शहरी विकासमन्त्री रामकुमारी झाँक्री न सिसडोलय् च्वपिनिगु भावनाय् चोट लाउगु गतिविधि जुगुलि माफी फ्वःगु दु।

फोहोर व्यवस्थापनबारे मन्त्रालय छलफल यायेत थौं सुथय् सःतूगु खः।

उगु छलफलय् स्थानीय आन्दोलनकर्ता, धुनवेँसी व ककनीया जनप्रतिनिधिपि नाप सांसदपि भूमि त्रिपाठी, नारायणप्रसाद खतिवडां प्रहरी दमनया विरोध याउगु खः। मन्त्री झाँक्री न धासा आः अन जबर्जस्ती जुइ मखु धका धाउगु खः।

वयकलं धयादीगु दु ‘जिगु खँ, जिगु भनाइप्रति सूयात न चोट लगे जूसा क्षमाप्रार्थी दु।’

स्वनिगःया फोहोर  व्यवस्थापन सम्बन्धय् सहरी विकास मन्त्रालय व स्थानीयपि दथुइ वार्ता क्वचाउगु दु।

वार्ताय् सामान्य छलफल जुक जुगू तर छु न निर्णय जूगु मदु धका मन्त्रालयं धाउगु दु। प्रधानमन्त्री नापं बहनि हाकनं मेगु वार्ताया लागि सःतूगु दु धका बन्चरेडाँडा ल्यान्डफिल साइट प्रभावित क्षेत्र सरोकार समितिया अध्यक्ष श्रीराम ढुंगानां जानकारी बिउगु दु।

सुथय् जुगु वार्ताय् स्थानीय, सहरी विकासमन्त्री रामकुमारी झाँक्री, यल महानगरपालिकाया मेयर चिरिबाबु महर्जनपि नाप सरोकारवाला निकाय सहभागिता दुगु खः।

उच्च अदालत पाटनं यल महानगर–११ शंखमूलय् आवास क्षेत्रमा विद्युतीय शवदाह गृह दयकेगु यल महानगरपालिकाया निर्णय कार्यान्वयन मयायेत आदेश बिउगु दु।

न्यायाधीश टेकप्रसाद ढुंगाना व अमृतबहादुर बस्नेतया मंकाः इजलासं विद्युतीय शवदाह गृह दयकेगु महानगरपालिकाया निर्णय कार्यान्वयन मयायेत बुधबाः महानगरपालिका नाप मेयर चिरिबाबु महर्जन लगायतया नामय् परमादेश जारी याउगु दु। महानगरपालिकां २०७६ साल श्रावण २३ गते वागमती फाँट जग्गा एकीकरण आयोजना दुने विद्युतीय शवदाह दयकेगु दयकेगु निर्णय याउगु खः।

उगु निर्णयया आधारय् २०६७ साल असोज २४ गते बोलपत्र सूचं प्रकाशित याउगु खः। विद्युतीय शवदाह गृह निर्माण ज्या वातावरण संरक्षण ऐन व नियमावली २०७६, नगर विकास ऐनया बर्खिलाप जुगु धासो मणिडोल टोल सुधार समितिपाखे केशव वज्राचार्य न उगु ज्या रोके यायेत २०७८ साल कार्तिकय् रिट दायर याउगु खः। उगु रिटय् अदालतं निवेदकया पक्षय् निर्णय याउगु खः।

रिट निवेदन बिइवं अदालतं २०७८ मंसिर ८ गते तक निर्माण ज्या रोके याउगु खः। महानगरपालिकां विद्युतीय शवदाह दयकेत कित्ता नम्बर १०५७ जग्गा १ रोपनी ३ आना स्थानीय छम्ह मनूयाके न्याउगु खः। निवेदकया पाखे अधिवक्तापि नीना डंगोल, जुजुकाजी महर्जन, सुनील महर्जन, युद्धमान महर्जन, षट्कोण श्रेष्ठ, नरेश श्रेष्ठ, राजु शाक्य, जनकसिंह साउद व अर्जुन महर्जनपिन्स बहस याउगु खः।

अथेहे महानगरपालिकापाखे वरिष्ठ अधिवक्ता शम्भु थापा, अधिवक्ता माधव बाँस्कोटा, खग्रेन्द्रप्रसाद वस्ती, लोकबन्धु पौडेल व प्रवीण नापितलपिन्स बहस याउगु खः।

अथेतु, काठमाडौं उपत्यका जिल्ला विकास प्राधिकरणपाखे ताराकुमार श्रेष्ठ, प्रधानमन्त्री तथा मन्त्रिपरिषद् कार्यालयपाखे  न्यायाधिवक्ता दीपिका गजुरेलं उगु मुुद्दाय् बहस याउगु खः।

येँ महानगरपालिका व सिसडोल बञ्चरेडाँडा–कुँडुले ल्याण्डफिल साइट क्षेत्रय् च्वपि दथुइ १९ बुँदे सहमति जुगु दु।

महानगरपालिका व स्थानीय च्वंपि दथुइ वंगु चान्ह्यः १ बजे सम्पन्न जुगु बैठकय् फोहोर ढुवानी यायेगु ज्या दीर्घकालीनतक चान्ह्यः जक व चान्ह्यःया लागि माःगु मत व लँ दयकेगु निर्माण महानगरपालिकां स्वलाया दुने यायेगु लगायतया सहमति जुगु खः।

सिसडोल व बन्चरे डाँडाय् फोहोर नः मवयेकेत येँ महानगरपालिकां लच्छिया दुने व्यवस्थापन यायेगु, फोहोरं पिहावइगु लिच्चड खुसिइ मछ्वयेत निलाया दुने वैज्ञानिक व्यवस्थापन यायेगु, फोहोर वान्छ्वइगु गाडीं लँय् लिच्चड मवाकं व्यवस्था लच्छिया दुने मिले यायेगु लगायतया सहमति जुगु खः।

नेपाल आयल निगमं इन्धनया भाः हाकन थकाउगु दु।

सरकारं पूर्वाधार कर समायोजन यायेगु निर्णय लिपा लिटरं झीतका थकया इन्धनया भाः निगमं बिहीबाः चान्ह्यनिसे लागु जुइगु कथं थकाउगु दु।

पेट्रोलय् लिटरं च्यातक व मचिकं नाप डिजलय् १२ रुपैयाँ थकानागु दु धका आयल निगमं धाउगु दु।

आ पेट्रोल लिटरं १७८ रुपैयाँ व मचिक नाप डिजलय् १६५ रुपैयाँ थ्यकूगु दु।