन व सहकारी ख्यलय् सुधार यायेत माःगु खने दु। थ्व अध्यादेशं उगु समस्यायात चिइका जनभावना कर्थ ज्या यायेफइ व देशय् समृद्धि वइ।” धका धयादीगु खः।

प्रधानमन्त्री केपी शर्मा ओलीयात नेपाल संस्कृत विश्वविद्यालयया जग्गा खोजबिन समितिं थौ थःपिनिगु प्रतिवेदन लःल्हागु दु। प्रधानमन्त्री निवास, बालुवाटारय् उगु समितिया संयोजक शेखरप्रसाद पौडेलं विश्वविद्यालयया आःयागु जग्गा उपयोग, अतिक्रमणया अवस्था व अतिक्रमण चिइकेत ल्ह्वनेमाःगु ज्याया विषय सुुझाव नाप प्रतिवेदन कुलपति ओलीयात लःल्हागु खः।

नेपाल सरकार (मन्त्रीपरिषद्) न वंगु असार २० गतेया निर्णयपाखे उच्च अदालतया पूर्व न्यायाधीश पौडेलया संयोजकत्वय् न्याम्ह दुजः दुगु जग्गा खोजबिन समिति गठन याःगु खः। समितिं दाङय् दुगु विश्वविद्यालयया १ हजार ६ सय ६२ बिगाहा जग्गा दुगु  व देउखुरी क्षेत्रय् १ हजार ३ सय ३६ बिगाहामध्ये ९ सय १० बिगाहा अतिक्रमण जुगु २०५९ निसे उगु जग्गापाखे विश्वविद्यालयं छु न आम्दानी मयागु खनेदु धका धाःगु दु।

संयोजक पौडेलं जग्गायात माःगु कथं हया बालं बिइफइगु व अतिक्रमण चिइकेत सरकार व राजनीतिक दलया ग्वहालि दइगु कथं सुझाव ब्यूगु दु।  प्रधानमन्त्री ओलीं प्रतिवेदन लःल्हाना कयादीसे अध्ययन व सहलह याना माःगु प्रक्रिया न्ह्यने यकेगु भलसा बियादीसे विश्वविद्यालयय् तालं ग्वयातःगु व अतिक्रमण थे जाःगु अवाञ्छित क्रियाकलापयात दिकेमाःगुलि बः बियादीगु खः।

प्रतिवेदन लःल्हायत शिक्षा, विज्ञान लिसे प्रविधिमन्त्री नाप सहकुलपति विद्या भट्टराई न झायादीगु खः।

राष्ट्रिय समाचार समिति (रासस)या ६४ क्वःगु वार्षिकोत्सवया झ्वलय् ‘रासस मिडिया सङ्ग्रहालय समाचार बुलेटिन’ कक्ष सर्वसाधरण तय्गु निंतिं चायेकेत्यंगु दु।

कन्हय् फागुन ७ गते ग्वसाः ग्वयेत्यंगु वार्षिकोत्सव मूल समारोहया झ्वलय् बुखँ बुलेटिन सर्वसाधारण तय्गु निंतिं चायेकीगु राससया कार्यकारी अध्यक्ष धर्मेन्द्र झां धयादिगु दु। विसं २०१८ फागुन ७ गते रासस स्थापना जुसांनिसें आःतकया बुखँ बुलेटिनयात सङ्ग्रहालयकय् सङ्ग्रहित जुयाच्वंगु दु।

राससया महत्त्वपूर्ण सम्पत्ति व उपलब्धिया कथं दूगु बुखँ बुलेटिन पत्रकारिता ब्वनाच्वंपिं विद्यार्थी व मिडिया अध्येतातय्गु निंतिं चायेकेगु क्वःछिनागु धकाः कार्यकारी अध्यक्ष झां धयादिल। “रासस राज्यया संस्था जुगुलिं थुकिया बुलेटिन व बुखँ सामग्रीत राससया जक मखुसे फुक्क नेपाःमि तय्गु सम्पत्ति खः।

उगु बुलेटिन अध्ययन अनुसन्धान यायेगु ह्वःताः सकसित नं दयेमाः। उकिं राससया सञ्चालक समितिया २०८१ माघ २७ गते क्वःछ्यूगु कथं बुलेटिन कक्ष अध्ययन अनुसन्धानया निंतिं चायेकेत्यंगु खः,” वय्कलं धयादिल। रासस बुखँ बुलेटिन कक्षं मिडियाया अनुसन्धानय् च्यूताः तइपिं, आमसञ्चारया विद्यार्थीत व ज्या यानाच्वंपिं पत्रकार तय्त लाभ जुइगु नापं नेपालय् बुखँ ‘एजेन्सी’या विकासया सन्दर्भय् अध्ययन यायेत ग्वाहालि जुइगु राससया महाप्रबन्धक सिद्धराज राईं धयादिल।

भुखाचं राससया भवन दुनावयेधुंकाः गोदामय् लानाच्वंगु व जीर्ण जूगु बुलेटिनयात सङ्ग्रह यानाः राससया इतिहासयात जीवन्त दयेकेत व अभिलेखयात पाय्छि यानातय्त बुलेटिन कक्ष स्थापना जूगु महाप्रबन्धक राईं धयादिल। राससं नीप्यघौ हे राष्ट्रिय व अन्तरराष्ट्रिय महत्वया आधिकारिक व विश्वसनीय बुखँ सम्प्रेषण याना वयाच्वंगु दु।