राष्ट्रपति रामचन्द्र पौडेल कतारया राजधानी दोहाय् जुगु ज्याझ्वः ‘सामाजिक विकासया निति निक्वःगु विश्व शिखर सम्मेलन’ य् ब्बति कया थौ स्वदेश लिहावःगु जुगु दु।

राष्ट्रपति पौडेलं उगु सम्मेलनया मुख्य सत्रयात वंगु मंगलवाः सम्बोधन याःगु खः।

प्रधानमन्त्री सुशीला कार्कीं पूर्वराष्ट्रपति डा. रामवरण यादवयात नापलागु दु।

प्रधानमन्त्री निवास बालुवाटारय् म्हिगः थ्व हे वइगु फागुन २१ जुइत्यःगु चुनावया तयारी व राजनीतिक वातावरणया विषय खँ जुगु धका प्रधानमन्त्रीया प्रेस संयोजक रामबहादुर रावलं जानकारी ब्यूगु खः।

पूर्वप्रधानमन्त्री झलनाथ खनालं नेकपा एमालेया अध्यक्ष केपी शर्मा ओलीयात नापलागु दु।ओली नाप खँ ल्ह्यायेगु निति खनाल गुन्डु वःगु खः।

वार्तायाना खनाल नाप एकीकृत समाजवादीया नेतापि एमाले लिहात्यःगु धका स्रोतं धागु दु। नेकपा माओवादी केन्द्र नाप घटक पार्टी एकता यायेत एकीकृत समाजवादीया अध्यक्ष माधवकुमार नेपालं निर्णय यायेवं खनालनाप मेपि नेतापि असन्तुष्ट जुगु खः।

एकता प्रक्रिया हे अस्वीकार यानाच्वम्ह पूर्वप्रधानमन्त्री खनालयात थौ ओलीया सचिवालयं सहलह यायेगु निति गुन्डु सःतगु खः।माओवादीनाप एकता यायेत तयार मजुगु व ण्घनश्याम भूसालया नेतृत्वमा जुइगु प्रक्रियाय् न सामेल मजुसें रामकुमारी झाँक्री लगायत नेतापि निशर्त एमालेय् लिहावनेत  तयार जुगु खः।

सर्वोच्च अदालतं नेपाल विद्युत् प्राधिकरणया कार्यकारी निर्देशकपाखें हितेन्द्रदेव शाक्ययात चीकेगु निर्णय विरूद्ध दायर जूगु रिट निवेदनय् च्वयातःगु लिसः माग याःगु दु।

न्यायाधीश नृपध्वज निरौलाया इजलासं थौं कारण देखाउ आदेश जारी यासें न्हय्न्हुदुने च्वयातःगु लिसः माग याःगु खः। अदालतं अन्तरिम आदेश बिइगु वा मबिइगु धइगु विषय थ्व हे कात्तिक २१ गते निगुलिं पक्षयात सहलहया निंतिं सःतातःगु खः।

आदेशय् धयातःगु दु, “रिट निवेदनय् अन्तरिम आदेश तकं माग जूगुलिं बिचाः यायेबलय्, निवेदक व विपक्षी निगुलिं पक्ष तयाः सहलह यानाः अन्तरिम आदेश जारी जुइगु मजुइगु सम्बन्धय् लिच्वः थ्यकेत पाय्छि जुइगु खनेदूगुलिं उगु प्रयोजनार्थ मिति २०८२÷०७÷२१ गते सहलहया पेसी क्वःछिनाः उगु पेसीइ उपस्थित जुइत विपक्षीतय्त सुचं बियाः नियमकथं पेस याः।”

प्राधिकरणया निर्वतमान कार्यकारी निर्देशक शाक्यं सरकारं थःत गैरकानुनी रुपं पदं चीकूगु धासें थःत पुनर्बहाली यायेगु माग सोमबाः सर्वोच्चय् रिट निवेदन दायर यानादीगु खः। लिपांगु सरकारं प्यदँया निंतिं नेपाल विद्युत् प्राधिकरणया कार्यकारी निर्देशकय् नियुक्त याःगु खः। आःया सरकारं शाक्ययात सरुवा याःगु खः।

‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेगु झ्वलय् कतारया राजधानी दोहाय् झाया च्वनादीम्ह राष्ट्रपति रामचन्द्र पौडेललिसे संयुक्त राष्ट्रसङ्घया महासचिव एन्टोनियो गुटेरेसं थौं नापलानादीगु दु।

उगु झ्वलय् वय्कःपिं दथुइ कोपनहेगन प्रतिबद्धताया कार्यान्वयन, सामाजिक विकास, शान्ति, सामाजिक न्याय व दिगो विकासया मंकाः आज्जुइ थ्यंकेत विचारविमर्श जूगु राष्ट्रपतिया सञ्चारविज्ञ किरण पोखरेलं राससयात कनादिल। राष्ट्रपतिं कोपनहेगन प्रतिबद्धताया कार्यान्वयन, सामाजिक विकास, शान्ति, सामाजिक न्याय व दिगो विकासया मंकाः आज्जु पूवंकेत संयुक्त राष्ट्रसङ्घलिसे लिक्क च्वनाः नेपालं ज्या याइगु धयादिल।

राष्ट्रपति पौडेलं प्रतिनिधिसभा विघटन जुयाः वइगु फागुन २१ य् आम निर्वाचनया घोषणा जूगु नापं स्वतन्त्र व निष्पक्ष निर्वाचन पूवंकेत नेपालं ज्या यानाच्वंगु धयादिसें थ्व निर्वाचनं नेपालय् राजनीतिक निकास बिइगु लिसें सुशासन, विकास व समृद्धिया यात्रा सुनिश्चित याइगु भलसा प्वंकादिल।

नेपालं कार्बन उत्सर्जन तसकं म्ह्वः जक याःसां नं नेपाल जलवायु ह्यूपाःया बांमलाःगु प्रभावं प्रताडित जुयाच्वंगुलिं जलवायु ह्यूपाःया असरतय्गु न्यूनीकरण व अनुकूलनया निंतिं अन्तरराष्ट्रिय समुदायया ग्वाहालिया अपेक्षा यानाच्वंगु राष्ट्रपतिया धापू खः।