कमल थापा नेतृत्वया राप्रपा नेपालपाखे अलग जुया उद्धव पौडेल व चन्द्रबहादुर गुरूङ राजेन्द्र लिङ्देन नेतृत्वय् राप्रपाय् हे लिहावःगु दु।

निम्हेसित राप्रपा अध्यक्ष लिङ्देनं सोमबाः पार्टीइ लसकुस याउगु दु धका राप्रपाया प्रवक्ता मोहन श्रेष्ठं जानकारी बिउगु दु।

येँ महानगरपालिकाया दकलय् अप्पो मत हया निर्वाचित जुयादीम्ह उपमेयर सुनिता डंगोलं थः च्वनीगु ज्याकुथिइ नेमकार्डय् थःगु नां नेपाःया मौलिक लिपि रंजना लिपि छ्यःम्ह न्हापाम्ह जनप्रतिनिधि जुगु दु।

उपमेयर डंगोल रंजना लिपिया प्रचारप्रसार यायेगु ज्याय् छम्ह न्ह्यलुवाः न जुयादी।

वयकलं नेपाल लिपि गुथिं रंजना लिपिया प्रचारप्रसार यायेगुलि क्यालिजात्राय् सक्रिय जुयाः प्रचारप्रसार यनादीगु खः।

उपमेयर  डंगोलं शपथ तक नेपालभाषां कयादीगु खः।

मिसायात हातपात याउगु द्धपनय् प्रहरीं लुम्बिनी प्रदेशया स्वास्थ राज्यमन्त्री विमला कुमारी खत्री वलीयात नियन्त्रणय् काउगु दु।

तुलसीपुर उपमहानगर–५ य् सब्जिमण्डी बजाः नाप छम्ह मिसाया छेँय् वना ल्हाः तःगु प्रहरीं वयात नियन्त्रणय् कयाउगु धका इलाका प्रहरी कार्यालय तुलसीपुरया प्रहरी निरीक्षक रन्जनबहादुर स्वारं धाउगु दु।

सुथय् करिब ८ बजे उम्ह मिसायात राज्यमन्त्री वलीं हातपात यायेव स्थानीयपिन्स प्रहरीयात खबर याउगु खः। प्रहरी निरीक्षक स्वारं, ‘घटनाबारे बुझे जुयाच्वनागु दु।’ धका धाउगु दु।

ज्यापुन्हियात दकलय् ताः हाकःगु न्हि कथं नेपालय् कायेगु याइ। पश्चिम देशय् जून २१ तारीखयात दकलय् ताःहाकःगु दिं कथं कायेगु याइ।

थौंया दिं यलया मंललया लायकुलिइ विशेष संगीत महोत्सव जुइ। थनिं ४०० दँ न्ह्यः जुजु सिद्धिनर्सिङ मल्लया पालंनिसें यलया लायकूलि संगीत महोत्सव जुया वयाच्वंगु खः।

उगु संगीत महोत्सवय् जुजु सिद्धिनर्सिङ मल्लं चिनातःगु ३२ गु राग हालेगु चलन दु।

थौं सुथंनिसें हे मंगलय् सिद्धिनर्सिङ मल्लया बिलंपौ व श्रीनिवास मल्लया सिंहासन ब्वयाः दाफा भजन हालाः सनिलय् सिंहासन लायकुलिइ हे तययंकिइ।

वागमती प्रदेशय् नेवाः व तामाङ भाषा गुगू कक्षा व झिगू कक्षाय् ऐच्छिक विषय विकल्प भाषा हे अले मेमेगु ब्यागलं कथंया पुचः दयेत माग याःगु दु।

म्हिगः सोमवाः उगु माग सहित ज्ञापन पौं नेवाः देय् दबूया् केन्द्रीय अध्यक्ष पबित्र बज्राचार्यं शिक्षा मन्त्री देवेन्द्र पौडेलयात लःल्हागु दु। मन्त्रालयय् पुलांम्ह राज्यमन्त्री दिलीप महर्जन, दबूया केन्द्रीय न्वकू उमेश स्थापित, स्वनिगः विशेष प्रदेशया अध्यक्ष श्रीकृष्ण महर्जन, दुजः नरेश श्रेष्ठ व विष्णु चित्रकार, विद्या चित्रकार, दिपक तुलाधर, सुजीव बज्राचार्य, तामाङ समुदायपाखें नेपाल तामाङ घेदुङया उपमहासचिव जगत दोङपि उपस्थिति जुगु खः।

उगु ज्ञापन पतिइ नेपाःया संविधान २०७२ या भाग ७ या मौलिक हक व कर्तव्य अन्तर्गत धारा ३१ य् शिक्षा सम्बन्धी हक व कर्तव्यया उपधारा ५ कथं नेपालय् च्वपि प्रत्येक मनू व समुदायपिन्स कानून कथं थःगु मांभाषं शिक्षा कायेगु हक दइ धकाः न्ह्यथनाः तःसां नेपालय् पंचायती शिक्षा नीति २०२८ लादेयानाः माध्यमिक तहया ९ व १० तगिमय् मातृभाषाया विकल्पय् ऐच्छिक कथं गणित व कम्प्युटर विषय तयातःगुलिं उगु विषय तत्काल चिइकेत माग याःगुु खः।

ज्ञापन पौ लःल्हाना कयादीसे मन्त्री पौडेलं नेपाःया संविधानं मातृभाषा शिक्षा ब्वनेदइगु अधिकार प्रत्याभूति जुइधुंकाः शिक्षा ऐन नियमय् वयाच्वंगु व्यवधानयात चिइकाः वनेगु बचं बिसें तत्काल वय्कलं ज्ञापन पतिइ न्ह्यथनातःगु खँ कार्यान्वयन यायेगुु नितिं पाठ्यक्रम विभागया प्रमुखयात तोक आदेश बियादीगु खः।