वंगु २४ घण्टाया दुने देयन्यक ६६ म्हेसित कोरोना भाइरसया सङ्क्रमण पुष्टि जूगु दु।

पीसीआर व एन्टिजेन याना ३ हजार २ सय ६२ म्हेसिगु नमुना परीक्षण याउगुलि ६६ म्हेसित सङ्क्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

अथेहे १ सय ३७ म्ह कोरोना सक्रमणमुक्त जुगु दु।

लुँ तोलां थौं हाकनं न्यासः थहावंगु दु। थौं लुँ तोलां न्यासः थहावना ९१ हजार ८ सय रुपैयाँ थ्यःगु दु।

अथेहे, वहः तोलां झीन्यातका थहावंगु दु। वहः तोलां झीन्यातका थहावना १ हजार १ सय ८५ रुपैयाँ थ्यःगु दु।

येँ महानगरपालिकां वीर अस्पताल न्ह्यने वासः पसः दुगु अस्थायी टहरा हटे याःगु दु। वीर अस्पतालय् सर्जिकल भवनपाखे टाँसे जुयाच्वंगु टहरा व अन च्वंगु पसः हटे याःगु दु।

सर्जिकल भवनया पास जूगु नक्साय् अन बगैंचाया याना तःगु खः। तर, वीर अस्पतालं हटे यायेत स्वंगु इलय् उगु वासः पसःपिन्स पुलागु सम्झौता क्यना हटे जुइ माने मजुगु खः।

तर, महानगरं उगु टहरा नक्सा विपरीत जूगु धासे बुधबाः माइकिङ यासे बिहीबाः न्हिनय् १ बजे तक खाली यायेत अल्टिमेटम बिःगु खः।

थौं बिहीबाः न्हिनय् २ बजे डोजरनाप महानगर प्रहरीं वासः पसः हटे याःगु खः। उगु पसः हटे यायेवं आः वीर अस्पतालय् बिरामी व वया परिवारपिन्स छु भचा सकस जुइ खनेदु।

म्हिगः बुधवाः थहावंगु शेयर बजाः थौं धाःसा हाकन घटे जूगु दु।

शेयर बजाः परिसूचक नेप्से थौं ९ दशमलव ८३ अङ्कं घटे जूया १ हजार ८ सय ३८ दशमलव ९६ विन्दुइ कुहावंगु दु। थौं दक्को समूहया शेयर घटे जूगु दु।

बजाः घटे जुइवं कारोबार रकम न कम जूगु दु। २२९ गु कम्पनीया २५ लाख ४२ हजार कित्ता शेयर ६५ करोड ५७ लाख रुपैयाँ न कारोबार जुगु दु।

दकmय् अप्पो नबिल बैंकया २ करोड ५८ लाख रुपैयाँया शेयर किनबेच जूगु दु। थौं प्रभु डिबेन्चर व गरिमा डिबेन्चर २०८४ या शेयर झन्डै १० प्रतिशतं घटे जूगु दु।

समग्र बजाः कुहावंसा साम्लिङ पावर कम्पनीया शेयर १० प्रतिशतं थहावंगु दु।

येँ महानगरपालिकां वीर अस्पतालया जःखः अनधिकृत संरचना हटे यायेगु सुरु याःगु दु।

अस्पतालया भवननिसे उत्तर पाखे दयका तःगु अनधिकृत संरचना डोजरं हटे यायेगु सुरु याःगु धका महानगरं धाःगु दु।

डोजर चले याये न्ह्यः टहरा हटे यायेत महानगरं सूचं जारी याःगु खः।