राष्ट्रपति रामचन्द्र पौडेलं निर्माणाधीन येँ–तराई–मधेस द्रुतमार्गया निरीक्षण यानादीगु दु।

व हे झ्वलय् वय्कलं आयोजनाया प्रगतिबारे सुचं कयादीगु राष्ट्रपतिया सचिवालयपाखें धाःगु दु। राष्ट्रपति पौडेलं आयोजनायात क्वछिनातःगु इलय् दुने क्वचायेके कथं ज्यायायेत निर्देशन बियादिल।

उगु आयोजना नेपाली सेनापाखे निर्माण यानाच्वंगु दु। येँ–यल–मकवानपुर जुयाः बाराया निजगढतक निर्माण जुइत्यंगु दु।

पूर्वपश्चिम राजमार्गय् स्वाइगु द्रुतमार्ग निर्माण धुंका मुलुकया विकासया निंतिं ग्वहालि जुइगु अपेक्षा याःगु दु।(रासस)

सर्वोच्च अदालत बार एशोसिएसनं थ्व हे माघ २ गते वरिष्ठ अधिवक्ता डा दिनेश त्रिपाठीयात जूगु भौतिक आक्रमण, ब्वः ब्यूगु नापं ख्याच्वः ब्यूगु खँय् ध्यानाकर्षण जूगु धकाः धाःगु दु।

एशोसिएसनया छ्याञ्जे रमणकुमार कर्णं थौं पिथंगु प्रेस विज्ञप्तिइ येँ जिल्ला अदालतय् न्ह्यानाच्वंगु सङ्गठित अपराध व ठगी मुद्दाय् थुन छेक बहस यानाः अदालतं पिहाँ वयेगु झ्वलय् जाहेरवालापाखें बहस याःगु आधारय् बहस पैरवीया बुँदा कयाः अराजक पुचलं थुगु बार एशोसिएसनया दुजः वरिष्ठ अधिवक्ता डा त्रिपाठीयात याःगु व्यवहारय् ध्यानाकर्षण वंगु धाःगु दु।

“कानुन बन्जाःपाखें थःगु प्रतिरक्षा याये दइगु हक नेपाःया संविधानं बियातःगु मौलिक हक खः। कानुन ब्यवसायीतय्त ल्हाः तयेगु, दायेगु नापं मेगु छुं कथंया भौतिक व मानसिक आक्रमण कानुन ब्यवसायीतय्त जक मखु स्वतन्त्र न्यायपालिका व मुक्कं संविधानयात हे जूगु सुनियोजित आक्रमण खः धइगु बार एशोसिएसनं काःगु दु”, विज्ञप्तिइ धयातःगु दु।

बार एशोसिएसनं थुगु घटना खंपिं, कयातःगु भिडियोत व उकिलिसे स्वापू दूगु प्रमाणयात तकं अनुसन्धानया लिधंसा दयेकाः निष्पक्ष व स्वतन्त्र अनुसन्धान यानाः दोषीतय्त तुरुन्त कानुनकथं कारबाही यायेत व भविष्यय् थजाःगु घटना मजुइमा धकाः उकिया आवश्यक प्रबन्ध याये याकेत गृहमन्त्रालयलिसें स्वापू दूगु निकायतय्त माग याःगु दु।

बारं थजाःगु घटनां स्वतन्त्र न्यायपालिकाया न्याय सम्पादन ज्यायात पनीगु व थजाःगु ज्या अदालतया अपहेलनाजन्य ज्या तकं जुगुलिं थुकिइ दक्वपक्ष नं संवेदनशील जुइमाःगु आवश्यक दु धकाः धयातःगु दु।

प्रधानमन्त्री केपी शर्मा ओलीयात नेपाःया निंतिं इजरायलया राजदूत स्मुलिक ए बासं नापलानादीगु दु।

प्रधानमन्त्री व मन्त्रिपरिषदया कार्यालयय् थौं न्हिनय् नाप लायेगु झ्वलय् वय्कःपि दथुइ निगू पक्षीय स्वापू व आपसी हितया थीथी विषय सहलह जूगु खः।

अथे हे सूचं प्रविधि, लगानी, पर्यटन, रोजगारी, कृषिया आधुनिकीकरण, शिक्षा व संस्कृतिलिसे पारस्परिक साझेदारीया खँय् नं खल्हाबल्हा जूगु प्रधानमन्त्रीया निजी सचिवालयंं धाःगु दु। उगु अवसरय् राष्ट्रियसभाया दुजः नापं इजरायलया निंतिं पुलांम्ह नेपाःया राजदूत डा अञ्जान शाक्य व परराष्ट्र मन्त्रालयया उच्च अधिकारी तय्गु न ब्बति दुगु खः।

संचारकःमि दिलिप शान्ती यज्जुया मां पुर्णदेबी खड्गी म्हिगः आकाझाका मन्त। अक्सिजन कम जुया अस्पताल यकिइगु झ्वलय् मदुगु खः।

७१ दँ दुम्ह खड्गी म्हिगः ९ः४५ बजे बहनि मदुगु खः। मदुम्ह खड्गीया खुम्ह काय् व छम्ह म्ह्याय् दी। पत्रकार दिलिप तःधिम्ह काय् खः। वयकः अन्त्यष्ठी थौ लुँतीइ जुगु खः

नेपाल विद्युत् प्राधिकरणं थौ यलय् थीथी थासय् साढे ६ घण्टा बिजुली कटौती याइगु जुगु दु।

प्राधिकरणं छगु सूचं प्रकाशित यासे मतया लठ्ठा हिलेमाःगुलि थौ सुथय् ९ः३ः बजे निसे न्हिनय् ४ बजे तक विद्युत् आपूर्ति बन्द जुइ धका धाःगु दु।

प्राधिकरणया कथं पूच्वो वितरण केन्द्रपाखे पूूच्वो फिडरअन्तर्गत लागु इटी, महापाल, पाटन दरबार, बङ्गलामुखी, शंखमूल, पाटनध्वका, मङ्गलबजाः, छवाः थासय् बिजुली कटौती याइगु जुगु दु।