थौं असार १ गते निसे मतदाता नामावली संकलन ज्या सुरु जुगु दु।

काठमाडौं जिल्ला प्रशासन कार्यालय मतदाता नामावली संकलन कक्ष स्थापना याना नामावली संकलन यायेत्यःगु खः।

जिल्ला प्रशासन कार्यालय येँ न छगु सूचं जारी यासे येँ जिल्ला बाहेकया नागरिकपिनिगु नां छुटे जुगु दुसा जिल्ला निर्वाचन कार्यालय अनामनगरय् सम्पर्क तयेत इनाप याउगु दु।

येँ पिनेच्वपिन्स न थःगु मतदाता नामावलीइ नां दर्ता याये फइ धका जिल्ला प्रशासन कार्यालयं धाउगु दु।

निर्वाचन आयोगं मतदाता नामावली संकलन व अद्यावधिक ज्या असार १ गतेनिसे सञ्चालन याइगु जुगु दु।

वइगु प्रदेशसभा व प्रतिनिधिसभा सदस्य निर्वाचनया लागि लक्षित यासे आयोगं नामावली संकलन व अद्यावधिक ज्या न्ह्याके त्यःगु खः।

अथेहे मतदातां मतदाता नामावलीइ च्वंगु थःगु नां, थाय्, जन्ममिति लगायतया विवरण भिंकेगु प्रमाण नापं निवेदन बिइमाः धका आयोगं धाउगु दु।

आयोगया कथं मतदातां मखुगु विवरण बिया मतदाता नामावलीइ नां दुथ्याकू मनूया प्रमाण नाप उजुरी बिलकि उगु नां दर्ता अधिकारीं छानबिन याना उगु नां हटे याइ धका धाउगु दु।

पिपुल्स पावर लिमिटेडं आयोजनापाखे असर जुपिन्त स्थानीय बासिन्दाया लागि साधारण सेयर निष्कासन नाप बिक्री खुल्ला याउगु दु।

कम्पनीं वइगु असार ८ गतेनिसे प्रतिकित्ता १०० रुपैयाँया दरं ६ करोड ३२ लाख ६० हजार रुपैयाँ मूल्य बराबरया ६ लाख ३२ हजार ६०० कित्ता प्रारम्भिक सार्वजनिक निष्कासन (आईपीओ) बिक्री खुल्ला याइगु जुगु दु।

कुल निष्कासनमध्ये आयोजनापाखे असर जूपिन्त इलाम जिल्लाया इलाम नगरपालिका–१ व ४ य् च्वपिन्त १ लाख ८९ हजार ७८० कित्ता व उगु वडाबाहेक इलाम जिल्लाय् च्वपिन्त असार २२ गते तक ४ लाख ४२ हजार ८२० कित्ता सेयर खरिदया लागि आवेदन बिइफइगु जुगु दु।

उगु इलय् न मवसा  साउन ५ तक न्यूनतम १० कित्तानिसे अधिकतम ५० हजार कित्ता सेयर खरिदया लागि हाकनः आवेदन बिइ फइ धका सार्वजनिक याउगु आह्वान पत्रय् उल्लेख याउगु दु। कम्पनीं इलाम जिल्लाय् इलाम नगरपालिका–१ व ४ य् पुवा खुसिइ ४.९६ मेगावाट क्षमताया पुवा–२ जलविद्युत् आयोजना निर्माण याउगु खः।

सेयर बजाः थौं न कुहावःगु दु। बजाः २ हजारया बिन्दु न कुहावया १९९६.२६ बिन्दुइ थ्यःगु दु।

मंगलबाः ३६.०७ अंकं घटे जुया सेयर बजाः कारोबार रकम १ अर्ब स्वया अप्पो थ्यःगु दु। २३२ गु कम्पनीया ३१ हजार ८०६ कारोबारं ४१ लाख ४७ हजार २५५ कित्ता सेयर किनबेच जुगु खः।

थौं १ अर्ब १८ करोड ५५ लाख ४६ हजार १७९ रुपैयाँ बराबरया कारोबार जुगु खः। दकलय् अप्पो मेमेगु, निर्जीवन बीमा, वित्त व विकास बैंक समूहया लगानीकर्तापिन्सं गुमे याउगु दु।

आँधिखोला लघुवित्त वित्तीय संस्थाया भाः दकलय् अप्पो ८.१८ प्रतिशतं थहावना ४४८.४० रुपैयाँ थ्यःगु दु। एनएमबी ५० या सेयर ४.१० प्रतिशतं व माउण्टेन हाइड्रोया भाः ३.७२ प्रतिशतं थहावःगु दु। \

हिमालयन पावर पार्टनरया भाः ९.९९ प्रतिशतं कुहावना ३४४.३० रुपैयाँ थ्यःगु दु सा बलेफी हाइड्रोया भाः ८.१५ प्रतिशतं घटे जुया २७४ रुपैयाँ कुहावःगु दु सा शिवम सिमेन्ट थौं दकलय् अप्पो कारोबार जुगु खः।

लुँया भाः थौं तोलां १ हजार ८ सय रुपैयाँ न घटे जुगु दु।

 थौं १ हजार ८ सय रुपैयाँ न कुहावया ९७ हजार १ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाउगु दु।

अथेहे, वहः न तोलां नीतका कुहावंगु दु।

वहः तोलां नीतका कुहावया १ हजार २ सय ४५ रुपैयाँ न कारोवार जुगु दु धका किनबेच महासङ्घं धाउगु दु।