प्रधानमन्त्री सुशीला कार्कीं सार्वजनिक खर्चय् मितव्ययिता कायम यायेत व सार्वजनिक कोषया प्रभावकारी नापं लिच्वः वयेक उपयोग यायेत निर्देशन बियादीगु दु । वय्कलं न्हूगु पुस्तां लःल्हाःगु समृद्धि, विकास, सुशासन, समानता व भ्रष्टाचारविहीन शासकीय प्रबन्धया सुनिश्चितता यायेत निर्देशन बियादिल।

आःया सरकार गठन जुइ धुंकाः पूवंगु कार्यप्रगतिया विवरण बिइत थौं ग्वसाःग्वःगु मन्त्री व सचिवतय्गु बैठकय् प्रधानमन्त्री कार्कीं वंगु भदौ २३ व २४ गतेया आन्दोलनया मर्म व भावना कथं लिच्वः वयेकेत मातहतया निकायतय्त निर्देशन बियादीगु वय्कःया सचिवालयं धाःगु खः।“

भ्रष्टाचार नियन्त्रण, सुशासन कायम व प्रभावकारी सेवा प्रवाहय् खनेदयेक सुधार जूगु दक्व नागरिकतय्सं तप्यंक अनुभूति याइकथं फुक्क मन्त्रालयतय्सं ‘ब्लुप्रिन्ट’ तयार यानाः कार्यान्वयन यानादिसँ”, प्रधानमन्त्री कार्कीं धयादिल, “निजी ख्यःया मनोबल थकयाः औद्योगिक वातावरणय् सुधार यायेत आवश्यक संवाद, सहजीकरण व सहकार्य यानादिसँ।” आम नागरिकय् सरकारप्रतिया भलसा अप्वयेकेत नापं निजामती कर्मचारी व सुरक्षाकःमितय्गु मनोबल थकायेगु उपायत नालेमाःगु लिसेंया १४ गू बुँदाया निर्देशन बियादिसें वय्कलं कर्मचारीतय्गु सरुवा बढुवा प्रणालीयात व्यवस्थित यानाः अनुमानयोग्य, पारदर्शी व न्यायोचित जुइकेगु उपाय नालेमाःगुलिइ बः बियादिल।

“आन्दोलनया झ्वलय् क्षतिग्रस्त संरचनाया क्षति नापं नोक्सानीया प्रतिवेदन थत्थें तयार यानाः पुनर्निर्माणया नीति व कार्ययोजना दयेकादिसँ”, प्रधानमन्त्री कार्कीं धयादिल, “भौतिक संरचना मेसिनरी औजार नापं उपकरणय् जूगु क्षतिं सेवा प्रवाह अवरुद्ध जुइके मबीत थत्थें खरिद वा वैकल्पिक सेवा प्रवाहया व्यवस्था यानादिसँ ।” निर्वाचनया वातावरण दयेकेत थःम्हं निर्वाचन आयोग, सुरक्षा निकाय राजनीतिक दल व मेपिं सरोकारवालातलिसे मद्दिक संवाद यानाच्वनागु जानकारी बियादिसें वय्कलं निर्वाचनया पूर्वतयारीया निंतिं थःथःगु भालाया ज्यायात चुस्त दुरुस्त रूपं सम्पादन यायेत निर्देशन बियादिल।

प्रधानमन्त्री कार्कीं दक्व मन्त्रालयतय्गु वार्षिक कार्ययोजना कार्यान्वयनया समीक्षा यानादिसें परम्परागत शैलीं दनाः न्हूगु मानकत स्थापना यायेत आवश्यक कुतः यायेगु सुझाः बियादिल। थःगु अध्यक्षताया अन्तरप्रदेश परिषद्लिसेंया दक्व परिषद् वा समितिया बैठकया निंतिं प्रबन्ध यायेत निर्देशन बिसें प्रधानमन्त्री कार्कीं नवनियुक्त मन्त्रीत व प्रदेशया मुख्यमन्त्रीतय् ब्वतिइ कूटनीतिक मामिलासम्बन्धी सहलह ग्वसाःग्वयेत नं ध्यानाकर्षण याकादिल। प्रदेशय् जनशक्ति व्यवस्थापनयात प्रभावकारी जुइकेमाःगु व स्वंगूलिं तहया सरकारदथुइया समन्वययात अझ प्रभावकारी जुइकेत आवश्यक ज्या यायेत निर्देशन बिसें वय्कलं धयादिल, “कानुनया शासन प्रत्याभूत यायेत फुक्क कथंया आपराधिक ज्याखँत नियन्त्रण यायेमाः।

थुकिइ छुं नं सम्झौता यानादीमते।” प्रधानमन्त्री कार्कीं अनावश्यक खनेदूगु संरचना खारेज यायेगु, स्वाकेगु लिसें लःल्हायेगु यानाः सार्वजनिक प्रशासनयात चुस्त दुरुस्त व उच्च उत्पादकत्वयुक्त दयेकेगु ज्या थत्थें न्ह्याकेत निर्देशन बियादिल। वय्कलं धयादिल, “छिकिपिं स्थायी सरकार खः। थःपिनिगु ज्ञान सीप अनुभवयात छ्यलाः कर्तव्य व उत्तरदायित्व पालना बांलाक हे यानादी।” 

राहदानी विभागं न्हिं द्वःछिपा राहदानी बिइगु धाःगु दु। विभागं म्हिगः सनिलंनिसें न्हिं (सार्वजनिक बिदाया दिं बाहेकं) राहदानी बिइगु धाःगु दु।

विभागं विद्युतीय राहदानी आपूर्तिया निंतिं न्हू आपूर्तिकर्तालिसें वंगु साउनय् खरिद सम्झौता यायेधुंकूगु व उगु सम्झौता कथं आः वइगु फागुन ११ निसें राहदानी सेवा न्ह्याइगु यानाः न्हू पूर्वाधार लिसें प्रणाली दयेकाच्वंगु म्हिगः पिथंगु विज्ञप्तिइ धयातःगु दु। न्हू आपूर्तिकर्ता व आःया आपूर्तिकर्ता दथुइ जुइगु सङ्क्रमणकालीन अवस्था (ह्याण्डओभर व टेकओभर) लिसें राहदानी पुस्तिकाया सीमित ल्याः व सेवाग्राहीया उच्च मागलिसेंया हुनिं राहदानी वितरणय् छुं समस्या जुयाच्वंगु विभागं धाःगु दु।

उगु ई तक राहदानीया अभाव जुइके मबीत माःगु पहल जुयाच्वंगु व मेगु सुचं पिहांमवःतकया निंतिं अत्यावश्यक जुपिं सेवाग्राहीं जक राहदानीया निंतिं आवेदन बिइत विभागं सकसितं इनाप याःगु दु। राहदानीया विषयय् अनधिकृत मनुतय् भरय् मच्वनेत, उजाःपिं मनुंत पाखें जुइफइगु ठगीपाखें सावधान जुयाच्वनेत विभागं ध्यानाकर्षण याःगु दु।

 राष्ट्रपति रामचन्द्र पौडेल कतारया दोहाय् जुइगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत कतार झायादीगुलिं वय्कःया अनुपस्थितिइ राष्ट्रपतिपाखें जुइगु ज्याया कार्यभार उपराष्ट्रपति रामसहायप्रसाद यादवयात बियाथकुगु दु।

राष्ट्रपति पौडेलं नेपाःया संविधानया धारा ६७ या उपधारा (२) कथं उगु इलय् राष्ट्रपतिपाखें जुइगु ज्या उपराष्ट्रपतिपाखें सम्पादन याइगु यानाः क्वःछिनादीगु राष्ट्रपतिया ज्याकुथिया प्रवक्ता प्रदीपकुमार कोइरालां पिथनादीगु विज्ञप्तिइ धयातःगु दु।

राष्ट्रपति पौडेल थ्वहे कात्तिक १७ निसें २० गते तक सम्मेलनय् ब्वति कायेगु निंतिं नेपाली प्रतिनिधिमण्डलया नेतृत्व यानाः थौं सुथय् दोहा झायादीगु खः।

येँ महानगरपालिका–८ जयवागेश्वरीया गायत्री मार्गय् च्वंगु खुगूगु शताब्दीया ऐतिहासिक ब्रम्हा देगलय् मूर्ति पुनः स्थापना याःगु दु। येँ महानगरपालिका सम्पदा लिसें पर्यटन समितिया कजि नापं वडा नं ८ या वडाध्यक्ष आशामान सङ्गत, महानगरपालिकाया नगर उपप्रमुख सुनिता डङ्गोलं थौं विधिपूवंकं पुजा यानाः उगु मूर्ति पुनःस्थापना यानादीगु खः।

खुगूगु शताब्दीइ दयेकूगु ऐतिहासिक ब्रम्हा देगःया मूर्ति वंगु पीदँ न्ह्यःनिसें प्रहरी वृत्त गौशालाय् तयातःगुलिइ थनिनिसें ब्रम्हा देगलय् पुनःस्थापना यानागु धकाः वडाध्यक्ष सङ्गतं धयादिल । वय्कलं धयादिल, “संरक्षणया अभावं मूर्ति पीदँ न्ह्यःनिसें गौशाला प्रहरी वृत्तय् तयातःगु खः। थौं जिमिसं मूर्तियात देगलय् पुनःस्थापना यानागु दु।”

येँ महानगरपालिका–८ या विश्वसम्पदा धलखय् सूचीकृत पशुपति लागा गायत्री मार्गय् लाःगु नितजाःगु देगलय् बाजं थानाः बग्गीलिसेंया ¥यालीं थौं मूर्तियात देगलय् पुनःस्थापना याःगु खः। खुगूगु शताब्दीइ निर्माण जूगु ब्रम्हाया उगु प्यपा ख्वापाया मूर्तिलिसेंया ऐतिहासिक देगः १९९० सालया तःभुखाय् न्ह्यः हे दुनावंगु व भ्वाभःजक दूगु देगलं मूर्तिनापं खुयायंकूगु व लिपा वना उगु मूर्ति धोबीखोलाय् लुइकूगु खः।

उगु मूर्ति पीदँ न्ह्यःनिसें गौशाला प्रहरी वृत्तय् तयातःगु वडाध्यक्ष सङ्गतं धयादिल। विसं २०७२ वैशाख १२ गतेया भुखाचं जीर्ण जूगु उगु देगःयात येँ महानगरपालिकाया प्रमुख बालेन्द्र शाहं पुनःनिर्माणया निंतिं शिलान्यास यानादीगु खः। ब्रम्हा देगलय् अप्पा, चा व सिँ छ्यलाः नितजाःगु प्यागोडा शैलीया देगः निर्माण याःगु दु।

प्रधानमन्त्री सुशीला कार्कीं झीगु देय् दयेकेगु भाला झी सकसियागु जूगु धयादीगु दु। प्रधानमन्त्री निवास बालुवाटारय् म्हिगः जूगु न्हय्गूलिं प्रदेशया मुख्यमन्त्रीलिसेया बैठकय् वय्कलं धयादिल, “झी सकलें जानाः देय् दयेकेगु खः।

झीसं भिंके मफुसा मेपिंसं भिंकः वइमखु। अथे जुयाः गुजाःगु समस्यात दु, सकलें जानाः ज्यंकेनु।”प्रधानमन्त्री कार्कीं थः राजनीतिक नेता मखूगु व परिस्थितिं थन थ्यंकाब्यूगु धयादिसें वंगु भदौ २३ गते न्ह्यःतकला थुजाःगु अवस्था वइ धकाः बिचाः तकं मयानागु धयादिल। जेनजीपिनिगु न्हापांगु माग भ्रष्टाचार नियन्त्रण, सुशासन न्यंकेगु व सामाजिक सञ्जालय् याःगु प्रतिबन्ध लिकायेगु जूगु धयादिसें वय्कलं आः वयाः थीथी कथंया जेनजीपिं खनेदूगु व सकसिया माग नं ब्यागलं ब्यागलं कथंया न्ह्यनेवयाच्वंगु धकाः धयादीगु वय्कःया सचिवालयं धाःगु दु।

“गुलिखय् जेनजी थन वयाः ततःधंगु खँ ल्हानाः वनी। गुलिखय् थन दुने सुम्क च्वनाः, पिहांवनाः मती वःवःथे नवाइ । न्ह्यागु हे जुसां झी हे सन्तानपिं खः”, प्रधानमन्त्री कार्कीं धयादिल, “सयेकाच्वंगु दु। गुलिसिनं ला परिपक्व खँ नं ल्हाइ। झिसंसिबें गुलिला उमिसं यक्वः स्यू।”प्रधानमन्त्री कार्कीं थःपिं प्रदेश सरकारलिसे मंकाःज्या यानाः हे न्ह्याः वनेगु धयादिसें संविधानं ब्यूगु परिधि दुने हे च्वनाः ज्या यायेगु धयादिल। संविधानं दयेकूगु संरचनायात हनेमाःगु वय्कःया धापू दु। “स्थायित्वया निंतिं निर्वाचित सरकार हे माः। निर्वाचन व राजनीतिक दल छगू संस्था मेगु नाप स्वानाच्वंगु दु।

राजनीतिक दल मदुसा थ्व व्यवस्था नं दइमखु। अथे जुयाः स्वतन्त्र विज्ञ धकाः नांजाःपिं नं चुनाव ल्वायेत दल दयेकाच्वन”, वय्कलं धयादिल, “जेनजीपिंत नं पार्टी चायेकाः चुनावय् ब्वति का व थःगु ऐजन्डा जनतापाखें अनुमोदन याकी धयागु दु। सुं सुं लँ तंपिं दुसा, सुं उग्र नं दु। उमिसं ईया संवेदनशीलता व अन्तरिम सरकारया सीमा थुइकेमाः।”निर्वाचनया वातावरण दयेकेगु सरकारया मुख्य प्राथमिकता जूगु धयादिसें प्रधानमन्त्री कार्कीं सुरक्षा निकायया निंतिं बन्दोबस्तीया फुक्क सामान व्यवस्था याये त्यनागु धयादिल। “प्रहरीया निंतिं माःग गाडी न्यायेगु प्रक्रिया न्ह्याये धुंकूगु दु।

जःला खःला देय्पिंसं नं सवारीसाधन बिइत्यंगु दु। छुं छुं मित्रराष्ट्रं आर्थिक ग्वाहालि यायेगु बचं ब्यूगु दु”, वय्कलं धयादिल। आन्दोलनय् क्षतिग्रस्त जूगु प्रहरीया ९० प्रतिशत संरचना स्थानीय जनतां हे दयेकाब्यूगु धयादिसें प्रधानमन्त्री कार्कीं थुकिं प्रहरीया मनोबल थकायेत व जनतानापया स्वापू अझं क्वातुकेत ग्वाहालि याःग धयादिल।प्रधानमन्त्री कार्कीं धयादिल, “थ्वसिबें नं तसकं प्रतिकूल अवस्थाय् नापं चुनाव जूगु दु। जेनजीपिंसं नं चुनाव जुइमाः व आःया हे अवस्थाय् यायेफइ धकाः धाःगु दु। दलपिं नापया संवादं अझं अप्वः चुनावया पक्षय् वातावरण दयावंगु तायेकागु दु।”

निर्वाचनयात माःगु १२० ताजि सामानतमध्ये ९० प्रतिशतसिबे अप्वः दूगु व ल्यंगु व्यवस्थापन यायेत्यनागु प्रधानमन्त्री कार्कीं धयादिल । आयोगं नं क्वःछिनातःगु इलय् हे चुनाव याकेफइगुलिं पूवंकं विश्वास ब्यूगु वय्कलं धयादिल।