उच्च अदालत यलं येँया हात्तिसारय् बँय् व उकिइ दयका तःगु संरचनाय् क्षति मयासे छु न ज्या मयायेत व मयाकेत येँ महानगरपालिकायात आदेश बिःगु दु।

हात्तिसारय् शारदा मानन्धर, किरण प्रकाश शाख नाप २१ म्ह छेँ थुवाःपिन्स बिःगु  रिटय् सुनुवाई यासे म्हिगः बुधबाः न्यायाधीश किरण पोखरेलया इजलासं उमित जग्गाय् छु न क्षति यायेगु मयायेत अल्पकालिन आदेश बिःगु दु।

उच्च अदालत यलया रजिष्ट्रारया कथं उगु आदेश निरन्तरता बिइगु वा मबिइगु निर्णय असोज २६ गते निगु हे पक्षयात अदालतय् सःतूगु दु। छलफलय् टुकुचा खुसिइ उत्खनन् यायेगु निर्णय सम्बन्धी भ्वँ ज्वना वयेत न धाःगु दु।

नेकपा एमालेया अध्यक्ष केपी शर्मा ओलीं खनालयात थौ पार्टी प्रवेश यायकेगु तयारी दु।

खनालं येँ व तनहुँ छथाय् पाखे चुनाव ल्वायेगु कथं एमालेय् प्रवेश यायेत्यःगु खः। खनाल थ्व स्वया न्ह्यः हे एमाले नाप जूगु धका द्धपः वःगु खः।

वीर अस्पताल न्ह्यने च्वंगु टहराय् च्वंगु वासः पसः हटे याइगु जुगु दु।

येँ महानगरपालिकां फर्मेसी सञ्चालकपिन्त म्हिगः २४ घण्टा दुने वासः पसः हटे यायेत निर्देशन बिःगु दु। तर फार्मेसी सञ्चालकपिन्स याकनं हटे याये फइ मखु धका धाःगु दु।

महानगरया प्रहरी प्रमुख राजु पाण्डे न थौं न्हिनय् १ बजे तक वासः पसः हटे मयासा थःपिन्स हे हटे यायेगु जानकारी बिःगु दु।

उगु वासः पसः हटे यायेगु वीर अस्पतालयात छु न हानि मयायेगु तर नक्सा विपरीत दुगु वासः पसः हटे यायेगु धका धाःगु दु।

कपनय् छखाः छेँय् मिँ च्याना स्वम्ह मनू सीगु दु। राममन्दिर नाप छगु ट्रेकिङ अफिसय् म्हिगः बहनि मिँ च्याःगु खः।

उगु कार्यालयय् दुगु अक्सिजन सिलिण्डर मूया तधःगु क्षति जूगु खः। मिँ च्याना अन स्वम्ह मनू सी गु दु धका जिल्ला प्रहरी परिसर, काठमाडौंया प्रमुखं जानकारी बिःगु दु ।

प्रमुया कथं सीम्हसिया म्हसिका खुले मजुनि। दमकल व सुरक्षाकःमि पिनिगु ग्वाहालि मिँ स्यायेत ताःलागु दु।

नागरिकता विधेयक प्रमाणीकरण मयाउगुलि राष्ट्रपति विद्यादेवी भण्डारीया असंवैधानिक पलाखय् एमालेया शीर्ष नेतापि सूम्क च्वनेगु नीति काःगु दु।

तर, एमालेया भ्रातृ संगठन अनेरास्ववियु व युवा संघका कार्यकर्ता धाःसा राष्ट्रपतिया पक्षय् वयकःया तस्वीर छातीइ टिकां सतकय् कुहावंगु दु।

नेकपा एमाले निकट विद्यार्थी संगठन अनेरास्ववियु व युवा संघ नेपालं राष्ट्रपति भण्डारीया समर्थनय् थौं येँ प्रदर्शन याःगु दु। युवासंघं बानेश्वर–माइतीघर सतकय् प्रदर्शन याःगुलि महेश बस्नेत लगायत एमालेया नेतापिनिगु न ब्बति दुगु खः।