वैशाख ३० गते जुइगु स्थानीय तह निर्वाचनय् रुपन्देहीइ च्वंगु खुगु स्थानीय तहया सत्तारुढ दल दथुइ गठबन्धन मजुइगु जुगु दु ।

१६ स्थानीय तहमध्ये जिल्लाय् दक्षिणी भेग लुम्बिनी सांस्कृतिक नगरपालिका नाप मर्चवारी, सम्मरीमाई, कोटहीमाई, मायादेवी व गैडहवाय् याकचा हे चुनाव ल्वाइगु जगु दु धका गठबन्धनय् आवद्ध दल दथुइ सहमति जुगु दु।

उगु पालिकाय् एमाले कमजोर जुगुलि याकचा हे चुनाव ल्वाइगु जुगु दु। थुगु खुगु पालिकामध्ये न्यागु पालिकाय् वंगु निर्वाचनय् जनता समाजवादी पार्टी न त्याकूगु खः।

आः छगु पालिका प्रमुख व उपप्रमुख लोकतान्त्रिक समाजवादी पार्टीइ प्रवेश याउगु खः। जनता समाजवादी पार्टी न दक्षिणी भेगया च्यागु पालिकाय् दाबी याउगुलि दलपि दथुइ सहमति मजुगुलि मित्रवत प्रतिस्पर्धा याना वनेत्यःगु खः।

नेपाली कांग्रेसं केन्द्रीय कार्यसम्पादन समितिया बैठक च्वनेत्यःगु दु।

खुगु महानगरपालिका व ११ उपमहानगरपालिकाया प्रमुख व उपप्रमुखया उम्मेदवारबारे छलफल यायेत बैठक च्वनेत्यःगु खः।

बैठक न्हिनसिया २ बजे पार्टी केन्द्रीय कार्यालय सानेपाय् च्वनेत्यःगु खः। सत्तारुढ गठबन्धनय् महानगरपालिका व नगरपालिकाया भागवण्डाबारे अझ न सहमति जुगु मदुनि।

थुकिया निति केन्द्रीय संयन्त्र हे टुंग्य यायेगु सहमति जुगु दु तर खुगु हे महानगरपालिकाय् मेयर मत्वत्यत कांग्रेस नेतृत्वय् क्वयागु कमिटीइ तधःगु दबाब दु ।

साइकलमैत्री शहर दयकेगु उद्देश्यं यलय् सतक साइकलमैत्री दयकूगु खःसा आः दक्को साइकल लेन अतिक्रमण जुयाच्वंगु दु।

यल महानगरपालिकां यक्को महत्व बिया सातदोबाटो, लगंख्यः, सुन्धारा, पूच्वो, भनिमण्डल, झम्सिख्यः व कुपण्डोलया सतकय् साइकल लेन बालागु व्यवस्था जुगु खनेमदु।

लिपागु इलय् स्वास्थ्य सचेतना व साइकलमैत्री सतक संरचना निर्माण जुइगु भलसा कया तःगु खःसा अथे जुगु खनेमदु। थुकियाना साइकल यात्रीपि निरुत्साही जुगु खनेदु।

नेपाली कांग्रेसया महामन्त्री गगन थापां चुनावी तालमेल यायेगु वा मयायेगु अधिकार स्थानीय कमिटीयात दु धका धयादीगु दु।

बुढानीलकण्ठय् ग्वसाः ग्वंगु पार्टीया छगु ज्याझ्वलय् सम्बोधन यायेगु झ्वलय् महामन्त्री थापां तालमेल यायेगु वा मयायेगु धइगु विषय पार्टीया क्वय् याउगु कमिटीपिन्त स्वतन्त्र दु धका धयादीगु खः।

वयकलं पर्साय् तालमेल मयायेगु व गुल्मीइ तालमेल यायेगु निर्णय जुगु उदाहरण बियादीसे  वयकल धयादीगु दु, ‘पार्टीया निर्णयबारे सू न अलमल जुइ माःगु मदु। स्थानीय तहया पासपिन्स तालमेल यायेगु निर्णय याये दयेमाः वा मयायेगु निर्णय याये दयेमाः।

सूना न लादे याये दइ मखु।’ महामन्त्री थापां नेपाली कांग्रेस याकचा हे चुनाव ल्वाये फु धका धयादीसे दल दथुइ (कम्युनिष्ट) गठबन्धन याना वनेफु व एकता तक याइगु  सम्भावना दुगुलि उकियात रोके यायेत पार्टी न थथे निर्णय याउगु धका धाउगु खः।

बाङ्गमय् शताब्दीपुरुष सत्यमोहन जोशी अस्पताल भर्ना जुयादिगु दु।

शताब्दीपुरुष जोशीया मुत्र प्रणालीइ संक्रमण व मुटुया चालय् गडबडी जुगुलि यलया किस्ट मेडिकल अस्पतालय् म्हिगः भर्ना जुयादीगु खः।

वय्कःया स्वास्थ्य स्थिति सामान्य दुगु धका अस्पतालया निर्देशक डा. सुरज बज्राचार्यं छगु विज्ञप्ती पिथना जानकारी बियादीगु खः।