सङ्घीय सरकारया गृहमन्त्रालयस्तरीय निर्णय कथं प्रहरी वरिष्ठ उपरीक्षकपाखें प्रहरी नायब महानिरीक्षक पदय् पदोन्नति जूपिं न्याम्ह प्रहरी नायब महानिरीक्षक दज्र्यानी चिंपाखें सुशोभित जुयादीगु दु।

प्रहरी महानिरीक्षक चन्द्रकुबेर खापुङं सोमबाः नेपाल प्रहरी प्रधान ज्याकुथिइ ग्वसाः ग्वःगु छगू समारोह दथुइ वय्कःपिंत दज्र्यानी चिंपाखें सुशोभन यानादीगु खः। दज्र्यानी चिंपाखें सुशोभित जूपिंखय् प्रहरी नायब महानिरीक्षकय् भूपेन्द्रबहादुर खत्री, सानुराम भट्टराई, ओमप्रसाद अधिकारी, शेखर खनाल व अविनारायण काफ्ले जुयादीगु खः ।

समारोहय् प्रहरी महानिरीक्षक खापुङं दज्र्यानी चिंपाखें सुशोभन जुयादीपिं प्रहरी अधिकृतपिंत भिंतुना नापनापं कार्यकाल सुथां लायेमाः धकाः लसंहनादीगु खः। थःगु दक्षता, कार्यकुशलता, राष्ट्र, जनता व सङ्गठनयात याःगु योगदानया उचित मूल्याङ्कनया लिधंसाय् पदोन्नति जूगु धयादिसें वय्कलं परम्परागत सोचाइ व शैलीयात ई कथं हिलायंकाः थःथःगु थासं व्यावसायिक, इमानदार नापं कर्तव्यनिष्ठ प्रहरीया छवि दयेकेगु यानाः दृढतापूर्वक ज्या यायेत प्रहरी अधिकृतपिंत निर्देशन बियादिल।

प्रहरी महानिरीक्षक खापुङं आःया संवेदनशील इलय् प्रहरी कमाण्डरको भूमिका प्रशासनिक नेतृत्वय् जक सीमित मजुसें नैतिक, रणनीतिक व प्रेरणादायी जुइमाःगु न्ह्यथनादिसें न्हापा जूगु घटनाया विश्लेषण यानाः अझं परिष्कृत कथं उच्च मनोबल ज्वनाः जनसेवा प्रवाह यायेमाः धयादिल।

नापं आः वइगु दिनय् खनेदयेफइगु हाथ्यायात नुगलय् तयाः सुचं सङ्कलन, विश्लेषण, रणनीतिक समन्वय व प्रभावकारी प्रहरी परिचालनया प्राथमिकता बियाः प्रचलित कानुन कार्यान्वयनय् छुं नं कथंया सम्झौता मयायेत नापं वय्कलं सकल प्रहरी कर्मचारीयात निर्देशन बियादिल।

समारोहय् पदोन्नति जुपिं प्रहरी अधिकृतया पाखें प्रतिबद्धता न्वचू बियादिसें प्रहरी नायब महानिरीक्षक खत्रीें साङ्गठनिक अपेक्षा, भलसा व विश्वासयात तयाः सङ्गठनया गौरव व प्रतिष्ठा अप्वयेकेगु यानाः कार्यसम्पादन यायेगु प्रतिबद्धता प्वंकादिल।दज्र्यानी चिं सुशोभन समारोहय् प्रहरी अतिरिक्त महानिरीक्षकपिं, प्रहरी नायब महानिरीक्षक, वरिष्ठ प्रहरी अधिकृत लिसें प्रहरी अधिकृत नापं जवान पिनिगु उपस्थिति दूगु खः।

सरकारं ११गू देय्या नेपाली राजदूतपिंत परराष्ट्र मन्त्रालयय् हे च्वनाः ज्या यायेगु कथं लिहां वयेत पौ छ्वःगु दु। सरकारया निर्णयविरुद्ध आइतबाः सर्वाेच्च अदालतं अन्तरिम आदेश बिइ धुंकाः सरकारं थौं पौ छ्वयाः वय्कःपिंत लिहां वयेत धाःगु मन्त्रालयं धाःगु दु।

सकलें राजदूतपिंत मन्त्रालयय् हे सःतेत म्हिगः हे पौ छ्वये धुंकूगु मन्त्रालयया प्रवक्ता लोकबहादुर पौडेल क्षेत्रीं धयादिल। वंगु असोज ३० गते च्वंगु मन्त्रिपरिषदया बैठकं राजनीतिक नियुक्ति कयातःपिं ११ म्ह राजदूतपिंत थ्वहे कात्तिक २० गते दुने लित सःतेगु निर्णय याःगु खः।

सरकारया उगु निर्णय कानुन कथं मजूगु धासें सर्वाेच्च अदालतय् रिट लाःगु खः। उगु मुद्दाया प्रारम्भिक सुनुवाइ लिपा सर्वाेच्च अदालतं आइतबाः निर्णय कार्यान्वयन मयायेत अन्तरिम आदेश जारी याःगु खः।

नेपाःया नांजाःम्ह बरिष्ठ सिनेपत्रकार, च्वमि, निर्देशकलिसें भाषासेवी विजयरत्न असंबरेयात स्वास्थ्य उपचार यायेत आर्थिक ग्वाहालि म्हयेगु नितिं कार्तिक २१ गते शुक्रवाः सनिलया ४ः३० ता इलय् क्षेत्रपाति पार्टी प्यालेसय् मुँज्या च्वंनीगु जूगु दु।

थौं मंगलवाः विजयरत्न असंबरे म्हं मफयाच्वंगुलिं वय्कःया वासः यायेत आर्थिक ग्वाहालि मुंकेगु नितिं जूगु सहलह लिपा वइगु शुक्रवाः थीथी ख्यःयापिन्त ब्वनाः मुँज्या च्वनेगु खँ क्वःछ्यूगु खः।

क्षेत्रपातिइ थौं मंगलवाः जूगु सहलह मुँज्याय् नेवाः देय् दबूया नायः पवित्र बज्राचार्य, भाषा आयोगया दुजः सुरेश किरण मानन्धर, सुजीव बज्राचार्य, नेवाः पत्रकार राष्ट्रिय दबूया नायः नृपेन्द्रलाल श्रेष्ठ, नांजाःम्ह निर्देशकलिसें कलाकार सुरेन्द्र तुलाधर, सुरजबीर बज्राचार्य, राजीव राजोपाध्यायलिसें असंबरेया सतीपिं मुनाः वय्कःया स्वास्थ्ययात कयाः सहलह ब्याकूगु खःसा उगु सहलह लिपा आर्थिक ग्वाहालि म्हयेगु खँ क्वःज्यूगु खः।

थथे आर्थिक ग्वाहालि म्हयेगु नितिं “विजयरत्न असंबरे ग्वाहालि पुचः” नं नीस्वंगु दु। विजयरत्न असंबरे नुगःचु (मुटु) व जलस्यँे (किड्नी) सम्बन्धी ल्वचं कयाः वासः यानाच्वनादीगु दु । वय्कः छुं दिं न्ह्यः जक वीर अस्पतालय् भर्ना जुयाः वासः यानादीगु खःसा थौंकन्हय् वय्कः थःगु हे छेँ असनय् च्वनाच्वनादीगु दु।

निर्वाचन आयोगया कार्यवाहक प्रमुख निर्वाचन आयुक्त रामप्रसाद भण्डारीं देसय् निर्वाचनमय वातावरण दयेकेत सञ्चारमाध्यमया महत्वपूर्ण भूमिका जुइगु धयादीगु दु।

आयोगया ज्याकुथिइ थौं राष्ट्रिय समाचार समिति (रासस)या व्यवस्थापन व राससकःमिनाप आः वइगु फागुन २१ गतेया निंतिं क्वःछिनातःगु प्रतिनिधिसभा दुजःया निर्वाचनया सन्दर्भय् सहलह यासें कार्यवाहक प्रमुख आयुक्त भण्डारीं विकट क्षेत्रया हरेक पेसाया नागरिकतक खःगु सुचं थ्यंका निर्वाचनया महत्व व आवश्यकताबारे प्रचारप्रसार यायेत इनाप यानादिल।

“देसय् निष्ठापूर्वक निर्वाचन सम्पन्न जुइगु वातावरण सृजना यायेत व वहे कथं निर्वाचन जूगु सन्देश देस विदेसय् न्यंकेत रासस थें जाःगु समाचार समितिया अझं अप्वः भूमिका दइ। अथे जुयाः न्हापाथें हे रासस न्ह्यचिलिगु विश्वास आयोगं कयागु दु”, कार्यवाहक प्रमुख आयुक्त भण्डारीं धयादिल, “आःया निर्वाचन विशेष परिस्थितिया निर्वाचन जूगुलिं थ्व पक्षयात नुगलय् तयाः निर्वाचन तयारी, सुरक्षा, मतदाता शिक्षालिसें विषयय् सही बुखँ बिइत उतिकं आवश्यक दु।”

निर्वाचन आयुक्तपिं डा जानुकीकुमारी तुलाधर, सगुनशमशेर जबरा, आयोगया सचिव माहादेव पन्थलिसें नं ब्वति काःगु सहलहय् निर्वाचनयात स्वच्छ, निष्पक्ष, स्वतन्त्र व भयरहित वातावरणय् यायेगु सन्दर्भय् आयोग व रासस दथुइ मंकाः ज्या अप्वयेकेगु विषयय् सहलह जूगु खः ।

उगु झ्वलय् राससया महाप्रबन्धक सन्दीप राईं लोकतन्त्रया प्राणया कथं दयाच्वंगु निर्वाचनया वातावरण दयेकेत राससं थःगु थासं मदिक्क भूमिका म्हिता वःगु धयादिल।सहलहय् आयोगया सहसचिवपिं नारायणप्रसाद भट्टराई, यज्ञप्रसाद भट्टराई, राजेन्द्र केसी, राससया लेखाशाखा प्रमुख रुद्रमणि अधिकारी, प्रमुख समाचारदाता नारायणप्रसाद न्यौपाने, वरिष्ठ समाचारदाता प्रकाश सिलवाललिसेंया नं ब्वति दूगु खः।