राष्ट्रपति रामचन्द्र पौडेल कतारया राजधानी दोहाय् थ्वहे कात्तिक १८ गतेनिसें २० गतेतक जुइगु ‘सामाजिक विकासया निंतिं निक्वःगु विश्व शिखर सम्मेलन’य् ब्वति कायेत उखे झायादीत्यंगु दु।

कतारया अमिर शेख तमिम बिन हमद अल थानीया ब्वनाय् झिंनिम्ह दुजःया नेपाली प्रतिनिधिमण्डलया नेतृत्व यासें वय्कः सम्मेलनय् ब्वति कायेत सोमबाः उखे झायादीत्यंगु परराष्ट्र मन्त्रालयया सचिव अमृतबहादुर राईं धयादीगु दु । राष्ट्रपति पौडेलं कात्तिक १८ गते सम्मेलनया मुख्य सत्रयात सम्बोधन यानादीत्यंगु ज्याधलः दु। संयुक्त राष्ट्रसङ्घ, महासभाया निर्णयकथं जुइत्यंगु उगु सम्मेलन दुजः देय्या निंतिं तसकं महत्वपूर्ण जुइगु विश्वास यानातःगु दु।

भ्रमणया बारे जानकारी बिइत थौं मन्त्रालयय् ग्वसाः ग्वःगु पत्रकार सम्मेलनय् सचिव राईं स्विदँ लिपा जुइत्यंगु सम्मेलनया महत्व व गरिमाकथं नेपाःपाखें राष्ट्रपतिं ब्वति कयादीत्यंगु धयादिल। सम्मेलनया झ्वलय् राष्ट्रपति पौडेलं कतारया अमिर व संयुक्त राष्ट्रसङ्घया महासचिव एन्टोनियो गुटेरेसलिसें थीथी विशिष्ट व्यक्तित्वपिंनाप नापलानादीत्यंगु दु।

थ्व सिबें न्ह्यः उगु सम्मेलन सन् १९९५य् डेनमार्कया कोपनहेगनय् जूगु खः। थुगुसी कतारं सम्मेलन ग्वसाः ग्वःगु खः। सम्मेलनय् आःया विश्वं फयाच्वंगु विकास असमानता, जनसङ्ख्याय् वःगु असन्तुलन व प्रविधिया हुनिं समाजय् लाकूगु लिच्वः लिसें थीथी विषयय् थीथी कोणय् दुग्यंकं सहलह जुइगु धयातःगु दु। सम्मेलनं सामाजिक विकासया निंतिं मंकाः ज्या व ग्वाहालिया विषयय् मंकाः प्रतिबद्धता प्वंकीगु धयातःगु दु। सन् १९५५य् संयुक्त राष्ट्रसङ्घया दुजः जुइधुंकाः नेपाः शान्ति व स्थायित्वया निंंितं न्ह्याबलें सक्रिय व प्रतिबद्ध जुयाः वयाच्वंगु दु।

आः नेपाः राष्ट्रसङ्घया आर्थिक लिसें सामाजिक परिषद्या नायः जूगुलिं नं सम्मेलनय् ब्वति काइगु अर्थपूर्ण जू। कतारया औपचारिक भ्रमण क्वचायेकाः राष्ट्रपति पौडेल थ्वहे कात्तिक २० गते स्वदेश लिहांझाइगु मन्त्रालयं धाःगु दु।

सर्वाेच्च अदालतं अन्तरिम सरकारं राजदूतपिं लित सःतेत याःगु निर्णय तत्कालया निंतिं कार्यान्वयन मयायेत अन्तरिम आदेश ब्यूगु दु। न्यायाधिशपिं शारङ्गा सुवेदी व श्रीकान्त पौडेलया मंकाः इजलासं थौं राजदूत लित सःतेगु सम्बन्धी सरकारया निर्णय कायान्वयन मयायेत अन्तरिम आदेश ब्यूगु खः।

आदेशय् धयातःगु दु, “थीथी देय्या १७ म्ह आवासीय राजदूत मध्ये ११म्हेसित जक ल्ययाः व पदमुक्त यानाः लित सःतेगु निर्णय यायेबले उकिया आवश्यकता व औचित्य पुष्टि जुइगु छुं हुनिंनापं निर्णयय् न्ह्यथनातःगु मदु। न्ह्यब्वःगु निवेदन अन्तिम आदेश जुइगु ठहर जू कथं जुइगु जुयाः आःयात मन्त्रिपरिषदया २०८२ असोज ३० गते जूगु राजदूत लित सःतेगु सम्बन्धी निर्णय आःयात कायान्वयन यायेमते।” थ्वसिबें न्ह्यः, न्यायाधीश विनोद शर्माया एकल इजलासं थ्वहे कात्तिक ९ गते थ्व विषयय् लिखित लिसः माग याःगु खः। अदालतं निगूलिं पक्षया सहलह लिपा थौं अन्तरिम आदेश जारी यासें राजदूत लित सःतेगु निर्णय कायान्वयन मयायेत धाःगु खः।

अधिवक्ता प्रतिभा उप्रेतीं थ्वहे कात्तिक २ गते प्रतिनिधिसभा हे विघटन जूगु अवस्थाय् संसदीय सुनुवाइ जुइमफइगु जुयाः संविधान कथं राजदूत नियुक्ति जुइ फइगु अवस्था हे मदूगुलिं राजदूत लित सःतेगु सरकारया निर्णय गैरकानुनी जूगु न्ह्यथनाः उगु निर्णय बदरया मागलिसें रिट निवेदन दायर यानादीगु खः।

वंगु असोज ३० गते सरकारं कात्तिक २० गतेया दुने ११ म्ह राजदूतयात लित सःतेगु निर्णय याःगु खः । लित सःतुपिं राजदूतय् चीनया प्रा डा कृष्णप्रसाद ओली, जर्मनीया डा शैल रुपाखेती, इजरायलया प्रा धनप्रसाद पण्डित, मलेसियाया डा नेत्रप्रसाद तिमल्सिना, कतारया रमेशचन्द्र पौडेल, रुसया जङ्गबहादुर चौहान, साउदी अरबया नरेशविक्रम ढकाल, स्पेनया सनिल नेपाल, संयुक्त अधिराज्य बेलायतया चन्द्रकुमार घिमिरे, संयुक्त राज्य अमेरिकाया लोकदर्शन रेग्मी व जापानया डा दुर्गाबहादुर सुवेदी खः।

शेयर बजाः थौ निगु ल्याखं थहावःगु दु। शेयर बजाः परिसूचक नेप्से थौ ३० दशमलव ७५ ल्याखं थहावना २ हजार ६ सय ३१ दशमलव १४ विन्दुइ थ्यःगु दु।

थौ दक्को समूहया शेयर थहावंगुलि फाइनान्स समूहया शेयर ५ दशमलव १८, जीवन बीमा समूहया शेयर ४ दशमलव ३५ प्रतिशतं कुहावःगु दु।सामुदायिक लघुवित्त, गुर्खाज फाइनान्स, पञ्चकन्या माई हाइड्रोपावर, पिपुल्स पावर तेह्रथुम पावर कम्पनी, गुह्येश्वरी मर्चेन्ट बैंक एन्ड फाइनान्स कम्पनीया शेयर १० प्रतिशतं थहावःगु दु।

बजाः थहावंगु खःसा खानीखोला हाइड्रोपावर कम्पनीया शेयर दकलय अप्पो ४ दशमलव ७६ प्रतिशतं कुहावःगु दु।

वंगु बिहीवाः ७ अर्ब ५१ करोडया कारोबार जुगुलि थौ ३ सय १९ गु कम्पनीया २ करोड ९७ लाख कित्ता शेयर ९ अर्ब २० करोड तका यागु कारोवार जुगु दु।

सामाजिक सुरक्षा कोषय् आःतक मुक्कं ९४ अर्ब गुंगू क्वति छगू लख ७९ द्वः तका ज्वःया ध्यबा मुनेधुंकूगु दु। कोषं १७ अर्ब २९ क्वति ३० लख ५१ द्वः तका ज्वःया ध्यबाः योगदानकर्तायात भुक्तानी नापं याये धुंकूगु दु।

कोषय् मुक्कं २५लख ९२ द्वः सच्छि व ४१ छम्ह सूचीकृत योगदानकर्ताया कथं दुथ्यानच्वंगु दु। कोषय् २२ द्वः सच्छि व नीन्यागू सूचीकृत रोजगारदाता दुतिनाच्वंगु दु। रोजगारदातायात छसिकथं सूचीकृत यायेत कोषं माःगु पहल नापं यानाच्वंगु दु।कोषय् औषधी उपचार, स्वास्थ्य लिसें मातृत्व दावी ध्यबाः २ अर्ब ४२ क्वति ५० लख ८१द्वः तका दयाच्वंगु दु।

अथे हे, दुर्घटना लिसें अशक्तता सुरक्षा दावी ध्यबा २२ क्वति ३१ लख ६३ द्वः तका, आश्रित परिवार सुरक्षा दावी ध्यबा २८ क्वति ३५ लख ९७ द्वः तका व अवकाश दावी ध्यबा १४ अर्ब ३६ क्वति झिंनिगू लख च्याद्वः तका दयाच्वंगु दु।

नेकपा एमाले न युथ भोलेन्टियर फोर्सया घोषणा याःगु दु। थौ आइतवाः ख्वपया गुण्डाय् जनसंगठन समन्वय संयन्त्रं छगु विशेष भेलायासे युथ भोलेन्टियर फोर्सया घोषणा याःगु दु।

उगु ज्याझ्वलय् एमाले अध्यक्ष केपी शर्मा ओली व राधिका शाक्यया उपस्थितिइ ज्याझ्वः जुगु खः।युवा संघ नेपालया अध्यक्ष महेश बस्नेतं युथ भोलेन्टियर फोर्सया छु भचा आचार संहिता न दयकूगु खः।

पुष्प श्रेष्ठ, अमित पौडेललगायतं आःतक समन्वय याना च्वंगु खः। युवा संघ, भूपू सैनिक संगठन, एमाले भक्तपुर लगायत नेतातयेगु सुरक्षाया ज्या याना च्वंगु खः।